Karakory ma Ataonay Izikoa fa Misy Antambo?

Izikoa fa misy antambo, zahay tsy mirekireky mamonjy naman̈a, fotony zahay ten̈a mifankatia. (Jaona 13:34, 35; 1 Jaona 3:17, 18) Karakory ahitan̈a zen̈y?

Man̈amia vola. Tamy faha apostoly aby io, nisy lera nisy mosary ta Jodia, iro Kristianin̈y namandro ta Antiokia tan̈y nandefa vola amonjian̈a iro. (Asan’ny Apostoly 11:27-30) Mira zen̈y koa ataonay. Zahay koa fa maharen̈y havanay sahiran̈a mare, zahay efa mandefa raha ilaindro edy hamonjian̈a iro.—2 Korintianina 8:13-15.

Zahay mandeha mizaha namanay avoa raha. Olobe amy fiangonan̈a amy tany nandalovany antambo io mizaha naman̈a jiaby, tsao misy naty na tsy hita. Efa misy olo koa mikarakara olo amy tany avoa raha karaha zen̈y. Iro mamory hanin̈y, rano madio, lamba, tran̈o ipitrahan̈a ndreky aody amian̈a olo avoa raha aby io. Misy olo pamonjy olo amy tany nandalovany sikilony na ranobe. Iro mandany volandro mandeha mamonjy olo ndreky man̈amboatra Tran̈o Fivorian̈a robaka. Izikoa efa misy raha karaha io, zahay tsy man̈avaka olo. Nata olo tsy Vavolombelon̈o Jehovah mbala vonjianay fo.—Galatianina 6:10.

Zahay mankahery olo ndreky mikoran̈a raha baka amy Baiboly. Mila naman̈a mankahery olo, izikoa fa misy antambo mandalo. Jehovah man̈amia angovo atsika amy lera karaha zen̈y. (2 Korintianina 1:3, 4) Zahay ravoravo mikoran̈a aminolo fa tsy ho ela Fanjakan̈any Zan̈ahary han̈adoso raha jiaby mampijaly atsika, an̈atinizen̈y karazan̈antambo jiaby.—Apokalypsy 21:4.

• Ino mahavy zahay tsy mirekireky mamonjy olo?

• Ino raha tsara baka amy Baiboly mety koran̈intsika amy naman̈a avoa raha?