Olo sasany mahita fa sarotro aminolo maro ho tia Zan̈ahary zen̈y. Amindrô baka Zan̈ahary zen̈y mistery, avio tsy mijery atsika na koa ratsy jery. Zahava baka raha volan̈indro:

• “Zaho nivavaka, nangataka fan̈ampian̈a tamy Zan̈ahary, fa izy karaha tsy tihan̈ampy zaho aby. Tan̈aty jeriko baka, Zan̈ahary zen̈y tsy mitepô olo.”​—Marco, Italy.

• “Tiako ndraiky hanompo Zan̈ahary zen̈y, fa izy fo karaha tsy mijery atsika aby. Masiaka loatra fahitako izy, sady pan̈asazy koa. Zaho tsy nino fa izy mba mahay tia olo zen̈y.”​—Rosa, Goatemalà.

• “Tamy zaho mbala hely, zaho nino fa Zan̈ahary io miasa mizaha raha tsy mety ataontsika fo, sady efa pare han̈asazy olo. Tafara tatỳ, tsapako fa izy tsy mijery olo aby. Izy mitovy amy premie ministra miandraikitry asany fanjakan̈a, kanefa tsy miasaloha aminolo foeky.”​—Raymonde, Kanada.

Akory hevitrinao? Zan̈ahary io ma tsy mendriky hitiavin̈y? Maro pivavaka nan̈ontany karaha zen̈y. Ankamaraozondro tamy Fivavahan̈a Miaboko ho Kristianin̈y, tamy Moyen Âge (taon̈o 500-1500) tsy nivavaka tamy Zan̈ahary Farany Mahery io. Nan̈ino? Fotony irô navozo izy. Nisy pahay tantara araiky, Will Durant, nivolan̈a karaha ty: “Azovy panota hasaky hivavaka amy Zan̈ahary mampavozo sady tsy mijery olo?”

Nan̈ino olo mieritreritry fa Zan̈ahary io ‘mampavozo ndreky tsy mijery olo?’ Ino raha ten̈a ampianariny Baiboly momba Zan̈ahary? Fahaizan̈a ny marin̈y momba Zan̈ahary io ma mety hahavy anao ho tia izy?

RAHA INOANOLO MARO

“Raha mbala tsy mampifankahazo zahay firaka ziô Zan̈ahary misy an̈aran̈a sa tsisy, avio izikoa misy, azovy an̈arany?”​—Profesera David Cunningham, Fianaran̈a Momba Teolojỳ (angiley).

NY MARIN̈Y BAKA AMY BAIBOLY

Volan̈iny Zan̈ahary: “Zaho Jehovah zen̈y! Efa zen̈y an̈aran̈anaka.” (Isaia 42:8) Jehovah io an̈aran̈a Hebreo. Dikanizio “Izy Man̈ano Raha Hahavy.”

Tiany Jehovah ampiasaintsika an̈aranany io. Baiboly mivolan̈a: “Kahia an̈aranany. Ambarà firenena aby io raha nataony, baka io ambarà fa efa mahazo voninahitry an̈aranany.”​—Isaia 12:4.

Jesosy nampiasa an̈arany Zan̈ahary. Karaha ty nivolan̈iny tamy Jehovah tamy vavaka: “An̈aranao efa nampianariko iro [pianatrany Jesosy], baka io mbala hampianariko iro koa.” Nan̈ino mba izio nambarany iro? Karaha ty ho izy: “Amy zen̈y fitiavandro anao [Zan̈ahary] ho tafiditry mare, karaha fitiavanao zaho, baka io zaho koa hitambatra amindro.”​—Jaona 17:26.

NAN̈INO TSARA HAY RAHA ZEN̈Y?

“Karaha ty nisoratiny Walter Lowrie, pandiniky fivavahan̈a: “Olo araiky koa tsy mahay an̈arany Zan̈ahary, izy tsy ten̈a mahay Zan̈ahary. Izikoa angovo matanjaka be fo fahaizany Zan̈ahary zen̈y, izy tsy mety ho tia Zan̈ahary.”

Pandeha leglizy isaka dimansy i Victor, kanefa tsapany fa izy mbala tsy ten̈a mahay Zan̈ahary. Ho izy: “Tamy zaho vo nahay fa Jehovah an̈arany Zan̈ahary, tio zaho vo nanomboko nahay izy. Efa ren̈iren̈iko fo koran̈a momba izy fa tamy zen̈y zaho ten̈a nahay izy. Tiô izy vo ten̈a nisy ankitin̈y taminaka. Tamy zen̈y koa zaho nanomboko nifandray taminany.

Jehovah von̈ono hifandray marikitry aminolo mampiasa an̈aranany io. Karaha ty raha nampan̈antinainy ‘olo misaintsain̈y an̈aranany’: “Zaho hahinakinaka iro, karaha ataonolo mahinakinaka zanany manompo izy in̈y.” (Malakia 3:16, 17) Izy koa mampan̈anten̈a han̈amia iro hatsaran̈a. Baiboly mivolan̈a: “Zay olo mikaiky an̈aran̈any Jehovah fo ho voavonjy”​—Romanina 10:13.

RAHA INOANOLO MARO

Iro fivavahan̈a kristianin̈y “maventy telo, tsy azovy iro io fa Fivavahan̈a Katoliky ndreky Ortôdôksy avio Protestant, samby man̈eky fa Zan̈ahary io Olo telo nitambatra araiky: Zan̈ahary Baba, Zan̈ahary Zanaka, avio Zan̈ahary Fan̈ahy Masin̈y. Fivavahan̈a Kristianin̈y tsy mampianatra fa misy zan̈ahary telo, fa ny ampianarindro, iro telo io olo araiky fo.”​—Rakipahalalan̈a Britaniky Vaovao (angiley).

NY MARIN̈Y BAKA AMY BAIBOLY

Jesosy, Zanaka Zan̈ahary io, tsiary nitoron̈o ho nitovy tamy Babany. Nata izy aby nivolan̈a: “Handeha amy Baba andan̈itry an̈y zaho io. Baba andan̈itry an̈y io bebe toizay zaho.” (Jaona 14:28) Karaha ty koa nivolan̈iny tamy pan̈aradia izy araiky: “Zaho hanonga amy Babako ndreky Babanaro, Zan̈aharinaka ndreky Zan̈aharinaro.”​—Jaona 20:17.

Fan̈ahy masin̈y io koa tsy olo. Izio tsy Zan̈ahary fa angovo ampiasainy Zan̈ahary. (Genesisy 1:2) Iro Kristianin̈y tamy taonjato voanalohany, ohatra, “feno fan̈ahy masin̈y.” Jehovah koa nivolan̈a: “Handatsahako tapany hely amy fan̈ahinaka karazanolo jiaby.”​—Asan’ny Apostoly 2:1-4, 17.

NAN̈INO TSARA HAY RAHA ZEN̈Y?

Karl Rahner ndreky Herbert Vorgrimler, manampahaizan̈a katoliky, mivolan̈a fa raha momba trinite io “tsisy andra hahaizan̈a izy, izikoa tsisy olo man̈ambara raha momba izy, sady nata ambara izio mbala tsy hazava fo.” Ke mba marin̈y aminao edy hankatia olo tsisy andra ho hay zen̈y? Hita baka amy zen̈y fa fampianaran̈a momba Trinite io misakana olo tsy hahay Zan̈ahary ndreky tsy ho tia izy.

Marco, araiky nikoran̈intsika taloha in̈y, mba efa navy nahatsapa karaha zen̈y. Ho izy: “Zaho nieritreritry fa nasitrikiny Zan̈ahary taminaka raha momba izy, “ke nahainanjary mistery fo fahitako izy, avio loso sarotro taminaka amy zay han̈aton̈o izy.” Kanefa, tiany Zan̈ahary atsika hahay raha momba izy, ke tsy nasitrikiny tamintsika foeky raha zen̈y. Jesosy nivolan̈a: “Zahay mivavaka amy raha hainay.”​—Jaona 4:22.

“Izikoa fa haiko fa kaiky Zan̈ahary io tsy tokana olo telo, zaho nanjary afaka nifandray marikitry taminany”, ho Marco. Ke ho mora amintsika koa ho tia Zan̈ahary izikoa haintsika tsarabe raha momba izy, fa tsy mihevitry izy ho mistery. Baiboly baka fa mivolan̈a: “Zay olo tsy tia mbala tsy mahay Zan̈ahary, fotony Zan̈ahary io fitiavan̈a.”​—1 Jaona 4:8.

RAHA INOANOLO MARO

“Irô olo nan̈ano fahotan̈a mahafaty koa fa maty, fan̈ahindrô direkty mijotso amy môtrobe an̈y. An̈y iro sazin̈a mandrakizay an̈aty ‘môtro tsy mety maty.’” (Katesiziny Leglizy Katoliky) Pitondra fivavahan̈a sasany mivolan̈a fa olo mandeha amy môtrobe io olo tsisy mifandray amy Zan̈ahary zen̈y eky.

NY MARIN̈Y BAKA AMY BAIBOLY

“Hofoaty zay manota.” (Ezekiela 18:4) Baiboly koa mivolan̈a amy Mpitoriteny 9:5 fa ‘olo maty fa tsisy raha hainy eky.’ Ke izikoa zen̈y, iro tsy hijaly an̈aty “môtro tsy mety maty” zen̈y.

Matetiky, volan̈a hebreo ndreky griky nadika “môtrobe” io amy Baiboly ao, ivolan̈ana fasan̈a iliven̈anolo maty jiaby. Ohatra, tamy Joba narary mare in̈y, izy nivavaka karaha ty: “Mba asitria amy fasan̈a an̈y [“môtrobe”, Dikan-teniny Douay-Rheims] zaho.” (Joba 14:13) Nivolan̈a Joba iô fa izy hidôko an̈aty fasan̈a, fa tsy handeha amy tany hampijalijalian̈a olo na toeran̈a lavitry Zan̈ahary zen̈y eky.

NAN̈INO TSARA HAY RAHA ZEN̈Y?

Izikoa atsika mihevitry fa Zan̈ahary io kafiry sady ratsy jery, atsika tsy mety ho tihan̈aton̈o izy. Misy man̈angy araiky mipetraka a Meksiky, kahian̈a Rocío, mivolan̈a fa taminizy mbala hely izy nampianarin̈y momba môtrobe io, ke ho izy: “Navozo loatra zaho ke zaho tsy nieritreritry fa Zan̈ahary zen̈y mba misy toetry tsaranany. Zaho nieritreritry fa izy meloko sady tsy mba man̈ambela heloko zen̈y.”

Hitany Rocío tamy Baiboly tao karakory ma didimpitsaran̈any Zan̈ahary ndreky man̈ano karakory marin̈y olo koa fa maty, ke raha zen̈y nan̈ova fomba fiheverany Zan̈ahary. Karaha ty ho izy: “Karaha nisy raha mavesatra be nadoso taminaka, ke nahatsiaro nahivankivan̈a zaho. Nanomboko tiô zaho nanjary natoky fa Zan̈ahary io mba man̈iry raha hampatsara atsika, tia atsika, avio mety hitiavin̈y. Izy mira baba araiky mitana tan̈any zanany sady mitady raha hampatsara zanany fo in̈y.”​—Isaia 41:13.

Maro olo mifen̈y mare mivavaka fotony mazovo tsao handeha amy môtrobe. Fa tsy tiany Zan̈ahary foeky izikoa nohony tahotro izy mahavy anao manompo izy. Ndray Jesosy aby nivolan̈a: “Ke tiava Jehovah Zan̈aharinao.” (Marka 12:29, 30) Sady izikoa atsika mahita fa kaiky Zan̈ahary io tsy man̈ano raha tsy rariny zen̈y foeky amy zioty, atsika loso matoky fitsaran̈anany aminy hoavy koa. Karaha Eliho kamaradiny Joba, atsika koa afaka hivolan̈a: “San̈atria araiky ten̈a Zan̈ahary io han̈ano ny ratsy. San̈atria izy Farany Mahery io han̈ano raha tsy marin̈y!”​—Joba 34:10.

Tandraraiky, Jesosy ta Jerosalema, izy nikoran̈a momba Jehovah Babany, avio izy nan̈ambara ny marin̈y momba iro pitondra fivavahan̈a aby taminy andranany. (Jaona 8:12-30) Raha nivolan̈iny tamy zen̈y man̈ampy atsika hahay handiniky momba raha inoanolo aminy andra zioty. Karaha ty baka ho Jesosy: “Pianatranaka ankitin̈y anaro, izikoa tsy miala amy volan̈anaka. Anaro hahay ny marin̈y, ke ny marin̈y io hankafaka anaro.”​—Jaona 8:31, 32.

Ty fitsipiky araiky nivolan̈iny Jesosy iô mba hahaizan̈a asa marin̈y sa tsy marin̈y raha ampianariny fivavahan̈a: “Tsy miala amy volan̈anaka.” Ke izikoa anao fa maharen̈y koran̈a momba Zan̈ahary, man̈ontania ten̈a karaha ty: ‘Mifan̈araka amy raha nivolan̈iny Jesosy ndreky raha koran̈iny Soratra Masin̈y ma izio?’ Aleva tahaka iro olo aby naharen̈y raha nivolan̈iny apostoly Paoly, fotony “isanandra koa iro nandiniky Soratra Masin̈y io, baka ho azondro antoko tsarabe fa zen̈y [raha nianarandro io] ankitin̈y izy.”​—Asan’ny Apostoly 17:11.

Marco, Rosa, ndreky Raymonde nikoran̈intsika tamy lahatsoratra taloha aby in̈y, samy nandiniky tsarabe raha inoandro, ke iro nianatra Baiboly tamy Vavolombelon̈o Jehovah. Ino raha nianarandro tao?

Marco: “Olo nampianatra Baiboly zahay io nampiasa tsarabe Soratra Masin̈y izikoa fa namaly fan̈ontanian̈a jiaby napetrakanay fivadiany. Ke nanomboko nitombo fo fitiavanay Jehovah, avio zahay roeny vadiko koa nahainifankatia fo!”

Rosa: “Tamy voanalohany, zaho nieritreritry fa Baiboly io raha boky mikoran̈a hevitrinolo momba Zan̈ahary fo. Kanefa koa fa nandeha fotoan̈a, hitako tan̈aty tao valiny fan̈ontanian̈anaka. Loso misy ankitin̈y Jehovah zen̈y aminaka zioty. Zaho nanjary matoky izy tsarabe.”

Raymonde: “Zaho nivavaka tamy Zan̈ahary baka hampiany hahay raha momba izy. Tafara tatỳ, zahay roeny vadiko nianatra Baiboly. Hitanay tao ny marin̈y momba Jehovah! Ravoravo zahay mahay fa izy ten̈a Zan̈ahary be fitiavan̈a.”

Aboakany Baiboly amintsika iro vandy volan̈inolo momba Zan̈ahary. Fa tsy zen̈y fo fa ambarany atsika koa ny marin̈y momba izy ndreky momba toetrinany maro tsara. Baiboly io Volan̈a Zan̈ahary, ke izio man̈ampy atsika ‘hahay raha namezany atsika taminy hatsarampan̈ahy.’ (1 Korintianina 2:12) Nan̈ino izikoa anao foeky mitady karakory ataony Baiboly mamaly iro fan̈ontanian̈a maventy momba Zan̈ahary, fikasan̈anany, ndreky ny amaraintsika? Vakia valiny sasany amy fan̈ontanian̈a aby io amy www.pr418.com ao, amy “Raha Ampianariny Baiboly > Fan̈ontanian̈a Valiany Baiboly.” Anao koa mety mameno fangatahan̈a hianatra Baiboly aminy Internet na mivolagna aminy araiky amy Vavolombelon̈o Jehovah hainao. Zahay matoky fa izikoa anao man̈ano zen̈y, ho hitanao fa kaiky Zan̈ahary io mendriky hitiavin̈y mare.