Akôry Ataon’i Jehovah Man̈ampy Atsika Hiaritry?

1. Nan̈ino atsika mila miaritry, aviô azôvy han̈ampy atsika? (1 Petera 5:10)

NDRAIKINDRAIKY sarotro amintsika miaritry, fôtony atsika jiaby manompo Jehovah samy tôjy raha sarotro isan-karazany. Sasany amintsika efa ela nararian̈a. Sasany naty havan̈a. Fa sasany ndraiky miatriky fanoheran̈a, na izio baka amin’ny havandrô, na baka amy fanjakan̈a. (Mat. 10:18, 36, 37) Matokisa fa na ino raha sarotro atrefinao, Jehovah mahavita man̈ampy anao hiaritry fo.​—Vakia 1 Petera 5:10.

2. Baka amin-jôvy mahavy atsika mahavita miaritry?

² Dikan’ny miaritry zen̈y, tsy mivadiky amy Jehovah ndreky manan̈a fan̈antinan̈a fo, nata iô raha maro sarotro mahazo atsika, karaha ataon’ny fan̈injehan̈a, problemo na fakam-pan̈ahy. Jehovah zaraiky fo mahavita man̈ampy atsika hiaritry, fôtony izy mahavita man̈amia atsika “angôvo mihoatran’ny mahazatra.” (2 Kor. 4:7) Amy lahatsoratra ty atsika handiniky raha efatra namezan’i Jehovah atsika, han̈ampian̈a atsika hiaritry. Hizahavantsika koa akôry hazahoantsika hatsaran̈a baka amy tsiaraikiaraiky amindrô io.

VAVAKA

3. Nan̈ino atsika mivolan̈a fa fahagagan̈a vavaka io?

³ Misy raha mahagaga nataon’i Jehovah, baka han̈ampian̈a atsika hiaritry. Nataony mahavita mikoran̈a aminany atsika, nata mbala mpanota. (Heb. 4:16) Diniha baka ty: Atsika mety mivavaka amy Jehovah, amy lera jiaby ndreky mikoran̈a zay raha tiantsika. Ren̈iny fo nata ino volan̈a ampiasaintsika, na aia tany misy atsika, nata atsika asintaka, aviô nata gadrain̈y. (Jona 2:1, 2; Asa. 16:25, 26) Izikoa atsika lôso kivy mare, ke tsy haintsika fomba hivolan̈ana aminany raha mahazo atsika, mbala hain’i Jehovah fo raha tiantsika koran̈iny. (Rom. 8:26, 27) Ten̈a fahagagan̈a ankitin̈y vavaka io!

4. Nan̈ino ma atsika afaka mivolan̈a fa mifan̈araka amy sitrapôn’i Jehovah, izikoa atsika mivavaka baka hahavita hiaritry?

⁴ Amy Volan̈anany ao, Jehovah man̈amia toky atsika fa “zay raha angatahintsika aminany, ke mifan̈araka amy sitrapônany, izy mitandren̈y atsika.” (1 Jaona 5:14) Atsika ma mety mangataka Jehovah han̈ampy atsika hiaritry? Ia! Man̈ano zen̈y atsika, fôtony fiaretan̈a io an̈isan’ny raha mifan̈araka amy sitrapônany. Nan̈ino ma atsika mivolan̈a zen̈y? Izikoa atsika miaritry raha sarotro, izy afaka mamaly Satana Devoly, mpankaratsy izy io. (Ohab. 27:11) Sôsoko zen̈y koa, Baiboly mivolan̈a fa Jehovah ‘tihan̈aboaka angôvonany han̈avotan̈a olo tsy miala aminany amy fô jiaby.’ (2 Tan. 16:9, l.p.a.) Ke atsika afaka matoky fa Jehovah manan̈a angôvo han̈ampian̈a atsika ndreky tihan̈ampy atsika hiaritry.​—Isaia 30:18; 41:10; Lioka 11:13.

5. Akôry han̈ampian’ny vavaka atsika hilamin-tsain̈y? (Isaia 26:3)

⁵ Baiboly mivolan̈a fa izikoa atsika mivavaka momba asalohantsika, ‘fiadan̈anan’ny Zan̈ahary mihoatran’ny raha jiaby takatran’ny jerin’olombelon̈o hiambin̈y fôntsika ndreky sain̈intsika.’ (Fil. 4:7) Diniha baka dikan’izen̈y. Ohatra, olo sasany koa fa miatriky raha sarotro, samby isany raha ataondrô, baka hampilamin̈y jerindrô. Ohatra, sasany amindrô man̈ano meditation. Adosondrô raha jiaby an̈atin’ny jerindrô, baka irô tsy hiasaloha eky. Fa fan̈afoan̈ana jery zen̈y faran-draha mandrobaka fifandraisan̈a amy Jehovah eky. (Ampiràn̈a amy Matio 12:43-45.) Aviô koa, filaminan-tsain̈y azondrô baka amizio, tsy honohono ho mira fiadanan̈a azontsika baka amy Jehovah. Olo milampy aminany fo mahazo fiadan̈ana karaha zen̈y. Izikoa atsika mivavaka amy Jehovah, aboakantsika amy zen̈y fa atsika matoky izy tsarabe, ke ‘hampiadan̈iny fo’ atsika. (Vakia Isaia 26:3.) Fomba araiky an̈anaovan’i Jehovah zen̈y, izy man̈ampy atsika hahazo onon̈o irô fahamarin̈ana feno toky nianarantsika baka tamy Volan̈anany. Fahamarin̈ana aby io han̈ampy atsika tsy han̈adin̈a fa izy ten̈a tia atsika, ndreky tihan̈ampy atsika, ke raha zen̈y hampilamin̈y sain̈intsika.​—Sal. 62:1, 2.

6. Ino raha mety hampidirinao amy vavakanao? (Zahava koa sary.)

⁶ Ino raha mila ataonao? Izikoa anao misy problemo, “apitraha amy Jehovah zay raha mampavesatra anao”, ke mivavaha baka hahazo fiadan̈ananany. (Sal. 55:22) Mivavaha koa baka mahazo fahendrena ilainao, misy hahaizanao raha tôkony hatao. (Ohab. 2:10, 11) Mivavaha baka hahavita hiaritry, fa aza adin̈a koa man̈ano mersy Jehovah. (Fil. 4:6) Iritrireta fomba an̈ampiany anao hiaritry isan’andra, ke ataova mersy izy. Nata anao mijaly baka amy fitsapan̈a mahazo anao, aza adin̈a irô fomba maro efa nan̈ampian’i Jehovah anao.​—Sal. 16:5, 6.

VOLAN̈A ZAN̈AHARY

7. Akôry ataon’ny fianaran̈a Baiboly han̈ampy anao hiaritry?

⁷ Jehovah nan̈amia atsika Volan̈anany han̈ampiany atsika hiaritry. Amy Baiboly ao misy andininy maro, man̈amia toky atsika fa Jehovah manohan̈a atsika. Diniha ohatra araiky ty. Amy Matio 6:8 mivolan̈a: “Ndray anarô mbala tsendriky mangataka raha amy Babanarô an-dan̈itry an̈y, efa hainy raha ilainarô.” Volan̈an’i Jesosy izio. Tsisy olo mahay Jehovah mandilatra izy. Ke matoky tsarabe atsika fa izikoa atsika fa mijaly, Jehovah mahay raha ilaintsika, aviô izy han̈ampy atsika. Amy Baiboly ao feno fampan̈antinan̈a baka amy Jehovah, man̈amia atsika angôvo ilaintsika hahavitantsika hiaritry raha sarotro.​—Sal. 94:19.

8. a) Ino torolalan̈an’ny Baiboly araiky man̈ampy atsika hiaritry? b) Ino han̈ampy atsika hahazo onon̈o torolalan̈an’ny Baiboly, amy fotoan̈a ilavantsika izy?

⁸ Baiboly man̈amia atsika torohevitry han̈ampy atsika hiaritry. Torohevitry aby zen̈y hazahoantsika fahendrena ilaintsika, baka atsika han̈ano fanapahan-kevitry mety tsara. (Ohab. 2:6, 7) Ohatra, Baiboly mandrisiky atsika tsy hiasaloha momba ny amaray, fa hilampy amy Jehovah fo isan’andra. (Mat. 6:34) Izikoa atsika zatra mamaky Baiboly ndreky misaintsain̈y raha vakintsika, ho mora amintsika hahazo onon̈o torohevitrin’ny Baiboly, amy fotoan̈a ilantsika izy.

9. Ino vokany, izikoa atsika mamaky tantaran’olo amy Baiboly ao ke nampian’i Jehovah?

⁹ Amy Baiboly ao koa misy tantaran’olo maro natoky Jehovah sady nampiany. (Heb. 11:32-34; Jak. 5:17) Izikoa atsika misaintsain̈y irô tantara aby io, hahaihitombo fo fatokisantsika fa Jehovah io “fialofantsika ndreky angôvontsika. Izy vôn̈ono han̈ampy amy fotoan̈a sarotro.” (Sal. 46:1) Izikoa atsika mieritreritry karakôry nan̈aboahan’ny mpanompon’i Jehovah taloha tan̈y fa irô nanan̈a finoan̈a ndreky niaritry, lôso tihangala tahaka irô koa atsika.​—Jak. 5:10, 11.

10. Ino raha tôkony hataonao, baka Baiboly han̈ampy anao tsarabe?

¹⁰ Ino raha mila ataonao? Mamakia Baiboly isan’andra, aviô ataova listy irô andininy aby hitanao ten̈a man̈ampy. Maro koa olo mamaky andininy ndreky fan̈azavan̈a izio amy Fandinihana ny Soratra Masina Isan’andro, isaka maraindrain̈y, ke zen̈y man̈ampy irô hisaintsain̈y raha volan̈in’ny Baiboly io an̈atin’ny andra araiky. Ranabavy Mariea nahita tsarabe fahamarin̈an’ny raha zen̈y, tamin’izy nikarakara raimandreninany navoa kansera. Ino ma raha nan̈ampy izy niaritry, tamy fanjava faramparany nikarakarany irô? Ho Marie: “Isaka maraindrain̈y, zaho mamaky ndreky misaintsain̈y fan̈azavan̈a andininy amy Fandinihana ny Soratra Masina Isan’andro. Raha zen̈y nan̈ampy zaho nifantoko tamy raha ten̈a maventy fa tsy taminaka ndreky problemo nahazo zaho.”​—Sal. 61:2.

MPIARA-MANOMPO

11. Nan̈ino mankahery atsika fahaizan̈a fa tsy atsika zaraiky fo miaritry raha sarotro?

¹¹ Jehovah man̈amia atsika rahalahy ndreky ranabavy eran-tany, han̈ampian̈a atsika hiaritry. Fahaizantsika fa ‘rahalahintsika amy tany jiaby koa mba mijaly fa tsy atsika zaraiky fo’, man̈amia toky atsika fa atsika tsy latsatokana. (1 Pet. 5:9) Ke lôso matoky atsika fa na ino raha sarotro tôjy atsika, misy olo hafa koa mba tôjy raha mira zen̈y, aviô irô nahavita niaritry. Dikan’izen̈y atsika koa mba hahavita hiaritry.​—Asa. 14:22.

12. Akôry ataon’ny mpiara-manompo man̈ampy atsika, aviô ino raha mety hataontsika amindrô? (2 Korintianina 1:3, 4)

¹² Baka hahavitantsika hiaritry, irô rahalahy ndreky ranabavintsika aby io mankahery atsika. Hain’ny apostoly Paoly tsarabe raha zen̈y. Tamy taratasinany izy nanon̈ono an̈aran’olo aby nan̈ampy izy ndreky nan̈ano mersy irô. Nankahery Paoly irô ndreky nan̈amia raha nilainy. (Fil. 2:25, 29, 30; Kol. 4:10, 11) Amy ziôty koa, izikoa atsika mila fan̈ampian̈a, irô rahalahy ndreky ranabavintsika aby io vôn̈ono han̈ampy atsika. Fa lera irô mila fan̈ampian̈a koa, atsika koa vôn̈ono han̈ampy irô!​—Vakia 2 Korintianina 1:3, 4.

13. Ino raha nan̈ampy ranabavy Maya niaritry?

¹³ Nan̈ampy mare ranabavy Maya baka a Rosia, irô rahalahintsika aby io. Nisavain’ny polisy tran̈onany tamin’ny 2020, aviô tafaran’izin̈y izy nigidrigidraindrô koa, fôtony izy nikoran̈a tamin’olo raha ninoany. Ho izy: “Tan̈atin’ny fotoan̈a aby zen̈y zaho kivy mare. Irô ranadahy ndreky rahavavy aby io nikaiky zaho tamy telefony ndreky nanoratra taratasy, nan̈amezan̈a toky zaho fa zaho tiandrô ndreky efa mira havandrô in̈y. Efa haiko fo taloha fa zaho misy havan̈a maro sady ten̈a tia zaho. Fa tamin’ny 2020 in̈y ten̈a nahatsapako raha zen̈y.”

14. Ino raha tôkony hataontsika baka atsika hahazo hatsaran̈a baka amy fan̈ampian’ny mpiara-manompo? (Zahava koa sary.)

¹⁴ Ino raha mila ataonao? Izikoa anao fa miatriky raha sarotro, mipitaha marikitry amindrô rahalahy ndreky ranabavy aby io. Aza mavozo mangataka fan̈ampian̈a amin’ny anti-pan̈ahy aby io. Irô io “fialofan̈a amy tsiko, ndreky amy mahalen̈y miaraka difi-baratra.” (Isaia 32:2) Aza adin̈a koa fa irô mpiara-manompo aby io mba miaritry raha sarotro. Ke izikoa anao man̈ampy olo sahiran̈a, zen̈y han̈ampy anao hahavita hiaritry ninao ndreky hahairavoravo fo.​—Asa. 20:35.

FAN̈ANTINAN̈A

15. Akôry ataon’ny fan̈antinan̈a nan̈ampy Jesosy ndreky man̈ampy atsika koa? (Hebreo 12:2)

¹⁵ Jehovah nan̈amia atsika fan̈antinan̈a azo antoko, han̈ampian̈a atsika hiaritry. (Rom. 15:13) Aleva onon̈o baka Jesosy niaritry raha faran’ny sarotro, tamin’izy tambony tany teto. Nan̈ampy izy tamy zen̈y fan̈antinan̈a io. (Vakia Hebreo 12:2.) Hain’i Jesosy fa izikoa izy tsy mivadiky, aboakany amy zen̈y fa tsy marin̈y vandy jiaby nivolan̈in’i Satana momba Jehovah, aviô Jehovah zaraiky fo man̈eva hamian̈a voninahitry. Jesosy koa nan̈anten̈a fa izy mbala himpody amy Babany an-dan̈itry an̈y, aviô izy hiaraka hanjaka amindrô rahalahiny voahosotro aby io. Karaha zen̈y koa atsika. Fan̈antinan̈a hiain̈y tsisy farany amy donia vaovaon’ny Zan̈ahary io han̈ampy atsika hiaritry zay raha sarotro tôjy atsika amy donian’i Satana ty.

16. Akôry ataon’ny fan̈antinan̈a io nan̈ampy ranabavy araiky, aviô ino raha ianaranao baka tamy raha nivolan̈iny?

¹⁶ Diniha baka akôry nataon’ny fan̈antinan̈a io nan̈ampy ranabavy Alla, a Rosia an̈y. Vadiny nisambôrin’ny polisy, aviô nitanandrô tan̈y miambin̈y fitsaran̈a izy. Tamy zen̈y, karaha ty ho Alla: “Vavaka nataoko momba fan̈antinan̈antsika io ndreky fisaintsain̈ako izio, nahavy zaho tsy ho kivy loatra. Haiko baka fa mbala ho hisy farany fo raha sarotro aby io. Jehovah handresy, ke atsika koa tsy maintsy handresy.”

17. Akôry han̈aboahantsika fa atsika mankasitraka fan̈antinan̈a namezan’i Jehovah atsika? (Zahava koa sary.)

¹⁷ Ino raha mila ataonao? Mangalà fotoan̈a himiniminen̈a raha tsara hataon’i Jehovah amin’ny amaray io. Ataova karaha efa amy donia vaovao in̈y anao, ke diniha raha maro tsara ho azonao amy zen̈y. Aviô lan̈iany fitsapan̈a jiaby hatrefintsika iziôty io amy zen̈y ho nira raha ‘nielan̈a ndreky nahivan̈a fo.’ (2 Kor. 4:17) Aviô koa, man̈anaova erakan’ny efanao, han̈ambaran̈a finoan̈anao amin’olo. Aza adin̈a fa ten̈a sahiran̈a irô olo aby tsy manompo Jehovah aby io. Maro problemondrô, fa irô tsy mahay raha maro tsara ampan̈antinain’i Jehovah. Ke ndray raha hely fo koran̈inao amindrô, efa mety hankahery irô edy, ke hahavy irô tihahay Fanjakan̈an’ny Zan̈ahary ndreky fampan̈antinan̈anany.

18. Nan̈ino atsika matoky fampan̈antinan̈an’i Jehovah?

¹⁸ Joba koa fa nahavita niaritry fitsapan̈a maro, karaha ty nivolan̈iny tamy Jehovah: “Haiko eky iziô fa mahay man̈ano raha jiaby anao. Tsisy tsy vitanao zay raha iritriretinao hatao.” (Joba 42:2) Hitan’i Joba fa tsisy raha mahasakana Jehovah tsy han̈atanteraka fikasan̈anany. Fahaizantsika raha zen̈y man̈ampy atsika hiaritry. Izio karaha man̈angy araiky marary kivy mare, fôtony maro dokotera efa nandihanany fa tsisy nahajanga izy. Fa izy baka tiô nahita dokotera mahay sady atokisan̈a tsarabe. Nambaran’ny dokotera io izy ten̈a problemonany, aviô nazavainy koa fitahan̈a handeha hataony aminany. Man̈angy io koa fa naharen̈y zen̈y, nahatsiaro nahivankivan̈a izy, nata mbala elaela izy vo janga. Mahavita miaritry izy, fôtony izy man̈anten̈a fa mbala ho janga. Karaha zen̈y koa atsika. Fatokisantsika fampan̈antinan̈a Paradisa ho avy io man̈ampy atsika hiaritry.

19. Mila man̈ino atsika baka mahavita miaritry?

¹⁹ Hitantsika tato fa Jehovah man̈ampy atsika hiaritry fitsapan̈a maro ke mampiasa vavaka, Volan̈anany, mpiara-manompo ndreky fan̈antinan̈antsika. Izikoa atsika mampiasa tsarabe irô raha aby io, izy man̈ampy atsika hahavita hiaritry zay raha sarotro mety mbala hatrefintsika, mandra-pavian’ny andra tsy hisian’ny donian’i Satana eky.​—Fil. 4:13.