Karakory ma Andaminany Jehovah Olonany?

1. Karakory ma nandaminany Jehovah Israelita aby io?

“Israelita” zen̈y, taranaka Abrahama. Iro zaraiky fo namiany Jehovah lalàn̈a. Jehovah koa nan̈iraka olo nitariky ndreky nampianatra iro volan̈anany ndreky fomba hanompoan̈a izy. (Salamo 147:19, 20) Tafara taty, ndray olo tsy Israelita, mbala nahazo hatsaran̈a fo baka amy raha nataony Jehovah tamindro Israelita aby io.—Vakia Genesisy 22:18.

Israelita aby io nataony Jehovah Vavolombelon̈onany. Tantarandro io ahitan̈a fa tsara man̈araka lalàn̈any Zan̈ahary. (Deoteronomia 4:6) Baka tamindro Israelita aby io koa nahaizanolo hafa raha momba Jehovah.—Vakia Isaia 43:10, 12.

2. Karakory koa andaminany Jehovah Kristianin̈y marin̈y?

Israelita aby io koa fa tsy nan̈araka volan̈a Zan̈ahary eky, nisoloany fiangonan̈a kristianin̈y. (Matio 21:43; 23:37, 38) Tsy Israelita aby io eky Vavolombelon̈o Jehovah, fa Kristianin̈y marin̈y.—Vakia Asan’ny Apostoly 15:14, 17.

Jesosy mitariky pianatranany han̈ambara vaovao tsara ndreky hampianatra karazan̈olo jiaby. (Matio 10:7, 11; 24:14; 28:19, 20) Aminandra izioty, efa ankamarozanolo ambony tany eto maharen̈y vaovao tsara io. Mahagaga fahaizany Jehovah mampihavan̈a karazan̈olo jiaby amy fivavahan̈a marin̈y! (Apokalypsy 7:9, 10) Olony Jehovah jiaby ampianarin̈y hifan̈ampy ndreky handrisiky naman̈a han̈ano ny tsara. Amy tany jiaby misy Vavolombelon̈o Jehovah, mira fo raha ataondro, iro koa fa mivory.—Vakia Hebreo 10:24, 25.

3. Rango ombian̈a ma nisiany Vavolombelon̈o Jehovah aminandra izioty?

Tafarany taon̈o 1870 tan̈y, nisy olo nitady ny marin̈y tamy Baiboly. Pianatra Baiboly an̈arandro tamy zen̈y. Iro koa fa nahay fa Jesosy nan̈iraka pianatranany hitory, iro jiaby nandeha nitory. Tamy 1931 amy zay iro vo nangala an̈aran̈a Vavolombelon̈o Jehovah zen̈y.—Vakia Asan’ny Apostoly 1:8; 2:1, 4; 5:42.

4. Ino ma mahavy Vavolombelon̈o Jehovah milamin̈y io?

Tamy faha apostoly aby io, nisy filankevipitantan̈ana nirahiny Jesosy nikarakara fiangonan̈a jiaby. (Asan’ny Apostoly 16:4, 5) Mira zen̈y koa izioty. Misy Filankevipitantan̈ana mikarakara fiangonan̈a Vavolombelon̈o Jehovah jiaby ambony tany eto. Iro io olobe maromaro, man̈aramaso asa atao amy birony sampan̈a. Amy birony sampan̈a aby io misy olo mandika boky amy volan̈a 600 karazany, man̈ano pirinty ndreky mandefa boky amy fiangonan̈a jiaby. Baka amy zen̈y ahavitany Filankevipitantan̈ana mitariky ndreky mandrisiky fiangonan̈a misy 100 000 ambony tany eto. Isaka fiangonan̈a, misy olobe mikarakara olony Zan̈ahary. Lelahy iro jiaby io.—Vakia 1 Petera 5:2, 3.

Vavolombelon̈o Jehovah jiaby mandeha isaka tran̈onolo mitory ndreky mampianatra vaovao tsara, karaha nataondro apostoly aby in̈y fo. (Asan’ny Apostoly 20:20) Tsy raha filaminan̈a zaraiky fo ahaizan̈a Vavolombelon̈o Jehovah, fa iro ten̈a mifankatia koa. Iro jiaby mifampitondra karaha olo kibo araiky. (2 Tesalonianina 1:3) Fisiany raha milamin̈y karaha zen̈y mahavy iro ravoravo fo, fotony iro jiaby samy mifen̈y man̈ano raha hamparavoravo Zan̈ahary ndreky mifan̈ampy.—Vakia Salamo 33:12; Asan’ny Apostoly 20:35.