Fan̈oren̈ana Natao Talohany Nisiany Valan̈aretin̈y

Mila tran̈o fan̈anovan̈a fanompoan̈a maro atsika, fotony andrivo andrivony olo vita batisa isaka taon̈o. Zen̈y mahavy Sampandraharahany Fan̈oren̈ana Antoeran̈a erantany man̈ano plan han̈amboatra ndreky han̈avao tran̈o fan̈anovan̈a fanompoan̈a 2 700 amy taompanompoan̈a 2020.a

Ndray izy man̈ano zen̈y, nirobatiny COVID-19 iro programo aby io. Komity Miandraikitry Asa Fan̈anovan̈a Pirinty amy Filankevipitantan̈ana nan̈ajanon̈o ankamarozany fan̈oren̈ana tokony hatao erantany, baka hiarovan̈a iro rahalahy ndreky ranabavy aby io ndreky fan̈ajan̈a lalàn̈a napetrakany fanjakan̈a. Fa atsika efa nahavita niasa ndreky nan̈avao tran̈o fivorian̈a 1 700, talohany nisiany valan̈aretin̈y ty. Nisy tetikasa maventiny sampan̈a mandilatra 100 koa vita tamy tran̈ony sampan̈a. Diniha ino hatsaran̈a nazondro rahalahy ndreky ranabavy aby io tamy fivitany tetikasa aroe ty.

Sampan̈any Cameroun. Hely mare sampan̈a araiky taloha sady ten̈a naro raha mbala nila namboarin̈y, ta Douala tan̈y. Ke Komity Miandraikitry Asa Fan̈anovan̈a Pirinty nandiniky fan̈avaozan̈a sampan̈a io, fa mbala be mandilatrany vola mety handafosan̈a izy vola mahavita fan̈avaozan̈a izio. Hevitry niritriretindro taminany io han̈orin̈y vaovao na hivanga tran̈o efa vita, fa avio hankatsarain̈a. Fa samy nambela hevitry aby io.

Fa fanjakan̈a tavaratrany Douala tan̈y, nan̈ano plan han̈amboatra lalan̈a marikitry Tran̈o Fan̈anovan̈a Fivoriambe. Ten̈a nilain̈a lalan̈a io, fotony tsy mampijaly olo mandeha amy Tran̈o Fan̈anovan̈a Fivoriambe io sady mbala misy tany mety nampiasain̈a tsara koa tan̈y. Nifan̈araka tamy raha ilainy sampan̈a io mare fankatsaran̈a lalan̈a io! Ke nikeny Filankevipitantan̈ana hiasan̈a tran̈ony sampan̈a vaovao marikitry Tran̈o Fan̈anovan̈a Fivoriambe io.

Baka hitsitsian̈a vola ndreky fotoan̈a, Vavolombelon̈o Jehovah nangala Entrepreneur niaraka niasa tamindro tamy tetikasa io. Safe nandamby deux million de dolara mandilatra, vola niasan̈a sampan̈a vaovao io! Ke efa tafifindra tamy tran̈ony sampan̈a vaovao io iro fianakavian̈any Betela tan̈y, taloha heliny naviany COVID-19.

Ten̈a ravoravo iro Betelita mipetraka ndreky miasa an̈y, fotony nahazo tran̈o tsara sady amy tany malalaka koa, ke fahitandro izio ten̈a kadô baka amy Jehovah ankitin̈y. Misy Betelita fivadiany zay nivolan̈a: “Tihan̈ano farany mare zahay aminy asanay, fotony valera aminay mare kadô baka tamy Jehovah io.”

Birôny Fandikanteny Mitokana (BFM) a Tojolabal, a Meksiky. Tan̈atiny taon̈o maro iro pandika teny tojolabal aby io niasa tamy birôny sampan̈a tan Amérique Centrale tan̈y fo, marikitry tanànany Meksiky. Iro olo mampiasa volan̈a adika io ndraiky mipetraka a Altamirano ndreky Las Margaritas an̈y, amy 1 000 kilometra miala sampan̈a io! Ke problemo, iro pandika teny aby io tsy maharaka fivoarany fivolan̈ana amy tany mampiasa volan̈a tojolabal io. Mbala sosony koa, sarotro tamy sampan̈a tan̈y nahita rahalahy ndreky ranabavy mety hatao pandika teny ndreky halain̈a feo.

Nohony antony aby zen̈y, Komitiny Fanoratan̈a amy Filankevipitantan̈ana tihandefa ekipy pandika teny aby io amy tany mampiasa volan̈a adikandro an̈y. Zen̈y nahavy iro nivanga tran̈o ndreky nan̈avao izio. Sintrany man̈ano zen̈y moramora tozay miasa birô vaovao na mamondro tran̈o.

Misy pandika teny araiky zay nivolan̈a karaha ty: “Tan̈atiny folo taon̈o zaho nandika teny tamy sampan̈a tan̈y, fa zaho tsy nahita fianakavian̈a nampiasa volan̈a nadikako io nata araiky. Fa izioty birônay natao amy tany feno olo mampiasa volan̈a tojolabal io. Zaho mikoran̈a amindro olo aby io isanandra isanandra. Nampitombo vokabileranaka raha zen̈y, ke nahaitsara fomba fandikako teny.”

Tetikasa amy taompanompoan̈a 2021

Vinavina amy taompanompoan̈a 2021 ty, hiasa BFM 75 ndreky tran̈o fan̈anovan̈a sekoly arabaiboly, izikoa tatra. Mankefa tetikasa valo maventy atsika izioty, an̈atinizen̈y foibe vaovao haorin̈y a Ramapo, New York, ndreky fan̈oren̈ana birôny sampan̈a vaovao an Argentine ndreky Italy. Mila Tran̈o Fivorian̈a vaovao mandilatra 1 000 koa fan̈ampinizen̈y. Avio mbala mila man̈amboatra Tran̈o Fivorian̈a mandilatra 6 000 koa atsika, fotony maro tran̈o fivorian̈a izioty efa ratsy ndreky efa mila soloan̈a. Avio misy Tran̈o Fivorian̈a 4 000 koa mila havaozin̈y.

Aia hazahoan̈a vola hiasan̈a tran̈o vaovao zen̈y ndreky han̈avaozan̈a ny efa iô? Mamaly kestion zen̈y Rahalahy Lázaro González, an̈isany Komitiny Sampan̈a an Amérique Centrale an̈y, taminizy nan̈azava momba tetikasa Birôny Fandikanteny Mitokana a Tojolabal in̈y. Volan̈iny: “Tsy ampy vola sampan̈a amy tany misy zahay atỳ. Ke tsy posibla fan̈amboaran̈a birôny fandikanteny amy tany misy iro olo andikan̈a volan̈a io, izikoa tsisy fan̈ampiany rahalahy ndreky ranabavy erantany. Vola amiandro rahalahy ndreky ranabavy aby erantany io nahavy iro pandika teny aby io afaka midoko amy tany misy olo mampiasa volan̈a adikandro io. Man̈ano mersy maventy iro rahalahy ndreky ranabavy erantany zahay, fotony iro mazoto man̈amia.” Man̈ano mersy anaro koa fotony vita iro tetikasa aby io nohony fan̈amezan̈a ataonaro aminy asa erantany, taminy donate jw.org.