Man̈angy Jiosy Araiky Nimpody Nandiniky Ndraiky Raha Ninoany

Volàn̈a aminay kony raha mombamomba anao.

Zaho teraka ta Etazonỳ taminy 1979. Nisaraka mamako ndreky papako tamy zaho telo taon̈o. Mamako nitarimy zaho tamy fombany jiosy baka io koa zaho nianatra tamy lekoly jiosy. Tamy zaho fito taon̈o, nipetraka tan Israely taon̈o araiky baka io nianatra tamy lekolimpanjakan̈a zaho tan̈y. Zahay baka io nifindra ta Meksiky.

Tan̈y tsisy synagoga, fa ndray zen̈y zaho mbala nan̈araka fombany jiosy fo. Mamaky Torah ndreky nandrehitry labozy zaho isaka sabata baka io nampiasa boky efa misy vavaka voasoratra koa fa nivavaka. Matetiky zaho nivolan̈a tamy tsaiky lekoly araiky taminay fa fivavahan̈anay voanalohany nisy. Zaho tamy zen̈y mbala tsiary ndraiky namaky boky mikoran̈a fanompoan̈any Jesosy Kristy ndreky fampianaran̈anany. Testamenta Vaovao an̈aranizio. Zaho tsy nimboany mamako hamaky izio foeky, tsao zen̈y zaho ho voalotony fampianaran̈a ao.

Nan̈ino fo anao tapakevitry hamaky Testamenta Vaovao?

Zaho koa fa feno 17 taon̈o, zaho nimpody ta Etazonỳ, hankefa fianaran̈anaka. Nisy olo haiko zay nivolan̈a taminaka fa Kristianin̈y izy. Nivolan̈a koa izy fa ho hisy raha manky fo fiain̈ananaka izikoa zaho tsy mino Jesosy.

Ho zaho: “Olo mino Jesosy edy very ke!”

Izy nan̈ontany zaho karaha ty: “Anao ma efa navy namaky Testamenta Vaovao?”

“Aha” ho zaho.

Ke volan̈iny taminaka: “Ino mahavy anao mitsaratsara fo kanefa tsisy raha hainao aby ao?”

Loso diniky zaho fotony hitako ten̈a marin̈y fa adalan̈a mitsaratsara raha tsy hay zen̈y. Nalaiko Baibolinany in̈y baka io zaho nanomboko namaky Testamenta Vaovao.

Ino vokatranizen̈y taminao?

Gaga zaho fa kaiky Jiosy nanoratra Testamenta Vaovao io. Arakarakany namakiako izio nahitako fa Jesosy io Jiosy tsara fan̈ahy ndreky nanetry ten̈a baka io tsy nan̈araraotro olo fa tihan̈ampy iro fo. Nandeha tamy librery foeky zaho hindran̈a boky momba Jesosy. Kanefa zaho mbala tsy resy lahatra Jesosy io Mesia. Misy boky sasany foeky mivolan̈a fa izy Zan̈ahary. Tsy loziky foeky raha zen̈y taminaka. Ke izikoa izy Zan̈ahary, nivavaka taminjovy fo basy izy? Taminy ain̈inany tompiny? Jesosy efa navy naty kanefa Baiboly mivolan̈a fa Zan̈ahary ‘tsy mety maty.’a

Akory nataonao baka hahaizan̈a ny ten̈a marin̈y?

Haiko fa fampianaran̈a marin̈y zen̈y tsy mifanipaka, ke zaho tapakevitry hitady izio. Zaho nivavaka tamy Zan̈ahary salakady nitomoan̈y. Sambany tamy zen̈y zaho nivavaka kanefa tsy nampiasa vavaka voasoratra tan̈aty boky. Vita hely vavaka nataoko, nisy olo nikonkon̈o tran̈onaka. Vavolombelon̈o Jehovah aroe tao. Namiandro boky fianaran̈a Baiboly zaho. Hitako tamy boky io ndreky koran̈a nataonay fa miorin̈y amy Baiboly raha inoandro. Vavolombelon̈o Jehovah tsy mino fa Jesosy an̈isany Zan̈ahary Tokana Olo Telo. Iro ndraiky mino fa izy Zanaka Zan̈aharyb, baka io izy voanalohany namboariny Zan̈ahary.c

Tsy ela tafaranizen̈y, zaho nimpody ndraiky ta Meksiky sady mbala nanohy nianatra faminanian̈a momba Mesia tamy Vavolombelon̈o Jehovah fo. Varian̈a zaho nahita faminanian̈a maro be. Kanefa zaho mbala tsy resy lahatra fo. Zaho nieritreritry: ‘Izio ma tamy Jesosy zaraiky fo tanteraka iro faminanian̈a aby io? Tsao mba olo pisandoko fo Jesosy io e?’

Ino raha ten̈a namparesy lahatra anao?

Nisy faminanian̈a naboakandro Vavolombelon̈o Jehovah aby in̈y zaho, ke tsy posibla ho vitanolo pisandoko foeky han̈atanteraka zen̈y. Mika paminan̈y nivolan̈a efa 700 taon̈o taloha, fa ho teraka a Betlehema a Joda an̈y Mesia io.d Tsisy olo mahavita mifidy toeran̈a hitirahany. Nivolan̈a koa Isaia fa hivonen̈y karaha olo pan̈ano ratsy in̈y Mesia, baka io halevin̈y amy fasan̈any pan̈arivo.e Tanteraka tamy Jesosy raha jiaby zen̈y.

Faminanian̈a momba razambeny Jesosy faminanian̈a ten̈a nampiafatra zaho. Baiboly mivolan̈a fa baka amy taranaka Davida haviany Jesosy.f Tsisy olo afaka mifamatra zen̈y. Vahoaka tamy zen̈y foeky nikaiky izy “Zanaka Davida.”g

Koa fa nandravan̈a Jerosalema iro Romanin̈y aby io 37 taon̈o talohany nifatesany Jesosy na tamy taon̈o 70, very na potiky iro kajian̈a jiaby momba tetirazan̈a Jesosy. Jesosy koa tsy navy talohany taon̈o 70, tsisy olo afaka nan̈aporofo fa marin̈y tetirazan̈anany.

Ino vokatrany fahaizan̈a zen̈y taminao?

Efa nivolan̈a tsialohaloha Deoteronomia 18:18, 19 fa hanendry paminan̈y karaha Mosesy amindro Israely aby io Zan̈ahary. Karaha ty ho Zan̈ahary: ‘Lan̈iany tsy mino volan̈a volan̈iko aminy an̈aranaka, zaho tsy maintsy hitsara izy.’ Ten̈a resy lahatra zaho koa fa nandiniky tsarabe Baiboly jiaby fa Jesosy baka a Nazareta ankitin̈y paminan̈y koran̈iny io.