Akory Hatao Han̈ampy Izikoa fa Misy Antambo Mandalo?

Efa mahaimaro fo antambo mandalo amy zioty. Izikoa fa misy tany andalovanizio, maro ezaka atao handaminan̈a fan̈ampian̈a iro piaramanompo aby io. Zen̈y nahavy Filankevipitantan̈ana nan̈ano Sampandraharahany Vonjy Rano Vaky, amy birôny sampan̈a tsiaraikiaraiky.

Iro rahalahy amy sampandraharaha io koa fa maharen̈y fa misy antambo nandalo, iro direkty mifandray aminy antipan̈ahy amy fiangonan̈a io, baka hahaizan̈a fomba han̈ampian̈a iro pitory ten̈a mila ampian̈a. Izikoa tsy vitany pitory amy fiangonan̈a io fan̈ampian̈a io, sampan̈a hanendry rahalahy mahay, hitariky asa fan̈ampian̈a io. Iro rahalahy aby io amy zay hitady piasa antsitrapo na fan̈amezan̈a voafaritry tsarabe, na iro mety hivanga raha ten̈a ilain̈a ndreky hizara zen̈y amindro pitory sahiran̈a aby io.

Ten̈a mahatsara raha fomba ampiasainy fandaminan̈a io. Izikoa baka iro rahalahy antoeran̈a fo man̈ano zay fomba hitandro fa mety handaminan̈a fan̈ampian̈a io, mety hankasarodraha fotony hisosoko asa tsy ilain̈a, avio mety hikorontan̈a fandaminan̈a izio. Ho maro koa vola lany ndreky fitaovan̈a ilain̈a.

Iro rahalahy nitindreny sampan̈a io afaka maminavina vola tokony ho lany amy fan̈ampian̈a io ndreky firy piasa antsitrapo hampiasain̈a. Iro io koa efa mahay mifandray amy manampahifan̈a antoeran̈a, ke matetiky raha zen̈y mampalaky asa fan̈ampian̈a io. Ke tsy tokony hisy olo hamory vola ndreky direkty handefa fan̈ampian̈a, avio tsy handeha amy tany mila fan̈ampian̈a io, izikoa iro tsy nirahin̈y han̈ano zen̈y.

Izikoa fa misy antambo mandalo, atsika efa tihan̈ampy edy. (He 13:16) Tiantsika baka iro rahalahintsika aby io! Ke akory tokony hataontsika? Raha ten̈a maventy, atsika afaka mivavaka nindro ndreky nindro olo man̈ampy iro. Mety man̈amia vola koa atsika, alatsaka amy fan̈amezan̈a aminy asa erantany. Iro amy birôny sampan̈a man̈araka taridalan̈any Filankevipitantan̈ana, ke iro mamaritry aia tany ten̈a tokony handifasan̈a vola aby amiantsika io. Fa izikoa ndraiky atsika tihan̈ampy aminy asa atao mifandray amizio, finoa Fangatahana ho Mpiasa An-tsitrapo Manao Fanorenana eo An-toerana (DC-50).

ZAHAVA VIDEO TONDRADRANO NANDROBAKA RAHA MARE TA BREZILY AVIO TADIAVA VALINY FAN̈ONTANIAN̈A TY:

Ino raha ten̈a mahalany fan̈ahy anao taminy ezaka nataony Vavolombelon̈o Jehovah, tafarany tondradrano nandalo ta Brezily, tamy 2020 in̈y?