Fan̈ontanian̈an’ny Mpamaky

Ino ma “hevitry” handeha hataon’i Jehovah an̈aty fôn’ny firenena aby io tsy ho ela?

Karaha ty raha volan̈in’ny Apokalypsy 17:16, 17 momba fanombohan’ny fahorian̈a be: “Ho halan’ny tandroko folo hitanao in̈y ndreky biby dy in̈y mare makorely io, ke hiravaindrô raha jiaby anan̈any aviô hampibonginindrô izy, baka iô hoanindrô nôfotronany jiaby aviô hiroandrô izy ziska izy ravan̈an’ny môtro. Efa nataon’ny Zan̈ahary tan̈atin’ny fôndrô tao baka hevitrinany, amy zen̈y irô han̈atanteraka izio, tsy ino hevitry tokan̈a handeha hitantirahindrô jiaby zen̈y fa han̈amia fanjakan̈andrô biby dy io.” Taloha tan̈y, boky ndreky gazetintsika nan̈azava fa “hevitry” handeha hataon’i Jehovah an̈aty fôndrô firenena aby io tsy ino fa handripaka fivavahan̈a diso.

Kanefa, mila ahitsy fan̈azavan̈a zen̈y. “Hevitry” handeha hataon’i Jehovah an̈atin’ny fôndrô firenena aby io tsy ino fa irô han̈amia “fanjakan̈andrô biby dy io.” Ke baka hazava amintsika karakôry hahatantirahan’izen̈y, alô dinihintsika fan̈ontanian̈a aby ty.

Azôvy aby ma voakoran̈a an̈atin’ny faminanian̈a io? “Makorely” na koa “Babylony Be”; izio manôndro fivavahan̈a diso jiaby eran-tany. Aviô, “biby dy mena dà”; izio fikambanan̈a momba filaminan̈a nanomboko niasa tamin’ny 1919, ke Fikambanam-pirenena an̈aran’izio tamy zen̈y fa Firenena Mikamban̈a ikahian̈a izio iziôty. (Apok. 17:3-5) “Tandroko folo” io ndraiky manôndro fitondrasan̈a jiaby manohan̈a biby dy io.

Ino raha ifandraisan’ny makorely io ndreky biby dy mena dà? Makorely io “mitenginy” biby dy io, ke mitahy izy, baka iô mifen̈y mifehy raha jiaby ataony foeky.

Karakôry hiafaran’ny makorely io? “Ho halan’ny” biby dy io ndreky tandroko folo manohan̈a izy io “makorely” io. Halandrô mare izy ke hiravaindrô fanan̈ananany jiaby, baka iô haboelindrô raha tsy manjary ataony. Irô amy zay han̈atanteraka didim-pitsaran̈an’i Jehovah, ke handripaka makorely io. (Apok. 17:1; 18:8) Ho tapitry iô tantaran’ny fivavahan̈a diso. Fa alohan’ny raha zen̈y, hataon’i Jehovah raha hahavy irô firenena aby io han̈ano raha tsiary nisy foeky tamy tantaran’olombelon̈o.

Ino raha handeha hampan̈anaovin’i Jehovah irô firenena aby io? Hataony an̈aty fôn’ny tandroko folo “hevitrinany”, tsy ino zen̈y fa “han̈amia fanjakan̈andrô biby dy mena dà” in̈y na Firenena Mikamban̈a. (Apok. 17:13) Diniha baka ino dikan’izen̈y. Izio ma sitrapôndrô fanjakan̈an’olombelon̈o aby io fo ho tapa-kevitry hanolotro fahifan̈andrô amy biby dy io? Ehe! Faminanian̈a io mivolan̈a fa Zan̈ahary han̈ano raha hahavy irô han̈ano zen̈y. (Ohab. 21:1; ampiràn̈a amin’ny Isaia 44:28.) Izio ma raha handeha tsihelihely? Ehe! Izio ho fivoan-draha tampoko. Baka iô amy zay, biby dy vo nahazo fahifan̈a io han̈atanteraka didim-pitsaran̈an’i Jehovah amindrô fivavahan̈a diso aby io, ke han̈afoan̈a irô io.

Ke ino raha hantin̈aintsika fa hiboaka? Atsika tsy mila miasaloha na hitady vaovao mivolan̈a fa fanjakan̈an’olombelon̈o aby io efa manomboko manohan̈a tsihelihely Firenena Mikamban̈a. Fa ty raha hampoizintsika fa hiboaka: Jehovah han̈ano raha tampoko, hahavy irô firenena aby io hanolotro fanjakan̈andrô amy biby dy io. Ke izikoa fa miboaka raha zen̈y, haintsika fa hanomboko fahorian̈a be. Fa mandra-pavian’izen̈y, “irarian̈a atsika tsy hatôro karaha olo hafa ndreky hisain̈y tsarabe”, fôtony efa tsy ho ela ho hisy fiovoan̈a tampoko io!​—1 Tes. 5:6.