Nan̈ino Vavolombelon̈on’i Jehovah Tsy Man̈ano Aniversairan’ny Andra Natirahan̈a?

Vavolombelon̈on’i Jehovah tsy mankalaza andra natirahan̈a fôtony irô mino fa fety araiky io tsy mamparavoravo Zan̈ahary. Baiboly tsy mandraova mivantan̈a fan̈anaovan̈a aniversaira, fa ndray zen̈y, atsika ampiany hangala onon̈o raha maventy momba izio ndreky hahay akôry fahitan’ny Zan̈ahary fety io. Diniha baka hevitry efatra aby ty ndreky toro lalan̈an’ny Baiboly mifandray aminany:

1. Mpanompo sampy olo voanalohany nan̈ano aniversaira. Eraka raha koran̈in’ny boky Funk & Wagnalls Standard Dictionary of Folklore, Mythology, and Legend, nanombohan’ny fety aby io finoan̈a fa amin’ny aniversairan’olo araiky “fan̈ahy ratsy ndreky angôvo ratsy mahavita mampijaly olo io” ke “naman̈a avy amy fety io ndreky firarian-tsoa baka amindrô miaro izy.” Boky Lovantsofin̈y Momba Fankalazan̈a Andra Natirahan̈a (angiley) mivolan̈a fa taloha tan̈y “ten̈a nilain̈y” nanoratra daty natirahan’olo araiky fôtony izio nan̈ampy “tamy famoron̈ana horoscope” mifan̈araka amin’ny “astrôlôzỳ.” Mivolan̈a koa boky io fa “maro olo mino fa, labozin’ny aniversaira io mahavita man̈atanteraka fan̈irian̈an’olo io.”

   Kanefa, Baiboly mivolan̈a fa tsy mety man̈ano mazỳ, misikidy, mifandray amy masantôko na fan̈ahy ratsy, na ‘raha hafa miramiran̈a amy zen̈y.’ (Deoteronomia 18:14; Galatianina 5:19-21) An̈isany antony nahavy Zan̈ahary nan̈asazy tanànan’ny Babylony taloha tan̈y iziô, fôtony olo nipetraka tao nizaha fambara tamy lan̈itry na astrôlôzỳ, kanefa raha zen̈y mbala karazan̈a sikidy fo. (Isaia 47:11-15) Vavolombelon̈on’i Jehovah ndraiky tsy mandiniky fôtotro navian’ny fombafomba ataon’olo jiaby, fa ndray zen̈y, izikoa Soratra Masin̈y fa man̈amia tari-dalan̈a mazava ambaka zen̈y, tsy ataonay sary tsy hita fa alainay onon̈o tsara.

2. Kristianin̈y tamy taonjato voanalohany tsy nan̈ano aniversairan’ny andra natirahan̈a. Boky The World Book Encyclopedia mivolan̈a fa “tamindrô, fankalazan̈a andra natirahan̈a io fetin’ny mpanompo sampy.” Koran̈in’ny Baiboly fa irô apostoly aby io ndreky olo hafa nampianarin’i Jesosy mivantan̈a efa nan̈ambela môdely tôkony harehan’ny Kristianin̈y jiaby.​—2 Tesalonianina 3:6.

3. Araiky fo fankalazan̈a tôkony hataon’ny Kristianin̈y; izio tsy fankalazan̈a andra natirahan̈a fa fankalazan̈a andra nifatesan’i Jesosy. (Lioka 22:17-20) Zen̈y tsy mahagaga fôtony Baiboly mivolan̈a fa “sitrany andra nifatesan̈a tozay andra natirahan̈a.” (Mpitoriteny 7:1) Jesosy nahazo laza tsara tamy Zan̈ahary, fôtony naboakany tsarabe tamin’ny andra nifatesany fa andra io matomboko lavitry tozay andra natirahany.​—Hebreo 1:4.

4. Amy Baiboly ao tsy ahitan̈a koran̈a fa efa navy nisy mpanompon’ny Zan̈ahary nan̈ano aniversairan’ny andra natirahan̈a. Fa ao ndraiky misy tantaran’olo aroe tsy mpanompon’ny Zan̈ahary nan̈ano aniversaira. Tantarainy ao koa fa ratsy raha nandalo tamy fety aby io.​—Genesisy 40:20-22; Marka 6:21-29.

Maharen̈y mijaly ma irô zanaka Vavolombelon̈on’i Jehovah aby io fôtony tsy man̈ano aniversaira?

Karaha raimandreny mahay mitaiza jiaby, Vavolombelon̈on’i Jehovah man̈aboaka fitiavan̈a amy zanakandrô fo mandavan-taon̈o, ke man̈amia kadô zanakandrô ndreky miaraka man̈ano raha amindrô. Irô mifen̈y mangala tahaka Zan̈ahary. Izy baka farandraha tia man̈amia raha tsara zanany. (Matio 7:11) Tsy maharen̈y mijaly foeky irô zanaka Vavolombelon̈on’i Jehovah aby io izikoa zahan̈a koran̈an’ny tsaiky sasany aby ty:

• “Mahairavoravo fo zaho koa fa mahazo kadô tsy ampoizin̈y in̈y.”​—Tammy, 12 taon̈o.

• “Nata zaho tsy mahazo kadô amin’ny aniversairanaka, zaho vidian’iry papako kadô amy fotoan̈a hafa. Zen̈y ten̈a tiako fôtony tsy ampoiziko foeky izy amin’in̈y.”​—Gregory, 11 taon̈o.

• “Mihina gatô hely ndreky mihirahira an̈atin’ny folo minity zen̈y tsy fety e! Mavia aminay an̈y baka anao fa an̈y anao mahita karakôry marin̈y fety zen̈y!”​—Eric, 6 taon̈o.