Fitiavan̈an’ny Zan̈ahary Maharitry Mandrakizay

1-2. Ino raha sarotro atrefin’ny Kristianin̈y maro?

MINIMINIA hely baka misy sambo araiky tatran’ny andra ratsy an̈ivon-dranomasin̈y. Sambo io mantrentreky, manonga mijotso azon’ny daroba. Ke izikoa tsisy olo mahazo onon̈o mandatsaka andrisa, sambo io indesin’ny daroba be io amy zay tany tiany. Andrisa io hiaro sambo io tsy ho dobo, aviô hidôko an-tany araiky fo, ke tsy hafefikin’ny rano an̈atin’ny andra ratsy io.

² Izikoa anao miatriky fitsapan̈a maresaka be, anao mety hahatsapa karaha sambo tatran’ny andra ratsy io. Mialamboetry mare baka fihetseham-pônao. Niany anao mahatsapa tian’i Jehovah ndreky ampiany, fa amaray anao fa misalasala koa tsao tsy hitany foeky raha mahazo anao. (Sal. 10:1; 13:1) Mety misy namanao mankahery anao, ke anao karaha mahazo angôvo hely. (Ohab. 17:17; 25:11) Fa iô fo anao efa lôso tafisalasala koa. Anao aby mety hieritreritry fa tsao efa narian’i Jehovah. Ke akôry ataonao handatsaka andrisa, amy fotoan̈a karaha zen̈y? Na koa, akôry hahavy anao hino ndreky hatoky fo fa Jehovah tia anao ndreky hanohan̈a anao?

3. Ino ma dikan’ny “be fitiavan̈a ndreky tsy mivadiky” voakoran̈a amy Salamo 31:7 ndreky 136:1, aviô nan̈ino atsika mivolan̈a fa Jehovah ten̈a miavaka amy fitiavan̈a? (Zahava koa sary.)

³ An̈isan’ny raha araiky han̈ampy anao tsy ho voahozonkozon̈o izikoa anao fa tôjy fitsapan̈a, fangalan̈a onon̈o fa Jehovah be fitiavan̈a sady tsy mivadiky. (Vakia Salamo 31:7; 136:1.) Dikan’ny “be fitiavan̈a ndreky tsy mivadiky” io, fitiavan̈a mare sady maharitry ela anan̈an’olo araiky amin’olo hafa. Jehovah ten̈a manan̈a fitiavan̈a karaha zen̈y. Ndray Baiboly aby mivolan̈a fa izy “be fitiavan̈a salakady tsy mivadiky.” (Eks. 34:6, 7) Karaha ty koa koran̈in’ny Baiboly momba Jehovah: “Anao be fitiavan̈a sady tsy mivadiky amin’olo jiaby mikaiky anao.” (Sal. 86:5) Mba diniha hely baka dikan’izen̈y: Jehovah tsy man̈ary foeky mpanomponany tsy mivadiky! Ke fangalan̈a onon̈o fa Jehovah tsy mivadiky, han̈ampy anao tsy ho voahozonkozon̈o, lera anao tôjy fitsapan̈a sarotro mare.​—Sal. 23:4.

FAMPIANARAN̈A FÔTOTRO AMY BAIBOLY AO JEHOVAH BE FITIAVAN̈A

4. Man̈ameza ohatra momba fampianaran̈a fôtotro amy Baiboly, aviô hazavà nan̈ino atsika lôso tsy voahozonkozon̈o, koa fa nahay zen̈y.

⁴ Fomba araiky han̈ampy anao tsy ho voahozonkozon̈o koa fangalan̈a onon̈o fa fitiavan̈an’i Jehovah io an̈isan’ny fampianaran̈a fôtotro amy Baiboly. Ino ma dikan’ny “fampianaran̈a fôtotro amy Baiboly” zen̈y? Anao mety hieritreritry fa izio irô fahamarin̈ana nianaranao baka tamy Baiboly. Ohatra, anao nianatra fa Jehovah an̈aran̈an’ny Zan̈ahary, Jesosy Zanaka lahitaokan̈anany, olo maty efa tsisy raha hay, aviô ho hisy Paradisa hiain̈an’olo mandrakizay ambony tany eto. (Sal. 83:18; Mpito. 9:5; Jaona 3:16; Apok. 21:3, 4) Anao koa fa nino fampianaran̈a aby zen̈y, anao efa tsy nora nihozonkozon̈iny eky. Nan̈ino? Fôtony efa lôso hainao fa azo antoko irô fampianaran̈a aby io. Hizahavantsika nan̈ino fangalan̈a onon̈o fa fitiavan̈an’i Jehovah io an̈isan’ny fampianaran̈a fôtotro, han̈ampy anao tsy hieritreritry eky fa Jehovah tsy mijery na tsy mahita raha mahazo anao.

5. Hazavà akôry hahafahan’olo araiky miala amy fampianaran-diso.

⁵ Tamin’ny anao somilan’ny nianatra Baiboly, ino nan̈ampy anao hiala tamy fampianaran̈a diso? Ohatra, nety nampiran̈inao raha ampianarin’ny fivavahan̈a nisy anao ndreky raha ampianarin’ny Soratra Masin̈y. Diniha baka ohatra ty. Anao taloha nety nino fa Jesosy Zan̈ahary Faran’ny Mahery. Fa anao koa fa nianatra Baiboly, anao nan̈ontany ten̈a karaha ty: Ten̈a marin̈y ma fampianaran̈a zen̈y? Ke anao koa fa baka nandiniky tsarabe porofo tamy Soratra Masin̈y, lôso hainao fa tsy marin̈y raha zen̈y. Ke nialanao fampianaran̈a diso in̈y. Fa anao amy zay lôso nino fahamarin̈ana baka amy Baiboly ty: Jesosy io “talan̈olo amy zavaboary jiaby”, aviô izy “lahitaokan̈an’ny Zan̈ahary.” (Kol. 1:15; Jaona 3:18) Marin̈y ndraiky fa fampianaran̈a diso koa fa “miôrin̈y mare”, sarotro ialan̈a. (2 Kor. 10:4, 5) Fa anao koa efa nahavita niala tamizio, anao efa tsy tihimpody amizio eky.​—Fil. 3:13.

6. Nan̈ino atsika mino fa Jehovah “be fitiavan̈a ndreky tsy mivadiky mandrakizay”?

⁶ Mety hataonao karaha zen̈y koa raha ampianarin’ny Baiboly momba fitiavan̈an’i Jehovah io. Lera anao tôjy fitsapan̈a ke lôso misalasala momba fitiavan’i Jehovah anao, man̈ontania ten̈a: ‘Ten̈a marin̈y edy ma raha iritriretiko zen̈y?’ Ke raha mampisalasala anao io ampiràn̈a amy Salamo 136:1, andinin-teny ioren̈an’ny lahatsoratra ty. Nan̈ino ma Jehovah mampiran̈a fitiavan̈anany io amy “tsy fivadihan̈a”? Aviô nan̈ino hevitry “izy be fitiavan̈a sady tsy mivadiky mandrakizay” io mimpody in-26 amy salamo io? Eraka raha efa nidinihintsika in̈y, tsy miovaova fitiavan’i Jehovah vahoakanany, ke raha zen̈y an̈isan’ny fampianaran̈a fôtotro amy Baiboly ao. Izio mira irô fampianaran̈a jiaby nikenao baka tamy Volan̈a Zan̈ahary in̈y fo. Ke tsy marin̈y foeky izikoa anao mieritreritry fa anao tsisy dikany amy Jehovah na tsy tiany. Aza mino zen̈y, karaha ataonao tsy mino irô fampianaran-diso aby io fo!

7. Man̈ameza andinin-teny man̈aboaka fa Jehovah tia anao.

⁷ Amy Baiboly koa misy porofo maro ahitan̈a fa Jehovah tia atsika. Ohatra, Jesosy nivolan̈a tamy mpan̈ara-dia izy aby io: “Anarô mbala valera mare mandilatra fody maro.” (Mat. 10:31) Jehovah lastiô koa nivolan̈a tamy vahoakanany: “Zaho han̈ano raha hampafatatra anao. Ia, zaho han̈ampy anao. Zaho hitana anao mare amy tan̈anaka ankavanan̈a, tan̈ana man̈ano ny rariny.” (Isaia 41:10) Mazava tsarabe volan̈a aby zen̈y. Jesosy tsy nivolan̈a: ‘Anarô mety mbala ho valera mare’, aviô Jehovah tsy nivolan̈a: ‘Zaho mety han̈ampy anao.’ Fa irô nivolan̈a: “Anarô mbala valera mare”, aviô “Zaho han̈ampy anao.” Ke izikoa anao mbala misalasala mare momba fitiavan’i Jehovah anao amy lera anao miatriky fitsapan̈a, andinin-teny aby io tsy vitan’ny han̈ampy anao hahatsiaro tian’i Jehovah fo fa, han̈ampy anao hahay tsarabe fitiavany anao. Volan̈a aby io ten̈a marin̈y. Ke izikoa anao mivavaka momba raha mampisalasala anao ndreky misaintsain̈y andininy aby io, anao koa hahavita hivolan̈a raha koran̈in’ny 1 Jaona 4:16 ty: “Nanjary haintsika sady inoantsika fa Zan̈ahary io tia atsika.”a

8. Ino raha mety hataonao, izikoa anao ndraikindraiky mbala misalasala momba fitiavan’i Jehovah anao?

⁸ Akôry fo izikoa anao mbala misalasala momba fitiavan’i Jehovah anao fo ndraikindraiky? Ampiràn̈a amy raha hainao raha tsapanao io. Fihetseham-pô io baka mety miovaova fa tsy mitovy amy raha ten̈a marin̈y. Fa fitiavan’i Jehovah anao ndraiky, izio raha ten̈a marin̈y ampianarin’ny Baiboly. Ke izikoa atsika tsy ten̈a mino fa Jehovah tia atsika, dikan’izen̈y tsy ikentsika koa fa fitiavan̈a io toetry ten̈a mampiavaka Jehovah.​—1 Jaona 4:8.

MINIMINIA FITIAVAN’I JEHOVAH ANAO

9-10. Nikoran̈a momba ino Jesosy tamin’izy nivolan̈a: “Baba lastiô mankatia anarô”, amy Jaona 16:26, 27 ao? (Zahava koa sary.)

⁹ Ho maro raha haintsika momba fitiavan̈an’i Jehovah, izikoa atsika mandiniky raha nivolan̈in’i Jesosy tamy mpan̈ara-dia izy. Karaha ty ho izy: “Baba lastiô baka mankatia anarô.” (Vakia Jaona 16:26, 27.) Tsy zisty hamparavoravo mpianatranany fo nahavy Jesosy nivolan̈a zen̈y. Izikoa atsika mamaky irô andininy alohan’ny andininy io, Jesosy tiô tsy nikoran̈a momba fihetseham-pôndrô mpianatranany aby io foeky. Fa izy tiô nikoran̈a momba vavaka.

¹⁰ Jesosy vo baka nikoran̈a tamy mpianatranany fa irô tôkony hivavaka amin’ny an̈aran̈anany, fa tsy hivavaka aminany. (Jaona 16:23, 24) Ten̈a raha maventy nahaizandrô mpianatranany aby io zen̈y. Izy koa fa natsangana tamy maty, irô mpianatranany aby io mety tihivavaka tamy Jesosy, sady izy lastiô namandrô mare. Ke irô mety nieritreritry fa baka amy fitiavan’i Jesosy irô handrisiky izy hitandren̈y irô ndreky hikoran̈a fangatahan̈andrô io amy Baba. Fa Jesosy nivolan̈a tamindrô fa irô tsy tôkony hieritreritry karaha zen̈y foeky. Nan̈ino? Fôtony karaha ty ho izy tamindrô: “Baba lastiô mankatia anarô.” Raha zen̈y an̈isan’ny fampianaran̈a fôtotro momba vavaka amy Baiboly ao. Miniminia hely baka dikan’izen̈y: Anao koa fa nianatra Baiboly, anao tsy vitan’ny nahay Jesosy fo fa lôso tia izy koa. (Jaona 14:21) Fa karaha irô mpianatra tamy taonjato voanalohany, anao matoky tsarabe mivavaka amy Zan̈ahary, fôtony hainao fa izy ‘lastiô mankatia anao.’ Ke isaka anao mivavaka amy Jehovah, anao man̈aboaka fa mino irô volan̈a aby zen̈y.​—1 Jaona 5:14.

DINIHA INO MAHAVY ANAO MISALASALA

11. Nan̈ino ravoravo Satana izikoa atsika misalasala momba fitiavan’i Jehovah atsika?

¹¹ Ino ma mahavy anao misalasala momba fitiavan̈an’i Jehovah? Anao mety hivolan̈a fa baka amy Satana. Misy mahamarin̈y izy ndraiky zen̈y. Devoly baka ‘mitady handripaka’ atsika, ke izy ravoravo izikoa atsika misalasala momba fitiavan’i Jehovah atsika. (1 Pet. 5:8) Aza adin̈a fa fitiavan̈a io nahavy Jehovah nan̈amia vidim-pan̈avotan̈a, fa tian’i Satana atsika hieritreritry fa atsika tsy vain̈y zen̈y. (Heb. 2:9) Fa azôvy ma mahazo tombony, izikoa atsika misalasala momba fitiavan̈an’i Jehovah? I Satana. Baka iô sitrapôn-jôvy ma tantirahintsika izikoa atsika man̈eky rivan̈a, izikoa fa tôjy raha sarotro? Nin’i Satana. Tiany atsika hieritreritry fa Jehovah tsy tia atsika. Kanefa Satana efa tsy tian’i Jehovah fa tsy atsika. An̈isan’ny “tetiky ratsy” maren’i Satana, izy man̈ano raha hahavy atsika hieritreritry fa atsika efa tsy tian’i Jehovah ndreky tsy jireny. (Efes. 6:11) Ke izikoa fa haintsika tetikin’ny fahavalontsika io, atsika hahaiho tapa-kevitry fo “hanohitry Devoly.”​—Jak. 4:7.

12-13. Nan̈ino fahotan̈a nilovaintsika mahavy atsika misalasala momba fitiavan’i Jehovah atsika?

¹² Misy raha hafa koa mahavy atsika misalasala momba fitiavan’i Jehovah atsika. Ino? Fahotan̈a nilovaintsika. (Sal. 51:5; Rom. 5:12) Ke fahotan̈a io nandrobaka fifandraisan’olo amy Mpamôron̈o. Izio koa nandrobaka fomba fisain̈anantsika, fihetseham-pôntsika ndreky fahasalaman̈antsika.

¹³ Misy vokany ratsy mare amy fihetseham-pôntsika fahotan̈a io ke mahavy atsika man̈amelo-ten̈a, miasaloha, mavozo, aviô men̈atra. Amy lera atsika tafan̈ano fahotan̈a in̈y atsika ten̈a mahatsapa zen̈y. Miboaka koa irô fihetseham-pô aby zen̈y, fôtony atsika tsy vôly mahatsapa fa atsika mpanota, kanefa tsy karaha zen̈y foeky namoron̈ana olombelon̈o tamy voanalohany. (Rom. 8:20, 21) Ke mira tomabily vaky laroa lôso tsy miasa tsara in̈y atsika tsy lavorary io, ke tsy erakan’ny fomba namoron̈ana olombelon̈o tamy voanalohany eky raha vitantsika. Tsy mahagaga izikoa misy lera atsika misalasala momba fitiavan’i Jehovah atsika. Izikoa sendra mandalo raha zen̈y, mila alaintsika onon̈o fa Jehovah io ‘Zan̈ahary ten̈a miavaka sady vain̈y atahoran̈a, aviô tia ndreky tsy mivadiky amin’olo tia izy ndreky man̈araka didinany.’​—Neh. 1:5.

14. Nan̈ino fieritreretantsika momba vidim-pan̈avotan̈a man̈ampy atsika tsy hisalasala fa Jehovah tia atsika? (Romanina 5:8) (Zahava koa efajoro “Mitandrema fa ‘Fahotan̈a io Mahavita Mamitaka.’”)

¹⁴ Atsika mety hahatsiaro tsy vain̈y tian’i Jehovah. Atsika ndraiky tsy vain̈y izio marin̈y, ke zen̈y mahavy fitiavan̈anany io ten̈a miavaka, fôtony tsy baka amy raha ataontsika mahavy izy ho tia atsika. Fa Jehovah mbala nan̈amia atsika vidim-pan̈avotan̈a fo, baka hahavitany man̈ambela hadisovan̈antsika, noho ny fitiavany atsika. (1 Jaona 4:10) Aleva onon̈o koa fa antony navian’i Jesosy, hamonjy olo mpanota, fa tsy olo lavorary. (Vakia Romanina 5:8.) Tsisy amintsika mahavita man̈ano raha lavorary, aviô Jehovah tsy mitaky atsika han̈ano raha karaha zen̈y. Ke izikoa fa haintsika fa noho ny atsika mpanota io mahavy atsika misalasala momba fitiavan’i Jehovah, atsika hahaiho tapa-kevitry fo tsy han̈eky hieritreritry karaha zen̈y.​—Rom. 7:24, 25.

MIFIDIANA TSY HIVADIKY

15-16. Ino raha atokisantsika izikoa atsika tsy mivadiky amy Jehovah, aviô nan̈ino? (2 Samoela 22:26)

¹⁵ Tian’i Jehovah atsika han̈ano safidy tsara ke “tsy hiala aminany.” (Deot. 30:19, 20) Atsika koa man̈ano ambaka zen̈y, matokisa fa izy koa tsy hivadiky amintsika. (Vakia 2 Samoela 22:26.) Koa atsika tsy mivadiky amy Jehovah, izy han̈ampy atsika fo, na ino na ino raha andalovantsika.

¹⁶ Eraka efa nidinihintsika tiô, maro antony mahavy atsika tsy ho voahozonkozon̈o foeky izikoa fa tôjy fitsapan̈a. Haintsika baka fa Jehovah io tia atsika ndreky manohan̈a atsika. Zen̈y raha ampianarin’ny Baiboly. Izikoa atsika sendra misalasala momba fitiavan’i Jehovah atsika, mila alaintsika onon̈o raha marin̈y haintsika fa tsy raha tsapantsika. Ke irarian̈a atsika hatoky fa fitiavan̈a tsy miovaovan’i Jehovah io maharitry mandrakizay, eraka raha koran̈in’ny Baiboly.