Nan̈ino ma Jesosy Kahian̈a Zanakan’ny Zan̈ahary?

Valiny baka amy Baiboly

Matetiky Baiboly mikaiky Jesosy “Zanakan’ny Zan̈ahary.” (Jaona 1:49) Hita baka amy volan̈a “Zanakan’ny Zan̈ahary” zen̈y fa Zan̈ahary io Mpamôron̈o raha manam-pahin̈ana jiaby, an̈isan’izen̈y Jesosy. (Salamo 36:9; Apokalypsy 4:11) Baiboly tsy mampianatra fa Zan̈ahary nanambady ndreky niteraka karaha olombelon̈o.

Baiboly koa mivolan̈a fa anjely aby io ‘zanakan’ny Zan̈ahary.’ (Joba 1:6) Mivolan̈a koa izy ao fa Adama, olombelon̈o voanalohany in̈y “zanakan’ny Zan̈ahary.” (Lioka 3:38) Fa Jesosy ndraiky raha voanalohany niasain’ny Zan̈ahary salakady izy mivantan̈a niasa Jesosy. Ke zen̈y mahavy izy kahian’ny Baiboly Zanaka ten̈a tian’ny Zan̈ahary.

• Efa niain̈y tan-dan̈itry tan̈y ma Jesosy talohan’ny naha olombelon̈o izy?

• Ino raha nataon’i Jesosy talohan’izy navy tambony tany?

Efa niain̈y tan-dan̈itry tan̈y ma Jesosy talohan’ny naha olombelon̈o izy?

Ia. Talohan’izy nanjary olombelon̈o, Jesosy fan̈ahy tan-dan̈itry tan̈y. Izy tômpiny foeky nivolan̈a fa izy ‘nijotso baka tan-dan̈itry.’​—Jaona 6:38; 8:23.

Jesosy niasan’ny Zan̈ahary talohan’ny raha hafa jiaby. Karaha ty volan̈in’ny Baiboly mikasiky Jesosy:

• “Izy koa talan̈olo amy raha jiaby niasain̈y.”​—Kolosianina 1:15.

• Izy ‘raha voanalohany niasain’ny Zan̈ahary.’​—Apokalypsy 3:14.

Tanteraka tamy Jesosy faminanian̈a ty: “Efa rango ela nisiany, efa ela be tan̈y.”​—Mika 5:2; Matio 2:4-6.

Ino raha nataon’i Jesosy talohan’izy navy tambony tany?

An̈abo plasinany tan-dan̈itry tan̈y. Nikoran̈a momba plasinany io izy tamin’izy nivavaka karaha ty: “Baba, ameza voninahitry … zaho, karaha voninahitry efa nanan̈ako tankilanao talohan’ny nisian’ny donia ty in̈y.”​—Jaona 17:5.

Izy nan̈ampy Babany niasa raha hafa jiaby. Jesosy ‘mpiasa ten̈a mahay’ niaraka niasa tamy Zan̈ahary. (Ohabolana 8:30) Karaha ty volan̈in’ny Baiboly mikasiky Jesosy: “Izy nampiasain̈y niasa raha jiaby an-dan̈itry an̈y ndreky ambony tany eto.”​—Kolosianina 1:16.

Zan̈ahary nampiasa Jesosy hampisy raha jiaby, an̈isan’izen̈y anjely ndreky raha jiaby hitantsika maso. (Apokalypsy 5:11) Zan̈ahary ndreky Jesosy niaraka niasa karaha ôtry ataon’ny mpan̈ano plan’ny tran̈o ndreky mpan̈amboatra tran̈o. Araiky man̈ano plan fa araiky ndraiky mampiasa plan in̈y han̈amboaran̈a tran̈o.

Izy Mpitondra volan̈an’ny Zan̈ahary. “Volan̈a” koa ikahian’ny Baiboly Jesosy talohan’izy navy tambony tany. (Jaona 1:1) Zen̈y mivolan̈a fa izy nampiasain’ny Zan̈ahary hitondra fan̈azavan̈a ndreky toromariky amin’ny anjely hafa.

Jesosy koa mety nampiasain’ny Zan̈ahary nitondra hafatra tamin’olombelon̈o tambony tany tatỳ. Azo antoko fa izy nampiasain’ny Zan̈ahary nan̈amia toromariky Adama ndreky Eva tamy zaridain’i Edena tao. (Genesisy 2:16, 17) Mety Jesosy anjely nitariky irô Israelita taloha tan̈y namakivaky tany paiky, aviô mety volan̈anany foeky izy nila narehandrô tamy zen̈y.​—Eksodosy 23:20-23.a