Han̈amboaran̈a Boky Ten̈a Miavaka amy Boky Jiaby

“Tan̈atiny 19 taon̈o niambesako izity!” Ino ma raha niambesany rahalahintsika io? Baiboly Ny Soratra Grika Kristianina​—Fandikan-tenin’ny Tontolo Vaovao amy volan̈anany, volan̈a Bengali. Maro koa nivolan̈a karaha zen̈y izikoa fa naboaka tamy volan̈anany Fandikanteniny Tontolo Vaovao io. Fa asa mba fa navy nidinihinao ino aby raha mila atao baka havitan̈a mandika ndreky man̈aboaka iro Baiboly aby io?

Voanalohany, Komitiny Fanoratan̈a amy Filankevipitantan̈ana mifidy ekipy pandika teny handika zio. Firy andra ma ekipy io mandika Baiboly araiky? Karaha ty ho Nicholas Ahladis miaraka miasa amy Sampandraharahany Fandikanteny a Warwick, a New York an̈y: “Maro raha mila dinihin̈y, an̈isanizen̈y firy pandika teny afaka man̈ano tetikasa io, karakory hasarotany volan̈a adika io, karakory fazahoanolo fiainan̈a taminandrany Baiboly, baka io miovaova arakarakany tany ma volan̈a io. Ohatra ziô Soratra Griky Kristianin̈y fo, mahadin̈y kadiriny taon̈o araiky firaka telo taon̈o iro pandika teny amy tany sasany mandika izy. Baiboly jiaby ndraiky, efatra taon̈o na mandilatra zen̈y iro mandika izy. Fa mandika Baiboly amy teny tan̈ana ndraiky mbala elaelanizen̈y.”

Kanefa koa fa handika Baiboly, tsy pandika teny fo raha ilain̈a. Misy ekipiny rahalahy ndreky ranabavy samy amy tany faviany koa, hirahan̈a man̈aboaka hevitrindro momba fandikanteny io. Tsy karamain̈y iro man̈ano zen̈y. Ten̈a ilainy pandika teny remarky ataondro, fotony man̈ampy iro handika Baiboly marin̈y tsara, mazava baka io mora azo. Misy rahalahy araiky baka an Afriky Atsimo, pampiofan̈a pandika teny amy fandikan̈a Baiboly nivolan̈a: “Iro pandika teny aby io mahatsiaro manan̈a andraikitry maventy man̈oloan̈a Jehovah ndreky iro olo pamaky Volan̈anany.”

Koa fa vita fandikan̈a, atao pirinty ndreky atambatra baka hanjary boky araiky Baiboly io. Havitan̈a zen̈y, misy raha folo farany hely ilaindro amy fan̈anovan̈a pirinty ao. Taratasy, lankra, raha fan̈amboaran̈a fon̈ony boky, lakoly, plastiky tsy len̈iny rano, volafotsy nifisahin̈y, riban hely, bandô, raha fan̈injan̈ana taratasy atao boky, fitaovan̈a man̈ampy amy fan̈atambaran̈a Baiboly. Nandilatrany 20 tapitrisa dolara vola lany nivangan̈a iro fitaovan̈a ampiasain̈y amy fan̈atambaran̈a Baiboly io, taminy 2019. Tamy taon̈o io fo, niasa tan̈atiny 300 000 lera mandilatra iro rahalahy tamy tany fan̈anovan̈a pirinty tao, han̈amboaran̈a ndreky handifasan̈a Baiboly.

Nan̈ino ma atsika mandany fotoan̈a ndreky volabe karaha zen̈y? Karaha ty ho Joel Blue, amy Sampandraharahany Fan̈anovan̈a Pirinty Erantany: “Baiboly io boky ten̈a miavaka amboarintsika. Ataontsika tsara ndreky maninton̈o formanany io, baka han̈amia voninahitry Jehovah Zan̈ahary ivavahantsika, ndreky hafatra torintsika.”

Ankoatrany Fandikan-tenin’ny Tontolo Vaovao fampiasaintsika io, mbala man̈amboatra Fandikan-tenin’ny Tontolo Vaovao amy forma hafa koa atsika, natao ninolo ten̈a mila zen̈y. An̈isanizen̈y ziô Fandikan-tenin’ny Tontolo Vaovao amy soratra braille, efa misy amy volan̈a folo karazany izio ziô. Mahadin̈y valo lera fan̈amboaran̈a Baiboly araiky, amy soratra braille. Rasarasain̈y atao boky maromaro amy zay zio, ke mila etazera 2,3 metara farany hely han̈apitrahan̈a iro boky aby io. Man̈amboatra Baiboly spesialy ninolo migadra koa atsika. Fon̈onizio atao taratasy fo, fotony zen̈y fo hikendro amy prizon an̈y.

Man̈ova fiain̈ananolo mamaky izy Fandikan-tenin’ny Tontolo Vaovao io. Diniha baka fiangonan̈a araiky, amy volan̈a Kiluba, amy tanànany Tombe, amy Repobliky Demokratikany Congo, 1 700 kilometara miala amy kapitaly. Araiky fo Baiboly nanan̈any Vavolombelon̈o Jehovah tan̈y, baka io koa volan̈a Kiluba taminany io efa volan̈a kay. Baiboly araiky in̈y fo hifandimbiasandro rahalahy aby io koa fa man̈oman̈a anjara amy fivorian̈a. Fa nanomboko taminy Aoty 2018, samy nahazo Baiboly Fandikan-tenin’ny Tontolo Vaovao amy volan̈a Kiluba olo tsiraikiaraiky tamy fiangonan̈a io. Baiboly izy jiaby nazondro, baka io amy volan̈a avahizo koa.

Karaha ty nivolan̈iny ranabavy araiky miteny aliman, momba Baiboly Fandikan-tenin’ny Tontolo Vaovao navaozin̈y, amy volan̈anany: “Zaho ziô efa tsy mivolan̈a eky, mila mamaky Baiboly zaho. Fa ho zaho: ‘Ombian̈a zaho afaka mamaky misimisy amy Baiboly ty?’” Nisy gadra araiky koa nanoratra karaha ty: “Zaho nahazo Fandikan-tenin’ny Tontolo Vaovao. Izio ten̈a man̈ova fiain̈ananaka. Tsisy raha azoko foeky raha nivolan̈iny Baiboly taloha. Kanefa rango namakiako fandikanteny ty nanjary mazava aminaka tsarabe raha koran̈inizio. Zaho mba tiahay misimisy momba Vavolombelon̈o Jehovah, baka io akory hahavy zaho hanjary Vavolombelon̈o Jehovah.”

Iro pamaky Fandikan-tenin’ny Tontolo Vaovao jiaby, mankasitraka fan̈amezan̈a ataonaro hanohan̈ana fan̈amboaran̈a Baiboly io. Misy fomba maro azo an̈anovan̈a fan̈amezan̈a niny asa erantany io amy donate.jw.org ao. Mersy anaro fa anaro ten̈a tsy matity.