Man̈ampia Olo Baka Tsy Hahatsiaro Latsatokana: Ino Raha Koran̈in’ny Baiboly?

Olo eran-tany amy ziôty mahatsiaro latsatokana ndreky tsy afaka minaman̈a amin’olo. Manampahaizan̈a momba fahasalaman̈a sasany mino fa man̈ampy olo an̈isan’ny fomba araiky hiadivan̈a amy fihetseham-pô io.

• “Ho hisy dikany fiain̈ananao izikoa anao man̈ampy olo mila fan̈ampian̈a. Tsy vitan’izen̈y fo fa anao koa tsy hahatsiaro latsatokana na tsisy naman̈a.”​—Fikambanan̈a Amerikain Mikarakara Fahasalaman̈a.

Amy Baiboly ao misy torohevitry momba ino aby raha mety ataontsika han̈ampiantsika olo. Izikoa atsika man̈araka torohevitry aby io, atsika tsy hahatsiaro latsatokana.

Ino aby raha mety ataontsika?

Mifen̈a ho tia man̈amia. Mitadiava fomba hiarahan̈a amin’olo, intsaka eky hiarahan̈a mivantan̈a amin’olo. Mifen̈a ho tia mizara raha anan̈anao amin’olo. Izikoa anao man̈ano zen̈y mety hankasitraka anao olo io ke anarô ho lôso kamarady.

• Torolalan̈an’ny Baiboly: “Irarian̈a anarô ho zatra man̈amia raha, baka anarô mba hamian̈a koa.”​—Lioka 6:38.

Ampia olo hafa. Mifen̈a han̈ampy olo voan’ny problemo. Ohatra, anao afaka mitandren̈y ndreky mahinakinaka izy na man̈ano raha hampahivankivan̈a problemonany.

• Torolalan̈an’ny Baiboly: “Olo ten̈a naman̈a zen̈y tia amy fotoan̈a jiaby.”​—Ohabolana 17:17.

Izikoa tianao hahay ino raha azonao atao baka anao hifandray tsara amin’olo fo, vakia lahatsoratra “Fianakaviana sy Namana.”