LAHATSORATRA FIANARAN̈A 42
HIRA 44 Vavaky ny Torotoro Fo
Akôry Ataonao Hankatsara Vavakanao?
“Zaho mikaiky anao amy fônaka jiaby. Mba valia kony zaho Jehovah.”—SAL. 119:145.
HEVITRY HIDINIHIN̈Y
Amy lahatsoratra ty atsika handiniky vavaka amy Baiboly ao han̈ampy atsika hankatsara vavakantsika.
1-2. a) Ino mety hisakana atsika tsy hikoran̈a raha an̈aty fôntsika amy Jehovah? b) Ino mahavy atsika mivolan̈a fa Jehovah vôn̈ono hitandren̈y vavakantsika?
ANAO ma mahatsapa fa vavakanao raha efa mimpodipody fo, na tsy ten̈a baka amy fô na fahazaran̈a fo? Izikoa ia, tsy anao zaraiky fo tatran’izen̈y. Fiain̈anantsika iziôty lomolomoay, ke atsika lôso tafan̈ano vavaka mekimeky. Mety sarotro amintsika koa hikoran̈a raha an̈aty fôntsika amy Jehovah, fôtony atsika mahatsapa tsy vain̈y han̈aton̈o izy.
2 Baiboly man̈amia toky atsika fa vavaka ataontsika baka amy fô ny raha ten̈a maventy amy Jehovah, fa tsy raha volan̈intsika. Izy mitandren̈y “fangatahan̈an’olo mpandefitry.” (Sal. 10:17) Izy vôn̈ono hitandren̈y raha jiaby volan̈intsika, fôtony izy ten̈a mijery atsika.—Sal. 139:1-3.
3. Ino aby fan̈ontanian̈a hidinihintsika?
3 Atsika mety han̈ontany: Nan̈ino atsika tsy tôkony havozo koa fa mivavaka amy Jehovah? Akôry hahavy vavakantsika ho baka amy fô tsarabe? Nan̈ino fandinihan̈a vavaka nataon’ny mpanompon’i Jehovah amy Baiboly ao, han̈ampy atsika hankatsara vavaka ataontsika? Aviô ino raha mety hatao, izikoa atsika miasaloha loatra ke tsy haintsika ino raha hivolan̈iny? Alô hizahavantsika valin’ny fan̈ontanian̈a aby io.
AZA MAVOZO MIVAVAKA AMY JEHOVAH
4. Ino man̈ampy atsika tsy havozovozo, koa fa mivavaka amy Jehovah? (Salamo 119:145)
4 Izikoa mazava amintsika fa Jehovah io kamarady araiky tsy mivadiky sady man̈iry atsika hahômby amy fiain̈ana, atsika tsy havozo hivavaka aminany. Karaha zen̈y mpanoratra Salamo 119. Jehovah nataony karaha fa kamaradinany in̈y, izy koa fa nivavaka. Naro problemonany. Nisy olo nivolan̈a raha vandy momba izy. (Sal. 119:23, 69, 78) Izy koa tsy maintsy niady tamy tsy fahalavorarian̈anany. (Sal. 119:5) Fa izy tsy navozo nikoran̈a tamy Jehovah raha tan̈aty fônany.—Vakia Salamo 119:145.
5. Nan̈ino tsy tôkony hisy raha hambelantsika hisakana atsika tsy hivavaka? Hazavà amin’ny ohatra.
5 Tian’i Jehovah hivavaka aminany aby firaka amin’olo nan̈ano fahotan̈a maventy. (Isaia 55:6, 7) Ke tsisy raha tôkony hambelantsika hisakana atsika tsy hivavaka aminany. Ohatra, olo mpitondra avion izikoa fa sahiran̈a an̈abo an̈y, izy mila mikaiky irô mpan̈ara-maso avion ambany atỳ. Ke izy ma hisalasala hikaiky irô mpan̈ara-maso aby io, fôtony mavozo tsao ho voabaraka nohon’izy very na nan̈ano hadisovan̈a? Ehe! Karaha zen̈y koa, atsika koa sendra niala lalan̈a na nan̈ano hadisovan̈a, atsika tsy tôkony havozo hivavaka amy Jehovah.—Sal. 119:25, 176.
AKÔRY HAHAVY VAVAKANAO HO BAKA AMY FÔ TSARABE?
6-7. Ino han̈ampy atsika hikoran̈a amy Jehovah raha ten̈a an̈aty fôntsika? Man̈ameza ohatra. (Zahava koa lamariky amy pazy ambany.)
6 Izikoa atsika tsy mihafahafa mikoran̈a amy Jehovah raha an̈aty jerintsika na raha ten̈a tsapantsika, hahaiho baka amy fô fo vavaka ataontsika. Ke ino han̈ampy atsika han̈ano vavaka karaha zen̈y?
7 Miniminia toetrin’i Jehovah.a Arakaraka isaintsain̈antsika toetrinany hahavy atsika hahavita tsarabe hikoran̈a raha an̈aty jerintsika. (Sal. 145:8, 9, 18) Diniha baka Ranabavy Kristine. Papany nasiaka ndreky kafiry mare. Ho izy: “Ten̈a tsy nora taminaka hikoran̈a amy Jehovah mira mikoran̈a amy papa zen̈y. Zaho navozo tsao baka amy tsy fahalavorarian̈anaka hahavy izy han̈ary zaho.” Ino toetrin’i Jehovah nan̈ampy izy? Ho izy: “Jehovah be fitiavan̈a ndreky tsy mivadiky, ke zen̈y nahavy zaho nahatsapa nisy mpiaro. Haiko fa izy iô fo han̈ampy zaho. Aviô na zaho tafan̈ano hadisovan̈a, izy mbala tia zaho ndreky han̈ampy zaho fo. Ke raha aby zen̈y nan̈ampy zaho tsy havozo foeky hikoran̈a aminany raha mamparavoravo ndreky mampalahelo zaho mare.”
8-9. Ino mahatsara mandiniky antsendriky raha tianao hikoran̈iny, alohan’ny anao hivavaka? Hazavà amin’ny ohatra.
8 Diniha raha hivolan̈inao. Alohan’ny anao hivavaka, anao mety man̈ontany karaha ty: ‘Ino ma problemo atrefiko amy ziôty? Misy olo tôkony havelako heloko ma an̈y? Misy fitsapan̈a vaovao ma atrefiko ziôty, ke ten̈a ilako fan̈ampian̈a baka amy Jehovah?’ (2 Mpanj. 19:15-19) Atsika koa mety man̈araka vavaka modely nampianarin’i Jesosy in̈y, ke mieritreritry raha mety hangatahintsika amy Jehovah momba An̈aranany, Fanjakan̈anany ndreky Sitrapônany.—Mat. 6:9, 10.
9 Narary mare efa hofoaty vadin’ny Ranabavy Aliska, ke sarotro taminany mare hivavaka. Karaha ty ho izy: “Nisafôtofôto loatra jerinaka, ke tsy vitako foeky handiniky raha hivolan̈iko.” Ino nan̈ampy izy? Ho izy: “Zaho nangala onon-draha hely antsendriky alohan’ny zaho hivavaka, nandiniky raha hivolan̈iko, amy zen̈y tsy zahay fo koran̈iko amy vavakanaka. Ke zen̈y nan̈ampy zaho ho kalma fo ndreky nahavita nikoran̈a raha maro tamy vavaka.”
10. Nan̈ino atsika tôkony han̈ano vavaka elaela? (Zahava koa sary.)
10 Man̈anaova vavaka elaela. Mety ho baka amy fô fo nata vavaka fôhiky, fa hahavita tsarabe hikoran̈a raha an̈aty fôntsika an̈y atsika, izikoa man̈ano vavaka elaela.b Karaha ty ho Elijah, vadin’ny Ranabavy Aliska: “Zaho matetiky mivavaka an̈atin’ny andra araiky, ke lôso mahaimifandray marikitry amy Jehovah fo zaho koa fa mivavaka elaela. Jehovah baka tsy mekimeky hivitan’ny vavakanaka io, ke zaho afaka mivavaka elaela.” Ataova baka ty: Mitadiava fotoan̈a ndreky toeran̈a hahavitanao mivavaka tsarabe na hahavitanao mivavaka mare ke tsisy mpanabataba, aviô ataova fahazaran̈a mivavaka elaela.
Mitadiava fotoan̈a ndreky toeran̈a hahavitanao man̈ano vavaka elaela (Zahava fehintsoratra 10)
DINIHA VAVAKAN’OLO BAKA AMY FÔ AMY BAIBOLY AO
11. Nan̈ino mahatsara atsika mandiniky vavaka baka amy fô voasoratra amy Baiboly ao? Zahava koa efajoro “Mitovy amy Raha Tsapandrô io ma Raha Tsapanao?”)
11 Mety hahatsara anao mandiniky irô vavaka baka amy fô ndreky hira masin̈y na salamo amy Baiboly ao. Izikoa anao mandiniky karakôry nataon’ny mpanompon’i Jehovah nikoran̈a raha ten̈a tan̈atin’ny eritreritrindrô, zen̈y handrisiky anao hikoran̈a amy Jehovah raha an̈aty fônao. Anao koa mety hahita fomba vaovao hideran̈a Jehovah amy vavaka. Baka iô koa, anao mety hahita vavakan’olo mira amy raha mahazo anao.
12. Ino aby raha mety han̈ontaniantsika, izikoa atsika fa mandiniky vavaka araiky?
12 Anao koa fa mandiniky vavaka aby amy Baiboly ao, man̈ontania ten̈a karaha ty: ‘Volan̈an-jôvy ma izity aviô ino raha nahazo izy? Mira raha tsapan’olo mivavaka io koa ma ninaka? Ino raha ianarako baka amizio?’ Mety ilainao man̈ano fikarohan̈a hely hitadiavan̈a valin’ny fan̈ontanian̈a aby io. Fa tsy ho maty antoko foeky anao koa man̈ano zen̈y. Alô baka atsika handiniky vavaka efatra.
13. Ino raha araiky ianarantsika baka amy vavakan’i Hana? (1 Samoela 1:10, 11) (Zahava koa sary.)
13 Vakia 1 Samoela 1:10, 11. Tamin’i Hana nan̈ano vavaka io, izy nisy problemo aroe maventy. Izy tsy niteraka, baka iô izy nampijalin’ny rafivaviny mare. (1 Sam. 1:4-7) Izikoa anao tôjy problemo tsy mahay afaka, ino raha ianaranao baka amy vavakan’i Hana? Izy nahatsiaro nahivankivan̈a, izikoa fa baka nivavaka elaela ndreky nikoran̈a tsara tamy Zan̈ahary raha tan̈aty fônany. (1 Sam. 1:12, 18) Atsika koa hahatsiaro hahivankivan̈a, izikoa “man̈aboraka amy Jehovah raha man̈avesatra atsika”, ke mikoran̈a raha tsapantsika momba problemontsika io.—Sal. 55:22.
Hana tsy niteraka, aviô koa rafivavinany tsy vôly nitady ady taminany, fa Hana nikoran̈a tamy Jehovah raha nan̈avesatra fônany (Zahava fehintsoratra 13)
14. a) Ino koa raha hafa ianarantsika baka amin’i Hana? b) Nan̈ino fisaintsain̈ana Soratra Masin̈y han̈ampy atsika hahita raha maro hikoran̈iny koa fa mivavaka? (Zahava lamariky amy pazy ambany.)
14 Taon̈o vitsivitsy tafaran’i Samoela teraka, izy nindesin’i Hana tamin’i Ely Mpisôron̈obe. (1 Sam. 1:24-28) Naboakan’i Hana tamy vavaka baka amy fô nataony fa izy natoky fa Jehovah miaro ndreky mikarakara mpanomponany tsy mivadiky.c (1 Sam. 2:1, 8, 9) Nety mbala tsy nafaka problemo tan̈aty tokantran̈onany tao, fa nidinihiny fomba nan̈ampian’i Jehovah izy. Ke ino raha ianarantsika baka amy zen̈y? Ho vitantsika hiatriky problemo mitohy, izikoa atsika mandiniky fomba an̈ampian’i Jehovah atsika firaka iziôty.
15. Ino raha ianarantsika baka amy vavakan’i Jeremia, izikoa atsika fa tôjy raha tsy rariny? (Jeremia 12:1)
15 Vakia Jeremia 12:1. Mpaminan̈y Jeremia efa navy niasaloha mare koa fa nahita olo ratsy fan̈ahy nahômby mare tamy fiain̈ana. Nisy vokany taminany koa raha nataondrô Israelita aby io taminany. (Jer. 20:7, 8) Haintsika raha navoa izy zen̈y, izikoa atsika fa mahita olo man̈ano raha ratsy lôso mpan̈arivo na lera irô mankaratsy atsika. Nikoran̈in’i Jeremia tamy Zan̈ahary fa izy nahaleho tamy zen̈y. Izy ndraiky tsy nidaon̈o tsao Zan̈ahary tsy man̈ano ny rariny. Izikoa fa hitany fa nisazin’i Jehovah irô Israelita tsy nan̈araka volan̈a aby io, nisaora nahaifatatra fo fatokisany fa Zan̈ahary man̈ano ny rariny. (Jer. 32:19) Mety koran̈intsika amy vavaka koa raha mampalahelo atsika. Sady matoky koa atsika fa amy fotoan̈a mety, Jehovah han̈afoan̈a raha tsy rariny hitantsika amy ziôty io.
16. Izikoa atsika mahatsapa fa misy erany raha vitantsika noho ny raha iain̈antsika, ino raha ianarantsika baka amy Levita araiky natao sesitany in̈y? (Salamo 42:1-4) (Zahava koa sary.)
16 Vakia Salamo 42:1-4. Levita araiky natao sesitany nanoratra hira io, ke tsy nafaka nifanerasera tamy vahoakan’i Jehovah. Amy salamo io ahitan̈a tsarabe raha tan̈aty fônany. Haintsika tsarabe raha nahazo izy io izikoa atsika tsy mahazo miboaka tran̈o na gadrain̈y noho ny finoan̈antsika. Mety hiovaova fihetseham-pôntsika, kanefa tsara izikoa koran̈intsika amy vavaka izio. Raha zen̈y mety han̈ampy atsika handiniky raha an̈atin’ny eritreritrintsika ndreky hampatsiaro atsika ino raha ten̈a maventy. Ohatra, Levita in̈y tontohitry fa izy mbala mety midera Jehovah amy fomba hafa fo. (Sal. 42:5) Izy koa nandiniky karakôry nataon’i Jehovah tsy vôly nikarakara izy. (Sal. 42:8) Mivavaka mare amy Zan̈ahary man̈ampy atsika handiniky fihetseham-pôntsika, han̈amboatra sain̈y, baka iô hahazo angôvo hiaretan̈a.
Levita nanoratra Salamo faha-42 io nan̈aboraka tamy Zan̈ahary raha tan̈aty fônany. Lera atsika mikoran̈a raha an̈aty fôntsika amy vavaka, mety ho tsaroantsika raha ten̈a maventy (Zahava fehintsoratra 16)
17. a) Ino raha ianarantsika baka amy vavakan’ny mpaminan̈y Jona? (Jona 2:1, 2) b) Nan̈ino volan̈a sasany amy Salamo ao mety man̈ampy atsika, izikoa atsika fa miatriky raha sarotro? (Zahava lamariky amy pazy ambany.)
17 Vakia Jona 2:1, 2. Tamy mpaminan̈y Jona tan̈atin’ny kibon’ny laoko maventy, izy nan̈ano vavaka io. Izy nata tsy nan̈araka volan̈a Jehovah, natokisany fa Jehovah nitandren̈y izy. Amy vavaka io Jona nampiasa volan̈a maro baka amy Salamo.d Mety efa hainy tsarabe baka irô andininy aby io. Ke izikoa izy fa nisaintsain̈y irô io, izy natoky fa Jehovah han̈ampy izy. Karaha zen̈y koa, izikoa atsika mangala onon̈o andininy sasany amy Baiboly ao. Ho azontsika onon̈o irô io ke han̈amia angôvo atsika, lera atsika mivavaka amy Jehovah koa fa tôjy raha sarotro.
AZA VÔLY MAN̈ATON̈O MARIKITRY JEHOVAH AMY VAVAKA
18-19. Izikoa atsika sahiran̈a hikoran̈a raha an̈atin’ny fôntsika koa fa mivavaka, nan̈ino mankahery atsika Romanina 8:26, 27? Man̈ameza ohatra.
18 Vakia Romanina 8:26, 27. Misy atsika miasaloha mare, ke tsy ho vitantsika foeky hikoran̈a raha an̈aty fôntsika. Fa mbala misy raha afaka man̈ampy atsika. Lera karaha zen̈y baka, fan̈ahy masin̈in’ny Zan̈ahary “miangavy” nintsika. Amy fomba akôry? Jehovah nampiasa fan̈ahy masin̈inany nahavy irô mpanoratra Baiboly aby io nanoratra vavaka maro amy Baiboly ao. Ke izikoa atsika tsy ten̈a mahavita mikoran̈a raha an̈atin’ny eritreritrintsika in̈y, fangatahan̈a an̈atin’ny vavaka aby amy Baiboly ao in̈y, hiraisin’i Jehovah ho fangatahan̈antsika, ke izy mety hamaly irô io.
19 Ten̈a nan̈ampy ranabavy Yelena baka a Russie raha zen̈y. Nisambôrin’ny polisy izy, fôtony nivavaka ndreky namaky Baiboly. Nikorontan̈a mare sain̈inany, ke sarotro taminany nivavaka. Ho izy: “Azoko onon̈o fa zaho koa fa niasaloha mare in̈y, tsy haiko foeky ino raha hivolan̈iko amy vavaka, ke vavakan’ny mpanomponany aby taloha tan̈y ... niraisin’i Jehovah mira fangatahan̈anaka. ... Ten̈a nankahery zaho raha zen̈y, tan̈atin’ny fotoan̈a sarotro be io.”
20. Akôry han̈oman̈antsika sain̈intsika, baka atsika hahavita hivavaka izikoa fa miasaloha mare?
20 Izikoa atsika miasaloha mare in̈y, mialamboetry mare sain̈intsika. Ke baka han̈oman̈ana sain̈intsika, atsika mety mitandren̈y irô Salamo nalain̈a feo aby io. Mety soratintsika koa raha tsapantsika, karaha nataon’ny Mpanjaka Davida. (Sal. 18, 34, 142; volan̈a mampiditry.) Fa zen̈y ndraiky tsy fitsipiky momba raha tôkony ataontsika mba hioman̈ana amy vavaka. (Sal. 141:2) Zay fomba hitanao mety tsara, ataova.
21. Nan̈ino atsika afaka mivavaka amy fôntsika jiaby?
21 Mankahery atsika mare mahay fa Jehovah efa mahay raha tiantsika hikoran̈iny, nata atsika mbala tsy mivolan-draha. (Sal. 139:4) Fa ravoravo mare izy, izikoa atsika matoky izy ke mikoran̈a aminany raha an̈aty fôntsika. Ke aza misalasala mivavaka amy Babanao an-dan̈itry an̈y. Ampiasà irô volan̈a voasoratra amy vavaka amy Volan̈anany ao. Mivavaha amy fô jiaby. Koràn̈a aminany raha mamparavoravo anao ndreky raha mampalahelo anao. Jehovah ten̈a Kamaradinao mare, ke izy iô fo han̈ampy anao!
HIRA 45 Izay Saintsainiko ato Am-poko
a Diniha “Toetry sasany mampiavaka Jehovah” amy boky Andininy Man̈ampy amy Fiain̈anan’ny Kristianin̈y, amy foto-kevitry “Jehovah.”
b Matetiky fôhiky fo vavaka atao nin’olo jiaby amy fiangonan̈a.
c Tamy vavaka nataony, Hana nampiasa volan̈a mira amy nisoratin’i Mosesy. Misaora nangala fotoan̈a nisaintsain̈ana Soratra Masin̈y izy. (Deot. 4:35; 8:18; 32:4, 39; 1 Sam. 2:2, 6, 7) Taon̈o maro tafara, Maria maman’i Jesosy nampiasa volan̈a fideran̈a mitovitovy tamy volan̈a nampiasain’i Hana koa.—Lioka 1:46-55.
d Ohatra, ampiràn̈a Jona 2:3-9 ndreky Salamo 69:1; 16:10; 30:3; 142:2, 3; 143:4, 5; 18:6; aviô 3:8. Irô io milahatra eraka fomba nikoran̈an’i Jona izio.