Ten̈a Raha Maventy Aminao ma An̈aran’i Jehovah?

1-2. Akôry hahaizantsika fa ten̈a raha maventy tamy Jesosy an̈aran’i Jehovah?

AN̈ARAN’I Jehovah raha farany maventy tamy Jesosy. Izy olo ten̈a nahavita nan̈ano raha nan̈ambaran̈a an̈aran̈a io. Eraka nikoran̈in’ny lahatsoratra talohan’ity, Jesosy vôn̈ono hofoaty, baka hankamasin̈ana an̈aran’i Jehovah ndreky hankamarin̈ana izio. (Mar. 14:36; Heb. 10:7-9) Aviô, izikoa fa tapitry Fanjakan̈a Arivo Taon̈o, Jesosy vôn̈ono han̈ampody fahifan̈a jiaby amy Jehovah, baka hankamasin̈ana an̈aran’i Jehovah. (1 Kor. 15:26-28) Fitiavan’i Jesosy an̈aran’ny Zan̈ahary koa man̈aboaka karakôry fifandraisany tamy Babany io. Ke hita baka amy zen̈y fa Jesosy ten̈a tia Zan̈ahary tômpin’ny an̈aran̈a io.

² Noho ny an̈aran’ny Babany navian’i Jesosy tambony tany teto. (Jaona 5:43; 12:13) Nambarany tamy mpan̈ara-dia izy an̈aran̈a io. (Jaona 17:6, 26) Izy nampianatra ndreky nan̈ano fahagagan̈a tamin’ny an̈aran’i Jehovah. (Jaona 10:25) Aviô Jesosy koa nangataka tamy Jehovah hiaro mpianatranany ‘noho ny an̈aranany.’ (Jaona 17:11) Ke mazava tsarabe baka amy zen̈y fa an̈aran’i Jehovah io raha ten̈a maventy tamy Jesosy. Nan̈ino fo olo sasany mivolan̈a fa mpan̈ara-dia Jesosy tsy mahay ndreky tsy mampiasa an̈aran’i Jehovah?

3. Ino raha hidinihintsika amy lahatsoratra ty?

³ Atsika io ten̈a Kristianin̈y sady mangala tahaka i Jesosy, ke ten̈a raha maventy amintsika koa an̈aran’ny Babany io. (1 Pet. 2:21) Amy lahatsoratra ty atsika hahita, nan̈ino an̈aran’i Jehovah io hahaizan̈a irô olo man̈ambara “vaovao tsaran’ny Fanjakan̈a io.” (Mat. 24:14) Hidinihintsika koa nan̈ino an̈aran’i Jehovah io tôkony ho ten̈a raha maventy amintsika tsiaraikiaraiky.

“VAHOAKA MITONDRA AN̈ARAN̈ANANY”

4. a) Nirahin’i Jesosy han̈ino irô mpan̈ara-dia izy aby io, talohan’izy himpody tan-dan̈itry? b) Ke ino fan̈ontanian̈a miboaka baka amy zen̈y?

⁴ Taloha helin’i Jesosy himpody tan-dan̈itry, izy nivolan̈a tamy mpianatranany: “Anarô hahazo angôvo lera fan̈ahy masin̈y avy aminarô, ke anarô hanjary vavolombelon̈onaka a Jerosalema ndreky man̈eran̈a Jodia ndreky Samaria, aviô amy faritry farany lavitry ambony tany eto.” (Asa. 1:8) Dikan’izen̈y, tamy tany jiaby nila nitorian̈a vaovao tsara io fa tsy tan Israely fo. Olo amy firenena jiaby koa afaka hanjary mpan̈ara-dia Jesosy. (Mat. 28:19, 20) Fa karaha ty koa ho Jesosy: “Anarô hanjary vavolombelon̈onaka.” Ke irô mpianatra vaovao aby io ma mbala nila nahay raha momba Jehovah koa, sa irô ho vavolombelon̈on’i Jesosy fo? Raha nandalo koran̈in’ny Asan’ny Apostoly toko faha-​15 han̈ampy atsika hamaly fan̈ontanian̈a zen̈y.

5. Karakôry nan̈aboahandrô apostoly aby io ndreky irô anti-pan̈ahy ta Jerosalema fa olo jiaby mila mahay an̈aran’i Jehovah? (Zahava koa sary.)

⁵ Tamy taon̈o 49, apostoly ndreky irô anti-pan̈ahy ta Jerosalema niaraka nivory nandiniky ino raha mety hataondrô hafa firenena aby io, baka irô ho lôso Kristianin̈y. Tamy faran’izio, Jakoba rahalahin’i Jesosy nivolan̈a: “Efa nitantarain’i [Petera] tamintsika tamin’ny an-tsipiriany karakôry somilany nan̈ikian’ny Zan̈ahary irô hafa firenena aby io, misy hangalany olo baka amindrô io ao, hitondra an̈aran̈anany.” An̈aran-jôvy ma nikoran̈in’i Jakoba io? Izy koa fa nangala volan̈a nisoratin’ny mpaminan̈y Amosa, ho izy: “Amy zen̈y, hitsakaraka Jehovah tsarabe irô olo tavela aby io, miaraka amin’olo baka amy firenena jiaby, tsy azôvy zen̈y fa irô olo kahian̈a amin’ny an̈aran̈anaka, ho Jehovah.” (Asa. 15:14-18) Ke mpianatra vaovao aby io tsy vitan’ny hianatra raha momba Jehovah fo fa ‘kahian̈a amin’ny an̈aran̈anany’ koa. Ke dikan’izen̈y, irô hitondra an̈aran’ny Zan̈ahary, baka iô an̈aran̈a io koa hahaizan̈a irô.

6-7. a) Nan̈ino ma Jesosy navy tambony tany teto? b) Ino koa antony hafa maventy naviany tambony tany teto?

⁶ Dikan’ny an̈aran’i Jesosy io, “Jehovah io Famonjian̈a”, ke naboakan’i Jesosy ankitin̈y fa izy ten̈a fitaovan̈a nampiasain’i Jehovah hamonjian̈a lan̈iany olombelon̈o manam-pinoan̈a. Jesosy navy tambony tany teto han̈amia ain̈inany han̈avaotan̈a olombelon̈o. (Mat. 20:28) Izy nan̈efa vidim-pan̈avaotan̈a, ke zen̈y nahafahan̈a nan̈avotro olombelon̈o ndreky hahazahoan̈a fiain̈ana tsisy farany.​—Jaona 3:16.

⁷ Fa nan̈ino ma olombelon̈o nila vidim-pan̈avotan̈a? Noho ny raha nandalo tamy zaridain̈in’i Edena. Eraka raha nikoran̈iny tamy lahatsoratra talohan’ity, Adama ndreky Eva raimandrenintsika tsy nan̈araka volan̈an’i Jehovah, ke nanjary tsy afaka niain̈y tsisy farany. (Gen. 3:6, 24) Fa misy raha beben’ny fan̈avaotan̈a olombelon̈o mpanota io. Satana nivolan̈a vandy momba an̈aran’i Jehovah. (Gen. 3:4, 5) Ke fan̈avaotan̈a taranakan’i Adama ndreky Eva aby io misy ifandraisany amy raha araiky maventy koa: Fankamasin̈ana an̈aran’i Jehovah. Efa Jesosy edy ny ten̈a mahavita man̈aboaka fa vandy aby raha nivolan̈in’i Satana, fôtony izy nisoloten̈a Jehovah ndreky nahavita tsarabe raha jiaby tian’i Jehovah nataony.

8. Ino raha mila hain’olo jiaby mino Jesosy?

⁸ Lan̈iany olo man̈aboaka fa mino Jesosy, na Jiosy na hafa firenena, nila nahay fa baka amy Jehovah Zan̈ahary, Baban’i Jesosy famonjian̈a irô io. (Jaona 17:3) Baka iô koa, karaha Jesosy, irô koa mila kahian̈a amin’ny an̈aran’i Jehovah. Nila haindrô koa fa ten̈a raha maventy fankamasin̈ana an̈aran’i Jehovah io. Miankin̈y amy zen̈y baka famonjian̈a irô. (Asa. 2:21, 22) Ke olo mpan̈ara-dia Jesosy jiaby tsy nivadiky, nila nianatra momba Jehovah ndreky Jesosy koa. Ke tsy mahagaga Jesosy koa fa namaran̈a vavaka nataony amy Jaona toko faha-​17, karaha ty: “Efa nataoko haindrô an̈aran̈anao, aviô izio mbala hataoko haindrô ndraiky koa, amy zen̈y karaha nitiavanao zaho hitiavandrô olo hafa, baka iô zaho ho tafikamban̈a amindrô.”​—Jaona 17:26.

“ANARÔ VAVOLOMBELON̈ONAKA”

9. Karakôry han̈aboahantsika fa ten̈a raha maventy amintsika an̈aran’i Jehovah?

⁹ Ke olo jiaby mpan̈ara-dia Jesosy mila mankamasin̈y an̈aran’i Jehovah io. (Mat. 6:9, 10) Tôkony ho raha ten̈a maventy amindrô an̈aran’i Jehovah. Ke raha zen̈y koa mila aboakantsika amy raha ataontsika. Fa ino ma raha mety hataontsika, baka hankamasin̈ana an̈aran’i Jehovah ndreky han̈aporofoan̈a fa vandy raha nivolan̈in’i Satana momba Jehovah?

10. Momba ino ma raha vakintsika amin’ny Isaia toko faha-42 firaka toko faha-44? (Isaia 43:9; 44:7-9) (Zahava koa sary.)

¹⁰ Faran-draha maventy eky raha ataontsika hankamasin̈ana an̈aran’i Jehovah, eraka Isaia faha-42 firaka faha-44. Mikoran̈a raharaha ara-pitsaran̈a an̈ohatra toko aby io: Irahin’i Jehovah man̈amia porofo lan̈iany miaboko ho zan̈ahary han̈aboaka fa ten̈a Zan̈ahary ankitin̈y irô. Irahiny mitsangana ho vavolombelon̈o koa lan̈iany olo mahavita miaro irô zan̈ahary aby io. Fa tsisy nata araiky!​—Vakia Isaia 43:9; 44:7-9.

11. Ino ma raha volan̈in’i Jehovah amy vahoakanany, amin’ny Isaia 43:10-12?

¹¹ Vakia Isaia 43:10-12. Karaha ty ho Jehovah momba vahoakanany: “Anarô Vavolombelon̈onaka, ... baka iô zaho Zan̈ahary.” Jehovah man̈iraka irô hamaly fan̈ontanian̈a ty: “Misy Zan̈ahary hafa ma ankoatran’ny zaho?” (Isaia 44:8) Ke voninahitry maventy amintsika koa mamaly fan̈ontanian̈a zen̈y. Baka amy raha volan̈intsika ndreky ataontsika, atsika afaka mankamarin̈y fa Jehovah zaraiky fo ten̈a Zan̈ahary. Tsisy an̈aran̈a an̈abon̈abon’ny ninany. Aboakantsika amy fiain̈anantsika fa atsika ten̈a tia Jehovah ndreky tsy mivadiky aminany, ndray karakôry fitsapan̈a ataon’i Satana. Izikoa atsika man̈ano ambaka zen̈y, aboakantsika fa atsika man̈ampy amy fankamasin̈ana An̈aran̈anany.

12. Karakôry nampatanteraka faminanian̈a amin’ny Isaia 40:3, 5?

¹² Izikoa atsika miaro an̈aran’i Jehovah na lazanany, atsika mangala tahaka Jesosy Kristy. Isaia koa efa nan̈ambara tsialohaloha fa ho hisy olo hisava na ‘han̈oman̈a lalan̈an’i Jehovah.’ (Isaia 40:3) Karakôry ma nampatanteraka zen̈y? Jaona Mpan̈ano Batisa nan̈oman̈a lalan̈an’i Jesosy, fôtony izy navy tamin’ny an̈aran’i Jehovah ndreky nivolan̈a tamin’ny an̈aran’i Jehovah. (Mat. 3:3; Mar. 1:2-4; Lioka 3:3-6) Karaha ty koa koran̈in’ny faminanian̈a io: “Hiboaka tsarabe voninahitrin’i Jehovah.” (Isaia 40:5) Karakôry nampatanteraka zen̈y? Tamy Jesosy navy tambony tany teto, izy nisoloten̈a Jehovah tamy fomba lavorary, ke efa nira Jehovah foeky navy tambony tany teto.​—Jaona 12:45.

13. Karakôry hangalantsika tahaka Jesosy?

¹³ Karaha raha nataon’i Jesosy koa ataontsika Vavolombelon̈on’i Jehovah. Atsika mitondra an̈aran’i Jehovah ndreky mikoran̈a amin’olo jiaby raha maro tsara ataony. Fa baka hahavitantsika tsara raha zen̈y, atsika koa mila man̈ambara raha jiaby nataon’i Jesosy nankamasin̈ana an̈aran’i Jehovah. (Asa. 1:8) Efa Jesosy edy Vavolombelon̈on’i Jehovah faran’ny miavaka, ke atsika koa mangala tahaka modelinany. (Apok. 1:5) Fa karakôry han̈aboahantsika tsiaraikiaraiky fa ten̈a raha maventy amintsika an̈aran’i Jehovah io?

TEN̈A RAHA MAVENTY AMINTSIKA MA AN̈ARAN’I JEHOVAH IO?

14. Eraka raha azavain’ny Salamo 105:3, ino raha tsapantsika momba an̈aran’i Jehovah?

¹⁴ Atsika mirehareha amin’ny an̈aran’i Jehovah. (Vakia Salamo 105:3.) Jehovah ravoravo mare izikoa atsika mirehareha amin’ny an̈aranany. (Jer. 9:23, 24; 1 Kor. 1:31; 2 Kor. 10:17) Dikan’ny “mirehareha amy Jehovah” zen̈y, ravoravo manan̈a izy Zan̈aharintsika. Ke tombontsoa maventy amintsika man̈amia voninahitry an̈aranany ndreky miaro lazanany. Ke tsy tôkony hampamen̈atra atsika foeky man̈ambara amin’olo fiasan̈a araiky amintsika, lekoly araiky amintsika, jiranintsika, aviô olo hafa, fa atsika Vavolombelon̈on’i Jehovah! Tian’i Devoly atsika ho vôly hikoran̈a amin’olo an̈aran’i Jehovah io. (Jer. 11:21; Apok. 12:17) Ny marin̈y aminany, Satana ndreky mpaminan̈y sandokonany aby io tihan̈ano raha hahavy olo han̈adin̈a an̈aran’i Jehovah. (Jer. 23:26, 27) Fa fitiavantsika an̈aran’i Jehovah mahavy atsika tsy vôly ravoravo amin’ny an̈aranany io, “manôfotro andra.”​—Sal. 5:11; 89:16.

15. Ino ma dikan’ny mikaiky an̈aran’i Jehovah zen̈y?

¹⁵ Atsika tsy vôly mikaiky an̈aran’i Jehovah. (Joela 2:32; Rom. 10:13, 14) Dikan’ny mikaiky an̈aran’i Jehovah zen̈y, tsy vitan’ny mahay ndreky mampiasa an̈aran’ny Zan̈ahary fo. Atsika koa mila mahay toetrin’ny Zan̈ahary ndreky matoky izy, baka iô mitady fan̈ampian̈a ndreky tari-dalan̈a aminany. (Sal. 20:7; 99:6; 116:4; 145:18) Atsika koa man̈ambara an̈aranany ndreky toetrinany amin’olo, ke mandrisiky irô hibebaka ndreky han̈ano raha, baka irô hahazo sitraka amy Jehovah.​—Isaia 12:4; Asa. 2:21, 38.

16. Akôry han̈aboahantsika fa Satana mpavandy?

¹⁶ Atsika vôn̈ono hiaritry jaly noho ny an̈aran’i Jehovah. (Jak. 5:10, 11) Izikoa atsika tsy mivadiky amy Jehovah ndray an̈atin’ny sarotro, zen̈y han̈aboahantsika fa Satana mpavandy. Tamin’ny andran’i Joba, Satana nivolan̈a karaha ty momba olo jiaby manompo Jehovah: “Zay raha anan̈an’olo hamiany hiarovan̈a ain̈inany.” (Joba 2:4) Satana nivolan̈a fa noho ny fiain̈anandrô mandeha tsara fo mahavy olo manompo Zan̈ahary, fa izikoa tôjy problemo, irô hiala Zan̈ahary. Fa Joba ndraiky nan̈aboaka fa vandy raha zen̈y. Atsika koa afaka man̈aboaka fa raha zen̈y vandy. Ke na ino raha ataon’i Satana amintsika, atsika tsy hivadiky amy Jehovah foeky. Afaka matoky tsarabe atsika fa Jehovah hiaro atsika, noho ny an̈aranany.​—Jaona 17:11.

17. Izikoa 1 Petera 2:12 io zahan̈a, karakôry koa hahafahantsika man̈amia voninahitry an̈aran’i Jehovah?

¹⁷ Aboakantsika fa atsika man̈aja an̈aran’i Jehovah. (Ohab. 30:9; Jer. 7:8-11) Atsika io misoloten̈a Jehovah ndreky mitondra an̈aranany, ke raha ataontsika mety han̈amia voninahitry na hangala baraka izio. (Vakia 1 Petera 2:12.) Ke atsika tihan̈ano erakany angôvontsika hideran̈a Jehovah amy raha volan̈intsika ndreky ataontsika. Ke izikoa atsika man̈ano zen̈y, atsika han̈amia voninahitry an̈aranany, ndray atsika mbala tsy lavorary.

18. Akôry koa han̈aboahantsika fa an̈aran’i Jehovah raha ten̈a maventy amintsika? (Zahava lamariky amy pazy ambany.)

¹⁸ Lazan’ny an̈aran’i Jehovah ten̈a raha maventy amintsika tozay lazantsika tômpiny. (Sal. 138:2) Nan̈ino ma raha zen̈y ten̈a maventy? Fôtony noho ny fitiavantsika an̈aran’i Jehovah mety hahavy lazantsika ho robaka.a Jesosy vôn̈ono hofoaty fo ndray hangala baraka izy fomba nifatesany, baka han̈amezan̈a voninahitry an̈aran’i Jehovah. ‘Tsy nampan̈ino izy nalain̈a baraka’, aviô izy tsy niasaloha dila loatra tamy raha niritriretin’olo momba izy. (Heb. 12:2-4) Fan̈anaovan̈a sitrapôn’ny Zan̈ahary fo raha ten̈a nahasôfy izy.​—Mat. 26:39.

19. Karakôry raha tsapanao momba an̈aran’i Jehovah io, aviô nan̈ino?

¹⁹ Mirehareha atsika amin’ny an̈aran’i Jehovah, baka iô voninahitry amintsika kahian̈a Vavolombelon̈on’i Jehovah zen̈y. Ke atsika vôn̈ono fo hiaritry, na ino fankaratsian̈a mety hahazo atsika. Lazan’ny an̈aran’i Jehovah raha ten̈a maventy amintsika fa tsy lazantsika tômpiny. Ke irarian̈a atsika ho tapa-kevitry fo hidera an̈aran’i Jehovah, ndray ino raha ataon’i Satana amintsika. Atsika koa man̈ano ambaka zen̈y, zen̈y an̈aboahantsika fa an̈aran’i Jehovah io raha ten̈a maventy amintsika, karaha nataon’i Jesosy Kristy in̈y fo.