Ino ma Antony Hivilomantsika?

Valiny baka amy Baiboly

Maro olo tihahay dikany fiain̈ana, ke mety han̈ontany karaha ty: Nan̈ino ma atsika velon̈o? Misy varany ma zaho velon̈o? Hita amy Baiboly ao fa atsika natao hihavan̈a amy Zan̈ahary. Diniha baka iro fahamarin̈ana koran̈iny Baiboly aby ty.

• Zan̈ahary niasa atsika. Baiboly mivolan̈a: “Tsara ho hainaro fa Jehovah io Zan̈ahary niasa atsika, ke atsika io ninany.”​—Salamo 100:3; Apokalypsy 4:11.

• Misy dikany niasany Zan̈ahary raha jiaby, an̈atinizen̈y atsika.​—Isaia 45:18.

• Zan̈ahary niasa atsika, baka atsika hihavan̈a aminazy, ke zen̈y mahavy atsika tihahay dikany fiain̈ana. (Matio 5:3) Tiany atsika han̈atanteraka fan̈irian̈antsika zen̈y.​—Salamo 145:16.

• Olo tihanjary kamaradiny Zan̈ahary mifen̈y man̈ano raha hihavan̈ana amy Zan̈ahary. Misy olo mivolan̈a fa tsy ho vitantsika olombelon̈o foeky hihavan̈a amy Zan̈ahary, fa Baiboly ndraiky mandrisiky atsika karaha ty: “Man̈aton̈a Zan̈ahary anaro, fa izy han̈aton̈o anaro.”​—Jakoba 4:8; 2:23.

• Atsika tsy maintsy miain̈y mifan̈araka amy dikany niasany Zan̈ahary atsika, izikoa tihanjary kamaradinany. Karaha ty koran̈iny Baiboly, amy Mpitoriteny 12:13: “Matahora lay ten̈a Zan̈ahary ndreky areha didinany, fotony zen̈y adidy tokony hataonolombelon̈o.”

• Mbala ho haintsika tsarabe aminy amaray an̈y karakory ten̈a fiain̈ana tiany Zan̈ahary iain̈antsika, lera izy man̈adoso jaly ndreky han̈amia fiain̈ana tsisy farany kamaradinany, dikanizen̈y lan̈iany olo manompo izy.​—Salamo 37:10, 11.