Fan̈ampian̈a iro Rahalahy Erantany amy Fotoan̈any Valan̈aretin̈y Izioty

Tamy Marsy 2020, Fikambanana Iraisam-pirenena Momba ny Fahasalamana koa fa nan̈ambara fisiany valan̈aretin̈y COVID-19, ankamarozanolo tsy nieritreritry foeky fa hiparitaka erantany izio sady hahadin̈y firaka taon̈o araiky manan̈amby. Olo antapitrisany, an̈atinizen̈y Vavolombelon̈o Jehovah mijaly arabatan̈a, arapihetsehampo, arabola azony valan̈aretin̈y ty. Akory ataony Vavolombelon̈o Jehovah mandamin̈y fan̈ampian̈a ndreky mirasa izio an̈atiny krizy be ty?

Fan̈ampian̈a Olo Ten̈a Sahiran̈a

Misy 950 Komitiny Vonjy Rano Vaky (KVRV) natsangana erantany tamy COVID-19 ty. Komity io miasa ambany fan̈arahamasony Komitiny Pandrindra amy Filankevipitantan̈ana. Misy fotoan̈a iro mandamin̈y fan̈ampian̈a antoeran̈a, na koa iro man̈ampy piaramanompo hahazo fan̈ampian̈a baka amy fanjakan̈a. Iro amy KVRV io koa mandamin̈y fan̈ampian̈a amy tany ten̈a sahiran̈a.

Ohatra izioty, raha nisy ta Paragoay tan̈y. Nisy gazety nikoran̈a vokatrany fan̈ampian̈a natao tan̈atiny valan̈aretin̈y ty nivolan̈a fa “maro mare olo tan̈y tsy ampy hanin̈y.” Fa KVRV ta Paragoay tan̈y efa nandrasa hanin̈y mahampy olo an̈atiny aroe herin̈iandra, materiely fan̈adiovan̈a, ndreky raha fiarovanten̈a aminy aretin̈y isaka fianakavian̈a misy olo efatra. Olo samy nahazo fan̈ampian̈a kadiriny 30 dolara (115 500 Ar).

Akory nataondro piasa aby tan̈y niaro ten̈a ndreky ain̈inolo amy COVID-19 tamy zen̈y? Iro nan̈ano kasibosy ndreky nan̈aja elan̈elan̈a. Niverifiendro tsara koa iro kompan̈e pan̈atitry hanin̈y, baka hanin̈y voakarakara tsara ndreky madio tsarabe aterindro, baka io iro man̈atitry izio koa ten̈a mitandrin̈y fahasalaman̈a. An̈isany raha zahavandro aminolo jiaby mirasa fan̈ampian̈a io, iro mila man̈ano lamba spesialy amizio, manasa tomabilindro ndreky man̈ano désinfectant amizio, avio mila ataondro amy tany efa nidezenfekten̈a iro fan̈ampian̈a aby io. Farany, lan̈iany olo mandrasa hanin̈y io mila man̈aja elan̈elan̈a amindro rahalahy mangala fan̈ampian̈a io.

Fampiasan̈a Tsarabe Fan̈amezan̈a Azo

Karaha tamy Zanvie 2021, Komitiny pandrindra nan̈eky hampiasan̈a vola 25 million de dolara han̈ampian̈a olo sahiran̈a amy COVID-19. Iro Sampan̈a ndreky KVRV aby io mitandrin̈y tsarabe amy fampiasan̈a vola io ndreky miasa mare mizaha prix moramora izikoa fa mivanga raha. Karaha ataony ta Chilie, tamy kontindro rahalahy aby nandamin̈y fan̈ampian̈a io, iro tihivanga lantihy 750 kilo. Fa nanonga doblany vidiny mahazatra lantihy io tan̈atiny fanjava araiky fo! Fa lera aroe tafarany komandindro vita tamy vidiny araiky lafo io, pivarotro in̈y nivolan̈a tamindro koa fa nisy olo nivanga lantihy zen̈y nan̈ampody volan̈a fa tsy hangala lantihy nikomandiny. Ke iro rahalahy aby io tsy nangala tamy vidiny lafo be in̈y fa nangala araiky tsy nalainolo in̈y, fa tamy vidiny araiky taminizy mbala tsy nanonga in̈y!

Fa izikoa fa navy iro rahalahy aby io hangala lantihy nikomandindro in̈y, nivadiky koa pivarotro in̈y. Nataony man̈ano afera karaha fikambanan̈a hafa aby io zen̈y koa iro rahalahy aby io. Nisy rahalahy araiky izikoa fa baka nivavaka mangin̈y hely, izy nitantara tamy pivarotro io fa iro olo ten̈a sahiran̈a isaka fiangonan̈a fo mahazo fan̈ampian̈a. Nazavaindro rahalahy aby io taminany koa fa tsy mitovy fototsakafonolo, ke raha ten̈a ilainy fianakavian̈a fo an̈ampian̈a iro. Farany aminjay, namezandro toky pivarotro io fa vola jiaby ataonolo fan̈amezan̈a io ndreky asa jiaby ataony Vavolombelon̈o Jehovah mifototro izio, atao antsitrapo aby. Lany fan̈ahy izy. Nan̈eky nan̈ajotso prix izy, avio mbala nan̈amia kadô lantihy 400 kilo koa.

“Porofony Fitiavan̈a Ten̈a Izy”

Misy ranabavy maty vady zay, Lusu an̈arany, mipetraka a Liberia. Misy havany dimy aby miaraka mipetraka aminany. Taminiro nihina maraindrain̈y man̈ano teny vakina in̈y, misy zafiny lelahy fito taon̈o nivolan̈a taminany fa tsisy hanin̈y tamindro tao. Izy nan̈ontany: “Ino ma hanin̈intsika niany dady e?” Lusu nan̈amia toky fa izy efa nivavaka tamy Jehovah nangataka hanin̈y, avio izy matoky fa Jehovah han̈amia zen̈y iro. Folakandranizin̈y ankitin̈y, Lusu nahazo kaiky baka taminy antipan̈ahindro, hangala laparany fan̈ampian̈andro. Ho Lusu nitantara: “Nivolan̈a zafiko lelahy io fa izioty izy vo mahay fa kaiky Jehovah mitandren̈y ndreky mamaly vavaka, fotony zen̈y Jehovah namaly vavakanaka.”

Nisy man̈angy araiky koa ta Repobliky Demokratikiny Congo tan̈y mipetraka ambadikiny tran̈ony Vavolombelon̈o Jehovah. Izy koa fa nahita fianakavian̈a io nahazo fan̈ampian̈a tamy piaramivavaka tamindro, izy nivolan̈a: “Koa fa vita valan̈aretin̈y ty, zaho manjary Vavolombelon̈o Jehovah, fotony iro mikarakara rahalahy ndreky anabavindro, an̈atiny fotoan̈a sarotro ty.” Vadiny aminjay nan̈ontany izy: “Vary gony araiky fo hampiova anao hanjary Vavolombelon̈o Jehovah?” Ho izy tamy vadiny: “Tsy nohony vary gony araiky fo fa izio porofony fitiavan̈a ten̈a izy.”

Nohony fan̈amezan̈a ataonaro, Vavolombelon̈o Jehovah mahavita mandefa fan̈ampian̈a malaky amindro rahalahy ndreky ranabavy sahiran̈a nohony valan̈aretin̈y ty. Mersy anaro tamy fan̈amezan̈a nataonaro tamy donate.jw.org.