Anaro ma mba Man̈ampy Olo Tatrany Antambo?

Ia. Matetiky Vavolombelon̈o Jehovah man̈ampy olo tatrany antambo. Zahay man̈ampy olo jiaby, an̈atinizen̈y olo tsy Vavolombelon̈o Jehovah, fotony zahay man̈araka toro lalan̈a Baiboly amy Galatianina 6:10, mivolan̈a karaha ty: “Irarian̈a atsika han̈ano ny tsara aminolo jiaby, indrindraka fa aminolo finoan̈a araiky amintsika.” Mifen̈y koa zahay mankahery olo jiaby tatrany antambo, baka finoan̈andro hahaifatatra fo, fotony zen̈y raha ten̈a ilaindro.—2 Korintianina 1:3, 4.

Fomba fandaminan̈a fan̈ampian̈a

Izikoa fa misy antambo, iro olobe amy fiangonan̈a mifandray amindro amy fiangonan̈a nandalovany antambo io. Zen̈y ahaizan̈a raha mahazo iro ndreky raha ilaindro. Olobe amy fiangonan̈a aby io amy zay man̈ambara vaovao amindro amy birony sampan̈a Vavolombelon̈o Jehovah. Koran̈indro fan̈ampian̈a efa natao.

Izikoa tsy vitany fiangonan̈a man̈ampy olo aby io, Filankevipitantan̈ana mandamin̈y fan̈ampian̈a iro. Karaha zen̈y nataondro Kristianin̈y tamy faha apostoly tan̈y, izikoa fa nisy mosary. (1 Korintianina 16:1-4) Iro amy birony sampan̈a koa manendry Komitiny Vonjy Rano Vaky, handamin̈y ndreky hitariky amy fan̈ampian̈a olo aby io. Misy koa Vavolombelon̈o Jehovah baka amy tany hafa mahatindry vola ndreky fotoan̈a man̈ampy olo amy tany andalovany antambo.—Ohabolana 17:17.

Baka aia ahitandro vola?

Olo jiaby amy fiangonan̈a samy man̈amia vola tindriny, baka io alefa amy birony sampan̈a Vavolombelon̈o Jehovah. Iro amy birony sampan̈a amy zay mampiasa vola zen̈y han̈ampian̈a olo tatrany antambo. (Asan’ny Apostoly 11:27-30; 2 Korintianina 8:13-15) Tsy karamain̈y iro mitondra fan̈ampian̈a io, ke vola jiaby voavory han̈ampian̈a olo fo, fa tsy ampiasain̈y amy raha hafa.—2 Korintianina 8:20.