Vonjy Rano Vaky 2021: Tsy Ariantsika iro Rahalahy Ndreky Ranabavintsika Aby Io

Tamy taompanompoan̈a 2021 in̈y,a ten̈a nijaly mare olo, fotony mbala naresaka valan̈aretin̈y COVID-19. Karaha efa nazavaintsika tamy lahatsoratra “Fan̈ampian̈a iro Rahalahy Erantany amy Fotoan̈any Valan̈aretin̈y Izioty”, nandany vola antapitrisany dolarab atsika nampiasainy vonjy rano vaky. Misy Komitiny Vonjy Rano Vaky mandilatra 950 natsangana tamizin̈y.

Fa sosoko valan̈aretin̈y nan̈adary be in̈y, mbala tio koa antambo ndreky raha ratsy nataonolo, ke nisy vokany tamindro rahalahintsika ndreky ranabavintsika aby io erantany. Nohony fisiany antambo mandeha 200 manan̈amby nandalo, Komitiny Pandrindra amy Filankevipitantan̈ana nan̈eky hampiasan̈a vola mandeha 8 million de dolara, fan̈ampiny vola hampiasain̈a amy COVID-19. Diniha baka akory nampiasan̈a fan̈amezan̈a, nan̈ampian̈a iro taminy antambo aroe aby.

Volkan nipoaka ta Nyiragongo

Tamy 22 May 2021, nanomboko nipoaka volkany Nyiragongo, ta Repobliky Demokratikiny Congo. Nandravan̈a tran̈onolo, lekoly maro, avio rezervoarany rano izio. Fa tsy zen̈y fo. Andra maromaro tan̈atiny fipoahany volkan io, karaha nisy zanazanaka horohorontany maro koa nandalo. Mandilatrany antsasakanolo tan̈y nirahan̈a niala tao. Anjatony olo nilefa, ke sasany nilefa ta Rwanda tan̈y.

Nisy Vavolombelon̈o Jehovah mandeha 5 000 koa nafindra toeran̈a taminio. Tran̈ony sasany tamindro io ravan̈a volkan in̈y, fa niny sasany ndraiky nivakinolo tran̈o, iro koa fa niala tao in̈y. Niaraka nan̈ampy iro tan̈y Komitiny Vonjy Rano Vaky ta Rwanda ndreky tamy Repobliky Demokratikiny Congo. Karaha ty tatitry nataony sampan̈any Congo (Kinshasa) momba Komitiny Vonjy Rano Vaky araiky: “Nata mbala nialamboetry olo tamy tanàna sady mbala tsy nirahan̈a niala tao, Komitiny Vonjy Rano Vaky io efa nirasa hanin̈y, rano, darà ndreky lamba sikinin̈y.” Fa nisy rahalahy ndreky ranabavy mandilatra 2000 koa tamy tanàna araiky. Ke Komitiny Vonjy Rano Vaky koa nan̈amia iro lay ndreky kasibosy, avio nan̈azava tamindro akory hiarovanten̈a amy COVID-19 ndreky kôlerà.

Tan̈atiny telo fanjava nisiany antambo io, nisy vary tsiota tonnes, podra tsakotsako tsiota tonnes, menaka telo tonnes, avio rano telo tonnes nirasain̈a tamindro rahalahintsika aby io. Tamy tany io fo nivangan̈a hanin̈y aby io, avio nivangain̈a en gros, amy zen̈y mba mitsitsy vola. Mandany vola baka izio izikoa afarin̈y baka lavitry.

Nisy ranabavy araiky, ravan̈any volkan in̈y tran̈onany mbala vao. Karaha ty nivolan̈iny: “Kivy mare zahay sady nalahelo mare.” Fa izy ndreky fianakavian̈anany baka tio nahazo fan̈ampian̈a. Ho izy: “Mahazo raha ten̈a ilainay fo zahay, fotony Jehovah man̈ampy. Tsapanay tsarabe fa Jehovah mitondra entan̈a mavesatranay io, ke manjary mahivankivan̈a aminay izio.”

Niova mare toekarena ta Venezoelà

Efa taon̈o maro izioty Venezoelà tatrany kriziny toekarena maventy. Mafy mare raha mahazo iro rahalahintsika an̈y, fotony hanin̈y tsy ampy, avio koa tany tsy milamin̈y. Fa fandaminan̈any Jehovah tsy man̈adin̈a iro.

Tamy taompanompoan̈a loso in̈y, vola mandilatra 1, 5 tapitrisa dolara lany, nivangan̈a ndreky nitateran̈a hanin̈y ndreky savon̈o namian̈a iro fianakavian̈a sahiran̈a aby io. Karaha ty tatitry nataony sampan̈any Venezoelà: “Mitatitry hanin̈y mandeha 130 tonnes zen̈y isaka fanjava ten̈a tsy raha moramora. Avio koa izio tsy maintsy alain̈a toky fa avy amindro olo amian̈a izio an̈y.” Matetiky hanin̈y tsy mora robaka fo alefandro rahalahy aby io. Sampan̈a koa nivolan̈a karaha ty: “Ankamarozandro hanin̈y aby io tsy vangain̈a antsinjarany. Amy fotoan̈any izy vokatra in̈y zahay mivanga, fotony mora izy amy zen̈y. Avio zahay mifidy fitondrasan̈a entan̈a ten̈a tsy mandany vola.”

Leonel an̈isany Komitiny Vonjy Rano Vaky a Venezoelà an̈y. Ten̈a tiany andraikitrinany io. Karaha ty ho izy: “Hafa foeky anao man̈ampy olo sahiran̈a aby io. Vadiko baka natiny COVID-19, ke ten̈a nankahery zaho andraikitry io rango nifatesany zay. Maro raha atao fo baka zaho, avio haiko fa mahatsara iro rahalahy sahiran̈a aby io raha ataoko io. Hitako koa fa Jehovah ten̈a nitana volan̈a nataony, ke izy tsy man̈adin̈a panomponany.”

Nisy rahalahy araiky zay koa taloha mba an̈isany Komitiny Vonjy Rano Vaky. Karaha ty nivolan̈iny: “Anjaranaka koa izioty mahazo fan̈ampian̈a. Zahay tsy vitany nahazo raha ten̈a nilainay fo fa mbala nampiandro rahalahy aby io koa zahay baka hilamin̈y fônay. Iro nikarakara zahay ndreky nankahery zahay.”

Ndraikindraiky antambo aby io tsy man̈onkon̈o fa tampoko faviany. Fa fandaminan̈any Jehovah matetiky mandefa fan̈ampian̈a farany malaky, nohony fan̈amezan̈a ataonaro aminy asa erantany. Amy jw.org ao ahitan̈a fomba sasany mety han̈anaovan̈a fan̈amezan̈a. Man̈ano mersy anaro zahay, fotony anaro mazoto man̈amia.