LESON 44
Mamparavoravo Jehovah ma Fety Jiaby Ataonolo?
Tiany Jehovah atsika ho ravoravo ndreky han̈ano fety. Fa fety jiaby ataonolo ma mamparavoravo izy? Akory han̈aboahantsika fitiavan̈a Jehovah amy resaka fety?
1. Nan̈ino ma maro fety tsy mamparavoravo Jehovah?
Mety ho gaga anao koa mahay fa maro fety tsy baka amy Baiboly fa baka amy panompo sampy. Iro fety aby io mety misy ifandraisany amy fivavahan̈a diso. Sasany amizio koa mety misy ifandraisany amy fan̈ahy ratsy ndreky finoan̈a fan̈ahy tsy mety maty. Misy koa izio miaraka amy finoanoampoan̈a ndreky finoan̈a anjara. (Isaia 65:11) Jehovah nampitandrin̈y vahoakanany: “Misaraha aminany, ... baka io aza mikasiky raha maloto eky.”—2 Korintianina 6:17.a
2. Akory fahitany Jehovah iro fety han̈amezan̈a voninahitry olo?
Jehovah mampitandrin̈y atsika baka atsika tsy ho voafandrikiny ‘fatokisan̈a olo.’ (Vakia Jeremia 17:5.) Misy fety sasany han̈amezan̈a voninahitry pitondra fanjakana na maramila. Sasany ndraiky fetiny fahaliovanten̈a na raha mampiavaka firenena araiky, karaha ataony sainampirenena. (1 Jaona 5:21) Misy koa fety momba politiky na fetiny fikambanan̈a. Akory fahitany Jehovah atsika, izikoa atsika man̈amia voninahitry olo na fikambanan̈a, sirto olo man̈ano raha tsy fan̈araka amy fikasan̈anany?
3. Ino aby raha ataonolo amy fety kanefa tsy fan̈araka amy Zan̈ahary?
Baiboly tsy man̈eky ‘figiahantoaka dila loatra, fety feno fitondranten̈a ratsy, ndreky mifan̈oesa migiaka.’ (1 Petera 4:3) Amy fety sasany, misy olo tsy mahafehy ten̈a ndreky ratsy fitondranten̈a. Baka mitohy fo fikamaradianantsika amy Jehovah, atsika mila miala lavitry raha maloto karaha zen̈y.
ALEVA ONON̈O
Zahava akory hataonao han̈ano fanapahankevitry mamparavoravo Zan̈ahary amy resaka fety.
4. Aza man̈ano fety tsy man̈amia voninahitry Jehovah
Vakia Efesianina 5:10, avio iaraha dinihin̈y fan̈ontanian̈a aby ty:
Mila mangala toky aminino atsika alohany hanapakevitry han̈ano sa tsy han̈ano fety araiky?
Ino aby fety ten̈a malaza aminaro an̈y?
Fahitanao izy, mamparavoravo Jehovah ma iro fety aby zen̈y?
Ohatra, anao mety efa nieritreritry karakory ma fahitany Jehovah fetiny aniverserany andra nitirahan̈a? Baiboly tsy mikoran̈a fa nisy panompony Jehovah nan̈ano aniversera. Olo tsy nanompo Jehovah fo koran̈inizio nan̈ano aniversera. Vakia Genesisy 40:20-22 ndreky Matio 14:6-10. Avio iaraha dinihin̈y fan̈ontanian̈a aby ty:
Ino itovizany fankalazan̈a aniversera aroe io?
Izikoa tantarany Baiboly zahan̈a, akory fahitany Jehovah fetiny aniversera?
Fa anao mety hivolan̈a: ‘Ahoany Jehovah ma zaho koa man̈ano aniversera ndreky fety tsy fan̈araka amy soratra masin̈y?’ Vakia Eksodosy 32:1-8. Baka io alifasa VIDEO io, avio iaraha dinihin̈y fan̈ontanian̈a aby ambany io.
Nan̈ino atsika mila mizaha tsarabe ino raha tiany Jehovah?
Akory mety han̈anovantsika zen̈y?
Akory hahaizantsika fety tsy mamparavoravo Jehovah?
Izio ma fety tsy baka amy soratra masin̈y? Hahaizanao zen̈y, zahava baka aia ma navianizio.
Izio ma fety han̈amezan̈a voninahitry olo, fikambanan̈a, na sainampirenena? Jehovah zaraiky fo tokony hamiantsika voninahitry, ke izy fo atokisantsika hamaha problemonolo jiaby ambony tany.
Fomba atao amy fety io ndreky raha ataonolo amizio ma tsy mifan̈araka amy fitsipikiny Baiboly? Mila madio fitondranten̈a fo atsika.
5. Ampia olo baka han̈aja raha inoanao
Mety tsy ho mora hiaro ten̈a izikoa misy olo miforise anao han̈ano fety tsy mamparavoravo Jehovah. Hazavà amindro fanapahankevitrinao, fa mahaiza mandanjalanja ndreky maharidraha fo. Izikoa tihahita ohatra araiky amy zen̈y, alifasa VIDEO io.
Vakia Matio 7:12, avio iaraha dinihin̈y fan̈ontanian̈a aby ty:
Izikoa andininy io zahan̈a, tokony hisakananao ma iry havanao koa fa han̈ano fety?
Ino raha mety hataonao han̈amezanao toky iry havanao fa tianao fo iro, nata anao tsy man̈ano fety miaraka amindro?
6. Tiany Jehovah ho ravoravo anao
Tiany Jehovah anao hiaraka ravoravo aminy havanao ndreky kamaradinao. Vakia Mpitoriteny 8:15, avio iaraha dinihin̈y fan̈ontanian̈a ty:
Akory han̈aboahany andininy io fa tiany Jehovah ho ravoravo atsika?
Tiany Jehovah vahoakanany ho ravoravo ndreky hiaraka hiravoravo. Alifasa VIDEO io ahitanao fa karaha zen̈y raha misy lera fivoriambe iraisampirenena ataonay.
Vakia Galatianina 6:10, avio iaraha dinihin̈y fan̈ontanian̈a aby ty:
Mila man̈ano fety tianolo ma atsika zay vo “man̈ano ny tsara” aminolo?
Lera karakory anao ten̈a ravoravo man̈amia kadô olo: Anao forsenolo man̈amia izio olo aminy andrany fety sa sitraponao?
Maro Vavolombelon̈o Jehovah man̈ano raha mamparavoravo zanakandro ndreky man̈amia kadô iro foeky, fa tsy aminy andra fety fo. Anao koa mananjanaka, ino sirprizy mety hataonao amindro?
MISY OLO MIVOLAN̈A: “Anao tsy mila miasaloha aminy ino naviany fety zen̈y. Fa anao koa fa miaraka aminy havanao ndreky kamaradinao, efa pare edy.”
Akory ho anao aminany?
INO RAHA NIANARANAO TATO?
Tiany Jehovah atsika ravoravo miaraka aminy havantsika ndreky kamaradintsika. Fa tsy tiany atsika han̈ano fety tsy mamparavoravo izy.
Fan̈ontanian̈a Fameren̈ana
Ino aby fan̈ontanian̈a apetraka, koa tihahay fety tsy mamparavoravo Jehovah?
Akory han̈azavanao aminy havanao ndreky kamaradinao fanapahankevitrinao momba fety?
Ino ahaizanao fa tiany Jehovah atsika ho sambatra ndreky ravoravo?
ZAHAVA
Diniha ino aby karazan̈a fety tsy ataony Kristianin̈y.
“Nan̈ino ma Misy Fety Sasany Tsy Ataony Vavolombelon̈o Jehovah?” (Lahatsoratra aminy Internet)
Zahava antony efatra mahavy zahay mino fa fankalazan̈a aniversera io tsy mamparavoravo Zan̈ahary.
“Nan̈ino ma Vavolombelon̈o Jehovah Tsy Mankalaza Aniversera?” (Lahatsoratra aminy Internet)
Zahava akôry nataon’ny tsaiky tia Jehovah man̈ano raha mamparavoravo izy koa fa nisy fety.
Kristianin̈y antapitrisany mifidy tsy han̈ano Noely. Ino raha tsapandro amy fanapahankevitrindro zen̈y?
“Misy Raha Tsara Mandilatra Krismasy” (Tilikambo Fiambesan̈a 1 Desambra 2012)
a Zahava Fan̈azavan̈a 5 ahitanao ino raha tokony hatao izikoa misy olo man̈ano fety.