Matokisa fa Jehovah Tia Anao

1. Nan̈ino ma anao nanokan-ten̈a tamy Jehovah ? (Zahava koa sary.)

TSAROANAO ma tamin’ny anao nanokan-ten̈a tamy Jehovah? Nan̈ano fanapahan-kevitry zen̈y anao, fôtony anao nanjary nahay izy ndreky tia izy. Anao nampan̈anten̈a izy fa han̈ano voalohan-toeran̈a sitrapônany amy fiain̈ananao jiaby, ndreky ho tia izy fo amy fônao jiaby, vatan̈anao jiaby, jerinao jiaby ndreky angôvonao jiaby. (Mar. 12:30) Rango tamy zen̈y, nahainitombo fo fitiavanao izy. Ke izikoa misy olo man̈ontany anao: “Anao ma ten̈a tia Jehovah?” Tsy hisalasala anao hamaly: “Ia ke. Tsisy olo na raha, tiako mandilatra izy!”

2-3. Tian’i Jehovah hatoky ino atsika, aviô ino raha hidinihintsika amy lahatsoratra ty? (Jeremia 31:3)

² Akôry ndraiky izikoa misy olo man̈ontany anao: “Anao ma matoky fa Jehovah tia anao?” Anao ma hisalasala hamaly izy, fôtony mieritreritry fa anao tsy vain̈y tian’i Jehovah? Misy ranabavy araiky zay tsy nahatsapa fitiavan’ny baba zen̈y tamin’izy mbala hely. Ho izy: “Haiko zaho tia Jehovah, tsisy fisalasalan̈a. Fa matetiky zaho misalasala asa Jehovah tia zaho.” Ke ino raha han̈ampy anao hahay fa Jehovah ten̈a tia anao?

³ Tian’i Jehovah anao ho resy lahatra fa izy tia anao. (Vakia Jeremia 31:3.) Ny marin̈y aminany, Jehovah nitaon̈o anao han̈aton̈o izy. Aviô tamin’ny anao nanokan-ten̈a taminany ndreky natao batisa, anao nahazo raha tsara oe: Fitiavan̈anany ndreky tsy fivadihan̈anany. Ke dikan’izen̈y, izy tia anao mare ndreky tsy hiala anao foeky. Zen̈y mandrisiky izy hihevitry mpanomponany tsy mivadiky, an̈isan’izen̈y anao, ho ‘fanan̈ananany valera.’ (Mal. 3:17, l.p.a.) Tian’i Jehovah anao hahatsapa karaha nataon’ny apostoly Paoly, natoky tsarabe nanoratra karaha ty: “Zaho matoky fa na fahafatesan̈a, na fiain̈ana, na anjely, na fanjakan̈a, na raha amy ziôty, na raha ho avy, na angôvo, na ny an̈abo, na ny ambany, na zavaboary hafa, tsisy hahavita hampisaraka atsika amy fitiavan̈an’ny Zan̈ahary.” (Rom. 8:38, 39) Amy lahatsoratra ty, atsika handiniky nan̈ino atsika mila mampitombo fatokisantsika fa Jehovah tia atsika, aviô ino raha han̈ampy atsika han̈ano zen̈y.

NAN̈INO ATSIKA MILA MAN̈EKY FA JEHOVAH TIA ATSIKA?

4. Akôry hahafahantsika miady amy tetiky faran’ny ratsy ampiasain’i Satana?

⁴ Atsika koa man̈eky fa tian’i Jehovah, atsika mahavita manohitry araiky amy “tetiky ratsin’i Satana.” (Efes. 6:11) Satana han̈ano erakan’ny vitany hisakana atsika tsy hanompo Jehovah. Araiky amy tetiky faran’ny ratsy ampiasain’i Satana, izy mivolan̈a fa Jehovah tsy tia atsika. Vandy fo zen̈y. Aza adin̈a foeky fa Satana io mpan̈araraotro. Matetiky amin’ny atsika malemy in̈y, iô izy manafiky atsika. Mety lera atsika kivy tamy raha nataontsika taloha tan̈y izio, na raha atrefintsika amy ziô, na koa raha mbala tsy haintsika amin’ny hoavy. (Ohab. 24:10) Satana karaha lion man̈araraotro rembinany tsisy mpiaro in̈y, ke araraotiny atsika kivy in̈y, baka tsy hanompo Jehovah eky. Fa atsika koa tsy vôly mankafatatra fatokisantsika fa Jehovah tia atsika, ho vôn̈ono ‘hanohitry’ Satana ndreky tetiky ratsinany aby io fo atsika.​—1 Pet. 5:8, 9; Jak. 4:7.

5. Nan̈ino atsika mila mahatsapa fa Jehovah tia atsika?

⁵ Atsika koa man̈eky fa tian’i Jehovah, atsika hahaiharikitry izy fo. Nan̈ino atsika mivolan̈a zen̈y? Atsika koa fa niforôn̈in’i Jehovah, nataony mahay tia olo ndreky hitiavin’olo. Valin’ny fitiavan̈a baka efa fitiavan̈a edy. Ke arakaraka hahatsapantsika fa Jehovah tia atsika, hahaiho tia izy fo atsika. (1 Jaona 4:19) Baka iô, arakaraka itiavantsika izy mare, izy hahaiho tia atsika fo. Baiboly mivolan̈a mazava amintsika: “Man̈aton̈a Zan̈ahary anarô, fa izy han̈aton̈o anarô.” (Jak. 4:8) Akôry fo hahavy atsika hatoky fa Jehovah tia atsika?

INO HAN̈AMPY ATSIKA HATOKY FA JEHOVAH TIA ATSIKA?

6. Ino raha mety hangatahinao amy vavaka, baka anao matoky fa Jehovah tia anao?

⁶ Farita tsara vavakanao aviô aza malaky rivan̈a. (Lioka 18:1; Rom. 12:12) Mangataha matetiky amy Jehovah isan’andra izikoa ilain̈y, baka ho mira amy fahitany izy fomba fahitanao ain̈inao. Izikoa anao man̈amelo-ten̈a, tsy mora miady amy zen̈y. Kanefa aleva onon̈o fa Jehovah beben’ny fônao. (1 Jaona 3:19, 20) Anao hainy mandilatra fahaizanao anao. Hitany koa raha mety tsy ho hitanao. (1 Sam. 16:7; 2 Tan. 6:30) Ke aza misalasala ‘mikoran̈a’ aminany raha an̈aty fônao, ndreky mangataka izy han̈ampy anao hatoky fa anao tiany. (Sal. 62:8) Aviô man̈anaova raha mifan̈araka amy vavakanao, ke areva irô sôso-kevitry fan̈araka aby ty.

7-8. Karakôry han̈amezan’ny Salamo toky atsika fa Jehovah tia atsika?

⁷ Sambora amy volan̈anany Jehovah. Nampiasa angôvonany Jehovah, nan̈ampian̈a irô mpanoratra Baiboly aby io han̈azava karakôry tsarabe izy. Zahava baka fomba tsara nivolan̈an’i Davida mpan̈ano Salamo momba Jehovah ty: “Jehovah marikitry olo tôrotôro fô, ary izy mamonjy lan̈iany olo kivy.” (Sal. 34:18) Ke leran’ny anao kivy in̈y, anao mety hahatsiaro latsatokana foeky. Fa Jehovah mampan̈anten̈a fa amy fotoan̈a karaha zen̈y, izy marikitry anao, fôtony hainy fa amy zen̈y anao ten̈a mila izy man̈ampy. Amy salamo hafa, ty koa raha nisoratin’i Davida: “Avoria an̈atin’ny sajoanao ranomasonaka.” (Sal. 56:8) Hitan’i Jehovah lera anao sahiran̈a. Izy miasaloha mare aminao ndreky amy raha iaretanao. Karaha teten-drano hely baka an̈aty sajoan’olo man̈ano dia lavitry, mamakivaky tany paiky in̈y, valera amy Jehovah ranomasonao, aviô azony onon̈o fotoan̈a jiaby niaretanao ndreky nampitomoan̈y anao io. Karaha ty koa vakintsika amy Salamo 139:3: “Hainao tsara [Jehovah], lalan̈anaka jiaby.” Jehovah mahita raha jiaby ataonao, fa raha tsara ataonao fo ten̈a zahavany. (Heb. 6:10) Nan̈ino? Fôtony izy mankasitraka mare ezaka jiaby ataonao, baka hamparavoravo izy.a

⁸ Baka amin’ny andininy mankahery karaha zen̈y an̈aty Volan̈anany ao, Jehovah mira mivolan̈a karaha ty amintsika: “Tiako hainao fa be fitiavako anao, aviô zaho miasaloha aminao mare.” Kanefa efa nikoran̈intsika fa Satana mivolan̈a fa Jehovah zen̈y tsy tia anao, kanefa vandy fo zen̈y. Ke lera anao misalasala tsao tsy tian’i Jehovah in̈y, mangalà onon-draha hely, man̈ontania ten̈a karaha ty: ‘Azôvy ma atokisako: “Baban’ny vandy” sa “Zan̈aharin’ny fahamarin̈ana”?’​—Jaona 8:44; Sal. 31:5.

9. Ino toky amezan’i Jehovah lan̈iany olo tia izy? (Eksodosy 20:5, 6)

⁹ Iritrireta fomba hamalian’i Jehovah fitiavantsika izy. Diniha baka volan̈an’i Jehovah tamy Mosesy ndreky tamindrô Israelita aby io. (Vakia Eksodosy 20:5, 6.) Jehovah mampan̈anten̈a fa izy tsy vôly ho tia ndreky tsy hivadiky amin’olo tia izy. Volan̈a aby zen̈y man̈amia toky atsika fa Zan̈aharintsika tsy mivadiky io tsy maintsy ho tia lan̈iany olo tia izy. (Neh. 1:5) Ke izikoa anao sendra misalasala asa Jehovah tia anao ankitin̈y, mangalà onon-draha hely, ke man̈ontania karaha ty: ‘Zaho ma tia Jehovah?’ Aviô diniha ty: Izikoa anao tia izy ndreky mifen̈y man̈ano raha mamparavoravo izy, matokisa fa izy koa ten̈a tia anao mare. (Dan. 9:4; 1 Kor. 8:3) Dikan’izen̈y, anao koa matoky fa anao tia Jehovah, anao tsy mila misalasala fa izy tia anao. Matokisa fa izy ho tia anao fo ndreky tsy han̈ary anao foeky.

10-11. Karakôry ma tian’i Jehovah hiheveranao vidim-pan̈avotan̈a io? (Galatianina 2:20)

¹⁰ Saintsain̈a vidim-pan̈avotan̈a. Jesosy Kristy nan̈ano sôron̈o ain̈inany in̈y, kadô faran’ny maventy namezan’i Jehovah olombelon̈o. (Jaona 3:16) Fa izio ma kadô namian̈a anao? Ia! Diniha baka raha niain̈an’ny apostoly Paoly. Maro fahotan̈a maventy nataony talohan’izy nanjary Kristianin̈y, aviô izy mbala niady tamy tsy fahalavorarian̈anany tômpiny koa. (Rom. 7:24, 25; 1 Tim. 1:12-14) Fa izy mbala nieritreritry fa vidim-pan̈avotan̈a io kadô namian’i Jehovah izy. (Vakia Galatianina 2:20.) Aza adin̈a fa Jehovah nan̈iraka apostoly Paoly nanoratra irô volan̈a aby io. Aviô, natao hampianaran̈a atsika aby raha jiaby voasoratra amy Baiboly ao. (Rom. 15:4) Hita amy raha nivolan̈in’i Paoly io karakôry tian’i Jehovah hiheveranao vidim-pan̈avotan̈a io: Kadô namezany anao. Izikoa karaha zen̈y fiheveranao izio, anao hahaihatoky fo fa Jehovah tia anao ankitin̈y.

¹¹ Atsika mankasitraka Jehovah nandefa Jesosy tambony tany tatỳ hofoaty namonjy atsika. Fa dian’i Jesosy tatỳ koa nan̈ambara olo ny marin̈y momba Zan̈ahary. (Jaona 18:37) Tafiditry an̈atin’ny fahamarin̈ana io koa fiheveran’i Jehovah irô zanany aby io.

AKÔRY AN̈AMPIAN’I JESOSY ATSIKA HATOKY FITIAVAN’I JEHOVAH?

12. Nan̈ino atsika matoky raha volan̈in’i Jesosy momba Jehovah?

¹² Tamy Jesosy tambony tany tatỳ, namparavoravo izy nan̈ambara karakôry Jehovah zen̈y. (Lioka 10:22) Atsika tôkony hatoky volan̈an’i Jesosy momba Jehovah io. Nan̈ino? Fôtony Jesosy efa niaraka nipetraka tamy Jehovah tan-dan̈itry tan̈y, talohan’ny naviany tambony tany teto. (Kol. 1:15) Hain’i Jesosy fitiavan’ny Babany izy. Hitany koa fitiavan’i Jehovah irô anjely tsy nivadiky, aviô irô olo jiaby tsy mivadiky aminany ambony tany eto. Ke akôry an̈ampian’i Jesosy olo hatoky fa Zan̈ahary tia irô?

13. Ino raha momba Jehovah tian’i Jesosy haintsika?

¹³ Tian’i Jesosy hitovy amy ninany fomba fahitantsika Jehovah. Amy Filazantsara ao, mandilatran’ny 160 Jesosy mikaiky Jehovah “Baba.” Aviô, izy koa fa nikoran̈a tamy mpan̈ara-dia izy, izy natetiky nivolan̈a Jehovah “Babanarô” na “Babanarô an-dan̈itry an̈y.” (Mat. 5:16; 6:26) Fan̈azavan̈a momba Matio 5:16 mivolan̈a: “Irô mpanompon’ny Zan̈ahary taloha tan̈y nampiasa an̈aram-boninahitry an̈abo izikoa fa nan̈azava momba Jehovah ndreky nikoran̈a taminany. An̈isan’izen̈y ‘Faran’ny Mahery’, ‘Faran’ny An̈abo’ ndreky ‘Mpamôron̈o Be Voninahitry.’ Fa Jesosy ndraiky natetiky nampiasa an̈aram-boninahitry tsotra, karaha ataon’ny ‘Baba.’ Zen̈y nan̈aboahany fa Zan̈ahary mifandray marikitry amy mpanomponany.” Tian’i Jesosy hitovy amy ninany koa fomba fiheverantsika Jehovah. Ke Jesosy nampianatra atsika fa Jehovah ten̈a be fitiavan̈a, mira baba ten̈a tia zanaka in̈y. Atsika iziôty handiniky ohatra aroe nampiasan’i Jesosy an̈aram-boninahitry “Baba” io.

14. Karakôry nan̈aboahan’i Jesosy fa atsika tsiaraikiaraiky io valera amy Babantsika an-dan̈itry an̈y? (Matio 10:29-31) (Zahava koa sary.)

¹⁴ Voanalohany, diniha baka volan̈an’i Jesosy amy Matio 10:29-31. (Vakia.) Fody io vôron̈o madiniky. Irô io tsy ho tia Jehovah ndreky tsy hanompo izy foeky. Kanefa, ndray araiky amindrô io fo latsaka an-tany, efa hitan’ny Babantsika io edy. Baka iô koa, valera aminany irô io. Ke tsy mbala mandilatra zen̈y ma mpanomponany tsiaraikiaraiky tsy mivadiky aminany sady tia izy! Karaha ty volan̈in’ny fan̈azavan̈a andininy faha-30, momba “firaka amy fan̈evanarô mbala voakôntiny fo” io: “Fahaizan’i Jehovah tsarabe momba raha mandalo an̈atin’ny minity tsiaraikiaraiky, man̈amia toky atsika fa izy ten̈a miasaloha amintsika.” Ke tian’i Jesosy atsika hatoky fa atsika tsiaraikiaraiky io valera amy Babantsika an-dan̈itry an̈y.

15. Man̈ambara ino aminao momba Babanao an-dan̈itry an̈y volan̈an’i Jesosy amy Jaona 6:44?

¹⁵ Diniha koa baka fomba faharoe nampiasan’i Jesosy volan̈a “Baba” io. (Vakia Jaona 6:44.) Babanao an-dan̈itry an̈y lastiô nitaon̈o anao han̈araka fahamarin̈ana. Nan̈ino ma izy nitaon̈o anao? Fôtony hitany fa anao manan̈a toetry tsara maro. (Asa. 13:48) Fan̈azavan̈a momba Jaona 6:44 mivolan̈a fa raha tan̈aty jerin’i Jesosy tiô mety raha nivolan̈in’i Jeremia, amin’ny andininy ioren̈an’ny lahatsoratra ty: ‘Zaho nitaon̈o anao han̈aton̈o zaho; fôtony zaho tia anao aviô tsy mivadiky aminao.’ (Jer. 31:3; ampiràn̈a amin’ny Hosea 11:4.) Diniha baka ino dikan’izen̈y. Babantsika be fitiavan̈a an-dan̈itry an̈y io mahita toetry tsaranao fo, ndray anao tsy mahita zen̈y.

16. a) Ino ma raha nampianarin’i Jesosy atsika, aviô nan̈ino atsika tôkony hatoky izy? b) Ino man̈ampy anao hatoky fa Jehovah io ten̈a mahay raha ilainao? (Zahava efajoro “Izy Baba Tadiavintsika Jiaby.”)

¹⁶ Jesosy koa fa nivolan̈a fa Jehovah io Babantsika, izy nira nivolan̈a: “Tsy Babako zaho zaraiky fo Jehovah io fa Babanarô koa. Aviô izy tia anarô ndreky miasaloha aminarô tsiaraikiaraiky.” Ke izikoa ndraikindraiky anao misalasala momba fitiavan’i Jehovah anao, mangalà onon-draha hely ke man̈ontania ten̈a karaha ty: ‘Jesosy nivolan̈a ny marin̈y fo, aviô izy ten̈a mahay Babantsika io, ke zaho edy tsy tôkony hatoky raha nivolan̈iny?’​—1 Pet. 2:22.

MIFEN̈A FO HATOKY FA JEHOVAH TIA ANAO

17. Nan̈ino atsika tsy mila vôly man̈ano raha hahavy atsika hatoky fa Jehovah tia atsika?

¹⁷ Atsika tsy mila vôly man̈ano raha hahavy atsika hatoky fa Jehovah tia atsika. Efa nianarantsika taloha tarỳ fa Satana fahavalontsika fetsy be io, tsy vôly han̈ano raha hamparivan̈a atsika hanompo Jehovah. Izy mifen̈y mare man̈ano zen̈y. Ke baka atsika ho vôly hanompo Jehovah, Satana hifen̈y fo han̈ano raha hampihen̈y fatokisantsika fitiavan’ny Zan̈ahary atsika. Fa atsika ndraiky tsy tôkony hino vandin’i Satana!​—Joba 27:5.

18. Akôry hahavy anao hahaihatoky fo fitiavan’i Jehovah anao?

¹⁸ Baka anao hahaihatoky fo fa Jehovah tia anao, mifen̈a fo mivavaka aminany, amy zen̈y ho mira amy ninany fomba fahitanao anao. Iritrireta mare karakôry fivolan̈andrô mpanoratra Baiboly aby io fitiavan’i Jehovah lan̈iany olo tia izy. Diniha fomba hamaliany fitiavan’olo izy; izy tsy vôly ho tia lan̈iany olo tia izy. Saintsain̈a koa nan̈ino vidim-pan̈avotan̈a io namian’i Jehovah anao. Aviô matokisa fa Jehovah io Babanao an-dan̈itry an̈y, eraka raha nivolan̈in’i Jesosy in̈y. Ke izikoa misy olo man̈ontany: “Anao ma matoky fa Jehovah tia anao?” Tsy hisalasala anao hamaly: “Ia, izy tia zaho! Ke zaho isan’andra hifen̈y han̈aboaka aminany fa zaho koa tia izy.”