‘Fidia Azôvy Hitompoenarô’

1. Ino raha mila hataontsika baka atsika ho ten̈a sambatra, aviô nan̈ino? (Isaia 48:17, 18)

BABANTSIKA an-dan̈itry an̈y ten̈a tia atsika. Tiany atsika hankafy fiain̈ana rango iziôty ndreky amin’ny amaray. (Mpito. 3:12, 13) Izy koa fa namôron̈o atsika, nataony manan̈a talenta miavaka atsika, fa atsika tsy nataony mahavita mifampitondra na hamaritry ny tsara ndreky ratsy. (Mpito. 8:9; Jer. 10:23) Hainy fa baka atsika ho sambatra ankitin̈y, atsika mila manompo izy ndreky man̈araka amy fitsipikinany.​—Vakia Isaia 48:17, 18.

2. Ino raha tian’i Satana hinoantsika, aviô ino raha nataon’i Jehovah?

² Tian’i Satana atsika hino fa tsy miankin̈y amy Jehovah mampasambatra atsika, fa atsika olombelon̈o mahavita mifampitondra. (Gen. 3:4, 5) Nambelan’i Jehovah antsendriky olombelon̈o mifampitondra, fa nasiany erany fo fotoan̈a io. Atsika tsy mizaha lavitry vo mahita voka-dratsin’ny olombelon̈o mifampitondra. Fa amy Soratra Masin̈y ao ndraiky mikoran̈a momba lelahy ndreky man̈angy maro, sambatra fôtony nanompo Jehovah. An̈isan’izen̈y iziô Jesosy. Izy ten̈a sambatra amindrô jiaby io. Voanalohany hidinihintsika amy lahatsoratra ty, nan̈ino izy nifidy hanompo Jehovah. Baka iô, hidinihintsika nan̈ino Babantsika an-dan̈itry an̈y io vain̈y tompoentsika. Farany, hizahavantsika koa antony sasany mahavy atsika manompo Jehovah.

NAN̈INO JESOSY NIFIDY NANOMPO JEHOVAH?

3. Namian’i Satana ino Jesosy, fa ino nifidin’i Jesosy?

³ Tamy Jesosy tambony tany teto, izy nila nifidy azôvy hitompoeny. Tsy ela tafaran’izy natao batisa, Satana nan̈aboaka izy fanjakan̈a jiaby tambony tany, aviô izy nivolan̈a tamy Jesosy fa mila mankôhoko aminany indraiky fo, baka hamezany izio. Jesosy namaly: “Mandihana an̈y anao Satana, fôtony ty raha efa voasoratra: ‘Anao tsy maintsy mankôhoko man̈oloan̈a Jehovah Zan̈aharinao, baka iô izy zaraiky fo tsy maintsy an̈anaovanao fanompoan̈a masin̈y.’” (Mat. 4:8-10) Nan̈ino ma Jesosy nifidy nanompo Jehovah? Diniha antony sasany aby ty.

4-5. Ino antony sasany nahavy Jesosy nifidy hanompo Jehovah?

⁴ Fitiavan̈a, io antony ten̈a maventy nahavy Jesosy nifidy hanompo Jehovah. Ten̈a tian’i Jesosy Babany io. (Jaona 14:31) Fan̈ampin’izen̈y koa, Jesosy nanompo Jehovah, fôtony zen̈y raha tsara tôkony hatao. (Jaona 8:28, 29; Apok. 4:11) Hainy baka fa Jehovah loharanon’ny fahin̈ana, izy mafatoky, aviô tsy matity. (Sal. 33:4; 36:9; Jak. 1:17) Jehovah nivolan̈a ny marin̈y tamy Jesosy fo, aviô baka taminany aby raha jiaby nanan̈any. (Jaona 1:14) Fa Satana tsy karaha zen̈y foeky. Baka taminany navian’ny fahafatesan̈a. Izy mpavandy, tsy mety afa-pô ndreky tia ten̈a. (Jaona 8:44) Hain’i Jesosy raha jiaby zen̈y. Tsy tiany foeky hanjary karaha Satana ndreky hivadiky amy Jehovah.​—Fil. 2:5-8.

⁵ Hain’i Jesosy koa fa hitondra hatsaran̈a maro tsy fivadihan̈anany io, ke zen̈y koa nahavy izy nanompo Jehovah. (Heb. 12:2) Hainy baka fa izy koa tsy mivadiky amy Babany, izy hankamasin̈y an̈aranany ndreky han̈adoso jaly jiaby baka amy Devoly.

NAN̈INO JEHOVAH MAN̈EVA HIVAVAHANTSIKA?

6-7. Nan̈ino maro olo iziôty tsy manompo Jehovah, fa kanefa nan̈ino izy man̈eva hitompoen̈y?

⁶ Maro olo iziôty tsy manompo Jehovah, fôtony tsy haindrô toetrinany maro tsara aby io. Tsy haindrô koa raha maro tsara efa nataon’i Jehovah tamindrô. Karaha zen̈y irô olo nitorian’i Paoly ta Atena tan̈y.​—Asa. 17:19, 20, 30, 34.

⁷ Nazavain’i Paoly tamindrô fa ten̈a Zan̈ahary io “nan̈amia olo jiaby fiain̈ana, fahin̈ana aviô raha jiaby.” Aviô ho izy koa: “Baka aminany mahavy atsika velon̈o, mihetsiketsiky, baka iô misy.” Zan̈ahary io Mpamôron̈o atsika. “Baka amin’olo araiky niasany olo jiaby.” Zen̈y mahavy izy vain̈y hivavahantsika.​—Asa. 17:25, 26, 28.

8. Ino raha tsy hataon’i Jehovah foeky? Hazavà.

⁸ Jehovah Mpamôron̈o ndreky Mpanjakan’ny raha jiaby. Vitany hiforse olo hanompo izy, izikoa zen̈y tiany. Fa Jehovah tsy han̈ano zen̈y foeky. Ndray izy aby man̈amia atsika porofo fa izy misy, aviô tiany mare koa atsika tsiaraikiaraiky. Tiany ho faran’ny maro olo hanjary kamaradinany mandrakizay. (1 Tim. 2:3, 4) Zen̈y mahavy izy mampiofan̈a atsika, hampianatra olo momba fikasan̈anany ndreky hikoran̈a amindrô raha tsara handeha ataony amin’olombelon̈o. (Mat. 10:11-13; 28:19, 20) Izy koa nan̈amia atsika fiangonan̈a, hahavitantsika manompo izy ndreky hazahoantsika fan̈ampian̈a baka amin’ny anti-pan̈ahy be fitiavan̈a aby io.​—Asa. 20:28.

9. Ino porofo fa Jehovah ten̈a tia olo?

⁹ Hita baka amy fitondrasan’i Jehovah irô olo tsy mino izy aby io fa izy ten̈a tia olo ankitin̈y. Diniha baka ty: Tan̈atin’ny andrivony taon̈o zay, olo maro nifidy han̈ano raha iritriretindrô fa tsara na ratsy fo fa tsy man̈araka volan̈an’i Jehovah. Fa Jehovah tsara fan̈ahy amindrô fo, ke man̈amia raha ilaindrô, baka irô ho velon̈o fo ndreky hankafy fiain̈ana. (Mat. 5:44, 45; Asa. 14:16, 17) Ambelany irô hanan̈a kamarady ndreky fianakavian̈a ho tia irô. Ambelany koa irô miteraka, miasa, baka irô ho ravoravo miain̈y. (Sal. 127:3; Mpito. 2:24) Raha jiaby zen̈y ahitan̈a fa Babantsika an-dan̈itry an̈y io tia olombelon̈o jiaby. (Eks. 34:6) Atsika iziô ndraiky hizaha ino aby antony mahavy atsika manompo Jehovah, baka iô akôry ataony mitahy atsika.

NAN̈INO MA ATSIKA MIFIDY MANOMPO JEHOVAH?

10. a) Ino antony maventy mahavy atsika manompo Jehovah? (Matio 22:37) b) Ino hatsaran̈a azonao baka amy Jehovah mamela heloko? (Salamo 103:13, 14)

¹⁰ Karaha nataon’i Jesosy, fitiavan̈a Jehovah mare, antony faran’ny maventy mahavy atsika manompo Jehovah. (Vakia Matio 22:37.) Haintsika fa izy ten̈a tsara toetry, ke zen̈y mandrisiky atsika han̈aton̈o izy. Ohatra, diniha fo baka Jehovah mamela helokontsika. Irô Israelita aby io koa fa tsy nan̈araka volan̈anany, izy niangavy irô: “Mialà amy raha ratsy fataonarô io anarô azafady.” (Jer. 18:11) Hain’i Jehovah fa atsika io olo tsy lavorary. (Vakia Salamo 103:13, 14.) Ke izikoa anao misaintsain̈y familan-kelokon’i Jehovah ndreky toetrinany maro tsara aby io, raha zen̈y handrisiky anao tihanompo izy mandrakizay. Sa karakôry?

11. Ino antony sasany mahavy atsika manompo Babantsika an-dan̈itry an̈y?

¹¹ Manompo Jehovah koa atsika, fôtony zen̈y raha tsara tôkony hataontsika. (Mat. 4:10) Fan̈ampin’izen̈y, haintsika fa atsika koa tsy mivadiky aminany, izy hitahy atsika. Mankamasin̈y an̈aran’i Jehovah baka atsika izikoa tsy mivadiky, aviô aboakantsika amy zen̈y koa fa Devoly io mpavandy, ke atsika mamparavoravo fôn’i Jehovah. Aviô, izikoa atsika mifidy manompo Jehovah amy ziôty, atsika mety hahavita hanompo izy mandrakizay!​—Jaona 17:3.

12-13. Ino raha ianarantsika baka amy tantaran’i Jane ndreky Pam?

¹² Ndray anao mbala hely, anao mety mianatra ho tia mare Jehovah. Baka iô hahaihitombo fo fitiavanao izy, izikoa anao fa mahaibe. Diniha baka Jane ndreky Pam, olo mpirahavavy.a Nianatra Baiboly i Jane tamin’izy 11 taon̈o, fa Pam ndraiky, tamin’izy 10 taon̈o. Raimandrenindrô ndray tsy nianatra, nambelandrô fo irô nianatra Baiboly tamy Vavolombelon̈on’i Jehovah, fa irô fo mbala nila nandeha legilizy niaraka tamy raimandrenindrô. Karaha ty ho Jane: “Baka tamy Baiboly aby raha nampianarin’ny Vavolombelon̈on’i Jehovah zaho. Ke raha zen̈y nan̈ampy zaho tsy voataon̈on’ny tsaiky lekoly araiky taminay nihina jamala ndreky naloto fitondran-ten̈a.”

¹³ Taon̈o vitsivitsy tafaran’izen̈y, irô roe nanjary mpitory. Tafaran’izin̈y koa, irô nan̈ano mpisava lalan̈a sady mikarakara raimandrenindrô efa matoe. Jane koa fa nieritreritry raha niain̈andrô in̈y, karaha ty nivolan̈iny: “Nianarako tamizin̈y fa Jehovah ten̈a tsy mivadiky, izikoa fa mikarakara kamaradinany. Karaha raha koran̈in’ny 2 Timoty 2:19 in̈y, ‘hain’i Jehovah olonany.’” Jehovah ten̈a mikarakara lan̈iany olo tia izy ndreky manompo izy!

14. Akôry ataontsika miaro Jehovah? (Zahava koa sary.)

¹⁴ Tiantsika olo hahay ny marin̈y momba Jehovah. Diniha baka ohatra ty: Anao manan̈a kamarady araiky tsara fan̈ahy sady tsy matity ndreky tia mamela heloko. Fa tandraraiky, anao naharen̈y olo nivolan̈a fa kamaradinao io zen̈y kafiry ndreky tsy man̈ano ny marin̈y. Akôry eky ho anao? Harovanao izy. Karaha zen̈y koa atsika. Izikoa atsika maharen̈y raha tsy marin̈y momba Jehovah, atsika mifen̈y mare miaro izy, ke man̈ambara ny marin̈y momba izy. (Sal. 34:1; Isaia 43:10) Aboakantsika amy raha volan̈intsika ndreky raha ataontsika fa atsika tihanompo Jehovah amy fô jiaby.

15. Paoly koa fa nan̈ova tanjon̈onany, ino hatsaran̈a nazony? (Filipianina 3:7, 8)

¹⁵ Vôn̈ono han̈ano fan̈ovoan̈a amy fiain̈anantsika atsika, baka hahavita hamparavoravo Jehovah, ndreky hampitombo fanompoan̈a izy. Ohatra, apostoly Paoly nanan̈a toeran̈a an̈abo tamy Fivavahan̈a Jiosy, fa nialany fivavahan̈a io baka izy nanjary mpianatran’i Kristy ndreky nanompo Jehovah. (Gal. 1:14) Ke vokany, izy nanjary nanan̈a tantara maro tsara tamy fanompoany Jehovah, aviô izy iziôty efa an-dan̈itry an̈y, hiaraka hanjaka amy Jesosy. Izy tsy nanen̈iny foeky nanompo Jehovah. Tsy ho diso fan̈antinan̈a koa atsika, izikoa mifidy hanompo Jehovah.​—Vakia Filipianina 3:7, 8.

16. Ino raha ianarantsika amy tantaran’i Julia? (Zahava koa sary.)

¹⁶ Jehovah hitahy atsika iziôty ndreky amin’ny amaray an̈y, izikoa fanompoan̈a izy raha ten̈a maventy amy fiain̈anantsika. Diniha baka ranabavy araiky ty, Julia an̈arany. Talohan’izy nianatra fahamarin̈ana, tamin’izy mbala tanora, izy kôraly tamy fivavahan̈a nisy izy. Nisy olo mpampianatra hira nahita fa izy nahay nihira, ke nampiofan̈a izy hanjary mpihira malaza. Tsy ela Julia efa nalaza edy ke nandeha nihira tamy toeran̈a maro malaza. Fa izy koa fa nianatra tamy lekoly araiky malaza, mampianatra hira, nisy lelahy araiky lekoly araiky taminany, nikoran̈a taminany momba Zan̈ahary. Nivolan̈iny taminany fa Jehovah an̈aran’ny Zan̈ahary. Tsy ela tafaran’izin̈y, Julia nianatra Baiboly, indroe isaka herin̈iandra. Izy baka tiô nanapa-kevitry hampiasa fotoan̈anany ndreky angôvonany hanompoan̈a Jehovah, fa tsy han̈ano mpihira malaza. Tsy nora taminany nan̈ano fanapahan-kevitry zen̈y. Ho izy: “Maro olo nivolan̈a taminaka fa adala zen̈y zaho, fôtony vôly nihira fa nanompo Jehovah. Fa ten̈a tiako hampiasa fiain̈ananaka jiaby hanompoan̈a Jehovah.” Efa 30 taon̈o iziôty nan̈anaovany zen̈y. Ke karakôry fahitany safidy nataony in̈y? Ho izy: “Zaho milamin-tsain̈y, aviô zaho matoky fa Jehovah mbala han̈atanteraka raha jiaby irin’ny fônaka, amin’ny amaray an̈y.”​—Sal. 145:16.

AZA VÔLY MANOMPO JEHOVAH

17. Efa hely tavela, ho avy faran’ny donia ty. Ino vokatran’izen̈y amin’olo mbala tsy nifidy manompo Zan̈ahary ndreky olo efa nifidy manompo izy?

¹⁷ Efa ten̈a marikitry faran’ny donia ty atsika iziôty. Apostoly Paoly nanoratra karaha ty: “‘Ten̈a hely tavela’, aviô ‘ho avy araiky mbala ho avy in̈y sady efa tsy ho ela.’” (Heb. 10:37) Ino vokan’izen̈y amintsika? Nindrô olo mbala tsy manompo Jehovah aby io, efa tsy be eky fotoan̈a tavela, hifidianandrô hanompo Jehovah. (1 Kor. 7:29) Fa izikoa ndraiky atsika efa nifidy hanompo Jehovah, haintsika fa atsika ndray miaritry fitsapan̈a, efa ‘ten̈a hely tavela.’

18. Ino raha tian’i Jesosy ndreky Jehovah hataontsika?

¹⁸ Jesosy mandrisiky olo hanjary mpianatranany, aviô tsy ho vôly han̈araka izy. (Mat. 16:24) Ke izikoa efa maromaro taon̈o nanompoantsika Jehovah, irarian̈a atsika ho tapa-kevitry tsy ho vôly hanompo Jehovah. Mila mifen̈y mare atsika baka hahavita zen̈y. Mety tsy ho mora man̈ano zen̈y. Fa atsika ndraiky koa mifen̈y fo, atsika ho sambatra sady ravoravo hahazo hatsaran̈a maro, rango iziôty!​—Sal. 35:27.

19. Ino raha ianarantsika baka amy tantaran’i Gene?

¹⁹ Olo sasany mieritreritry fa irô koa manompo Jehovah, irô tsy hahita ambiansin’ny fiain̈ana. Ke anao koa mbala tanora, anao ma mieritreritry karaha zen̈y koa? Karaha ty ho Gene, rahalahy tanora araiky: “Zaho karaha hitako tsy libra amy fiain̈ananaka, fôtony zaho Vavolombelon̈on’i Jehovah. Karaha hitako sambatra baka irô tanora miramira taon̈o taminaka aby io. Irô mibaly, man̈ano tsaikitsaiky, na koa misoma jeux video kafiry aby in̈y. Fa ninaka ndraiky efa fivorian̈a ndreky fitorian̈a fo.” Nan̈ano karakôry amy zay Gene? Ho izy: “Nan̈ano karaha nataondrô koa zaho, sady nanompo Jehovah. Karaha nahatsiaro sambatra hely zay zaho, fa tsy nahadin̈y ela, fôtony tsy ten̈a hasambaran̈a. Fa zaho baka tiô nangala onon̈o hatsaran̈a aby nazoko tamy zaho mbala nan̈araka raha koran̈in’ny Baiboly. Tafaran’izin̈y, zaho tapa-kevitry fa hanompo Jehovah amy fônaka jiaby. Ke rango tamizin̈y, hitako nivalin’i Jehovah aby vavaka jiaby nataoko.”

20. Tôkony ho tapa-kevitry han̈ino atsika?

²⁰ Mpan̈ano salamo araiky nihira karaha ty nin’i Jehovah: “Sambatra olo fidinao ndreky kahinao man̈aton̈o anao, baka hipetraka amin’ny haramanjanao.” (Sal. 65:4) Ke irarian̈a atsika jiaby ho tapa-kevitry han̈ano karaha raha nivolan̈in’i Josoa ty fo: “Zahay tran̈o araiky, zahay hanompo Jehovah.”​—Jos. 24:15.