Karakôry Fiheveran’ny Vavolombelon̈on’i Jehovah Divorsy?
Zahay man̈araka raha volan̈in’ny Baiboly momba mariazy ndreky fisaraham-panambadian̈a. Zan̈ahary namôron̈o vadian̈a. Izio nataony hahadin̈y ela. Nataony koa izio baka lelahy araiky ndreky man̈angy araiky hitambatra araiky. Soratra Masin̈y mivolan̈a fa fijangajangan̈a zaraiky fo antony mety isarahan̈a.—Matio 19:5, 6, 9.
Vavolombelon̈on’i Jehovah ma afaka man̈ampy olo fivadiany misy prôblemo amy tokantran̈o?
Ia. Ty aby raha ataonay an̈ampian̈a irô:
Boky ndreky gazety: Maro lahatsoratra amy boky ndreky gazetinay afaka man̈ampy olo fivadiany hankafatatra fifankatiavan̈andrô, ndray irô efa mitady hisaraka. Zahava baka, ohatra, lahatsoratra “Aoka Ianao Hitana ny Voady Nifanaovanareo”, “Mahaiza Mifamela”, aviô “Mbola Hifampatoky Indray ve Izahay?”
Fivorian̈a: Amy fivorian̈an’ny fiangonan̈a ndreky fivoriambe zahay mandiniky hevitry baka amy Baiboly mety arehan’olo manambady.
Anti-pan̈ahy: Afaka man̈ampy olo fivadiany koa anti-pan̈ahy. Irô iziô man̈aboaka andinin-teny magnampy irô, karaha ataony Efesianina 5:22-25.
Tsy afaka misaraka ma Vavolombelon̈on’i Jehovah izikoa tsy iken’ny anti-pan̈ahy?
Ehe. Misy olo fivadiany tsy mifan̈araka iziô mety mangataka fan̈ampian̈a amin’ny anti-pan̈ahy. Fa ndray zen̈y, anti-pan̈ahy tsy afaka mivolan̈a amindrô raha tôkony hataondrô. (Galatianina 6:5) Mety misy Kristianin̈y mifidy hisaraka amy vadiny, ndray tsy mifan̈araka amy Soratra Masin̈y antony hisarahany. Izikoa zen̈y ataony, izy tsy mahazo tombontsoam-panompoan̈a an̈ivon’ny fiangonan̈a sady tsy mahazo manambady ndraiky.—1 Timoty 3:1, 5, 12.
Karakôry fiheveran’ny Vavolombelon̈on’i Jehovah fisintahan̈a?
Baiboly mampirisiky olo manambady hiaraka hipetraka amy vadiny fo ndray irô misy prôblemo. (1 Korintianina 7:10-16) Maro amy prôblemo aby io voavaha izikoa irô mivavaka mare mangataka fan̈ampian̈a amy Jehovah ndreky man̈araka toro lalan̈a amy Baiboly, aviô mifan̈aboaka fitiavan̈a.—1 Korintianina 13:4-8; Galatianina 5:22.
Fa ndraikindraiky, mety misy Kristianin̈y araiky mifidy hisintaka hely izikoa fa tsy hainy eky raha ataony fôtony vadiny:
Kinia tsy mamelon̈o irô.—1 Timoty 5:8.
Kafiry mare.—Salamo 11:5.
Manakan̈a izy tsy hanompo Zan̈ahary foeky. Izikoa, ohatra, vadiny mifôrse izy tsy han̈araka didin’ny Zan̈ahary, izy mety hanapa-kevitry hisintaka, fôtony izy tihan̈araka raha volan̈in’ny Baiboly ty: ‘Zan̈ahary mpitondra zahay, ke izy fo tsy maintsy arehanay volan̈a fa tsy olo.’—Asan’ny Apostoly 5:29.