Jehovah “Mampajanga Olo Tôrotôro Fô”

1. Ino raha tsapan’i Jehovah momba mpanomponany aby io?

JEHOVAH koa fa mizaha mpanomponany ambony tany eto, ino raha hitany? Hitany atsika na ravoravo na malahelo. (Sal. 37:18) Izikoa izy mahita atsika ravoravo manompo izy erakan’ny mety ho vitantsika ndray atsika misy raha mampakivy, ravoravo mare izy amintsika! Vôn̈ono han̈ampy ndreky hankahery atsika koa izy.

2. Ino raha ataon’i Jehovah amin’olo tôrotôro fô, baka iô karakôry hazahoantsika hatsaran̈a baka amy fan̈ampiany?

² Koran̈in’ny Salamo 147:3 fa Jehovah ‘mampajanga bain’olo’ tôrotôro fô. Jehovah iô karaha olo araiky tsara fan̈ahy mikarakara bain’olo maratra fô in̈y. Ke ino raha tôkony hataontsika, baka atsika mahazo hatsaran̈a baka amy fikarakaran̈anany zen̈y? Diniha baka ohatra ty. Izikoa dokotera araiky mitaha olo maratra mare, izy man̈ano erakan’ny vitany. Fa olo marary io koa tsy maintsy man̈araka raha volan̈in’ny dokotera, baka izy janga. Ke amy lahatsoratra ty, atsika hizaha ino raha volan̈in’i Jehovah amy Volan̈anany ao amin’olo kivy, baka iô akôry hataontsika han̈araka torohevitry feno fitiavan̈a amiany atsika.

JEHOVAH MAN̈AMIA TOKY FA ATSIKA TEN̈A VALERA AMINANY

3. Nan̈ino olo sasany mahatsapa karaha tsisy dikany?

³ Maro olo miain̈y amin’ny andrantsika iziôty tsy tia olo. Vokan’izen̈y, irô mety hampijaly olo, na mety han̈ano raha hahavy olo hahatsapa fa tsisy dikany. Ranabavy araiky kahian̈a Helena nivolan̈a: “Zaho be tan̈atin’ny fianakavian̈a tsisy fitiavan̈a. Papako kafiry, baka iô nivolan̈a taminaka isan’andra fa zaho tsisy raha ilàn̈a zaho.” Karaha ataon’i Helen, mety misy olo koa manihitihy anao na mampijaly anao fo, na mety hahavy anao hahatsapa fa tsisy raha ilàn̈a anao, ke mety ho sarotro aminao hatoky fa misy olo ten̈a tia anao.

4. Ino toky amezan’i Jehovah atsika amy Salamo 34:18?

⁴ Nata misy olo mampijaly anao, matokisa fa Jehovah tia anao, aviô anao valera aminany. Izy “marikitry olo tôrotôro fô.” (Vakia Salamo 34:18.) Izikoa anao mahatsapa “kivy mare”, tsarova fa izy nahita toetry tsaranao, ke nitahôminy anao han̈aton̈o izy. (Jaona 6:44) Izy vôn̈ono fo han̈ampy anao, fôtony anao ten̈a valera aminany.

5. Ino raha ianarantsika baka tamy fomba nitondrasan’i Jesosy irô olo niheverin’olo fa tsisy dikany?

⁵ Hahay raha tsapan’i Jehovah atsika, izikoa mandiniky raha nataon’i Jesosy. Hitan’i Jesosy irô olo tsy nasian’olo fôtiny, ke izy tsara fan̈ahy tamindrô. (Mat. 9:9-12) Izikoa fa nisy man̈angy araiky nijaly mare tamin’ny aretin̈inany nikasiky lambanany, fôtony nan̈anten̈a ho janga, Jesosy nankahery izy nohon’izy nanan̈a finoan̈a. (Mar. 5:25-34) Jesosy ten̈a nitovy toetry tamy Babany. (Jaona 14:9) Ke anao matokisa fa anao ten̈a valera amy Jehovah, aviô hitany koa toetry tsaranao, an̈isan’izen̈y finoan̈anao ndreky fitiavanao izy.

6. Ino raha tôkony hataonao izikoa anao mahatsapa tsisy dikany?

⁶ Ino raha tôkony hataonao, izikoa anao mbala mahatsapa tsisy dikany fo? Vakia ndreky saintsain̈a andininy amy Baiboly mivolan̈a fa anao ten̈a valera amy Jehovah.b (Sal. 94:19) Aza mampiran̈a anao amin’olo hafa, baka iô aza mifantoko amy raha tsy vitanao. Jehovah tsy han̈iraka anao han̈ano raha tsy vitanao. (Sal. 103:13, 14) Izikoa anao nijaly baka tamy raha nataon’olo anao taloha tan̈y, aza man̈amelo-ten̈a. Tsy anao baka diso! Tsarova fa Jehovah mbala hitsara lan̈iany olo mampijaly olo, fa han̈ampy lan̈iany olo ampijalin’olo. (1 Pet. 3:12) Karaha zen̈y Sandra. Nisy olo kafiry mare taminany tamin’izy mbala hely. Ho izy: “Isan’andra zaho mangataka amy Jehovah baka hahita irô toetry tsara hitany aminaka.”

7. Akôry mety hampiasantsika raha niain̈antsika taloha amy fanompoan̈a Jehovah?

⁷ Matokisa fa anao mety hampiasain’i Jehovah han̈ampy olo. Anao namezany tombontsoa hiaraka hiasa aminany amin’ny asa fitorian̈a. (1 Kor. 3:9) Moramora aminao koa hahinakinaka olo mijaly, fôtony anao efa niain̈y raha mahazo izy io. Maro raha mety hataonao han̈ampian̈a irô. Helen, araiky nikoran̈intsika in̈y, nisy olo nan̈ampy, baka iô izy nahavita nan̈ampy olo koa. Izy nivolan̈a: “Zaho taloha nahatsapa ‘tsisy dikany’, fa Jehovah nan̈ano raha hahavy zaho hahatsapa fa zaho tiany. Izy koa nampiasa zaho han̈ampy olo.” Helen iziôty ravoravo mare man̈ano mpisava lalan̈a maharitry.

TIAN’I JEHOVAH ATSIKA HAN̈EKY FAMILAN-KELOKONANY

8. Ino toky amezan’i Jehovah atsika amin’ny Isaia 1:18?

⁸ Sasany amy mpanompon’i Jehovah miasaloha mare tamy raha nataondrô taloha tan̈y, na talohan’ny batisandrô na tafaran’izen̈y. Aza adin̈a fa Jehovah ten̈a tia atsika, fôtony namiany Zanany natao vidim-pan̈avotan̈a baka han̈ambilan̈a fahotan̈antsika. Tian’i Jehovah atsika han̈eky kadô namezany io. Atsika koa fa baka ‘nifandamin̈y’c taminany, ten̈a hamela helokontsika izy. (Vakia Isaia 1:18.) Ten̈a mankasitraka Jehovah Babantsika be fitiavan̈a io atsika, fôtony izy man̈adin̈a fahotan̈a vitantsika taloha tan̈y. Izy koa tsy man̈adin̈a ny tsara vitantsika.​—Sal. 103:9, 12; Heb. 6:10.

9. Nan̈ino atsika tôkony hifantoko amy raha mety hataontsika iziôty ndreky amin’ny hoavy fa tsy amy raha taloha tan̈y?

⁹ Izikoa anao mbala miasaloha tamy raha nataonao taloha, mifen̈a amy raha mbala mety hataonao iziôty ndreky amin’ny hoavy. Diniha baka apostoly Paoly. Izy nanen̈iny tamy raha nataony taloha, fôtony izy nan̈enjiky Kristianin̈y. Efa hainy fa Jehovah efa namela helokonany. (1 Tim. 1:12-15) Ke izy ma tsy vôly foeky nan̈amelo-ten̈a tamy raha nataony taloha? Azo antoko fa izy tsy nan̈eky han̈ano zen̈y, karaha ataony tsy nandany fotoan̈a hieritreritry raha nataony tamin’izy mbala Fariseo najain̈y in̈y. (Fil. 3:4-8, 13-15) Fa Paoly nazoto nanompo, aviô nizaha ny amaray fo. Karaha nataon’i Paoly, anao tsy afaka man̈ova raha vitanao taloha. Fa anao mbala afaka midera Jehovah, man̈ano raha mamparavoravo izy, aviô mieritreritry fiain̈ana tsara ampan̈antinainy amin’ny amaray.

10. Izikoa raha nataonao taloha tan̈y nampalahelo olo, ino raha tôkony hataonao?

¹⁰ Fa ino ndraiky raha mety hataonao, izikoa hitanao fa raha nataonao taloha tan̈y nampalahelo olo? Mifen̈a man̈ano ny tsara amindrô. Aboaha amy raha volan̈inao ndreky raha ataonao fa anao ten̈a nanen̈iny nan̈ano izin̈y. (2 Kor. 7:11) Angataha koa Jehovah han̈ampy irô olo aby nalahelo tamy vokatran’ny raha nataonao io. Izy mahavita man̈ampy anarô hiaritry aviô hihavan̈a tsarabe ndraiky.

11. Ino raha ianarantsika baka amy mpaminan̈y Jona? (Zahava koa amy fôn̈ony.)

¹¹ Mangalà leson baka amy raha niain̈anao taloha, aviô ikia Jehovah hampiasa anao amy zay raha tiany hampan̈anaovin̈y anao. Aleva onon̈o mpaminan̈y Jona. Izy nirahin’i Jehovah nandeha ta Ninive, fa izy ndraiky nilefa tan-tany hafa. (Jona 1:1-4, 15-17; 2:7-10) Jehovah nan̈anatra i Jona, ke izy nangala leson baka tamin’ny hadisovan̈a vitany io. Jehovah tsy rivan̈a tamy Jona. Izy mbala nan̈iraka Jona nandeha ta Ninive fo, ke tamin’io Jona direkty nan̈araka volan̈anany. Tsy tamin’ny hadisovan̈a nataony taloha nandifasany jerinany, fa tamy raha nan̈irahan’i Jehovah izy.​—Jona 3:1-3.

JEHOVAH MAMPIASA FAN̈AHY MASIN̈Y HANKAHIREZAN̈A ATSIKA

12. Akôry an̈amezan’i Jehovah atsika fiadan̈ana, izikoa misy raha ratsy nandalo tamy fiain̈anantsika na naty havan̈a? (Filipianina 4:6, 7)

¹² Izikoa misy raha ratsy nandalo tamy fiain̈anantsika na izikoa atsika naty havan̈a, Jehovah mampiasa fan̈ahy masin̈inany hankahirezan̈a atsika. Diniha baka raha niain̈an’i Ron ndreky Carol. Zanakandrô lelahy namono ten̈a. Karaha ty ho irô: “Efa tôjy raha sarotro fo zahay taloha fa araiky ty ten̈a nafy taminay. Tan̈atin’ny andra maro zahay tsy tafandry, ke zahay nivavaka tamy Jehovah fo. Ke zahay ten̈a nahatsapa nahazo fiadan̈anan’ny Zan̈ahary koran̈in’ny Filipianina 4:6, 7.” (Vakia.) Izikoa anao kivy mare baka tamy raha nandalo tamy fiain̈ananao, ambarà mazava amy Jehovah raha tsapanao. Anao mety mikoran̈a aminany matetiky ndreky ela erakan’ny itiavanao izy. (Sal. 86:3; 88:1) Mivavaha matetiky mangataka fan̈ahy masin̈inany. Izy tsy maintsy han̈ampy anao fo.​—Lioka 11:9-13.

13. Akôry ataon’ny fan̈ahy masin̈y man̈ampy atsika hahavita hanompo Jehovah fo ndreky tsy hivadiky? (Efesianina 3:16)

¹³ Anao iziôty ma mandalo fitsapan̈a mare, ke mahatsiaro lany angôvo? Fan̈ahy masin̈y mahavita man̈amia angôvo anao, baka anao hahavita hanompo Jehovah fo ke tsy hivadiky. (Vakia Efesianina 3:16.) Diniha baka tantaran’ny ranabavy araiky, Flora an̈arany. Irô fivadiany efa navy nan̈ano misionera, fa vadiny io baka tiô nivadiky taminany, ke irô nisaraka. Ho Flora: “Zaho nalahelo mare fôtony izy nivadiky taminaka, ke tsisy raha hafa eky tan̈atin’ny jerinaka izikoa tsy izio fo. Nivavaka tamy Jehovah zaho nangataka fan̈ahy masin̈inany, baka zaho hahavita hiaritry. Jehovah nan̈amia zaho raha nilaiko nampajanga zaho ndreky nahavitako niaritry raha tsy ho vitako foeky.” Tsapan’i Flora fa Jehovah nan̈ampy izy baka izy hahavita hatoky Jehovah fo. Aviô natoky koa izy fa Jehovah han̈amia raha jiaby ilainy an̈atin’ny fitsapan̈a io. Ho izy: “Volan̈a amy Salamo 119:32 mikoran̈a tsarabe akôry nataon’i Jehovah nan̈ampy zaho. Karaha ty volan̈iny ao: ‘Tsy mirekireky zaho man̈araka didinao amy fiain̈ananaka, fôtony ataonao malalaka fônaka hidiran’izio ao.’”

14. Akôry ataontsika han̈ambela fan̈ahy masin̈in’i Jehovah hiasa amintsika?

¹⁴ Anao koa fa baka nangataka fan̈ahy masin̈y tamy Jehovah, ino raha tôkony hataonao? Man̈anaova raha hahazahoanao fan̈ahy masin̈y baka amy Jehovah, an̈atin’izen̈y fivorian̈a ndreky fitorian̈a. Finoa hevitrin’i Jehovah sain̈inao, ke vakia isan’andra Baiboly. (Fil. 4:8, 9) Ke anao koa fa mamaky izio, aleva onon̈o tantaran’olo niaritry fitsapan̈a, aviô saintsain̈a akôry nataon’i Jehovah nan̈ampy irô baka irô nahavita niaritry. Sandra araiky nikoran̈intsika taloha tarỳ in̈y nijaly, fôtony nifanohitohy problemo nahazo izy. Ho izy: “Tantaran’i Josefa in̈y ten̈a nankahery zaho mare. Fitsapan̈a ndreky raha tsy rariny navoa Josefa, tsy nambelany hampihen̈y fifandraisany tamy Jehovah.”​—Gen. 39:21-23.

JEHOVAH MAMPIASA MPIARA-MANOMPO HANKAHIREZAN̈A ATSIKA

15. Azôvy mety hankahery atsika, aviô akôry ataondrô man̈ampy atsika? (Zahava koa sary.)

¹⁵ Atsika koa mijaly, irô mpiara-manompo aby io mety “hankahery mare.” (Kol. 4:11) Irô rahalahy ndreky ranabavy aby io an̈isan’ny fomba araiky ampiasain’i Jehovah han̈aboahany fitiavany atsika. Irô mahavita mankahery atsika, ke irô mahinakinaka mitandren̈y atsika tsarabe. Ndray faviandrô amintsika iô fo efa mankahery atsika edy. Irô koa mety mampiasa andininy hankahirezan̈a atsika, na mivavaka miaraka amintsika.d (Rom. 15:4) Ndraikindraiky rahalahy na ranabavy araiky mety hampatsiaro atsika fomba fihevitrin’i Jehovah, aviô han̈ampy atsika hahavita hiaritry fo. Irô Kristianin̈y namantsika aby io koa mety mizaha hevitry han̈ampian̈a atsika fo, ke ndraikindraiky aby irô man̈amia hanin̈y atsika.

16. Ino raha mila ataontsika baka atsika hahazo fan̈ampian̈a baka amin’olo?

¹⁶ Fa ndraikindraiky atsika koa mba mila mivolan̈a, izikoa misy raha mila han̈ampian̈a atsika. Irô rahalahintsika ndreky ranabavintsika aby io ten̈a tia atsika ndreky tihan̈ampy atsika. (Ohab. 17:17) Fa mety tsy haindrô akôry raha tsapantsika ndreky ino raha ilaintsika. (Ohab. 14:10) Ke izikoa anao fa kivy mare, volàn̈a amindrô kamaradinao matotro aby io raha tsapanao, ndreky fan̈ampian̈a tadiavinao. Anao koa mety hifidy hikoran̈a amin’ny anti-pan̈ahy araiky na aroe man̈avanan̈a anao. Ranabavy sasany ndraiky mahita fa ten̈a mankahery mikoran̈a amy ranabavy araiky matotro.

17. Ino aby raha mety hisakana atsika tsy hahazo fankahirezan̈a, aviô akôry hataontsika handresy irô io?

¹⁷ Aza mitokantokana. Atsika koa fa kivy mare in̈y, mety hahinihiny atsika ke tsy tihikoran̈a amin’olo foeky. Matetiky baka irô rahalahy ndreky ranabavy aby io tsy ten̈a mahay raha mahazo atsika ndreky raha tsapantsika. (Jak. 3:2) Fa kanefa, aza milefalefa irô, fôtony Jehovah mety hampiasa irô io hankahery anao. Misy anti-pan̈ahy araiky Gavin an̈arany. Izy efa navy kivy mare. Ho izy: “Natetiky zaho tsy tihikoran̈a ndreky tsy tihiaraka tamy kamaradiko foeky.” Fa izy tsy nan̈eky resin’ny fihetseham-pônany, ke izy nifen̈y fo niaraka tamindrô. Ke nahatsiaro nahivankivan̈a izy izikoa fa nan̈ano zen̈y. Misy ranabavy araiky koa, Amy an̈arany, nivolan̈a: “Sarotro taminaka natoky olo, baka tamy raha navoa zaho taloha. Fa zaho baka tiô nianatra ho tia ndreky hatoky irô ranadahy ndreky rahavavy aby io, karaha ataon’i Jehovah matoky irô koa. Haiko fa mamparavoravo Jehovah raha zen̈y, aviô mamparavoravo zaho koa.”

MANKAHERY ATSIKA FAMPAN̈ANTINAN̈AN’I JEHOVAH MOMBA NY AMARAY

18. Ino raha antinaintsika amin’ny amaray, aviô ino raha tôkony hataontsika iziôty?

¹⁸ Teteky iô, Jehovah han̈adoso hakivian̈a ndreky tehotehoko mahazo atsika. (Apok. 21:3, 4) Amy zen̈y, “tsy ho azo onon̈o eky” raha jiaby nampalahelo atsika in̈y. (Isaia 65:17) Hitantsika tiô fa Jehovah efa ‘mampajanga baintsika’, ndray iziôty. Ke araraota fomba jiaby ataon’i Jehovah hankahirezan̈a anao ndreky hampahivankivan̈a anao. Aza misalasala foeky fa “izy mikarakara anao.”​—1 Pet. 5:7.