Fitaovan̈a Vaovao Fampianaran̈a Baiboly

Tamy Zanvie 2021, Filankevipitantan̈ana nan̈ano filazan̈a fa misy boky vaovao fampianaran̈a Baiboly, Mankafiza Fiain̈ana Tsisy Farany!a Akory nataonao naharen̈y izin̈y? Karaha ty ho Matthew, baka a Kanada: “Ten̈a ravoravo zaho! Fa mbala ravoravonizen̈y zaho, izikoa fa nazavain̈a tamy kabaro ndreky video fomba fampiasan̈a izio. Avio koa izio efa nan̈oharan̈a nampianaran̈a olo, ke ten̈a nahomby. Efa tsy din̈iko aby hahita izio ndreky hampiasa izio.”

Vaovao fomba fampianaran̈a olo amy boky Mankafiza Fiain̈ana Tsisy Farany! Fa ndray izy man̈ano zen̈y, izio tsy dia fankalavitry amy fomba fampianaran̈a talohanizio. Izikoa anao mampiasa bokinany io vita pirinty, ho hitanao fa mety hafa be izio. Baka ho hainao antony, zahava baka raha mampiavaka boky io.

Raha mampiavaka boky vaovao io

Matevin̈y taratasy nampisain̈a amy boky io. Nan̈ino ma izio natao matevin̈y? Boky Mankafiza Fiain̈ana Tsisy Farany io misy sary ankolera mandeha 600. Izikoa ampiran̈iny amy boky Ampianariny Atsika, impolony sary an̈atinizio niny Mankafiza io! Misy tany malalaka koa amy boky io, tsy natao sary na soratra. Fa raha aroe ty mety ho problemo taminany io: Izikoa taratasy io natao matify, manjary hita baka ambadiky sary ambadiky. Ke baka hialan̈a amy zen̈y, iro rahalahy amy Sampandraharahany Fan̈anaovan̈a Printy a Walkill, a Etazonỳ nan̈ohatra taratasy karazany efatra hizahavan̈a ny ten̈a mety. Komitiny Fanoratan̈a amy Filankevipitantan̈ana nandiniky iro io tsiaraikiaraiky, avio nifidy araiky ten̈a mety. Nata lafolafo, 16 isanjatony araiky fampiasaintsika in̈y vangany taratasy matevin̈y io, izio tsy mampijaly pianatra io mizaha sary amy boky io.

Hafa nan̈anaovan̈a fon̈ony. Fon̈ony boky vaovao io tsy mira amindro boky sasany aby io, fotony izio natao sase miaro izy. Natao miboaka tsara sary amizio. Sase natao amy fon̈ony io koa miaro fotony boky io tsy ho mora robaka, nata izio matetiky ampiasain̈y. Fa lafo vangany raha natao fon̈ony karaha zen̈y. Fa sampan̈a maromaro niaraka niasa, baka nahavitan̈a nivanga izio.

Nan̈ino ma raha lafo karaha zen̈y nifidin̈a nampiasain̈a? Karaha ty nivolan̈iny rahalahy araiky miasa amy Sampandraharahany Fan̈anaovan̈a Printy Erantany, a Walkill: “Efa mitsinjo lavitry zahay, fotony boky io ten̈a matetiky hampiasain̈y, ke tianay ho tsara zahan̈a fo izio, nata matetiky miasa.” Karaha ty koa nivolan̈iny Eduardo, miasa amy Birôny Fan̈anaovan̈a Pirinty, amy sampan̈any Brezily: “Ten̈a ravoravo zahay mahita fa fandaminan̈any Jehovah mampiasa raha ten̈a tsara, baka boky io tsara zahan̈a, mahadin̈y ela, ndreky mora hindesin̈y. Hita baka amy zen̈y fa ten̈a ampiasaindro amy fomba tsara fan̈amezan̈a io.”

Fan̈anaovan̈a pirinty tan̈atiny valan̈aretin̈y COVID-19 in̈y

Tamy Marsy 2021 in̈y zahay nanomboko nan̈ano pirinty Mankafiza Fiain̈ana Tsisy Farany! Tsy mora nan̈ano izio, fotony mbala tan̈atiny valan̈aretin̈y be in̈y taminio. Mbala nifody Betela, ke piasa antsitrapo aby io tsy afaka nitatahy. Tsy nafaka nampiditry Betelita vaovao koa taminio. Ke vokany, tsy ampy olo niasa tamy fan̈anaovan̈a pirinty sasany, avio sasany nafody, fotony zen̈y lalàn̈a naboakany fanjakan̈a.

Akory natao niatriky raha sarotro aby zen̈y? Izikoa fa nahazo nan̈ano pirinty, iro rahalahy ndreky ranabavy aby tamy sampandraharaha hafa tamy Betela tao nampiasain̈a tsy maharitry, nitatahy iro tamy fan̈anaovan̈a pirinty. Karaha ty nivolan̈iny Joel, an̈isany Sampandraharahany Fan̈anaovan̈a Pirinty Erantany (IPD): “Ten̈a mamparavoravo toetsain̈indro rahalahy aby io von̈ono han̈eky fanendrena vaovao, ke iro ten̈a nan̈ampy zahay hahavita asa ten̈a nilan̈a natao.”

Ndray tio raha sarotro maro, zahay efa nahavita nan̈ano pirinty boky Mankafiza Fiain̈ana Tsisy Farany! antapitrisany. Mila fitaovan̈a maro, an̈atinizen̈y raha fan̈anaovan̈a pirinty, sase, taratasy, lankra ndreky lakoly. Tan̈atiny tsiota fanjava fo efa nandilatra 2,3 tapitrisa dolara nivangan̈a fitaovan̈a. Baka hitsitsian̈a vola, isany boky ten̈a ilainy fiangonan̈a fo nataonay pirinty.

“Ten̈a fitaovan̈a fampianaran̈a ankitin̈y izio”

Akory fahitandro papianatra Baiboly ndreky iro pianatra Baiboly aby io boky vaovao io? Karaha ty nivolan̈iny Paul, rahalahy an Australie an̈y: “Ten̈a tiako mampiasa Mankafiza Fiain̈ana Tsisy Farany! io. Ravoravo mare zaho mampiasa izio. Raha an̈atinizio ten̈a tsara, ke man̈antsory maso. Ten̈a maro tsara fan̈atambarandro hevitry an̈atinizio ao, fan̈ontanian̈a maro manohin̈y fonolo, video maro, tablo, sary, ndreky tanjon̈ony pianatra. Ten̈a fitaovan̈a fampianaran̈a ankitin̈y izio, ke ten̈a mandrisiky zaho hankatsara fahaizako mampianatra.”

Karaha ty ndraiky nikoran̈iny pianatra Baiboly araiky a Etazonỳ an̈y: “Ten̈a tiako boky vaovao io. Mazava aminaka tsara hevitry maventy azony sary maro ao io. Miditry an̈atiny fônaka tsarabe koa iro video aby io, ke mandrisiky zaho han̈ano raha.” Pianatra Baiboly io indroe mianatra isaka herin̈iandra, avio koa izy efa mivory tsy tapaka.

Misy antapitrisany boky Mankafiza Fiain̈ana Tsisy Farany! amy volan̈a isankarazany. Filankevipitantan̈ana nan̈eky handikan̈a boky io amy volan̈a 710 karazany, volan̈a 340 fan̈ampiny, izikoa ampiran̈iny amy boky Ampianariny Atsika!

Aia ahitan̈a vola han̈anovan̈a pirinty io? Baka amy fan̈amezan̈a atao aminy asa erantany. Maro aminolo man̈ano izio amy donate.jw.org. Ten̈a mankasitraka anaro zahay, fotony anaro manan̈a toetsain̈y mazoto man̈ano fan̈amezan̈a. Raha zen̈y man̈ampy zahay han̈aboaka fitaovan̈a fianaran̈a Baiboly, han̈ampian̈a olo hianatra momba Jehovah ndreky “hankafy fiain̈ana tsisy farany.”​—Salamo 22:26.