Problemo Man̈amia Fan̈antinan̈a

“Aminandra farany an̈y, fiain̈ana ho sarotro.”​—2 TIMOTY 3:1.

ASA anao mba efa naharen̈y na nahita foeky raha mampalahelo aby ty?

● Aretin̈y nandripaka olo antapitrisany.

● Mosary namono olo anjatony.

● Horohorontany nahafaty olo andrivony baka io maro olo nanjary tsisy tany ipitrahan̈a.

Amy pazy man̈araka aby io ao, mikoran̈a toejavatra mampisaintsain̈y. Ho hitanao ao koa fa Baiboly efa nivolan̈a tsialohaloha fa raha aby zen̈y hiboaka amy fotoan̈a araiky kaian̈a “andra farany.”a

Lahatsoratra aby ty tsy natao handrisian̈a lahatra anao fa fiain̈ana iain̈antsika ziô ten̈a manahiran̈a. Azo antoko baka fa efa hitanao raha zen̈y. Fa izity natao hahavy anao hanan̈a fan̈antinan̈a. Izity hikoran̈a faminanian̈a tsiota efa tanteraka, baka io hazavainy ato fa dikanizen̈y efa tsy ho ela “andra farany” io ho tapitry. Ho hitanao ato koa sasany aminy hevitrinolo tsy mino raha zen̈y, ndreky antony mahavy atsika tokony hino fa misy raha tsara miambin̈y atsika tsy ho ela.

[Lamariky amy pazy ambany]

Faminanian̈a 1. Horohorontany

“Ho hisy horohorontany matanjaka.”—LIOKA 21:11.

● Tambany vatovato nahitan̈a Winnie, tsaiky taon̈o araiky sy 4 fanjava. Iro pan̈ano vaovao aby io naharen̈y feonany mitomoan̈y. Izy avotro taminy horohorontany ta Haiti io, fa raimandreninany ndraiky naty.

RAHA MISY Tamy Zanvie 2010, nisy horohorontany 7,0 amy mezirany Richter, nandalo ta Haiti. Mandilatrany 300 000 olo naty. Nisy olo 1,3 tapitrisa koa nanjary tsisy tany nipitrahan̈a. Naresaka mare horohorontany in̈y. Fa ndray zen̈y, tsy in̈y zaraiky fo horohorontany matanjaka. Nisy 18 isandro io nandalo erantany letry taminy Avrily 2009 firaka Avrily 2010.

INO RAHA VOLAN̈INOLO? Horohorontany amy zioty tsy maromarony taloha tan̈y. Efa mivoatra mare teknolozy aminandrantsika zioty, ke efa haintsika fisiandro io, tsy karaha taloha tan̈y.

MBA MARIN̈Y EDY ZEN̈Y? Diniha baka ty: Baiboly tsy mivolan̈a firy horohorontany ho hisy aminandra farany. Fa izy mivolan̈a fa ho hisy “horohorontany matanjaka amy tany maro.” Zen̈y mahavy iro io an̈isany mampiavaka andrantsika zioty.—Marka 13:8; Lioka 21:11.

AKORY HEVITRINAO? Tanteraka ankitin̈y ma raha nivolan̈iny Baiboly? Misy ankitin̈y ma horohorontany matanjaka zen̈y?

Izikoa horohorontany zaraiky fo mbala tsy ampy ivolan̈ana fa atsika io miain̈y aminandra farany. Izio mbala vo araiky fo amindro faminanian̈a efa tanteraka. Zahava araiky faharoe.

[Volan̈a nalain̈y]

“Horohorontany matanjaka fivolan̈anay [manampahaizan̈a momba tany] iro io. Fa aminolo maro ndraiky, raha ten̈a ratsy izio ho iro.”​—KEN HUDNUT, FIKAMBANAN̈A AMERIKAIN MANDALIN̈Y MOMBA TANY.

[Sary nazahoan̈a lalan̈a]

© William Daniels/​Panos Pictures

Faminanian̈a 2. Mosary

“Hisy mosary.”—MARKA 13:8.

● Nisy lelahy araiky zay nandeha nifindra tamy tanàna heliny Quaratadji, a Niger an̈y, nangataka vonjy taminolo tan̈y, fotony izy nosary mare. Nisy havany, rahalahiny ndreky anabaviny koa niala tamy tany nisy iro. Kanefa lelahy io zaraiky fo nandry tamy tsihy tio. Nan̈ino? Karaha ty volan̈iny Sidi, sefony tanàna io: “Izy tsy afaka mamelon̈o [fianakavian̈anany] ke tsy din̈iny hizaha iro karaha io fo.”

RAHA MISY Erantany, an̈atinolo 7, olo araiky farany vitsy, tsy ampy hanin̈y isanandra. Fa mbala lombolombonizen̈y an Afriky atsimony Sahara. An̈atinolo telo, olo araiky tsy ampy hanin̈y mahadin̈y ela mare. Iritrireta baka ty: An̈aty fianakavian̈a araiky, ao papa, mama, ndreky zanaka. Izikoa hanin̈y mahampy olo aroe fo iô, azovy amindro tsy hihina? Tsaiky aby io sa papandro sa mamandro? Isanandra, fianakavian̈a aby io tsy maintsy man̈ano safidy karaha zen̈y.

INO RAHA VOLAN̈INOLO? Be vokatrany tany, ke mahampy atsika jiaby. Fa izio mila olo mahay mitantan̈a fo.

MBA MARIN̈Y EDY ZEN̈Y? Maromarony taloha ndraiky vokatra azondro pamboly aby io. Tokony ho vitany fitondrasan̈anolombelon̈o koa mitantan̈a izio tsara baka tsy hisiany mosary eky. Fa kanefa tan̈atiny ampolony taon̈o iro efa nifen̈y, fa mbala tsy vitandro fo nan̈ano zen̈y.

AKORY HEVITRINAO? Tanteraka ankitin̈y ma raha volan̈iny Marka 13:8? Ndray efa mivoatra mare teknolozy, tsy mbala mampijaly olo erantany fo ma mosary io?

Horohorontany ndreky mosary io matetiky mahavy raha araiky fahatelo, marikiny andra farany.

[Volan̈a nalain̈y]

“Mandilatrany ampahatelony tsaiky matiny aretin̈iny havokavoko, fivalan̈ana ndreky aretin̈y hafa, kanefa nety mbala velon̈o fo izikoa iro io ampy hanin̈y tsara.”​—ANN M. VENEMAN, PITANTAN̈A SAMPANDRAHARAHANY ONU MIKARAKARA RENY NDREKY TSAIKY, TALOHA.

[Sary nazahoan̈a lalan̈a]

© Paul Lowe/Panos Pictures

Faminanian̈a 3. Aretin̈y

“Hisy valan̈aretin̈y.”—LIOKA 21:11.

● Nisy ady sivily tamy tany araiky tan Afriky tan̈y. Bonzali, pikarakara fahasalamambahoaka tamy tany io, nifen̈y nitaha iro olo pitady harian̈a ambany tany, takany virisiny Marburg.a Izy nangataka fan̈ampian̈a tamy manampahifan̈a tamy tanàna maventy, kanefa tsy nahazo valiny foeky. Efa efatra fanjava tafaranizen̈y fan̈ampian̈a io vo navy. Fa Bonzali efa naty. Izy nifindrany aretin̈inolo nitahany aby io.

RAHA MISY Aretin̈iny taovampisefoan̈a (karaha pnemony), fivalan̈ana, SIDA, tiberkilozy, ndreky lafievra io an̈isany valan̈aretin̈y mahafaty ten̈a pahazo olo maro. Taminy 2004, olo kadiriny 10,7 tapitrisa natiny aretin̈y aby io. Zen̈y efa olo araiky maty, isaka telo segondy.

INO RAHA VOLAN̈INOLO? Mahaimaro fo olombelon̈o ambony tany, ke mahaimaro fo koa karazany aretin̈y. Dikanizen̈y mahaimaro fo olo mety harary.

MBA MARIN̈Y EDY ZEN̈Y? Olombelon̈o mahaimaro fo. Mahaimitombo fo koa fahaizanolombelon̈o mizaha, mifehy, ndreky mitaha aretin̈y. Ke tsy efa tokony hihen̈y fo aretin̈y ndreky olo marary? Kanefa mifanohitry amy zen̈y edy raha miboaka.

AKORY HEVITRINAO? Tanteraka ankitin̈y ma raha nivolan̈iny Baiboly? Mampijaly olo ankitin̈y ma aretin̈y?

Horohorontany, mosary ndreky aretin̈y io mampijaly olo antapitrisany. Fa tsy zen̈y fo. Misy koa olo samy olo fo mampijaly namandro. Ke maro amindro io, olo tokony hiaro iro edy mampijaly iro io. Zahava hely baka faminanian̈a araiky amy Baiboly ao mikoran̈a momba zen̈y.

[Lamariky amy pazy ambany]

[Volan̈a nalain̈y]

“Efa ten̈a mampalahelo mahita olo laniny lion na biby hafa. Mitovy amy zen̈y koa anao ndreky olo man̈odidin̈y anao, izikoa kikisany aretin̈y ratsy.”​—MICHAEL OSTERHOLM, PANDINIKY VALANARETIN̈Y.

[Sary nazahoan̈a lalan̈a]

© William Daniels/Panos Pictures

Faminanian̈a 4. Tsisy Fitiavan̈a

‘Tsy ho tia havan̈a.’—2 TIMOTY 3:1-3.

● Misy man̈angy araiky, Chris an̈arany, miasa amy fikambanan̈a araiky avaratrany Pays de Galles an̈y, man̈ampy olo popony vadiny. Karaha ty hoizy: “Tsaroako nisy man̈angy araiky zay niditry, hitako izy feno diany popoko. Saiky tsy haiko foeky izy. Hitanao koa man̈angy sasany kivy tanteraka, ke tsy sakindro foeky mizaha anao.”

RAHA MISY Nisy fan̈adikadin̈ana natao tamy tanàna araiky tan Afriky tan̈y. Hita fa amy viavy 3, kadiriny araiky amindro io tamy mbala hely, efa navy naolan̈anolo. Mandilatrany ampahatelony lelahy koa mieritreritry fa tsy mampan̈ino mamopoko vady zen̈y. Kanefa tsy lelahy fo mamopoko vady fa man̈angy koa. A Kanada, ohatra, amy lelahy 10, efa ho 3 amindro io mahazo popoko amy vadindro.

INO RAHA VOLAN̈INOLO? Letrizay, efa nisy fo lelahy mamopoko vady io. Fa amy zioty fo raha zen̈y ten̈a dinihin̈y lalin̈y.

MBA MARIN̈Y EDY ZEN̈Y? Marin̈y ndraiky fa tatoato, olo vo ten̈a setry tamy resaka vady mamopoko io. Fa raha zen̈y ma nampihen̈y isanizio? Ehe, tsy zen̈y foeky. Ndray olo nahay tsisy fitiavan̈a fo ke.

AKORY HEVITRINAO? Tanteraka ankitin̈y ma raha koran̈iny 2 Timoty 3:1-3? Tsy fankatia ankitin̈y ma olo tran̈o araiky, kanefa raha zen̈y tokony handeha ho azy?

Momba tany ty faminanian̈a fahadimy tanteraka aminandrantsika izioty. Aleva onon̈o baka raha koran̈iny Baiboly momba zen̈y.

[Volan̈a nalain̈y]

“Vady mamopoko io an̈isany raha ratsy tsy dia koran̈iny firy an̈ivony fiarahamonin̈y. Matetiky man̈angy araiky zay, efa nipopony vadiny in-35 izy vo mitarain̈y amy polisy.”​—PITONDRA VOLAN̈ANDRO A PAYS DE GALLES PAN̈AMIA FAN̈AMPIAN̈A ANTELEFONY IRO OLO POPONY VADINDRO.

Faminanian̈a 5. Fandrobatan̈a Tany

‘[Zan̈ahary] handripaka lan̈iany olo mandrobaka tany ty.’—APOKALYPSY 11:18.

● Misy lelahy zay Pirri an̈arany, pivarotro divain vita amy palmie a Kpor, a Nizeria an̈y. Kanefa nanjary tsy nandeha eky asanany io, fotony misy menaka mivarin̈y amy Vinan̈iny Niger. Ho izy: “Izio, mamono laokonay, mandrobaka hodrikinay, ndreky mandoto ranonay. Robaka foeky koa velonten̈anaka.”

RAHA MISY Araka koran̈any manampahaizan̈a, misy 6,5 tapitrisa tonnes fako mivarin̈y andranomasin̈y an̈y, isaka taon̈o. Mety ho 50 isanjatonizio raha plastiky efa nahadin̈y tan̈atiny anjatony taon̈o zay vo ravan̈a. Olombelon̈o tsy vitany efa mandrobaka tontolo iain̈ana fo fa laniandro firaka aminy harian̈a voajan̈ahary koa. Misy fandinihan̈a man̈aboaka fa mila taon̈o araiky sy dimy fanjava tany ty vo mahavita man̈ampody ndraiky raha jiaby nilanianolombelon̈o tan̈atiny taon̈o araiky. Mivolan̈a karaha ty gazety Ostraliain Sydney Morning Herald: “Izikoa mitohy fo fandrobatan̈a tontolo iain̈ana ndreky fandanilanian̈a harian̈a ambany tany, amy 2035 atsika mila tany aroe aby.”

INO RAHA VOLAN̈INOLO? Atsika olombelon̈o misain̈y sady afaka mitady vahaolan̈a amy problemo miboaka. Vitantsika man̈avotro tany ty.

MBA MARIN̈Y EDY ZEN̈Y? Maro olo na antokonolo efa mifen̈y man̈entan̈a olo ho tontohitry amy problemo momba tontolo iain̈ana. Kanefa ndray iô zen̈y, mahairobaka fo tany.

AKORY HEVITRINAO? Mila man̈ano raha ma Zan̈ahary baka han̈avotan̈a tanintsika ty tsy ho ravan̈a, karaha efa nivolan̈iny?

Nikoran̈a momba faminanian̈a dimy atsika tio. Fa Baiboly koa mbala mikoran̈a raha tsara hiboaka aminandra farany. Araiky amy zen̈y ziô ho hitanao amy faminanian̈a fahatsiota.

[Volan̈a nalain̈y]

“Aminaka, zaho efa tsy karaha amy toeran̈a tsara karaha paradisa, fa amy tany fan̈arian̈a fako mahafaty.”​—RAHA NIVOLAN̈INY ERINTAMBER, MIPETRAKA AMY SISINY RANOMASIN̈INY ETAZONY, MOMBA VOKATRANY MENAKA NAVY FIRAKA TAMY LABAINY MEKSIKY, TAMINY 2010.

[Efajoro]

Zan̈ahary ma Nahavy Izio?

Zan̈ahary ma nahavy raha ratsy hitantsika aby io matoa efa nivolan̈iny tsialohaloha amy Baiboly ao izio? Baka aminany ma jaly io? Hahita valiny mahafapo amy fan̈ontanian̈a aby zen̈y anao amy toko faha-​11 amy boky Ino ma Raha Ten̈a Ampianariny Baiboly? naboakany Vavolombelon̈o Jehovah.

[Sary nazahoan̈a lalan̈a]

U.S. Coast Guard photo

Faminanian̈a 6. Fitorian̈a Man̈erantany

“Hambara amy tany jiaby misy olo antsendriky vaovao tsara mikasiky Fanjakan̈a ty.”—MATIO 24:14.

● Misy man̈angy zay Vaiatea an̈arany, mipetraka amy Vondron̈ony Nosiny Tuamotu. Izio nosy mitokan̈a amy Ranomasin̈y Pasifiky an̈y. Erany faritry io misy nosy hely kadiriny 80. Iro io miparitaka amy toeran̈a mandilatrany 802 900 kilometra kare. Kanefa 16 000 fo olo mipetraka an̈y. Fa ndray zen̈y, Vaiatea ndreky olo tanàna araiky aminany mbala fanojy Vavolombelon̈o Jehovah fo. Nan̈ino? Fotony Vavolombelon̈o Jehovah tia mizara vaovao tsara momba Fanjakan̈any Zan̈ahary aminolo jiaby, ndray aia ndray aia tany ipitrahindro.

RAHA MISY Olo erantany maharen̈y hafatra momba Fanjakan̈any Zan̈ahary. Ohatra, taminy 2010 fo, efa nandilatra 1 600 tapitrisa lera laniny Vavolombelon̈o Jehovah nitorian̈a hafatra momba vaovao tsara, tamy tany mandeha 236. Izikoa atao kontikonty, 30 minity laniny Vavolombelon̈o Jehovah araiky isanandra, amy fitorian̈a. Tan̈atiny folo taon̈o loso zay, efa mandilatra 20 000 tapitrisa boky, gazety ndreky raha hafa momba Baiboly, naboakandro ndreky nizaraindro.

INO RAHA VOLAN̈INOLO? Efa andrivony taon̈o zay nitorian̈a hafatra momba Baiboly io.

MBA MARIN̈Y EDY ZEN̈Y? Marin̈y zen̈y. Maro olo efa nitory hafatra momba Baiboly. Kanefa ankamarozandro io nan̈ano zen̈y tan̈atiny fotoan̈a fohiky sady tamy faritry hely fo. Vavolombelon̈o Jehovah ndraiky mandamin̈y asa fitorian̈a erantany. Ke anjatony tapitrisa olo efa naharen̈y zen̈y. Ndray tio fanoheran̈a mare nataony sasany amindro fanjakan̈a ten̈a matanjaka sady ratsy fan̈ahy mare, Vavolombelon̈o Jehovah mbala mifen̈y mitory fo. (Marka 13:13) Iro koa tsy karamain̈y mandeha mitory io, fa antsitrapo iro man̈amia fotoan̈andro. Boky ndreky gazety rasaindro io koa tsy vangain̈y. Baka amy fan̈amezan̈a antsitrapo fo hanohan̈ana asa io.

AKORY HEVITRINAO? Efa torian̈a erantany ma “vaovao tsara momba fanjakan̈a io?” Fahatantirahany faminanian̈a io ma midika fa misy raha tsara hiboaka tsy ho ela?

[Volan̈a nalain̈y]

“Izikoa Jehovah mbala tsy mivolan̈a basy, atsika mbala hazoto hitory vaovao tsara momba Fanjakan̈a io fo. Ke ataontsika fomba jiaby baka olo jiaby maharen̈y izio.”​—DIARINY VAVOLOMBELON̈O JEHOVAH 2010.

Hoavy Ten̈a Tsara Efa Marikitry!

“Teteky io, tsisy olo ratsy fan̈ahy eky ... Olo pandefitry fo handova tany ty, ke ho ravoravo amy fiadan̈ana.”​—SALAMO 37:10, 11.

TIANAO ma hahita fahatantirahany faminanian̈a io? Azo antoko zen̈y. Misy porofo mafatoky tsarabe mahavy atsika afaka mino fa efa tsy ho ela izio.

Iro lahatsoratra taloha tio aby in̈y nikoran̈a sasany amy faminanian̈any Baiboly man̈ambara fa atsika io miain̈y “aminandra farany.” (2 Timoty 3:1-5) Nampanoratiny Zan̈ahary an̈aty Baiboly ao faminanian̈a aby io, baka atsika hanan̈a fan̈antinan̈a. (Romanina15:4) Ke fahatantirahandro io midika fa tsy ho ela ho foan̈a raha jiaby mampijaly atsika io.

Ino raha hiboaka izikoa fa tapitry andra farany? Fanjakan̈any Zan̈ahary hanjaka aminolombelon̈o jiaby. (Matio 6:9) Han̈ano karakory eky fiain̈ana amy zen̈y? Zahava baka raha koran̈iny Baiboly:

● Tsy ho hisy eky mosary. “Tany hahavokatra mare. Nata an̈abony bongo mbala hahavokatra fo.”—Salamo 72:16.

● Ho foan̈a aretin̈y. “Tsisy aminolo mipetraka ao hivolan̈a: ‘Zaho zen̈y marary e.’”—Isaia 33:24.

● Hanjary vaovao tany. “Ho ravoravo tany dezera ndreky tany paiky . Ho ravoravo koa lemaka paiky sady hamolera karaha folera safrona.”—Isaia 35:1.

Mbala sasany amindro faminanian̈a maro tsara ho tanteraka tsy ho ela fo iro io. Fa anao mety man̈ontany Vavolombelon̈o Jehovah ino antony mahavy iro matoky mare fa ho tsara fiain̈ana tsy ho ela.