Nan̈ino Ten̈a Raha Maventy Tamy Jesosy An̈aran’i Jehovah?

1-2. a) Ino ma raha nataon’i Jesosy, tamin’ny alin̈y talohan’ny namonoan̈a izy? b) Ino aby fan̈ontanian̈a hidinihintsika amy lahatsoratra ty?

KAMISY alin̈y 14 Nisana, taon̈o 33 tamy zen̈y. Jesosy nankalaza Sakafo Harivan’ny Tompo niaraka tamin’ny apostolinany tsy mivadiky. Tsy ho ela, Jodasy hamadiky Jesosy, aviô hitsarain̈y Jesosy, ho voaheloko hofoaty, hampijalin̈y, aviô hivonen̈a. Irô koa fa baka nan̈ano fankalazan̈a io, Jesosy nivolan̈a raha maromaro nankahirezany irô. Aviô Jesosy nan̈ano vavaka matomboko, talohan’ny irô niala tao. Vavaka zen̈y nisoratin’ny apostoly Jaona, amy Jaona toko faha-​17.

² Ino raha nampiasaloha Jesosy tamy zen̈y, izikoa vavaka io zahan̈a? Aviô, nan̈ino vavaka nataony io nan̈aboaka ino raha ten̈a maventy taminany, tamin’izy nanompo tambony tany teto? Hidinihintsika valin’ny fan̈ontanian̈a aby zen̈y.

“AN̈ARANAO EFA NATAOKO HAINDRÔ”

3. Ino ma raha nivolan̈in’i Jesosy momba an̈aran’i Jehovah, aviô ino raha tiany havian̈a? (Jaona 17:6, 26)

³ Tamy vavaka nataony, Jesosy nivolan̈a: “An̈aran̈anao efa nataoko haindrô.” Efa indroe tamin’io Jesosy nivolan̈a fa an̈aran’i Jehovah io efa nataony haindrô mpianatranany aby io. (Vakia Jaona 17:6, 26.) Ino ny tiany havian̈a? Izy ma nan̈ambara irô an̈aran̈a mbala tsiary haindrô? Ehe, mpianatran’i Jesosy aby io Jiosy, ke irô efa nahay an̈aran’i Jehovah. Sady an̈aran̈a zen̈y mimpodimpody andrivony amy Soratra Hebreo. Ke tsy azôvy an̈aran’ny Zan̈ahary raha tian’i Jesosy koran̈iny, fa izy nan̈ampy irô mpianatranany aby io hahay tsarabe raha momba Jehovah. An̈isan’izen̈y fikasan̈anany, raha nataony ndreky mbala hataony, aviô toetrinany. Ke Jesosy fo ten̈a afaka nan̈ambara tsarabe raha zen̈y.

4-5. a) Hazavà amin’ny ohatra dikan’ny mahay tsarabe an̈aran’olo araiky zen̈y? b) Karakôry nahavy irô mpianatran’i Jesosy aby io lôso nahay tsarabe an̈aran̈a Jehovah?

⁴ Ty baka misy ohatra. Misy anti-pan̈ahy araiky amy fiangonan̈anarô ao dokotera mpandidy. Davida an̈arany. Efa taon̈o maro nahaizanao rahalahy io. Fa tandraraiky anao nila fitahan̈a meky, ke anao nandeha nalaky tamy lopitaly niasany tan̈y. Izy nampiasa fahaizan̈anany jiaby nan̈avaotany anao. Lôso mahaitianao oe rahalahy io, mandilatran’ny taloha. Ke izikoa anao fa maharen̈y an̈aranany, direkty tsaroanao raha nataony namonjian̈a anao in̈y. Tsy vitan’ny anti-pan̈ahy fo fahaizanao Davida, fa dokotera nan̈avotro anao koa.

⁵ Karaha zen̈y koa. Efa hain’ny mpianatran’i Jesosy aby io an̈aran̈a Jehovah. Fa lôso nisy dikany tsarabe tamindrô an̈aran̈a io, Jesosy koa fa nampianatra tsarabe izio irô. Nan̈ino ma atsika mivolan̈a zen̈y? Jesosy nan̈aboaka tsarabe karakôry toetrin’ny Babany tamy raha jiaby nivolan̈iny ndreky nataony. Ke irô mpianatranany aby io “nahainahay” raha momba Jehovah fo izikoa fa nitandren̈y fomba nampianaran’i Jesosy ndreky nahita fomba nitondrasany olo.​—Jaona 14:9; 17:3.

“AN̈ARAN̈ANAO NAMEZANAO ZAHO”

6. Nan̈ino ma Jesosy nivolan̈a fa an̈aran’i Jehovah namian̈a izy? (Jaona 17:11, 12)

⁶ Jesosy nivavaka nin’ny mpianatranany karaha ty: “Araova irô nohon’ny an̈aran̈anao namezanao zaho.” (Vakia Jaona 17:11, 12.) Zen̈y ma mivolan̈a fa Jehovah koa hikahian̈a Jesosy? Ehe. Aleva onon̈o fa tamy vavaka io, Jesosy nivolan̈a karaha ty momba an̈aran̈a Jehovah: “An̈aran̈anao.” Ke dikan’izen̈y, an̈aran’i Jesosy io tsy niova Jehovah. Nan̈ino fo Jesosy nivolan̈a an̈aran’ny Zan̈ahary namian̈a izy? Voanalohany, Jesosy solonten̈an’i Jehovah ndreky Mpitondra hafatranany. Baka tamin’ny an̈aran’ny Babany naviany teto, aviô izy nan̈ano asa maro matomboko tamin’ny an̈aran̈a io. (Jaona 5:43; 10:25) Aviô koa, dikan’ny an̈aran̈a Jesosy io “Jehovah io Mpamonjy.” Ke dikan’ny an̈aran’i Jesosy misy ifandraisany marikitry amin’ny an̈aran’i Jehovah.

7. Hazavà amin’ny ohatra nan̈ino ma Jesosy afaka nivolan̈a raha tamin’ny an̈aran̈a Jehovah.

⁷ Ohatra, ambasadera araiky misoloten̈a mpitondra araiky. Izy afaka mivolan̈a raha, amin’ny an̈aran’ny mpitondra io. Ke izy koa fa mivolan̈a, mitovy fahifan̈a amy mpitondra soloany ten̈a io fo. Karaha zen̈y koa, Jesosy misoloten̈a Jehovah, ke izy afaka nivolan̈a raha tamin’olo, tamin’ny an̈aran’i Jehovah.​—Mat. 21:9; Lioka 13:35.

8. Nan̈ino ma Jehovah nivolan̈a fa An̈aranany “tamy” Jesosy, nata Jesosy mbala tsy navy tambony tany teto ? (Eksodosy 23:20, 21)

⁸ Baiboly mivolan̈a fa Jesosy io Volan̈a, fôtony izy nampiasain’i Jehovah hitondra hafatranany tamin’ny anjely ndreky olombelon̈o, ke nan̈ambara raha tiany ho haindrô ndreky hataondrô. (Jaona 1:1-3) Nety Jesosy anjely nirahin’i Jehovah nikarakara Israelita aby io, tamin’irô tamy tany paiky tan̈y. Jehovah koa fa nan̈iraka Israelita aby io han̈araka volan̈an’ny anjely io, karaha ty ho izy: “Fôtony aminany ao an̈aranaka.”a (Vakia Eksodosy 23:20, 21.) An̈aran’i Jehovah “tamy” Jesosy, fôtony Jesosy nisoloten̈a Jehovah, aviô izy koa ten̈a niaro ndreky nankamasin̈y an̈aran’ny Babany.

“BABA, AMEZA VONINAHITRY AN̈ARANAO”

9. Karakôry nan̈aboahan’i Jesosy fa ten̈a raha maventy taminany an̈aran̈a Jehovah? Hazavà.

⁹ Eraka raha nidinihintsika tiô, ndray talohan’i Jesosy navy tambony tany teto, efa ten̈a raha maventy taminany an̈aran’i Jehovah. Ke tsy mahagaga izikoa misy ifandraisany tamin’ny an̈aran’i Jehovah aby raha jiaby nataon’i Jesosy tamin’izy tambony tany teto! Tamy faramparan’ny fanompoan̈anany, Jesosy niangavy: “Baba, ameza voninahitry an̈aran̈anao.” Babany direkty namaly, ke nisy feo mare baka tan-dan̈itry nivolan̈a: “Efa namezako voninahitry izio, ary zaho mbala han̈amia voninahitry izio ndraiky koa.”​—Jaona 12:28.

10-11. a) Karakôry nataon’i Jesosy nan̈amia voninahitry an̈aran’i Jehovah? (Zahava koa sary.) b) Nan̈ino ma an̈aran’i Jehova nila nankamasin̈iny ndreky nankamarin̈iny?

¹⁰ Jesosy koa nan̈amia voninahitry an̈aran’i Babany. An̈isan’ny fomba araiky nan̈anaovany zen̈y, izy nivolan̈a fa Jehovah io tsara toetry, aviô maro tsara raha ataony. Fa mbala misy raha beben’izen̈y koa nataony. An̈aran’i Jehovah baka nila nankamasin̈iny, aviô koa nila nankamarin̈iny lazanany.b Naboakan’i Jesosy fa ten̈a raha maventy fan̈anaovan̈a raha zen̈y, izikoa izy fa nampianatra irô mpan̈ara-dia izy aby io vavaka modely in̈y. Ho izy: “Anao Babanay andan̈itry an̈y, irarian̈a an̈aran̈anao ho masin̈y.”​—Mat. 6:9.

¹¹ Nan̈ino ma an̈aran’i Jehovah mila hankamasin̈iny ndreky hankamarin̈iny? Fôtony tamy zaridain̈y Edena tan̈y, Satana Devoly nangala baraka ndreky nivolan̈a raha vandy momba Zan̈ahary Jehovah. Satana nivolan̈a fa Jehovah io mpavandy, aviô nisy raha tsara tsy namezany i Adama ndreky Eva. (Gen. 3:1-5) Satana koa tihivolan̈a fa tsy pare zen̈y fomba fan̈anaovan’i Jehovah raha. Ke raha nivolan̈in’i Satana aby zen̈y nankaratsy lazan’i Jehovah na an̈aranany. Tamin’ny andran’i Joba koa, Satana nivolan̈a fa olo manompo Jehovah raha zisty tihahazo raha baka aminany fo. Mpavandy io koa nivolan̈a fa tsisy olo hanompo Jehovah, izikoa tôjy raha sarotro. (Joba 1:9-11; 2:4) Ke nila nambela nandeha fotoan̈a, misy ahitan̈a azôvy ny mpavandy, Jehovah sa Satana.

“ZAHO MAHAFOE AIN̈INAKA”

12. Vôn̈ono han̈ino ma Jesosy noho ny fitiavany an̈aran̈a Jehovah?

¹² Jesosy tia Jehovah. Izy nan̈ano erakan’ny vitany nankamasin̈ana ndreky nankamarin̈ana an̈aran’i Jehovah. Karaha ty ho Jesosy: “Zaho mahafoe ain̈inaka.” (Jaona 10:17, 18) Ke izy vôn̈ono hofoaty baka amin’ny an̈aran’i Jehovah.c Adama ndreky Eva olo voanalohany lavorary tambony tany teto. Fa irô nivadiky tamy Jehovah, ke nilan̈y tamy Satana. Fa tsy karaha zen̈y Jesosy. Izy vôn̈ono nandeha tambony tany teto, han̈aboaka tsarabe fitiavany Jehovah. Ke izy nan̈araka volan̈an’i Jehovah fo tamy raha jiaby nataony ndreky nivolan̈iny. (Heb. 4:15; 5:7-10) Izy tsy nivadiky firaka izy naty tamin’ny hazofijalian̈a. (Heb. 12:2) Naboakany tamy zen̈y fa izy tia Jehovah ndreky an̈aran’i Jehovah.

13. Nan̈ino ma efa Jesosy edy ten̈a nahavita nan̈aporofo fa Satana mpavandy? (Zahava koa sary.)

¹³ Raha jiaby nataon’i Jesosy nan̈aboaka fa Satana mpavandy fa tsy Jehovah! (Jaona 8:44) Efa Jesosy edy olo ten̈a nahay tsarabe Jehovah. Ke izikoa mba nisy narin̈y edy raha nivolan̈in’i Satana nankaratsian̈a Jehovah in̈y, Jesosy edy olo tôkony hahay raha momba zen̈y. Fa Jesosy tapa-kevitry niaro lazan’i Jehovah, na an̈aranany. Baka iô, Jehovah ndray tsy niaro Jesosy, izy mbala vôn̈ono fo hofoaty fa tsy nivadiky tamy Babany be fitiavan̈a io.​—Mat. 27:46.d

“EFA VITAKO ASA NAN̈IRAHANAO ZAHO”

14. Karakôry nan̈amezan’i Jehovah hatsaran̈a i Jesosy nohon’izy tsy nivadiky?

¹⁴ Tamy vavaka nataon’i Jesosy tamin’ny alin̈y talohan’ny nifatesany, izy nahavita nivolan̈a: “Efa vitako asa nan̈irahanao zaho.” Izy natoky fa Jehovah han̈amia hatsaran̈a izy, fôtony izy tsy nivadiky taminany. (Jaona 17:4, 5) Ke tsy nanin̈enan’i Jesosy nan̈ambela fatokisan̈anany tamy Babany io. Tsy nambelan’i Jehovah tavela tam-pasan̈a tao i Jesosy. (Asa. 2:23, 24) Jehovah namelon̈o Jesosy, baka iô nan̈amia izy toeran̈a an̈abo, an-dan̈itry an̈y. (Fil. 2:8, 9) Aviô, tafaran’izin̈y, Jesosy lôso Mpanjakan’ny Fanjakan̈an’ny Zan̈ahary. Ino raha hataon’ny Fanjakan̈an’ny Zan̈ahary io? Tapany faharoe amy vavaka modely in̈y mikoran̈a karaha ty: “Irarian̈a Fanjakan̈anao ho avy! Irarian̈a koa sitrapônao [Jehovah] hatao ambony tany eto, karaha an-dan̈itry an̈y!”​—Mat. 6:10.

15. Ino koa raha handeha hataon’i Jesosy?

¹⁵ Teteky iô, Jesosy hiady amy fahavalon’ny Zan̈ahary, baka iô handripaka olo ratsy fan̈ahy, amin’ny Aramagedona. (Apok. 16:14, 16; 19:11-16) Afara helin’izen̈y, Satana hatsipiny mare amy “lavaka tsy hita farany”, ke tsy hahavita raha eky izy koa fa migadra ao. (Apok. 20:1-3) Aviô amy zay Jesosy hanjaka an̈atin’ny arivo taon̈o, ke han̈ampody fiadan̈ana ambony tany eto ndreky han̈ampy olombelon̈o hanjary lavorary. Izy hamelon̈o olo maty. Tany jiaby hanjary paradisa. Ho tanteraka eky amy zen̈y fikasan̈an’i Jehovah!​—Apok. 21:1-4.

16. Han̈ano karakôry fiain̈ana, izikoa fa tapitry Fanjakan̈a Arivo Taon̈o?

¹⁶ Han̈ano karakôry fo fiain̈ana, izikoa fa tapitry Fanjakan̈a Arivo Taon̈o? Tsy ho hisy eky olo mpanota, fôtony olo jiaby efa lavorary. Olombelon̈o amy zen̈y efa tsy mila mangataka familan-keloko miôrin̈y amy sôron̈on’i Jesosy eky, fôtony irô efa tsy mpanota. Baka iô koa, efa tsy mila mpan̈elan̈elan̈a ndreky mpisôron̈o eky. Aviô, ‘hifoan̈ana koa fahavalo farany, fahafatesan̈a [baka tamin’ny Adama] io.’ Ho foan̈a koa fasan̈a jiaby. Olo naty efa mimpody velon̈o. Ho lavorary aby olo jiaby ambony tany eto.​—1 Kor. 15:25, 26.

17-18. a) Ino raha ho hisy, izikoa fa tapitry Fanjakan̈a Arivo Taon̈o io? b) Ino raha hataon’i Jesosy, izikoa fa avy fotoan̈a hamaran̈any Fanjakan̈anany? (1 Korintianina 15:24, 28) (Zahava koa sary.)

¹⁷ Ino koa raha ho hisy, izikoa fa tapitry Fanjakan̈a Arivo Taon̈o io? Ho hisy raha miavaka handalo amy zen̈y. Olo jiaby samy han̈eky fa Jehovah io masin̈y ndreky man̈ano ny rariny. Tamy zaridain̈y Edena tan̈y in̈y, Satana nivolan̈a fa Jehovah mpavandy, baka iô tsisy fitiavan̈a foeky fomba fitondrasany olombelon̈o. Ke rango tamy zen̈y, lan̈iany nanompo Jehovah efa nan̈aboaka impirimpiry fa izy ten̈a mahay mitondra. Ke amy faran’ny Fanjakan̈a Arivo Taon̈o, hankamarin̈iny amy fomba feno lazan’i Jehovah. Ho voaporofo fa Jehovah Babantsika an-dan̈itry an̈y io ten̈a be fitiavan̈a.

¹⁸ Afaran’ny Fanjakan̈a Arivo Taon̈o an̈y, olo jiaby hahay fa vandy aby raha jiaby nivolan̈in’i Satana momba Jehovah in̈y. Ino raha handeha hataon’i Jesosy, izikoa fa tapitry fotoan̈a hanjakany? Izy ma han̈ano karaha ataon’i Satana ke handeha hanohitry Jehovah? Ehe! (Vakia 1 Korintianina 15:24, 28.) Jesosy han̈ampody Fanjakan̈a io amy Babany. Izy han̈eky fitondrasan̈an’i Jehovah. Ke Jesosy tsy han̈ano karaha Satana, fa izy vôn̈ono hahafoe raha jiaby, fôtony tiany Jehovah.

19. Raha karakôry ma an̈aran’i Jehovah io tamy Jesosy?

¹⁹ Ke tsy mahagaga izikoa Jehovah vôn̈ono han̈amia Jesosy an̈aranany! Jesosy nahavita nan̈aboaka tsarabe karakôry Babany io. Ke raha karakôry an̈aran̈a Jehovah io tamy Jesosy? Izio raha ten̈a maventy taminany. Izy vôn̈ono hofoaty baka tamin’ny an̈aran̈a io, baka iô izy koa vôn̈ono han̈ampody raha jiaby amy Jehovah, amy faran’ny Fanjakan̈a Arivo Taon̈o. Karakôry mety hangalantsika tahaka modelin’i Jesosy zen̈y? Handiniky valin’ny fan̈ontanian̈a zen̈y atsika amy lahatsoratra fan̈araka ty.