Azovy Niasa Zan̈ahary?

Iritrireta baka misy baba araiky mikoran̈a amy zanakanany lelahy fito taon̈o. Ho izy: “Taloha tan̈y Zan̈ahary niasa tany avio raha jiaby misy aminany, avio niasa masoandra, fanjava avio lakintan̈a.” Nandiniky hely tsaiky io, avio nan̈ontany babany: “Azovy fo basy niasa Zan̈ahary?”

“Zan̈ahary tsisy namoron̈o fa izy fa nisy tio fo” ho babany taminany. Nikeny tsaiky io antsendriky zen̈y tio, fa ndray izy efa be, mbala tsy niala tamy jerinany fo fan̈ontanian̈a io. Tsy ikeny jerinany baka Zan̈ahary tsisy namoron̈o zen̈y, fotony raha jiaby nisy namoron̈o aby. Loso din̈iky karaha ty izy: ‘Karakory fo nisiany Zan̈ahary?’

Akory volan̈iny Baiboly? Miramira amy raha nivolan̈iny babany tsaiky in̈y fo. Karaha ty ho Mosesy: ‘Ah Jehovah, ...talohany nisiany bongo ndreky nisiany tany mamokatra, anao efa Zan̈ahary fo letry taloha be tan̈y firaka izio ndreky aminy hoavy koa.’ (Salamo 90:1, 2) Karaha ty koa ho paminan̈y Isaia: “Izio ma tsendriky hainao, sa tsiary ren̈inao fa Jehovah, Pamoron̈o raha jiaby ambony tany ty, Zan̈ahary mandrakizay?” (Isaia 40:28) Koran̈iny taratasiny Joda koa fa Zan̈ahary efa nisy fo ‘letrizay ndreky ho mandrakizay.’​—Joda 25.

Andininy aby io mivolan̈a fa “Panjakany mandrakizay” Zan̈ahary. Karaha zen̈y koa ho Paoly. (1 Timoty 1:17) Efa nisy fo izy letry tamy fotoan̈a takatra jerintsika ndreky mbala ho hisy fo izy aminy hoavy. (Apokalypsy 1:8) Zen̈y raha ten̈a mampiavaka Zan̈ahary Farany Mahery io.

Nan̈ino sarotro amintsika mahatakatra zen̈y? Fotiny tsy be fotoan̈a iain̈antsika, ke tsy mira niny Jehovah Zan̈ahary mandrakizay io fahitantsika fotoan̈a. Aminany arivo taon̈o mira andra araiky. (2 Petera 3:8) Misy ohatra araiky ty: Valala be aby io, fanjava araiky fo iro velon̈o, efa maty edy. Iro tsy mahay karakory ataonolombelon̈o velon̈o an̈atiny 70 na 80 taon̈o zen̈y. Koran̈iny Baiboly fa amy Jehovah Pamoron̈o Be Voninahitry io atsika mira valala in̈y fo. Ten̈a misain̈y mandilatra atsika Jehovah. (Isaia 40:22; 55:8, 9) Ke rariny izikoa tsy takatra dinikinolombelon̈o raha sasany momba izy.

Ndray sarotro amy jerintsika man̈eky Zan̈ahary fa nisy letrizay firaka mandrakizay zen̈y, efa zen̈y edy ny marin̈y. Izikoa baka izy nisy namoron̈o, zay niasa izy io tokony kahian̈a Pamoron̈o. Fa kanefa Baiboly mivolan̈a fa Jehovah “niasa raha jiaby.” (Apokalypsy 4:11) Haintsika koa fa tsy direkty nisy raha jiaby io taloha. (Genesisy 1:1, 2) Ke karakory fo basy nampisy raha jiaby io? Voanalohany, Pamoron̈o io mila efa nisy tio fo. Efa tio fo izy talohany niasany iro raha misain̈y andan̈itry an̈y, karaha ataony Zanany lahitokana ndreky iro anjely aby io. (Joba 38:4, 7; Kolosianina 1:15) Dikanizen̈y, efa nisy fotoan̈a, izy zaraiky fo nisy. Izy tsy niasain̈y, avio tsisy afaka namoron̈o izy koa.

Fisiantsika ndreky raha jiaby nisy io porofo fa misy Zan̈ahary araiky efa nisy letrizay sady tsy mahaimaty. Izy nampisy raha jiaby amy lan̈itry an̈y ndreky ambony tany eto, ndreky nan̈ano lalàn̈a mifehy izio. Izy fo nahavita nampisy raha manampahin̈ana jiaby.​—Joba 33:4.