Aza Adin̈a Mivavaka Nin’olo Hafa

1. Ino ahaizantsika fa vavaka io raha ten̈a maventy?

VAVAKA io an̈isan’ny raha faran’ny tsara namezan’ny Zan̈ahary. Diniha baka. Jehovah nan̈amia anjely aby io asa sasany ataondrô. (Sal. 91:11) Izy koa nan̈amia Jesosy Zanany andraikitry maro maventy. (Mat. 28:18) Fa kanefa, izy ma nan̈iraka olo hitandren̈y vavaka ataontsika? Aha. Vavaka io raha nifidin’i Jehovah hitandrin̈esany izy zaraiky. Jehovah “Mpitandren̈y vavaka” mitandren̈y atsika tsiaraikiaraiky.​—Sal. 65:2.

2. Nan̈ino apostoly Paoly ohatra tsara amy fan̈anaovan̈a vavaka nin’olo?

² Atsika ndray tsy mihafahafa amy Jehovah mikoran̈a raha mampiasaloha atsika, atsika koa tôkony hivavaka nin’olo hafa. Karaha zen̈y apostoly Paoly. Ohatra, izy nanoratra tamy fiangonan̈a ta Efesosy karaha ty: “Zaho mivavaka ninarô fo.” (Efes. 1:16) Fa Paoly nivavaka nin’olo tsiaraikiaraiky koa. Ohatra, izy nivolan̈a tamy Timoty: “Zaho man̈ano mersy Zan̈ahary, ... ke zaho mahatsiaro anao fo izikoa fa miangavy mivavaka matsan̈a alin̈y.” (2 Tim. 1:3) Paoly nanan̈a problemonany manokan̈a ke nikoran̈iny tamy Zan̈ahary. (2 Kor. 11:23; 12:7, 8) Fa izy mbala nanokan̈a fotoan̈a nivavahan̈a nin’olo fo.

3. Nan̈ino atsika mety han̈adin̈a hivavaka nin’olo?

³ Ndraikindraiky mety adin̈antsika mivavaka nin’olo. Nan̈ino? Ranabavy Sabrinaa nikoran̈a antony araiky. Ho izy: “Lomolomoay fo fiain̈ana iziôty. Ke matetiky problemontsika fo mahasôfy atsika. Ke raha ilaintsika fo koran̈intsika amy vavaka.” Asa anao ndraikindraiky mba tatran’izen̈y? Izikoa ia valiny, han̈ampy anao lahatsoratra ty. Izity 1) han̈azava nan̈ino atsika mila mivavaka nin’olo hafa, aviô 2) man̈amia soso-kevitry amy fomba han̈anaovan̈a zen̈y.

NAN̈INO MA MILA MIVAVAKA NIN’OLO?

4-5. Amy karakôry ma vavaka ataontsika nin’olo io “misy vokany be”? (Jakoba 5:16)

⁴ Vavaka nin’olo io “misy vokany be.” (Vakia Jakoba 5:16.) Mety hahatsara raha ma fan̈anaovan̈a vavaka nin’olo? Ia. Karaha ataon’i Jesosy efa nahay fa apostoly Petera tsy ho ela han̈ano sary tsy hahay izy. Ho Jesosy tamy Petera: “Zaho efa niangavy baka finoan̈anao tsy hihen̈y.” (Lioka 22:32) Hain’i Paoly koa fa vavaka atao nin’olo io mety hahatsara raha. Izy koa fa nigadrain̈a tsy tamy rariny ta Roma tan̈y, karaha ty nisoratiny tamy Filemona: “Zaho man̈anten̈a fa ho afaka gadra, ke ho avy aminarô an̈y ndraiky, fôtony anarô mivavaka ninaka.” (Filem. 22) Zen̈y ankitin̈y raha nandalo. Paoly nafaka gadra, aviô izy nahavita nitory ndraiky koa.

⁵ Fa zen̈y ndraiky tsy mivolan̈a fa atsika koa mivavaka, atsika hiforse Jehovah han̈ano raha. Hitany mpanomponany aby io miasaloha mare momba raha angatahindrô io, ke ndraikindraiky izy mety han̈ano raha hamalian̈a fangatahan̈andrô io. Fahaizantsika raha zen̈y han̈ampy atsika hivavaka amy Jehovah momba problemo araiky, aviô apetrakantsika aminany fatokisan̈a fa izy hanapa-kevitry amy raha mety hataony.​—Sal. 37:5; zahava 2 Korintianina 1:11.

6. Nan̈ino hanjary hahinakinaka olo atsika izikoa mivavaka nindrô? (1 Petera 3:8)

⁶ Manjary mahay “mahinakinaka” olo atsika izikoa mivavaka nindrô.” (Vakia 1 Petera 3:8.) Olo mahay mahinakinaka olo zen̈y mahay jalin’olo, ke tihan̈ano raha han̈ampian̈a izy. (Mar. 1:40, 41) Karaha ty ho Michael, anti-pan̈ahy araiky: “Zaho koa fa mivavaka momba raha manahiran̈a olo, manjary mahaimazava aminaka fo jaly mahazo irô. Raha zen̈y mampitombo fitiavako irô. Karaha mahaimarikitry irô fo zaho, ndray tsy haindrô raha zen̈y.” Mikoran̈a hatsaran̈a azo baka amy fahinakinahan̈a olo koa i Richard, anti-pan̈ahy araiky. Ho izy: “Zaho koa fa mivavaka nin’olo, raha zen̈y mandrisiky zaho han̈ano raha han̈ampian̈a izy.” Karaha ty koa ho izy: “Atsika koa fa man̈ampy olo ampidirintsika amy vavakantsika io, atsika ampiasain’i Jehovah hamaly vavaka nataontsika ninany.”

7. Nan̈ino atsika koa mivavaka nin’olo hafa, tsy hieritreritry be problemo mahazo atsika? (Filipianina 2:3, 4) (Zahava koa sary.)

⁷ Atsika koa mivavaka nin’olo, hanjary ho haintsika mitondra problemontsika. (Vakia Filipianina 2:3, 4.) Atsika io miain̈y amy donia fihezin’ny Devoly, ke tsisy olo tsisy problemo. (1 Jaona 5:19; Apok. 12:12) Ke izikoa atsika zatra mivavaka nin’olo hafa, zen̈y mampatsiaro atsika fa “tsy atsika zaraiky fo mijaly karaha io fa rahalahintsika amy tany jiaby koa.” (1 Pet. 5:9) Karaha ty ho Katherine, ranabavy mpisava lalan̈a: “Zaho mivavaka nin’olo hafa io mampatsiaro zaho fa tsy zaho zaraiky fo miaritry raha sarotro. Raha zen̈y mahavy zaho tsy miasaloha be loatra amy problemo mahazo zaho.”

ILAINDRÔ VAVAKANTSIKA

8. Azôvy aby mety ampidirintsika amy vavaka?

⁸ Azôvy aby mety ampidirintsika amy vavaka? Atsika mety mivavaka nin’olo amy fitambarany. Ohatra amy zen̈y irô olo marary, irô tsaiky lekoly kotran̈in’ny namandrô na forsendrô han̈ano raha tsy mety, aviô irô olo efa matoe aby io. Maro amindrô rahalahy ndreky ranabavy aby io koa miaritry fanoheran̈a, na baka amy fianakavian̈andrô, na baka amy fanjakan̈a. (Mat. 10:18, 36; Asa. 12:5) Sasany amindrô rahalahy aby io koa tsy maintsy milefa, fôtony misy korontan̈a baka amy politiky amy tany misy irô. Fa sasany ndraiky, mety andalovan’ny antambo tany misy irô, ke irô mety ho voa raha. Mety tsy haintsika irô rahalahy ndreky ranabavy aby io tsiaraikiaraiky. Fa atsika koa mivavaka nindrô, aboakantsika amy zen̈y fa atsika man̈araka volan̈an’i Jesosy, ‘mila mifankatia’ in̈y.​—Jaona 13:34.

9. Nan̈ino atsika tôkony hivavaka nindrô mitariky amy fandaminan̈an’i Jehovah ndreky nin’ny vadindrô?

⁹ Tsara koa atsika mivavaka nindrô mitariky amy fandaminan̈an’i Jehovah. An̈atin’izen̈y Filan-kevi-pitantan̈ana ndreky mpan̈ampy irô, Komitin’ny Sampan̈a, mpiandraikitry amy birôn’ny sampan̈a, mpiandraikitrin’ny faritry, anti-pan̈ahy amy fiangonan̈a ndreky mpikarakara fiangonan̈a. Maro amindrô rahalahy aby io koa mba miasaloha, fa irô mbala miasa mare han̈ampian̈a atsika. (2 Kor. 12:15) Ohatra, karaha ty nivolan̈in’i Mark, mpiandraikitrin’ny faritry: “An̈isan’ny raha ten̈a mampiasaloha zaho, zaho lavitry iry olobeko, kanefa irô efa matoe, aviô samy marary. Anabaviko ndreky valilahiko ndraiky efa mikarakara irô, fa mbala mampangôtsoko fônaka fo mieritreritry fa zaho tsy mahavita man̈ampy irô mivantan̈a.” Ke ndray haintsika na tsy haintsika raha mampiasaloha irô rahalahy miasa mare aby io, tsara atsika tsy vôly mivavaka nindrô fo. (1 Tes. 5:12, 13) Tsara koa atsika mivavaka nin’ny vadindrô, fôtony irô tsy mivadiky ndreky manohan̈a vadindrô, baka irô mahavita man̈ano fanendrenandrô io fo.

10-11. Vavaka ataontsika amy fitambarany nindrô rahalahy ndreky ranabavintsika aby io ma mamparavoravo Jehovah? Hazavà.

¹⁰ Efa nikoran̈intsika tiô fa matetiky atsika mivavaka nindrô rahalahy ndreky ranabavintsika aby io amy fitambarany. Ohatra, atsika ndray tsy mahay an̈arandrô tsiaraikiaraiky, atsika mety hangataka Jehovah han̈ampy lan̈iany migadra, ndreky hankahery lan̈iany naty havan̈a. Karaha ty ho Donald, anti-pan̈ahy araiky: “Maro mare irô rahalahy ndreky ranabavintsika aby io miatriky raha sarotro. Ke tsara ndraikindraiky atsika man̈ano vavaka tambabe, ke atambatrantsika ao olo jiaby miatriky raha sarotro.”

¹¹ Mamparavoravo Jehovah ma vavaka karaha zen̈y? Mazava ho azy! Fa tsy haintsika tsarabe raha ten̈a ilaindrô rahalahintsika ndreky ranabavintsika aby io. Ke mety tsarabe izikoa atsika man̈ano vavaka amy fitambarany nindrô. (Jaona 17:20; Efes. 6:18) Vavaka aby zen̈y man̈aboaka fa atsika “tia irô rahalahy jiaby amy finoan̈a.”​—1 Pet. 2:17.

KOA FA MIVAVAKA NIN’OLO TSIARAIKIARAIKY

12. Nan̈ino ma mila mahay mandiniky atsika, izikoa tihan̈ano vavaka voafaritry tsara?

¹² Mahaiza mandiniky. Fan̈ampin’ny atsika man̈ano vavaka amy fitambarany nindrô rahalahy ndreky ranabavy aby io, tsara koa atsika mivavaka nin’olo tsiaraikiaraiky ke manon̈ono an̈arandrô. Asa misy olo marary lava na marary mare amy fiangonan̈anarô ao? Misy olo kivy ma ao fôtony forsen’olo lekoly araiky amindrô han̈ano raha tsy mety? Misy olo sahiran̈a mitaiza manokan̈a ma ao, mitarimy zanany “mifan̈araka amy fan̈anaran̈a ndreky fomba fisain̈an’i Jehovah”? (Efes. 6:4) Izikoa anao mahay mandiniky, hahaiho tia ndreky hahinakinaka olo fo, izikoa mivavaka nindrô.b​—Rom. 12:15.

13. Karakôry hataontsika hivavaka nin’olo tsiary haintsika na tsy hitantsika?

¹³ Tonon̈a an̈arandrô. Tsara atsika man̈ano zen̈y, nata izikoa fa mivavaka nin’olo mbala tsiary hitantsika. Ohatra, diniha irô rahalahy ndreky ranabavintsika migadra a Crimée, Érythrée, Russie, Singapour. Amy jw.org ao ahitanao an̈arandrô tsiaraikiaraiky.c Karaha ty ho Brian mpiandraikitrin’ny faritry: “Hitako man̈ampy izikoa soratin̈y an̈arandrô rahalahy ndreky ranabavy migadra aby io, aviô tonon̈iny mare, amy zen̈y irô tsisy adin̈ako amy vavaka manokan̈a ataoko.”

14-15. Akôry han̈anaovantsika vavaka voafaritry tsara?

¹⁴ Farita tsara vavakanao. Michael nivolan̈intsika taloha tarỳ in̈y nan̈amia soso-kevitry karaha ty: “Zaho koa fa mamaky tantaran’ny rahalahy aby migadra amy jw.org ao, zaho mimenimeny karakôry nataoko zaho koa tamy plasindrô. Haiko fa zaho tsy maintsy hiasaloha amy vadiko, aviô mila haiko tsarabe koa fa ten̈a mahazo raha ilainy izy. Karaha zen̈y ataoko, ke voafaritry tsara vavaka ataoko nindrô rahalahy migadra, kanefa manambady aby io.”​—Heb. 13:3.

¹⁵ Izikoa atsika mandiniky karakôry fiain̈anandrô rahalahy migadra amy prizon an̈y isan’andra, atsika koa hahita fomba hafa han̈anaovan̈a vavaka voafaritry tsara nindrô. Atsika, ohatra, mety mivavaka amy Jehovah, baka mpiambin̈y gadra aby io ho tsara fan̈ahy amindrô rahalahy aby io. Hangatahintsika koa Jehovah, baka irô manam-pahifan̈a aby io han̈ambela irô libra hanompo Jehovah. (1 Tim. 2:1, 2) Mety mivavaka koa atsika baka fiangonan̈a amy tany misy irô rahalahy migadra aby io hahaiho fatatra finoan̈a fo, baka amin’ny ohatra tsara amezandrô rahalahy aby io. Mivavaka koa atsika, baka irô olo tsy Vavolombelon̈on’i Jehovah hahita toetry tsarandrô rahalahy migadra aby io, ke hitandren̈y hafatra torin̈a amindrô. (1 Pet. 2:12) Mbala karaha zen̈y koa raha mety ataontsika izikoa fa mivavaka nindrô rahalahy ndreky ranabavy miaritry fitsapan̈a karazany hafa. Atsika koa mahay mandiniky, manon̈ono an̈aran’olo aby io izikoa fa mivavaka, aviô faritantsika tsara vavakantsika, aboakantsika amy zen̈y fa ‘ten̈a mifankatia’ atsika.​—1 Tes. 3:12.

RAHA TSARA HO HAINTSIKA MOMBA VAVAKANTSIKA

16. Akôry han̈aboahantsika fa atsika manetry ten̈a izikoa fa mivavaka? (Matio 6:8)

¹⁶ Efa hitantsika fa vavakantsika io misy vokany be ke mety han̈ova raha. Ndray izy man̈ano zen̈y, misy raha tsy mila adin̈antsika. Atsika koa fa mivavaka, tsara haintsika fa efa hain’i Jehovah raha mandalo io, aviô atsika tsy tôkony hikômandy Jehovah amy raha tôkony hataony amy problemo io. Jehovah mahay raha ilain’ny mpanomponany, alohalohandrô tompiny na alohalohantsika. (Vakia Matio 6:8.) Nan̈ino fo basy atsika tôkony hivavaka nin’olo? Fan̈ampin’ny antony aby efa nikoran̈intsika tamy lahatsoratra ty, atsika mivavaka nin’olo hafa io an̈aboahantsika fa atsika mba miasaloha nin’olo hafa koa. Ke fitiavan̈a mandrisiky atsika hifampivavaka. Aviô Jehovah koa ravoravo mahita mpanomponany mifankatia fôtony mangala tahaka izy.

17-18. Ino ohatra mety han̈azavan̈a vavaka ataontsika nin’olo?

¹⁷ Nata vavakantsika io karaha tsisy vokany amy problemon’olo, izio ahitan̈a fa atsika tia irô rahalahy ndreky ranabavy aby io, aviô hitan’i Jehovah koa raha ataontsika. Ohatra misy raimandreny manan-janaka aroe mianadahy. Narary araiky lelahy io, ke araiky man̈angy io mivolan̈a amy papany: “A papa, zahava izy. Marary mare kony izy ay.” Papan’ny tsaiky io efa man̈ano raha ikarakaran̈a izy. Tiany baka zanany io ke karakarainy tsara. Fa papany io fo ravoravo mahita fa zanany viavy hely io mba miasaloha mare amin’ny anadahiny marary io, ke miangavy izy han̈ampy anadahiny.

¹⁸ Karaha zen̈y koa raha irahin’i Jehovah ataontsika. Tiany atsika hifampikarakara ndreky hifampivavaka. Atsika koa man̈ano zen̈y, vavaka ataontsika io ahitan̈a fa atsika tsy tia ten̈a fa miasaloha amin’olo hafa, ke mamparavoravo Jehovah raha zen̈y. (2 Tes. 1:3; Heb. 6:10) Aviô koa, karaha efa nikoran̈intsika in̈y, ndraikindraiky vavakantsika io mety han̈ova raha mandalo io foeky. Ke irarian̈a atsika tsy han̈adin̈a hifampivavaka.