Fan̈ampian̈a Tamin’ny Antambo Tamy 2023: “Hitanay Tsarabe fa Jehovah Tia Zahay”

Baiboly efa nan̈ambara fa amy “faran’ny rafitrin’ny donia ty”, hisy “firenena hiady firenena”, aviô koa hisy antambo maro. (Matio 24:3, 7) Hitantsika tsarabe fa tanteraka raha aby zen̈y tamy taom-panompoan̈a tamy 2023 in̈y.a Fa ndray tiô ady ndreky antambo maro tamy tany efa hely tsy ho 100, Vavolombelon̈on’i Jehovah mbala tia olo fo, karaha ataon’i Jehovah tia olo koa. Akôry nan̈anaovandrô zen̈y?

Tan̈atin’ny taom-panompoan̈a 2023 in̈y, mandilatran’ny 20 antambo nandalo tamindrô rahalahintsika aby io, na izio antambo baka amy natira na izio raha nataon’olombelon̈o. Fa Vavolombelon̈on’i Jehovah nampiasa vola mandilatran’ny 10 000 000 dolarab, baka tamy fan̈amezan̈a eran-tany nan̈ampian̈a olo tamy zen̈y. Mbala misy vola maro koa namezandrô rahalahy ndreky ranabavy aby io, irô olo nila fan̈ampian̈a tamy tany nisy irô. Zahava baka akôry nampiasanay irô fan̈amezan̈a nataonao nan̈ampian̈a olo tamin’ny antambo aroe amindrô antambo aby io, ke nisy vokany tamindrô rahalahy aby io.

“Ten̈a fitiavan̈a io mbala misy amin’ny ankitin̈y”

Efa natetiky tatran’ny ranobe irô tamy faritrin’i Nizeria tan̈y. Fa araiky tamin’ny Oktobra 2022 faran’ny nahery, tamindrô ranobe nandalo tan̈atin’ny folo taon̈o zay. Tany fitsaboan̈a mandeha 676 000 hektara ravan̈an’ny rano, aviô mandilatran’ny 2 000 000 olo nafindra toeran̈a. Sampan̈an’i Nizeria direkty nanendry Komitin’ny Vonjy Rano Vaky, nandamin̈y fan̈ampian̈a irô rahalahy ndreky ranabavy aby io ndreky nan̈ampy irô nankafatatra finoan̈andrô.

Vokatran’ny antambo io tamindrô rahalahy ndreky ranabavy aby io

• 7 505 mpitory nafindra toeran̈a

• 860 tran̈o robaka na ravan̈a

• Tran̈o Fivorian̈a 90 ndreky Tran̈o Fan̈anaovan̈a Fivoriambe araiky dobon-drano

Fampiasan̈a vola fan̈ampian̈a

Nandilatran’ny 250 000 dolara nilanin̈a tamy fan̈ampian̈a vonjy rano vaky, ke an̈isan’ny raha nampiasan̈a izio:

• Nivangan̈a hanin̈y karaha ataon’ny vary, zarikô ndreky paty

• Nividianan̈a raha ilan̈a amy tran̈o karaha ataon’ny Kidôro ndreky lay

• Nan̈amboaran̈a tran̈o nisy robaka ndreky ravan̈a

Akôry nataondrô rahalahy aby io, baka nampiasan̈a tsarabe vola nazo tamy fan̈amezan̈a io? Nizahavandrô tsarabe antsendriky tran̈o tsiaraikiaraiky, nisy nahaizandrô nanapa-kevitry tsao mbala mety hamboarin̈y fo izio. Fa izikoa nisy tran̈on’olo ten̈a ravan̈a jiaby, irô nampiasa fomba fan̈amboaran̈a tran̈o tsotra mahazatra antoeran̈a iô fo.

Irô rahalahy ndreky ranabavy nahazo fan̈ampian̈a aby io ten̈a nankasitraka mare. Karaha ty nivolan̈in’ny ranabavy araiky zay: “Ten̈a nampisabadidaka fiain̈ananay ranobe in̈y, fôtony tsabonay jiaby ravan̈a, aviô zahay nanjary tsisy tany nipitrahan̈a. Kanefa, nahatsiaro nahivankivan̈a zahay, fôtony andran’izin̈y fo irô ranadahy ndreky rahavavy aby io efa navy edy nan̈ampy zahay ndreky nan̈amia zahay tany azo antoko, mety nipitrahan̈a. An̈isan’ny fan̈ampian̈a ten̈a maventy koa hanin̈y nalefan’ny birôn’ny sampan̈a. Tsy hainay foeky raha koran̈iny, fôtony hitanay tsarabe fa tanteraka tamy fiain̈ananay raha koran̈in’ny Jaona 13:34, 35 in̈y. ... Ten̈a fitiavan̈a io mbala misy amin’ny ankitin̈y. Ke zaho ndreky vadiko, aviô iry zanako ten̈a man̈ano mersy anarô, fôtony anarô navy han̈ampy zahay tamy lera nilanay izy tsarabe.”

Irô olo aby tamy tany io koa mba lany fan̈ahy nahita fan̈ampian̈a nataontsika io. Nisy mairan’i Sabagreia, amy fanjakan̈an’i Bayelsa an̈y nivolan̈a karaha ty: “Mba maro fikambanan̈a ndreky legilizy misy ambony tany ty fa Vavolombelon̈on’i Jehovah zaraiky fo mba nan̈ano raha karaha ty. ... Fikambanan̈anarô io an̈isan’ny fikambanan̈a faran’ny tsara ambony tany eto.”

“Hitanay tsarabe fa Jehovah tia zahay”

Tamy Fevrie 2023 in̈y ta Chili tan̈y, efa mandilatran’ny 400 môtro nandravan̈a raha maro. Nisy 430 000 hektara manan̈amby tany ndreky raha maro valera ravan̈a. Aviô efa tsy ela 8 000 olo nafindra toeran̈a. Fa tsy ela tafaran’izen̈y, efa nandamin̈y fan̈ampian̈a edy birôn’ny sampan̈a tan̈y.

Vokatran’ny antambo io tamindrô rahalahy ndreky ranabavy aby io

• 222 mpitory nafindra toeran̈a

• 20 tran̈o ravan̈a

Fampiasan̈a vola fan̈ampian̈a

Mandilatran’ny 200 000 dolara nilanin̈a tamy fan̈ampian̈a vonjy rano vaky, ke an̈isan’ny raha nampiasan̈a izio:

• Nividianan̈a hanin̈y ndreky rano

• Nividianan̈a lesansy, fitaovan̈a fan̈adiovan̈a, ndreky aody

• Nan̈amboaran̈a tran̈o robaka

Nisy fianakavian̈a araiky taitry mare, izikoa fa hitandrô fa ravan̈a rahandrô jiaby, an̈atin’izen̈y tran̈ondrô ndreky velonten̈andrô. Nanjary tsisy raha nitadiavan̈a vola irô. Fa kanefa, lany fan̈ahy irô izikoa nahita fa tsy ampy firy andra, efa navoamboatra edy tran̈ondrô ravan̈a in̈y. Vitandrô fo niatriky raha nahazo irô io, fôtony ten̈a tia olo irô mpiasa an-tsirapô navy tan̈y. Nanjary nahazo angôvo aby irô, ke nandeha nitahitahy irô mpiasa an-tsirapô aby io nan̈amboatra tran̈on’ny rahalahy hafa koa.

Maro rahalahy ndreky ranabavy ten̈a ravoravo tamy fan̈ampian̈a vonjy rano vaky io. Ho rahalahy araiky zay: “Ten̈a mahagaga mare fandaharan̈a nataon’i Jehovah nan̈ano Komitin’ny Vonjy Rano Vaky io. Andra araiky tafaran’ny antambo io nandalo, irô efa navy edy nan̈atriky raha ten̈a nilainay. Efa mankahery mamaky momba fan̈ampian̈a irô rahalahy ndreky ranabavy amy tany sasany, eran-tany, fa kanefa, mbala tsaratsaran’izen̈y izikoa anten̈a mahazo fan̈ampian̈a io, fôtony baka anten̈a mahaimankasitraka fandaminan̈an’i Jehovah fo. Hitanten̈a tsarabe fa irô rahalahy ndreky ranabavy aby io mangala tahaka toetrin’i Jehovah amin’ny ankitin̈y. Hay tsarabe fa irô miasaloha amy raha ilaintsika, amin’ny ara-pan̈ahintsika ndreky amy fihetseham-pôntsika. Hitanay tsarabe fa Jehovah tia zahay.”

Arakaraka hifaran̈an’ny donia ty, hahaimaro fo antambo ho hitantsika. (Lioka 21:10, 11) Fa ndray zen̈y, Jesosy Kristy Mpanjakantsika be fitiavan̈a io hiaraka amintsika fo “isan’andra firaka amy faran’ny donia ty.” (Matio 28:20) Fan̈amezan̈a ataonao nin’ny asa eran-tany, na izio ataonao amy donate.jw.org na amy fomba hafa, ndreky fan̈amezanao fotoan̈a ndreky angôvo, man̈aboaka fa anao manohan̈a Fanjakan̈a io ndreky Mpanjakan’izio ten̈a be fitiavan̈a io. Mersy anao tsy vôly man̈ano fan̈amezan̈a.