Aleva Tahaka Fanetren-ten̈an’i Jehovah

1. Nan̈ino ten̈a miavaka fanetren-ten̈an’i Jehovah?

FAHITANAO izy ma olo manan̈a fahifan̈a amy ziôty ma mba manetry ten̈a? Mety tsy karaha zen̈y. Fa Jehovah ndraiky nata izy faran’ny mahery, izy manetry ten̈a. (Sal. 113:5-8) Tsisy olo manetry ten̈a mira nin’i Jehovah, baka iô izy tsy man̈ambony ten̈a foeky. Handiniky toetrin’i Jehovah efatra atsika ato, ke hahita nan̈ino irô toetry efatra io ahitan̈a fa izy faran’ny manetry ten̈a. Hizahavantsika koa karakôry ataon’i Jesosy nangala tahaka fanetren-ten̈an’ny Babany. Fandinihan̈a raha aby zen̈y han̈ampy atsika hahaihifandray marikitry amy Jehovah fo ndreky hahavita hangala tahaka tsarabe fanetren-ten̈anany.

JEHOVAH MORA ATÔN̈INY

2. Ino raha koran̈in’ny Salamo 62:8 momba Jehovah? (Zahava koa sary fôn̈ony.)

² Olo man̈ambony ten̈a matetiky sarotro atôn̈iny. Irô miavonkavon̈o, ke misalasala olo han̈aton̈o irô. Na koa, irô man̈ano raha hahavy olo tsy hasaky han̈aton̈o irô. Fa Jehovah ndraiky tsy karaha zen̈y foeky. Babantsika an-dan̈itry an̈y io manetry ten̈a, ke izy man̈iraka atsika han̈aton̈o izy ndreky hikoran̈a aminany raha mampiasaloha atsika ndreky raha man̈avesatra fôntsika. (Vakia Salamo 62:8.) Izy mira baba araiky vôn̈ono hitandren̈y raha mampiasaloha zanany in̈y. Ke Jehovah mitandren̈y vavaka ataon’ny mpanomponany. Sady maro vavakan’ny mpanomponany voakoran̈a an̈atin’ny Baiboly ao. Ke hita baka amy zen̈y fa Jehovah ten̈a mora atôn̈iny ankitin̈y. (Jos. 10:12-14; 1 Sam. 1:10-18) Fa akôry ndraiky izikoa atsika ndraikindraiky mahatsiaro fa tsy vain̈y man̈aton̈o Jehovah?

3. Nan̈ino anao matoky fa anao tian’i Jehovah han̈aton̈o izy matetiky amy vavaka?

³ Atsika mety man̈aton̈o Jehovah amy vavaka fo, nata atsika mahatsapa fa tsy vain̈y itiavin’i Jehovah. Nan̈ino ma atsika mivolan̈a zen̈y? Tamy fan̈oharan̈an’i Jesosy momba zanaka adala in̈y, izy nampiran̈a Jehovah tamy baba araiky nanan̈a zanaka nahatsapa tsy vain̈y nataony zanany eky. Fa babany io mbala nandray izy fo. Karakôry nataony izikoa fa nahita zanany io navy? Jesosy nivolan̈a fa izy ‘nilomoay, aviô nitolon̈o izy. Aviô izy nirôfiny.’ (Lioka 15:17-20) Mira zen̈y koa Jehovah. Izy koa fa maharen̈y vavaka ataon’ny mpanomponany tsiaraikiaraiky, mikoran̈a aminany raha man̈avesatra fônany na mampiasaloha izy, baka amy fanetren-ten̈anany mahavy izy mitandren̈y irô tsarabe. (Fitom. 3:19, 20) Aviô noho ny hinakinakanany mahavy izy vôn̈ono hankahery irô, ke mamindra fô ndreky mankatia irô. (Isaia 57:15) Ke akôry ataon’i Jehovah “milomoay man̈aton̈o atsika” amy ziôty? Matetiky izy mampiasa irô anti-pan̈ahy aby io, aviô fianakavian̈antsika ndreky kamaradintsika tia Jehovah, mankahery atsika. (Jak. 5:14, 15) Jehovah man̈ampy atsika, fôtony tiany atsika hifandray marikitry aminany.

4. Akôry nan̈aboahan’i Jesosy fa izy mora atôn̈iny?

⁴ Jesosy mangala tahaka Babany. Mira Babany fo, Jesosy manetry ten̈a. Ke zen̈y nahavy olo tsy nihafahafa foeky nan̈aton̈o izy, tamin’izy tambony tany teto. Irô tsy navozo nan̈ontany raha izy. (Mar. 4:10, 11) Baka iô Jesosy koa fa nan̈iraka irô hikoran̈a hevitrindrô, irô tsy nihafahafa foeky nivolan̈a raha tan̈atin’ny fôndrô. (Mat. 16:13-16) Lera irô nan̈ano hadisovan̈a, irô tsy navozo tsao Jesosy ho meloko amindrô. Haindrô baka fa Jesosy tsara fan̈ahy, mamindra fô, baka iô manan̈a faharetan̈a. (Mat. 17:24-27) Jesosy ten̈a nangala tahaka tsarabe Babany. Ke tsy nahagaga izikoa irô mpan̈ara-dia izy aby io nahay tsarabe raha momba Jehovah. (Jaona 14:9) Nazava tamindrô baka fa Jehovah tsy nira irô mpitondra fivavahan̈a nasiaka, nan̈ambony ten̈a, ndreky tsy nijery olo aby io foeky. Fa izy manetry ten̈a ndreky mora atôn̈iny.

5. Nan̈ino ho mora atôn̈iny atsika izikoa mifen̈y manetry ten̈a?

⁵ Karakôry hangalantsika tahaka Jehovah? Izikoa atsika mifen̈y manetry ten̈a, ho moramora amin’olo koa han̈aton̈o atsika. Fanetren-ten̈a io hisakana atsika tsy ho be fô olo, tsy han̈ambony ten̈a ndreky tsy hitana heloko am-pô. Toetry karaha zen̈y baka hahavy olo hilefa atsika. Fa fanetren-ten̈a io ndraiky hahavy atsika ho tsara fan̈ahy, hanan̈a faharetan̈a, ndreky hamela heloko. Toetry karaha zen̈y hahavy olo tihifandray marikitry amintsika. (Kol. 3:12-14) Irô anti-pan̈ahy aby io ten̈a mila mifen̈y ho mora atôn̈iny. Fa baka irô ho karaha zen̈y, irô mila mifanerasera matetiky amindrô rahalahy ndreky ranabavy aby io. Ke irô mila mifen̈y man̈aton̈o fivorian̈a amy Tran̈o Fivorian̈a, fa tsy amy vidéoconférence fo. Baka iô koa, irô mila miaraka mitory amindrô rahalahy ndreky ranabavy aby io isaka tran̈o, erakany mety ho vitandrô. Irô koa baka mifankazatra tsara amindrô anti-pan̈ahy aby io, irô tsy hihafahafa hikoran̈a amindrô, lera irô misy problemo.

JEHOVAH MAHAY MANDANJALANJA

6-7. Man̈ameza ohatra man̈aboaka fa Jehovah vôn̈ono hiova hevitry noho ny fangatahan’ny mpanomponany.

⁶ Maro olo tsy mahay mandanjalanja izikoa fa mifandray amin’olo. Fa Jehovah manetry ten̈a, ke izy mahay mandanjalanja fo ndreky vôn̈ono hiova hevitry, nata izy faran’ny mahay raha. Zahava baka karakôry nataony tamy Miriama anabavin’i Mosesy. I Miriama ndreky Arona nin̈on̈on̈o nanohitry Mosesy. Kanefa Mosesy solon-ten̈an’i Jehovah. Ke Miriama nira tsy nan̈aja Jehovah fo. Jehovah neloko tamy Miriama, ke izy nataony boka. Fa Arona koa fa nilafidafiky tamy Mosesy, baka iô Mosesy niangavy Jehovah hampajanga anabaviny in̈y, karakôry nataon’i Jehovah? Jehovah tsy nan̈ano karaha olo man̈ambony ten̈a ke tsy man̈eky hiova hevitry aby io. Jehovah nanetry ten̈a, ke izy nan̈eky hampajanga Miriama.​—Nom. 12:1-15.

⁷ Naboakan’i Jehovah koa fanetren-ten̈anany, izy koa fa nifandray tamy Mpanjaka Hezekia. Jehovah nampiasa mpaminan̈inany nivolan̈a tamy mpanjaka io fa izy hofoaty. Ke tamy fônany jiaby, Hezekia nilafidafiky tamy Jehovah, baka hampajanga izy. Jehovah namindra fô taminany, ke nampiany 15 taon̈o ndraiky taon̈o nivilaomany. (2 Mpanj. 20:1, 5, 6) Ke noho ny fanetren-ten̈anany mahavy Jehovah mahinakinaka olo ndreky miova hevitry.

8. Ino aby ohatra ahitan̈a fa Jesosy mahay mandanjalanja? (Marka 3:1-6)

⁸ Jesosy mangala tahaka Babany. Tamy Jesosy tambony tany teto, izy vôn̈ono nan̈ano raha fo nan̈ampian̈a olo, izikoa mbala nety. Ohatra, izy nampajanga olo tamin’ny andra Sabata, nata izy nitoherindrô mpanohitry izy tsy nahay nahinakinaka olo aby io. (Vakia Marka 3:1-6.) Jesosy amy ziôty lohan’ny fiangonan̈a. Fa izy mbala mandanjalanja ndreky mahinakinaka olo fo. Ohatra, izikoa misy olo an̈atin’ny fiangonan̈a man̈ano fahotan̈a maventy, izy manam-paharetan̈a aminany, baka izy hahavita hiova.​—Apok. 2:2-5.

9. Akôry hahavy atsika hahay handanjalanja amy raha iritriretintsika ndreky raha ataontsika? (Zahava koa sary.)

⁹ Karakôry hangalantsika tahaka Jehovah? Atsika mila manetry ten̈a ke hangala tahaka Jehovah ke hahay handanjalanja amy raha iritriretintsika ndreky raha ataontsika. (Jak. 3:17) Ohatra, raimandreny mifen̈y mangala tahaka Jehovah zen̈y tsy han̈iraka zanakandrô han̈ano raha tsy ho vitandrô. Koran̈in’ny Genesisy 33:12-14 fa Jakoba ten̈a ohatra tsara amy raha zen̈y. Raimandreny manetry ten̈a ndreky mandanjalanja koa tsy tôkony hampiran̈a raha vitan’ny zanakandrô. Fa irô anti-pan̈ahy aby io koa ten̈a mila mahay mandanjalanja. Fomba araiky han̈aboahandrô zen̈y, irô vôn̈ono hanohan̈a hevitry lanin’ny ankamarozan’ny anti-pan̈ahy, izikoa raha zen̈y tsy mandika torolalan̈an’ny Baiboly. (1 Tim. 3:2, 3) Baka iô atsika jiaby koa tôkony hifen̈y hahatakatra fomba fihevitrin’olo, nata izio tsy mira amy nintsika. (Rom. 14:1) Dikan’izen̈y, olo jiaby amy fiangonan̈a tôkony hifen̈y han̈aboaka fa “mahay mandanjalanja.”​—Fil. 4:5.

JEHOVAH MANAN̈A FAHARETAN̈A

10. Akôry aby nan̈aboahan’i Jehovah fa izy manan̈a faharetan̈a?

¹⁰ Mety hitanao fa olo man̈ambony ten̈a tsy man̈eky ampiambesin̈y. Irô miavonkavon̈o, ke tsy manan̈a faharetan̈a! Fa Jehovah ndraiky tsy karaha zen̈y. Izy ten̈a manan̈a faharetana amin’ny ankitin̈y. Ohatra, tamin’ny andran’i Noa, Jehovah nivolan̈a fa izy mbala hiambin̈y 120 taon̈o, alohan’izy handripaka olo ratsy fan̈ahy aby io. (Gen. 6:3) Ke Noa mbala nahavita nitarimy iry zanany ndreky nan̈amboatra sambofiara, niaraka tamy fianakavian̈anany. Tamin’ny andran’i Abrahama koa, nisy anjely nirahin’i Jehovah nisoloten̈a izy, hitandren̈y tsarabe Abrahama tsy vôly nan̈ontany izy momba fandravan̈ana Sodoma ndreky Gomora. Ke izikoa olo man̈ambony ten̈a an̈ontanian̈a raha maro be karaha zen̈y, mety hivolan̈a karaha ty: ‘Anao ma mieritreritry fa zaho tsy mahay raha tôkony hataoko?’ Fa anjely io nangala tahaka Jehovah ke nanan̈a faharetan̈a tamin’i Abrahama.​—Gen. 18:20-33.

11. Eraka raha koran̈in’ny 2 Petera 3:9, nan̈ino ma Jehovah mbala manan̈a faharetan̈a firaka iziôty?

¹¹ Amin’ny andra iziôty koa Jehovah mbala man̈aboaka fo fa izy manan̈a faharetan̈a. Izy miambin̈y fotoan̈a efa nitondroeny havian’ny farany. Nan̈ino ma izy manan̈a faharetan̈a? Fôtony “tsisy olo tiany ho ripaka, fa tiany olo jiaby hibebaka.” (Vakia 2 Petera 3:9.) Ke tsisy varany ma Jehovah manan̈a faharetan̈a io? Misy ke. Amy ziôty misy olo tsara fô mandeha an-tapitrisany, mifandray marikitry aminany. Atsika koa man̈anten̈a fa mbala misy olo an-tapitrisany maro han̈ano karaha zen̈y. Fa ndray izy man̈ano zen̈y, misy erany faharetan̈an’i Jehovah io. Izy tia olo fa izy tsy handefitry lava. Tsy hambelany hisy mandrakizay raha ratsy.​—Hab. 2:3.

12. Akôry ataon’i Jesosy mangala tahaka faharetan̈an’i Jehovah?

¹² Jesosy mangala tahaka Babany. Efa andrivony taon̈o Jesosy nangala tahaka faharetan̈an’i Jehovah. Hitany Satana man̈aparitaka vandy momba Jehovah ndreky olo tsy mivadiky amy Zan̈ahary. (Gen. 3:4, 5; Joba 1:11; Apok. 12:10) Hitan’i Jesosy koa olo maro mijaly mare. Ke diniha hely baka izy efa tihan̈ano raha mare “handravanan̈a asan’ny Devoly”! (1 Jaona 3:8) Ino raha man̈ampy Jesosy hiambin̈y Jehovah hivolan̈a aminany lera han̈anaovan̈a zen̈y? An̈isan’ny raha man̈ampy Jesosy, izy manetry ten̈a. Hainy fa Jehovah zaraiky fo mahavita manapa-kevitry ombian̈a havian’ny farany io.​—Asa. 1:7.

13. Akôry nan̈aboahan’i Jesosy fa izy nanan̈a faharetan̈a tamindrô apostolinany aby io, aviô nan̈ino?

¹³ Tamy Jesosy tambony tany teto, izy nanan̈a faharetan̈a tamindrô apostolinany aby io koa. Ohatra, irô apostoly aby io natetiky nimalo, azôvy bebe amindrô. Fa ndray zen̈y, Jesosy tsy kivy, fa izy nanan̈a faharetan̈a nan̈ampy irô fo. (Lioka 9:46; 22:24-27) Izy natoky fa izikoa mandeha fotoan̈a, irô io mbala hiova fo. Ke misy hadisovan̈a araiky ma matetiky ataonao? Misora man̈ano mersy Zan̈ahary anao, manan̈a Jesosy mpanjaka manetry ten̈a, sady manan̈a faharetan̈a io!

14. Akôry hahavy atsika hanan̈a faharetan̈a?

¹⁴ Karakôry hangalantsika tahaka Jehovah? Izikoa atsika mifen̈y “manan̈a jerin’i Kristy”, ho moramora amintsika hieritreritry ndreky han̈ano karaha Jehovah. (1 Kor. 2:16) Ke akôry hahavy atsika hanan̈a jerin’i Kristy? Tsisy lalan̈a manapaka. Atsika mila mamaky Filazantsara, baka iô mila misaintsain̈y, amy karakôry raha nivakintsika io man̈aboaka fomba fiheveran’i Kristy raha. Atsika koa mila mangataka amy Jehovah han̈ampy atsika hanetry ten̈a ndreky hanan̈a faharetan̈a, karaha Jesosy. Izikoa atsika manan̈a jerin’i Kristy, ho vitantsika han̈ano karaha Zan̈ahary, ke hanan̈a faharetan̈a amin’ny ain̈intsika ndreky amy mpiara-manompo aby io.​—Mat. 18:26-30, 35.

JEHOVAH MAN̈AMIA VONINAHITRY OLO MANETRY TEN̈A

15. Man̈ameza ohatra man̈aboaka fa Jehovah tia olo manetry ten̈a. (Salamo 138:6)

¹⁵ Vakia Salamo 138:6. Diniha baka! Jehovah faran’ny an̈abo amy raha jiaby, kanefa izy man̈amia voninahitry olo manetry ten̈a. Tan̈atin’ny taon̈o maro, nisy olo niheverin’olo ho ambany kanefa namezan’i Jehovah voninahitry. Sasany amindrô io mety tsy direkty tsaroantsika, fa irô ndraiky amy Baiboly ao. Ohatra, Jehovah nan̈iraka Mosesy nanoratra an̈aran’ny man̈angy araiky mpampinono, Debora an̈arany. Izio tamin’ny andrandry Jakoba tan̈y. Izikoa atambatra, tan̈atin’ny 125 taon̈o, izy niasa tantran̈on’ny fianakavian̈an’i Isaka ndreky Jakoba, baka iô izy tsy nivadiky tamindrô foeky. Ndray tsy maro raha haintsika momba man̈angy tsy nivadiky io, nataon’i Jehovah azo antoko fa nisoratin’i Mosesy fa izy tian’i Jehovah. (Gen. 24:59; 35:8, l.p.a.) Taon̈o maro tafara koa, Jehovah nifidy Davida tsaiky lelahy mpiambin̈y ôndrikôndriky, nanjary mpanjakan’Israely. (2 Sam. 22:1, 36) Tsy ela tafaran’i Jesosy teraka koa, Zan̈ahary nandefa anjely nan̈amia voninahitry mpiambin̈y ôndrikôndriky. Ke irô voanalohan’ny nan̈ambarandrô anjely aby io fa vo teraka a Betlehema Mesia. (Lioka 2:8-11) Baka iô, Josefa ndreky Maria koa fa nitondra Jesosy tamy tempoly, Jehovah nan̈amia voninahitry Simeona ndreky Ana efa matoe be, ke irô nataony nahita Jesosy Zanany. (Lioka 2:25-30, 36-38) Ke Jehovah “nata an̈abo, izy miôndriky mizaha olo manetry ten̈a”!

16. Karakôry nataon’i Jesosy nangala tahaka fomba fitondrasan’ny Babany olo?

¹⁶ Jesosy mangala tahaka Babany. Nira Babany fo, Jesosy koa nan̈amia voninahitry olo niheverin’olo ho ambany. Nampianariny raha momba Fanjakan̈an’ny Zan̈ahary irô “olo niheverin’olo ambany sady olo tsotra.” (Asa. 4:13; Mat. 11:25) Jesosy koa nitaha olo marary sady nataony raha nahavy irô hahatsapa tian̈a ndreky nisy hajany. (Lioka 5:13) Tamin’ny alin̈y farany talohan’ny nifatesany koa, Jesosy koa nanasa vitin’ny apostolinany, kanefa raha zen̈y asan’ny mpanompo. (Jaona 13:5) Aviô talohan’izy nanonga tan-dan̈itry, izy nan̈amia voninahitry mpan̈ara-dia izy jiaby. Tamy fomba akôry? Irô nirahiny nan̈ano asa faran’ny maventy, ke han̈ampy olo hahazo fiain̈ana tsisy farany.​—Mat. 28:19, 20.

17. Akôry han̈aboahantsika fa atsika tia ndreky man̈aja olo? (Zahava koa sary.)

¹⁷ Karakôry hangalantsika tahaka Jehovah? Tia ndreky man̈aja olo koa atsika, izikoa atsika mitory vaovao tsara amin’olo jiaby mitandren̈y atsika, ndray karakôry fiain̈ananany, volon-koditrinany, aviô fianaran̈a vitany. Baka iô man̈amia voninahitry irô rahalahy ndreky ranabavintsika aby io koa atsika, izikoa atsika mihevitry irô ho an̈abon̈abontsika, ndray karakôry ndray karakôry fahaizan̈antsika ndreky tombontsoa mety hanan̈antsika. (Fil. 2:3) Ravoravo amintsika Jehovah, izikoa atsika manetry ten̈a ke man̈ano raha voanalohany hifan̈amezan̈a voninahitry, amy raha aby zen̈y na amy fomba hafa koa.​—Rom. 12:10; Zef. 3:12.

18. Nan̈ino anao tihangala tahaka fanetren-ten̈an’i Jehovah?

¹⁸ Izikoa atsika mifen̈y mangala tahaka fanetren-ten̈an’ny Babantsika be fitiavan̈a an-dan̈itry an̈y io, hanjary ho mora atôn̈iny atsika, hahay handanjalanja baka iô hanan̈a faharetan̈a. Aviô hahavita han̈amia voninahitry olo, karaha ataon’i Jehovah koa atsika. Ke irarian̈a ezaka ataontsika hifandraisan̈a marikitry amy Zan̈aharintsika manetry ten̈a io, hahavy atsika tsiaraikiaraiky hahaiho hisy valerany aminany fo!​—Isaia 43:4.