Fomba Ten̈a Tsara Iatrefan̈a Raha Tsy Rariny

1-2. Karakôry ataon’olo maro izikoa fa mahita raha tsy rariny, aviô ino raha hidinihintsika?

FENO raha tsy rariny amy tany jiaby. Olo sasany tsy asian’olo fôtiny, noho irô masikiny, na karazan̈andrô na antony hafa koa. Sasany ndraiky mijaly vokatran’ny kolikoly ataon’olo mpan̈arivo sasany ndreky manam-pahifan̈a sasany. Raha aby zen̈y ndreky raha tsy rariny hafa, mety hisy vokany amintsika jiaby, na mivantan̈a na tsy mivantan̈a.

² Ke maro olo meloko izikoa fa mahita raha tsy rariny amy donia ty. Atsika jiaby tiantsika misy mpiaro ndreky asian’olo fôtiny. Olo sasany mifen̈y hamaha problemo eran-tany na amy firenenandrô. Irô man̈ano lagirevo hanoheran̈a fanjakan̈a ndreky lalàn̈a. Irô koa manohan̈a mpan̈ano politiky mampan̈anten̈a fa hamaha problemondrô ndreky han̈adoso raha tsy rariny. Kanefa, atsika nampianarin̈y fa atsika “tsy an̈isan’ny donia ty” ndreky hatoky fa Fanjakan̈an’ny Zan̈ahary zaraiky fo hahavita han̈adoso raha tsy rariny jiaby. (Jaona 17:16) Fa ndray zen̈y, atsika mety mbala halahelo ndreky ho meloko, izikoa fa mahita olo mampijaly olo. Ke atsika mety hieritreritry: ‘Izikoa zaho mahita raha karaha zen̈y, akôry eky hataoko? Mba misy raha mety hataoko ma han̈adosoan̈a raha tsy rariny misy amy ziôty?’ Baka hamalian̈a irô fan̈ontanian̈a aby zen̈y, alô atsika handiniky karakôry fahitan’i Jehovah ndreky Jesosy raha tsy rariny.

JEHOVAH NDREKY JESOSY TSY TIA RAHA TSY RARINY

3. Nan̈ino tsy diso atsika izikoa meloko mahita olo avoa raha tsy rariny? (Isaia 5:7)

³ Baiboly man̈aboaka amintsika nan̈ino atsika malahelo izikoa fa misy olo avoa raha tsy rariny. Ao man̈azava fa Jehovah koa fa namôron̈o atsika, atsika nataony mira sora aminany. Jehovah koa “tia rariny ndreky hitsiny.” (Sal. 33:5; Gen. 1:26) Izy tsy han̈ano raha tsy rariny zen̈y foeky, baka iô tsisy olo tiany han̈ano raha tsy rariny! (Deot. 32:3, 4; Mika 6:8; Zak. 7:9) Ohatra, tamy faha mpaminan̈y Isaia, naro Israelita ren̈in’i Jehovah ‘nijaly ndreky nitarain̈y’, fôtony namandrô fo nampijaly irô. (Vakia Isaia 5:7.) Jehovah nan̈asazy lan̈iany olo tsy nety nan̈eky nitandrin̈y Lalàn̈anany ndreky nampijaly olo aby io.​—Isaia 5:5, 13.

4. Karakôry nataon’i Jesosy koa fa nahita olo sahiran̈a tsy nirarahain’olo? (Zahava koa sary.)

⁴ Mira Jehovah, i Jesosy koa ten̈a tia ny rariny. Tandraraiky, tamin’izy nan̈ano fanompoan̈anany tambony tany teto, izy nahita lelahy araiky naty tan̈ana. Jesosy nahinakinaka ke nitaha izy. Fa irô mpitondra fivavahan̈a aby io neloko mare nahita zen̈y. Irô nivolan̈a fa Jesosy nandika lalàn̈a momba Sabata. Tsy nahoandrô foeky lelahy io ndray efa nahivan̈a. Karakôry fahitan’i Jesosy raha nataondrô zen̈y? ‘Nalahelo mare izy fôtony irô nanan̈a fô vato.’​—Mar. 3:1-6.

5. Nan̈ino atsika tôkony hahay hifehy helokontsika, izikoa fa mahita raha tsy rariny?

⁵ Mampameloko Jehovah ndreky Jesosy mahita olo mampijaly olo, ke tsy diso atsika koa mahatsapa karaha zen̈y. (Efes. 4:26) Fa ndray atsika meloko mare, atsika tsy mahavita man̈afoan̈a raha tsy rariny. Sady heloko tsy mahaivita ndreky tsy voafehy mety hankarary ndreky hampakivy mare. (Sal. 37:1, 8; Jak. 1:20) Ke karakôry tôkony hataontsika izikoa atsika tôjy raha tsy rariny? Han̈ampy atsika mandiniky raha nataon’i Jesosy.

KARAKÔRY NATAON’I JESOSY NIATRIKY RAHA TSY RARINY?

6. Ino aby raha tsy rariny nisy tamy Jesosy tambony tany teto? (Zahava koa sary.)

⁶ Naro raha tsy rariny hitan’i Jesosy tamin’izy tambony tany teto. Hitany irô mpitondra fivavahan̈a aby io nan̈ano lalàn̈a maro nampijalian̈a olo. (Mat. 23:2-4) Hainy koa irô mpitondra romanin̈y aby io nampijaly olo mare. Naro Jiosy nitaky fahaliôvan-ten̈a tamy Fanjakan̈a Romanin̈y. Nisy tamindrô aby vôn̈ono hiady tamy fanjakan̈a io, an̈isan’izen̈y irô Zelôta aby io. Fa Jesosy tsy nilan̈y ndreky tsy nanohan̈a irô andian’olo nitady fan̈ovoan̈a aby io. Baka iô izikoa fa nisy olo nila hangala izy hatao mpanjaka, nialany tiô.​—Jaona 6:15.

7-8. Nan̈ino Jesosy tsy nan̈afoan̈a raha tsy rariny, tamin’izy tambony tany teto? (Jaona 18:36)

⁷ Tamy Jesosy tambony tany teto, izy tsy niaraka niasa tamindrô mpan̈ano politiky tamy zen̈y, han̈adoso raha tsy rariny. Nan̈ino? Hainy baka fa olombelon̈o tsy natao hifampitondra sady tsy mahay mifampitondra foeky. (Sal. 146:3; Jer. 10:23) Fitondrasan̈an’olombelon̈o koa tsy mahavita man̈adoso antony ten̈a mahavy raha tsy rariny. Satana Devoly mitondra donia ty. Izy anjely ratsy fan̈ahy, baka iô maro olo amy donia ty mangala tahaka toetrinany. (Jaona 8:44; Efes. 2:2) Olombelon̈o koa tsy lavorary, ke nata olo tihan̈ano ny tsara, tsy ten̈a mahavita mamaha problemo.​—Mpito. 7:20.

⁸ Hain’i Jesosy koa fa Fanjakan̈an’ny Zan̈ahary zaraiky fo ten̈a mahavita man̈adoso fôtotro problemo jiaby. Zen̈y nahavy Jesosy nifen̈y mare nampiasa fotoan̈a ndreky angôvonany, “nitory ndreky nan̈ambara vaovao tsaran’ny Fanjakan̈an’ny Zan̈ahary.” (Lioka 8:1) Namezany toky irô olo “mosary ndreky sakara fahamarin̈ana” fa efa tsy ela hifaran̈a aferafera ndreky raha tsy rariny. (Mat. 5:6; Lioka 18:7, 8) Kanefa tsisy fitondrasan̈an’olombelon̈o hahavita han̈ano zen̈y, fa Fanjakan̈an’ny Zan̈ahary zaraiky fo. Izio “tsy an̈isan’ny donia ty.”​—Vakia Jaona 18:36.

ALEVA TAHAKA JESOSY LERA ANAO MIATRIKY RAHA TSY RARINY

9. Ino mahavy anao resy lahatra fa Fanjakan̈an’ny Zan̈ahary zaraiky fo han̈afoan̈a raha tsy rariny jiaby?

⁹ Raha tsy rariny hitantsika amy ziôty mbala lombolombon’ny raha tsy rariny hitan’i Jesosy tamin’izy tambony tany teto. Fa Satana ndreky olo ratsy fan̈ahy aby io fo mahavy raha tsy rariny misy amin’ny andra farany iziôty io. (2 Tim. 3:1-5, 13; Apok. 12:12) Karaha Jesosy, haintsika koa fa Fanjakan̈an’ny Zan̈ahary zaraiky fo hahavita han̈adoso fôtotro raha tsy rariny io. Atsika manohan̈a Fanjakan̈an’ny Zan̈ahary angôvo jiaby. Atsika tsy man̈ano lagirevo hanoheran̈a fanjakan̈an’olombelon̈o sady tsy man̈anten̈a izio han̈afoan̈a raha tsy rariny. Diniha baka ranabavy Stacy.a Talohan’izy nahita fahamarin̈ana, izy natetiky nandeha nilahatra, izikoa fa nisy lagirevo niadivan̈a amy raha tsy rariny. Izy baka tiô lôso diniky, tsao tsisy varany aby raha zen̈y. Ho izy: “Zaho koa fa nandeha nilahatra, zaho lôso diniky, tsao tsisy varany aby raha nataonay. Fa zaho iziôty efa manohan̈a Fanjakan̈an’ny Zan̈ahary. Haiko fa Jehovah ten̈a han̈afoan̈a problemo jiaby, fa tsy zaho.”​—Sal. 72:1, 4.

10. Nan̈ino hetsiky ataon’olo hitakian̈a fan̈ovoan̈a aby io tsy mifan̈araka foeky amy torohevitrin’i Jesosy amy Matio 5:43-48? (Zahava koa sary.)

¹⁰ Hetsiky itakian̈a fan̈ovoan̈a amy donia ty, matetiky ahitan̈a olo meloko mare, tsy man̈araka lalàn̈a ndreky mampijaly olo. Jesosy tsy nampianatra atsika han̈ano raha karaha zen̈y foeky. (Efes. 4:31) Misy rahalahy araiky, Jeffrey an̈arany, nivolan̈a: “Ndray somary milamin̈y hetsiky hitakian̈a ny rariny io amy voanalohany, matetiky izio mivadiky olo mifamono ndreky mandrobaka rahan’olo.” Fa Jesosy nampianatra atsika ho tia olo jiaby, ndray olo tsy mitovy hevitry amintsika, na man̈enjiky atsika. (Vakia Matio 5:43-48.) Atsika io Kristianin̈y, ke atsika man̈ano erakany vitantsika hangalan̈a tahaka Jesosy.

11. Nan̈ino ndraikindraiky sarotro mangala tahaka Jesosy?

¹¹ Atsika mahay fa Fanjakan̈an’ny Zan̈ahary zaraiky fo han̈afoan̈a raha tsy rariny jiaby. Fa ndray zen̈y sarotro amintsika ndraikindraiky mangala tahaka Jesosy izikoa atsika avoa raha tsy rariny. Diniha baka raha nahazo Janiya. Izy navakavahan’olo. Karaha ty ho izy: “Neloko mare zaho, aviô nalahelo, baka iô efa tiako voasazy fo irô olo aby nan̈ano raha tsy rariny io. Ke zaho baka tiô nieritreritry hanohan̈a hetsiky hiadivan̈a tamy fan̈avakavahan̈a. Hitako fa io fomba ten̈a mety nan̈aboahako helokonaka.” Koa fa ela ny ela, tontohitry Janiya fa izy nila niova. Ho izy: “Nambelako hisy vokany tamin’ny eritreritrinaka raha nataon’olo, ke zaho lôso natoky olo fa tsy natoky Jehovah. Zaho tapa-kevitry fa tsy hiaraka amindrô mpan̈ano lagirevo aby io eky.” Mila mitandrin̈y koa atsika baka tsy han̈ambela helokontsika hahavy atsika hibidabida politiky ndreky adihevitry momba fiaraha-monin̈y.​—Jaona 15:19.

12. Nan̈ino atsika mila mitandrin̈y amy vaovao tandrin̈esantsika?

¹² Ino han̈ampy atsika hifehy helokontsika izikoa atsika tôjy raha tsy rariny? Maro olo mahita fa tsara mifidy tsarabe raha vakin̈a ndreky tandrin̈esan̈a, aviô raha zahavan̈a. Sasany amy tantara amin’ny Internet ao natao hampameloko ndreky handrisiky olo hitaky fan̈ovoan̈a. Matetiky koa irô mpan̈ano vaovao aby io mikoran̈a hevitrindrô tômpiny fo fa tsy raha ten̈a misy. Aviô nata ten̈a nisy marin̈y raha koran̈indrô io, fandinihan̈a be momba izio ma ten̈a han̈ampy atsika edy? Izikoa atsika mandany fotoan̈a loatra amy vaovao karaha zen̈y, atsika hahay hiasaloha fo, aviô ho diso fan̈antinan̈a. (Ohab. 24:10) Aviô ny ten̈a ratsy, mety ho adin̈antsika fa Fanjakan̈an’ny Zan̈ahary zaraiky fo ten̈a han̈afoan̈a raha tsy rariny jiaby.

13. Nan̈ino famakian̈a Baiboly isan’andra man̈ampy atsika hanan̈a toe-tsain̈y tsara hiatrefan̈a raha tsy rariny?

¹³ Han̈ampy atsika hiatriky raha tsy rariny koa mamaky Baiboly isan’andra ndreky misaintsain̈y raha vakintsika. Misy ranabavy araiky Alia an̈arany, nalahelo mare izikoa fa nahita olo sasany mampijaly olo. Baka iô hitany karaha tsy voasazy foeky irô io. Ho izy: “Zaho tsy maintsy nipetraka hely nangala onon-draha, ke nimenimeny karaha ty: ‘Zaho ma ten̈a mino fa Jehovah hamaha irô problemo aby io?’ Tamy zen̈y zaho namaky Joba 34:22-29. Irô andininy aby io nampatsiaro zaho fa tsisy raha tsy hitan’i Jehovah. Izy zaraiky fo ten̈a mahay ny rariny, aviô efa izy edy ten̈a mahavita mamaha problemon’olo jiaby.” Fa mandra-pavian’ny Fanjakan̈an’ny Zan̈ahary hampisy ny ten̈a rariny, atsika tsy maintsy miatriky raha tsy rariny. Akôry ataontsika?

INO RAHA METY ATAONTSIKA ZIÔTY?

14. Ino raha mety ataontsika baka atsika tsy ho an̈isan’ny tômpin’andraikitry amy raha tsy rariny? (Kolosianina 3:10, 11)

¹⁴ Atsika mety tsy hahavita hifehy raha tsy rariny ataon’olo, fa atsika ndraiky mahavita mifehy raha ataontsika. Erakan’ny efa nianarantsika, atsika mangala tahaka Jesosy ke tia olo. Fitiavan̈a mahavy atsika man̈aja olo jiaby, firaka olo man̈enjiky atsika. (Mat. 7:12; Rom. 12:17) Jehovah ravoravo izikoa atsika tsara fan̈ahy amin’olo jiaby ndreky tsy man̈ilikiliky irô.​—Vakia Kolosianina 3:10, 11.

15. Ino vokan’ny fikoran̈antsika amin’olo fahamarin̈ana baka amy Baiboly?

¹⁵ Fomba ten̈a tsara hiadivantsika amy raha tsy rariny koa mampianatra olo fahamarin̈ana baka amy Baiboly. Nan̈ino? Fôtony “fahaizan̈a Jehovah” mahavita man̈ova olo kafiry mare taloha, lôso tsara fan̈ahy ndreky tia olo. (Isaia 11:6, 7, 9) Ohatra, nisy lelahy araiky, i Jemal, talohan’ny nianarany fahamarin̈ana, niaraka tamin’ny andian’olo mpanohitry fanjakan̈a, han̈ongan̈a fitondrasan̈a araiky niritriretiny fa mampijaly vahoaka. Karaha ty ho izy: “Anao tsy mahavita miforse olo hiova. Basy tsy nahavita nan̈ova zaho, fa fahamarin̈ana nianarako nan̈ova zaho.” Raha nianaran’i Jemal nandrisiky izy ho vôly nandeha niady. Ke izikoa atsika mampianatra olo fahamarin̈ana amy Baiboly, ho vitantsika han̈ampy irô ho vôly han̈ano raha mampijaly olo.

16. Nan̈ino anao tihikoran̈a amin’olo raha handeha hataon’ny Fanjakan̈an’ny Zan̈ahary?

¹⁶ Karaha Jesosy, atsika ravoravo man̈ambara amin’olo fa Fanjakan̈an’ny Zan̈ahary zaraiky fo mahavita man̈afoan̈a ny tsy rariny. Fan̈antinan̈a zen̈y hankahery olo ampijalin’olo. (Jer. 29:11) Stacy nikoran̈intsika taloha tarỳ in̈y, nivolan̈a: “Nianatra fahamarin̈ana nan̈ampy zaho niatriky raha tsy rariny hitako ndreky niain̈ako. Jehovah mampiasa hafatra amy Baiboly ao hankahirezan̈a olo.” Mila mioman̈a tsarabe anao baka hahavita han̈ambara hafatra mankahery baka amy Baiboly. Izikoa anao resy lahatra tsarabe fa ten̈a marin̈y irô hevitry baka amy Baiboly nikoran̈intsika tato, anao ho vôn̈ono ndreky hahay handanjalanja izikoa fa mikoran̈a amin’olo lekoly araiky aminao, na olo fiasan̈a araiky aminao, nan̈ino misy raha tsy rariny.b

17. Akôry an̈ampian’i Jehovah atsika hiatriky raha tsy rariny amy ziôty?

¹⁷ Haintsika fa izikoa mbala Satana “mitondra donia ty”, atsika tsy maintsy hiatriky raha tsy rariny. Fa atsika ndraiky mbala manan̈a fan̈antinan̈a tsara, fôtony Jehovah mampan̈anten̈a fa izy han̈ampy atsika rango ziôty, aviô han̈adoso Satana ndreky raha ratsy jiaby. (Jaona 12:31) Ohatra, koran̈iny amy Baiboly ao nan̈ino mahaimare fo jaly, aviô koa izy miasaloha amindrô olo miatriky raha tsy rariny aby io. (Sal. 34:17-19) Jehovah mampiasa Zanany mampianatra atsika karakôry atao miatriky raha tsy rariny ndreky karakôry hataon’ny Fanjakan̈anany han̈afoan̈a izio. (2 Pet. 3:13) Irarian̈a atsika tsy ho vôly sady hazoto fo hitory vaovao tsara momba Fanjakan̈a io ndreky hiambin̈y mare fotoan̈a hisian’ny “rariny ndreky hitsiny” ambony tany eto.​—Isaia 9:7.