Aleva Tahaka Fomba Fisain̈an’i Jehovah Ndreky Nin’i Jesosy

1-2. Karakôry ma tia Jehovah zen̈y, baka iô, karakôry nan̈aboahan’i Jesosy fa izy tia Jehovah tamy jerinany jiaby?

“TIAVA Jehovah Zan̈aharinao amy fônao jiaby ndreky amy vatan̈anao jiaby ndreky amin’ny angôvonao jiaby ndreky amy jerinao jiaby.” (Lioka 10:27) Hain’i Jesosy fa io didy ten̈a maventy tamy Lalàn̈an’i Mosesy. Aleva onon̈o fa atsika mila tia Jehovah amy fôntsika jiaby, tafiditry amy zen̈y fan̈irian̈antsika, fihetseham-pôntsika, ndreky toetrintsika. Atsika koa mila tia Jehovah amy vatan̈antsika jiaby ndreky amin’ny angôvontsika jiaby. Fa tafiditry amizio koa fampiasan̈a jerintsika, an̈atin’izen̈y fomba fieritreretantsika raha araiky. Marin̈y ndraiky fa tsy ho takantsika fomba fisain̈an’i Jehovah momba raha jiaby. Fa atsika ho lôso hahay fomba fisain̈any, izikoa atsika mianatra momba “sain̈in’i Kristy”, fôtony Jesosy ten̈a nangala tahaka fomba fisain̈an’ny Babany.​—1 Kor. 2:16.

² Jesosy tia Jehovah tamy jerinany jiaby. Efa hain’i Jesosy sitrapôn’ny Zan̈ahary, baka iô izy efa tapa-kevitry han̈ano izio nata izy tsy maintsy hijaly, baka amy zen̈y. Izy nifantoko tamy fan̈anaovan̈a sitrapôn’ny Babany fo, baka iô tsisy raha nambelany hisakana izy tsy hahavita zen̈y.

3. Ino raha nianaran’ny apostoly Petera tamy Jesosy, baka iô ino raha nampirisihin’i Petera hataondrô Kristianin̈y aby io? (1 Petera 4:1)

³ Petera ndreky irô apostoly namany aby io nanan̈a tombontsoa niaraka tamy Jesosy ndreky nanan̈a fomba fisain̈ananany. Petera koa fa nanoratra taratasinany voanalohany, izy nandrisiky irô Kristianin̈y aby io han̈ano raha hanan̈ana toe-tsain̈y karaha nin’i Kristy.a (Vakia 1 Petera 4:1.) Tamy Petera nanoratra “ataova raha” io, izy nampiasa fivolan̈ana fampiasain’ny maramila, lera irô irahan̈a misikiny fitaovan̈a jiaby, alohan’ny handeha hiady. Ke izikoa Kristianin̈y mangala tahaka toe-tsain̈in’i Jesosy, na fomba fisain̈any, irô hanan̈a raha jiaby ilain̈a hahavitan̈a miady amy fan̈irian̈a han̈ano raha ratsy ndreky donia indesin’i Satana ty.​—2 Kor. 10:3-5; Efes. 6:12.

4. Nan̈ino lahatsoratra ty han̈ampy atsika han̈araka torohevitrin’i Petera?

⁴ Atsika handiniky fomba fisain̈an’i Jesosy, baka iô akôry hangalantsika tahaka zen̈y. Hizahavantsika karakôry: 1) hangalantsika tahaka fomba fisain̈an’i Jehovah, fôtony raha zen̈y hahavy atsika jiaby hifan̈araka hevitry, 2) hanetry ten̈a, aviô 3) hisain̈y tsarabe ke hilampy amy Jehovah amy vavaka.

ALEVA TAHAKA FOMBA FISAIN̈AN’I JEHOVAH

5. Nan̈ino Petera tandraraiky tsy nahavita nan̈araka fomba fisain̈an’i Jehovah?

⁵ Petera tandraraiky tsy nahavita nangala tahaka fomba fisain̈an’i Jehovah. Nivolan̈a tamin’ny apostolinany aby io baka Jesosy fa izy handeha a Jerosalema, ke an̈y izy hisamborindrô mpitariky fivavahan̈a aby io, hiaritry fampijalian̈a, baka iô hivonen̈a. (Mat. 16:21) Mety sarotro tamy Petera foeky hino fa Jehovah han̈ambela Jesosy hivonen̈a zen̈y. Nan̈ino? Fôtony Jesosy Mesia Nampan̈antinain̈y ndreky han̈avotro vahoakan’ny Zan̈ahary. (Mat. 16:16) Ke Jesosy nindesin’i Petera nitokana hely, baka iô nivolan̈iny karaha ty: “A Tômpo, anao mba mahaiza tsara fan̈ahy amin’ny ain̈inao. Raha zen̈y tsy havoa anao foeky.” (Mat. 16:22) Petera tsy nangala tahaka fomba fisain̈an’i Jehovah, ke izy tsy nitovy hevitry tamy Jesosy.

6. Karakôry nan̈aboahan’i Jesosy fa izy nangala tahaka fomba fisain̈an’i Jehovah?

⁶ Jesosy nahay tsarabe fomba fisain̈an’ny Babany, ke izio nalainy tahaka tsarabe koa. Ho izy tamy Petera: “Mandihana an̈y anao Satana! Anao raha tihampivadiky zaho fo, fôtony fomba fisain̈ananao tsy fomba fisain̈anan’ny Zan̈ahary fa nin’olombelon̈o.” (Mat. 16:23) Petera nety tihan̈ampy Jesosy, fa Jesosy tsy nan̈araka raha nivolan̈iny. Hain’i Jesosy baka fa izy tsy maintsy hijaly ndreky hofoaty. Nianaran’i Petera baka tamy zen̈y fa izy nila nangala tahaka fomba fisain̈an’ny Zan̈ahary. Ten̈a raha maventy koa hangalantsika onon̈o zen̈y.

7. Karakôry nan̈aboahan’i Petera tafara tatỳ fa izy nangala tahaka fomba fisain̈an’i Jehovah? (Zahava koa sary.)

⁷ Koa fa nandeha fotoan̈a, naboakan’i Petera fa izy nianatra nangala tahaka fomba fisain̈an’i Jehovah. Efa leran’i Jehovah tamy zen̈y hampiditry hafa firenena ho an̈isan’ny vahoakanany. Ke Petera nirahiny hitory tamy Kornelio, olo hafa firenena voanalohany nanjary Kristianin̈y. Irô Jiosy aby io tamy zen̈y tsy dia nifandray tamin’olo hafa firenena. Ke Petera nila nan̈ova toe-tsain̈inany baka izy nahavita nitory tamin’olo hafa firenena. Ke izikoa fa hainy sitrapôn’ny Zan̈ahary momba irô io, izy nan̈ova toe-tsain̈inany. Ke izy koa fa nirahin̈y nandeha tan̈y, izy “tsy nisalasala foeky” nandeha. (Asa. 10:28, 29) Izy nitory tamy Kornelio ndreky tamin’olo jiaby tan-tran̈onany tao, baka iô irô jiaby natao batisa.​—Asa. 10:21-23, 34, 35, 44-48.

8. Akôry han̈aboahantsika fa fomba fisain̈anantsika mifan̈araka amy fomba fisain̈an’i Jehovah? (1 Petera 3:8 ndreky lamariky amy pazy ambany.)

⁸ Taon̈o maro tafara, Petera nandrisiky irô Kristianin̈y aby io ‘hifen̈y hifan̈ara-tsain̈y.’ (Vakia 1 Petera 3:8 ndreky lamariky amy pazy ambany.) Mifan̈ara-tsain̈y atsika Vavolombelon̈on’i Jehovah, izikoa mangala tahaka fomba fisain̈an’i Jehovah ambarany an̈atin’ny Baiboly ao. Ohatra, Jesosy nandrisiky irô mpan̈ara-dia izy aby io han̈ano Fanjakan̈an’ny Zan̈ahary ho raha ten̈a maventy amy fiain̈anandrô. (Mat. 6:33) Fangalan̈a onon̈o raha zen̈y mety hahavy mpitory araiky amy tany misy anao, hanapa-kevitry han̈ano mpisava lalan̈a na karazan̈a fanompoan̈a manontolo andra hafa. Ke atsika tsy tôkony handrisiky izy ho tsara fan̈ahy amin’ny ain̈inany, fa hifen̈y hikoran̈a raha tsara momba tanjon̈onany io, ndreky hanohan̈a izy.

MIFEN̈A HANETRY TEN̈A

9-10. Akôry nan̈aboahan’i Jesosy fa izy ten̈a nanetry ten̈a?

⁹ Alin̈y talohan’ny namonoan̈a Jesosy, izy nampianatra Petera ndreky apostoly jiaby fa ten̈a ilain̈a manetry ten̈a. Taloha helin’izen̈y, Jesosy nan̈iraka Petera ndreky Jaona handeha han̈oman̈a hanin̈y farany hiarahan’i Jesosy mihina tamindrô, talohan’ny hifatesany. An̈isan’ny raha nataondrô pare tamy zen̈y kovety ndreky serviety maromaro hanasan̈a vitin’ny vahiny, alohan’ny irô hihinan̈a. Fa azôvy hahavita hanetry ten̈a ke hanasa vitin’olo jiaby?

¹⁰ Jesosy tsy nisalasala foeky nan̈ano asa io. Naboakany fa izy ten̈a nanetry ten̈a. Ke gaga mare irô apostolinany aby io. Asa tôkony hataon’olo mpanompo baka nataony io. Ke nadoson’i Jesosy lambanany ambelan̈a, baka iô izy nangala serviety araiky nifiheziny tamin’ny andilan̈anany. Aviô nataony rano tamy kovety, ke izy nanomboko nanasa vitindrô. (Jaona 13:4, 5) Nety elaela izio vo vita, fôtony apostolinany io 12, tan̈atin’izen̈y Jodasy, olo handeha hamadiky izy. Jesosy baka tiô amy zay nahari-draha nan̈azava karaha ty tamindrô: “Hainarô dikan’ny raha nataoko taminarô tiô in̈y? Anarô mikaiky zaho ‘Mpampianatra’ ndreky ‘Tômpo’, ary marin̈y tsarabe zen̈y, fôtony zen̈y ankitin̈y zaho. Ke izikoa zaho Tômpo ndreky Mpampianatra nanasa vitinarô, anarô koa mba tôkony hifanasa vity.”​—Jaona 13:12-14.

11. Karakôry nan̈aboahan’i Petera fa izy nianatra nanetry ten̈a? (1 Petera 5:5) (Zahava koa sary.)

¹¹ Petera nangala fianaran̈a baka tamy fanetren-ten̈an’i Jesosy. Tafaran’ny nimpodianan’i Jesosy tan-dan̈itry tan̈y, Petera nan̈ano fahagagan̈a, nampajanga lelahy araiky nalemy rango izy vo teraka. (Asa. 1:8, 9; 3:2, 6-8) Nisy olo maro nivory tamy Petera tiô, irô koa fa nahita fahagagan̈a io. (Asa. 3:11) Petera tombo tamy fiaraha-monin̈y tia laza ndreky voninahitry. Ke izy ma nety nan̈araraotro voninahitry ho azony tamin’io? Ehe. Izy nanetry ten̈a, ke Jehovah ndreky Jesosy fo namezany voninahitry. Karaha ty ho izy: “Baka amin’ny an̈aran̈anany [Jesosy] ndreky baka amy zahay mino an̈aran̈anany, zen̈y nahavy lelahy hitanarô sady hainarô io nanjary natanjaka.” (Asa. 3:12-16) Tafaran’izin̈y, Petera nanoratra tamindrô Kristianin̈y aby io fa ten̈a ilain̈a manetry ten̈a. Ke volan̈a nampiasainy tamizio mampatsiaro atsika i Jesosy namehy serviety tamin’ny andilan̈anany in̈y, baka iô nanasa vitandrô apostolinany aby io.​—Vakia 1 Petera 5:5.

12. Akôry hahavitantsika manetry ten̈a fo, karaha nataon’i Petera?

¹² Atsika koa mety man̈ano karaha nataon’i Petera in̈y, ke mianatra manetry ten̈a fo. Tsy ampy izikoa mivolan̈a manetry ten̈a fo. Volan̈a “fanetren-ten̈a” nampiasain’i Petera io ahitan̈a fa tafiditry amy zen̈y fomba fiheverantsika ain̈intsika tômpiny ndreky olo hafa. Atsika man̈ano raha han̈ampian̈a olo, fôtony atsika tia Jehovah ndreky tia olo, fa tsy nohon’ny atsika tihahazo voninahitry. Ke izikoa atsika mifen̈y erakan’ny vitantsika manompo Jehovah ndreky mikarakara irô rahalahintsika aby io, na hitan’olo atsika na tsy hitan’olo, aboakantsika amy zen̈y fa atsika manetry ten̈a.​—Mat. 6:1-4.

‘MISAIN̈A TSARABE’

13. Hazavà karakôry ‘misain̈y tsarabe’ zen̈y.

¹³ Karakôry ma ‘misain̈y tsarabe’ zen̈y? (1 Pet. 4:7) Kristianin̈y misain̈y tsarabe zen̈y mifen̈y eraka angôvo man̈ano fanapahan-kevitry tsara mifan̈araka amy fomba fisain̈an’i Jehovah. Ke Kristianin̈y karaha zen̈y mahay fa fifandraisany amy Jehovah raha ten̈a maventy amy fiain̈ana. Aviô koa, izy mandanjalanja amy fomba fiheverany ain̈inany, ke man̈eky fa tsy raha jiaby hainy. Izy milampy amy Jehovah, ke matetiky izy mivavaka aminany mangataka tari-dalan̈a.b

14. Karakôry nahavy Petera tamy diany araiky io lôso tsy nilampy tamy Jehovah?

¹⁴ Tamin’ny alin̈y farany talohan’ny nifatesan’i Jesosy, izy nampitandrin̈y mpianatranany aby io karaha ty: “Anarô jiaby io hiala zaho aby alin̈y ty, baka amy raha hahazo zaho.” Fa Petera natoky ten̈a nivolan̈a karaha ty: “Ndray hiala anao aby irô jiaby io baka amy raha havoa anao, zaho tsy hiala anao foeky!” Mbala tamin’ny alin̈y io fo, Jesosy nandrisiky mpianatranany karaha ty: “Miambesa ndreky mivavaha fo.” (Mat. 26:31, 33, 41) Izy koa nan̈araka volan̈an’ny Tômponany zen̈y, vitany tsy nifamatra fa izy mpianatran’i Kristy. Fa tsy zen̈y raha nataony. Petera nivolan̈a fa tsy nahay Tômponany io foeky, ke izy nanen̈iny mare.​—Mat. 26:69-75.

15. Karakôry nan̈aboahan’i Jesosy fa izy nisain̈y tsarabe, tamin’ny alin̈y farany talohan’ny nifatesany?

¹⁵ Jesosy nilampy mare tamy Jehovah. Izy ndray lavorary, izy impirimpiry nivavaka. Ke raha zen̈y nan̈amia angôvo izy nan̈ano raha nifan̈araka tamy sitrapôn’i Jehovah momba izy. (Mat. 26:39, 42, 44; Jaona 18:4, 5) Azo antoko fa tsy nadin̈an’i Petera foeky Jesosy nivavaka matetiky, tamin’ny alin̈y talohan’ny nifatesany in̈y.

16. Akôry nan̈aboahan’i Petera fa izy nanjary nisain̈y tsarabe? (1 Petera 4:7)

¹⁶ Koa fa nandeha fotoan̈a, Petera lôso nilampy tamy Jehovah tsarabe tamy vavaka. Jesosy koa fa natsangana tamy maty, izy nan̈amia toky Petera ndreky irô namany aby io fa irô hahazo fan̈ahy masin̈y, baka irô hahavita hitory vaovao tsara. Fa kanefa, Jesosy nan̈iraka irô niambin̈y ta Jerosalema antsendriky, mandra-pazahoandrô fan̈ahy masin̈y. (Lioka 24:49; Asa. 1:4, 5) Ino ma raha nataon’i Petera, tamin’irô niambin̈y io? Petera ndreky irô Kristianin̈y namany aby io “tsy vôly nivavaka.” (Asa. 1:13, 14) Tafara amy zay, tamy taratasinany voanalohany, Petera nandrisiky irô Kristianin̈y namany aby io hisain̈y tsara ndreky hilampy amy Jehovah amy vavaka. (Vakia 1 Petera 4:7.) Petera nianatra nilampy tamy Jehovah, ke nahavita nan̈ampy ndreky nankahery irô rahalahy ndreky ranabavy aby io.​—Gal. 2:9.

17. Ndray karakôry fahaizan̈a anan̈antsika, atsika mbala mila man̈ino fo? (Zahava koa sary.)

¹⁷ Baka atsika hisain̈y tsarabe, atsika tsy maintsy mivavaka matetiky amy Jehovah. Aviô ndray amy raha hitantsika karaha mora man̈ano izy, atsika mbala mila mivavaka amy Jehovah fo. Lera atsika hangala fanapahan-kevitry maventy koa ten̈a mila mivavaka, ke mangataka tari-dalan̈a amy Jehovah, ndreky matoky fa izy mahay raha ten̈a mahatsara atsika.

18. Akôry hahavy atsika hangala tahaka fo fomba fisain̈an’i Jehovah?

¹⁸ Atsika mankasitraka Jehovah mare nan̈ano atsika mahavita mangala tahaka toetrinany. (Gen. 1:26) Marin̈y ndraiky fa atsika tsy hahavita hangala tahaka Jehovah amy fomba lavorary. (Isaia 55:9) Fa karaha Petera, atsika mahavita man̈ova fomba fisain̈anantsika, baka hifan̈araka amy fomba fisain̈an’i Jehovah. Irarian̈a atsika han̈ano zen̈y fo ke hifen̈y fo hangala tahaka fomba fisain̈an’ny Zan̈ahary, hanetry ten̈a, baka iô hisain̈y tsarabe.