Man̈ano Raha Mahatsara Mpiara-manompo Ndreky Planety

Amy maha Vavolombelon̈o Jehovah atsika, haintsika fa tsy ho ela Jehovah Zan̈ahary himpody han̈amboatra ndraiky planety efa nirobatin’olombelon̈o ty. (Apokalypsy 11:18) Ndray izy man̈ano zen̈y atsika man̈ano erakany vitantsika koa hikarakaran̈a planetintsika ty.

Maro amy tran̈o namboarin’ny fandaminan̈a iziôty nasian̈a raha tsy mandrobaka tontolo iain̈ana. Tekniky tsy mandrobaka tontolo iain̈ana io tetik’asa, manan̈a tanjon̈o hampihen̈y vokatran’ny raha maloto amy tontolo iain̈ana. Ke ino amy tetik’asa io ma efa nataontsika? Aviô nan̈ino izio man̈ampy atsika hahay hampiasa tsara fan̈amezan̈a azontsika?

Fomba Araiky Hahavy Tran̈o Fan̈anovan̈a Fivoriambe Hampahazo Ain̈y Tsara

Tamy voanalohany, Tran̈o Fan̈anaovan̈a Fivoriambe a Matola a Mozambiky, tsisy ribany baka iô tôly fo tafony. Ke izio amy zay mitondra hafanan̈a amy tran̈o be io. Rahalahy tao nivolan̈a: “Hafanan̈a io nampahevoko zahay ke izikoa fa tapitry programo, irô rahalahy ndreky ranabavy aby io miraparapa mandeha antany mangala tsitsiko ndreky mangala onondraha.” Ino raha efa nataontsika baka Tran̈o Fan̈anovan̈a Fivoriambe io hampahazo ain̈y tsara iro rahalahy ndreky ranabavy?

Fandaminan̈a iziô nanapa-kevitry nampiasa fomba aroe hamahan̈a problemo zen̈y. Voanalohany, ventilatera mandeha amy tsiko. Faharoe, isolation thermique. Ke isolation thermique io mampihen̈y hafanan̈a baka amy masoandra fa ventilatera io ndraiky mampanintsinintsy Tran̈o Fan̈anovan̈a Fivoriambe. Ventilatera io tsy mandeha courant fa mandeha amy tsiko ke tsiko mafana be in̈y ivoany manintsinintsy an̈aty tran̈o ao. Mandeha 50 dolara vidin’ny tsiaraikiaraiky.a

Vokatran’izen̈y, nahaitsara fo tsiko tan̈aty Tran̈o Fan̈anovan̈a Fivoriambe tao. Nahampy tsara tsiko ke lôso tsisy amandoan̈a ndreky moisissure tao. Vokatran’ny raha jiaby zen̈y lôso nihen̈y dioxyde de carbone fa nitombo ndraiky oxygène. Ke nanjary nilamin̈y ndreky afaka nifantoko tsara mpiara-manompo koa fa nivory. Rahalahy nikoran̈intsika taloha tary in̈y nivolan̈a: “Zahay iziôty efa tsy miraparapa miboaka antany eky koa fa vita programo fa mifanohitry amy zen̈y, zahay iziôty midôko amy Tran̈o Fan̈anovan̈a Fivoriambe ao mihina matsan̈a ndreky mifampahery miaraka amy mpiara-manompo. Efa karaha mipetrapetraka amy vodindraha in̈y zahay koa fa mipetraka amy Tran̈o Fan̈anovan̈a Fivoriambe ao!”

Fampiasan̈a Energie Renouvelable

Nan̈apetaka panneau solaire maro atsika amy tran̈on’ny fandaminan̈a eran-tany. Panneau solaire io mangala angôvo baka amy masoandra ke izin̈y amy zay avadiny courant. Nohon’izen̈y, atsika iziô efa tsy mitavandra be carburant mba hazahoan̈a courant. Panneau solaire io tsy mandoto tontolo iain̈ana. Baka iô koa izio man̈ampy atsika hitsitsy vola.

Tamy 2023, Biron’ny Sampan̈a a Slovénie nan̈apitahan̈a panneau solaire. Efa 30% ny courant nampiasain̈y tao, baka tamy panneau solaire fo. Izikoa fa mihoatran’ny nitadiavin̈y courant naboakany, lambiny nihoatra in̈y, alefa amy commune an-tanàna iô. Ke 360 000 dolara iziô vola lany tamy fan̈apitahan̈a panneau solaire io. Iziôty efa mihen̈y vola lanin’ny Biron’ny Sampan̈a amy fan̈ifan̈a courant. Baka iô koa, an̈atin’ny efatra taon̈o fo beben’ny vola lanintsika tamy fan̈apitahan̈a panneau solaire in̈y, vola voatsitsintsika.

Tamy 2024 koa, biron’ny sampan̈a a Sri Lanka nan̈apitahan̈a panneau solaire ndreky namezan̈a batterie maventy oe. Ke vola lany tamy tetik’asa io mandeha 3 000 000 dolara. Aviô izio mahavita man̈amia 70% ny courant ilain’ny biron’ny sampan̈a io. An̈atin’ny telo taon̈o fo, beben’ny vola lanintsika vola voatsitsintsika. Tamy taon̈o io fo biron’ny sampan̈a ta Pays-Bas, nan̈apitahan̈a panneau solaire. Ke vola lany taminany io mandeha 1,1 tapitrisa dolara. Baka iô izio mahavita man̈amia 35% ny courant ilaintsika. Ke an̈atin’ny sivy taon̈o, beben’ny vola lanintsika vola voatsitsintsika.

Atsika koa nan̈apetaka panneau solaire amy Biron’ny Fandikan-teny Mitokana (BFM) sasany a Mexique. Ohatra amy BFM Tarahumara (Afovoany) a Chihuahua misy izio. Koa fa lera manintsy be, misy fotoan̈a mahatatra 0 dégré nintsin’andra. Koa fa lera mafana be in̈y ndraiky, mahatatra 40 dégré hafanan̈a. Ke nohon’ny alafosan’ny jiro, iro rahalahy ndreky ranabavy an̈y, tsy mampiasa climatiseur ndreky chauffage. Karaha ty koran̈in’ny Jonathan miasa amy BFM io: “Mampiasa dara matevin̈y ndreky paltô zahay andra koa fa manintsy. Fa biafinay ndraiky la fenetra koa fa mafana andra.”

Tamy 2024 fo nan̈apitahan̈a panneau solaire tamy BFM io. Ke vola lany taminany io mandeha 21 480 dolara. An̈atin’ny dimy taon̈o fo, beben’ny vola lanintsika vola voatsitsintsika. Amy iziô rahalahy ndreky ranabavintsika aby io afaka mampiasa climatiseur ndreky chauffage matetitetiky. Jonathan nivolan̈a: “Nahay nankafizinay fo fanendrena nazonay io baka iô lôso mahay mazoto fo zahay man̈ano izio. Aviô ravoravo zahay mahay fa miasa tsara volan’ny fandaminan̈a baka iô koa izio man̈aja tsara tontolo iain̈ana.”

Fampiasan̈a Rano Baka amy Mahalen̈y

An Afrika an̈y, Tran̈o Fivorian̈a sasany, mijaly mare mahazo rano. Nohon’izen̈y, voatery mandeha kilometra maro iro rahalahy aby io mantsaka rano indesin̈y amin’ny Tran̈o Fivorian̈a. Amy tran̈o fivorian̈a sasany, iro rahalahy aby io mivanga rano aterin’ny kamion. Baka iô izio tsy vitan’ny lafo fo fa mbala tsy madio tsara koa.

Zahay nan̈apetaka tasaka ndreky Makiplast tamy tran̈o fivorian̈a amy tany maro an afrika an̈y. Alohany han̈apitahan̈a raha jiaby, iro rahalahy antoeran̈a io mandiniky fotoan̈a mety tsara be an̈apitahan̈a irô io baka izio misy rano fo. Ke vola lany tamy fan̈apitahan̈a raha jiaby io, an̈elan̈elan̈a 600 firaka 3 000 dolara. Vokany, efa tsy mivanga rano eky iro rahalahy aby io iziôty

Iro rahalahy aby io mahazo hatsaran̈a baka amy ranon’ny mahalen̈y. Karaha ty raha nivolan̈in’ny Noemi baka Mozambiky: “Taloha, zahay mandeha lavitry zay vo mahazo rano. Kajo mare zahay koa fa avy amy Tran̈o Fivorian̈a. Tsy basin’izahay mijaly rano fo fa, izio koa tsy madio tsara. Fa iziôty ndraiky, zahay jiaby afaka manasa tan̈ana amy rano madio. Aviô koa lera zahay avy amy tran̈o fivorian̈a an̈y, zahay tsy kajo loatra sady afaka mankafy tsara fivorian̈a. Mersy ay!”

Aia ahitan’ny fandaminan̈a vola an̈ifan̈a raha jiaby zen̈y? Baka amy fan̈amezan̈a ataon’ny rahalahy ndreky ranabavy man̈erantany. Maro fomba mety an̈anovan̈a izio ke misy amizio atao amy donate.jw.org. Zahay ten̈a mankasitraka mare anaro mazoto man̈amia!