TOKO 3
Ino Ma Fikasan̈any Zan̈ahary Momba Olombelon̈o?
1. Ino ma fikasan̈any Zan̈ahary momba olombelon̈o?
TEN̈A tsara fikasan̈any Zan̈ahary momba olombelon̈o. Izy niasa lelahy ndreky man̈angy voanalohany, Adama ndreky Eva, napetrany tamy zaridain̈y tsara. Tiany iro hiteraka maro, han̈ano tany jiaby hanjary paradisa, ndreky hikarakara iro biby aby io.—Genesisy 1:28; 2:8, 9, 15; zahava Fan̈azavan̈a 6.
2. a) Akory ahaizantsika fa tsy maintsy ho tanteraka fikasan̈any Zan̈ahary? b) Olo karakory volan̈iny Baiboly fa ho velon̈o tsisy farany?
2 Atsika io ma mbala hiain̈y amy paradisa zen̈y? Jehovah mivolan̈a: “Raha efa nikasaiko, tsy maintsy ataoko.” (Isaia 46:9-11; 55:11) Ho vitany ankitin̈y han̈atanteraka fikasan̈anany, fotony tsisy raha mahasakana izy. Jehovah mivolan̈a fa misy antony nahavy izy niasa tany ty. Hoizy: “Tsy raha tsisy antony niasany tany ty.” (Isaia 45:18) Tiany ho feno olo tany jiaby. Olo karakory ma tiany hipetraka eto? Firaka ombian̈a iro hiain̈y eto? Volan̈iny Baiboly: “Olo marin̈y [olo man̈araka volan̈a Zan̈ahary] handova tany ty, ke hipetraka io tsisy farany.”—Salamo 37:29; Apokalypsy 21:3, 4.
3. Olo mbala mety marary ndreky maty, ke ino fan̈ontanian̈a mety mipetraka?
3 Olo mbala mety marary ndreky maty. Misy ady ndreky olo mifamono koa amy tany maro. Tsy zen̈y foeky fikasan̈any Zan̈ahary. Ino nahavy fiain̈ana karaha zen̈y? Baiboly zaraiky fo mahavita man̈azava zen̈y.
ZAN̈AHARY NANJARY NISY PANOHITRY
4, 5. a) Azovy nampiasa bibilava nikoran̈ana taminy Eva, tamy zaridain̈y Edena tao? b) Ino mahavy olo tsara toetry, manjary pangalatra?
4 Baiboly mivolan̈a fa Zan̈ahary nisy panohitry. “Devoly ndreky Satana” an̈aranizio. Satana nampiasa bibilava nikoran̈ana taminy Eva, tamy zaridain̈y Edena tao. (Apokalypsy 12:9; Genesisy 3:1) Nataony Satana nira bibilava io fo nikoran̈a taminy Eva.—Zahava Fan̈azavan̈a 7.
5 Tsy Zan̈ahary ma niasa Satana Devoly io? Ehe. Tamy Zan̈ahary niasa tany hipitrahany Adama ndreky Eva, nisy anjely araiky tandan̈itry tan̈y nivadiky taminany, ke nanjary Devoly. (Joba 38:4, 7) Mba marin̈y edy zen̈y va? Ia. Ino mahavy olo tsara toetry, manjary pangalatra? Tsy niaraka izy vo teraka efa pangalatra. Izy nan̈iry hahazo raha tsy ninany. Tsy nadosony tamy jerinany tao foeky zen̈y, ke nahay tiany fo. Izy amy zay koa fa nahita lalan̈a, izy nangalatra. Izy fo nahavy izy nanjary pangalatra.—Vakia Jakoba 1:13-15; zahava Fan̈azavan̈a 8.
6. Karakory nahavy anjely araiky nanjary panohitry Zan̈ahary?
6 Mira zen̈y koa anjely in̈y. Jehovah koa fa baka niasa Adama ndreky Eva, izy nitsodrano iro hiteraka, “baka tany ty ho feno olo.” (Genesisy 1:27, 28) Mety ho karaha ty raha tan̈aty jeriny anjely io: ‘Tiako izikoa olo jiaby hivavaka aminaka, fa tsy amy Jehovah!’ Tsy nadosony tamy jerinany raha zen̈y, ndray efa hainy fa Jehovah fo tokony hivavahan̈a. Tiany anjely io olo hivavaka aminany, ke izy navandy ndreky namitaka Eva. (Vakia Genesisy 3:1-5.) Zen̈y nahavy izy nanjary Satana Devoly, panohitry Zan̈ahary.
7. a) Nan̈ino ma Adama ndreky Eva naty? b) Ino mahavy atsika mahaimatoe ndreky mety maty?
7 Adama ndreky Eva tsy nan̈araka volan̈a Zan̈ahary, ke nihina voany kakazo in̈y. (Genesisy 2:17; 3:6) Iro nanota tamy Jehovah, ke izikoa fa ela ny ela, iro naty. Zen̈y raha efa nivolan̈iny Jehovah tamindro in̈y. (Genesisy 3:17-19) Taranakany Adama ndreky Eva koa nanjary panota, ke mety maty. (Vakia Romanina 5:12.) Diniha ohatra ty, baka ho azonao tsarabe antony nahavy taranakany Adama ndreky Eva nanjary panota. Akory izikoa misy petso vilan̈y fandokisan̈a godrogodro? Zay godrogodro niasain̈y tamy vilan̈y io hisy petso koa. Adama nanjary panota, koa fa tsy nan̈araka volan̈a Zan̈ahary. Taranakany Adama atsika, ke nanjary panota koa. Zen̈y mahavy atsika mahaimatoe ndreky mety maty.—Romanina 3:23; zahava Fan̈azavan̈a 9.
8, 9. a) Ino raha tiany Satana inoany Adama ndreky Eva? b) Nan̈ino ma tsy niaraka iro nanota efa nivoneny Jehovah edy?
8 Satana koa fa nitariky Adama ndreky Eva tsy han̈araka volan̈a Zan̈ahary, nanomboko tamy zen̈y izy nanjary panohitry Jehovah. Tiany Satana hino Adama ndreky Eva fa Jehovah io pavandy, tsy mahay mitondra ndreky tsy mijery iro foeky. Satana nivolan̈a fa olombelon̈o tsy mila Zan̈ahary han̈ambara raha tokony hataondro, ke Adama ndreky Eva zaraiky fo zen̈y efa mahavita manapakevitry momba ny tsara ndreky ratsy. Ino raha tokony ho nataony Jehovah tamy zen̈y? Vitany tsarabe namono iro jiaby tsy nan̈araka volan̈anany. Koa zen̈y nataony, ho hita edy fa Satana io pavandy? Tsy ho hita.
9 Zen̈y nahavy Jehovah tsy namono iro, niaraka iro nanota in̈y. Nambelany antsendriky olombelon̈o hifampitondra. Ho hita tsarabe amy zen̈y fa pavandy ankitin̈y Satana, baka io Jehovah fo mahay raha ten̈a mahatsara atsika. Amy Toko faha-11 atsika mbala hianatra momba izio. Fa akory fandinihanao fanapahankevitriny Adama ndreky Eva? Fahitanao izy, rariny izikoa iro nino vandiny Satana ndreky tsy nan̈araka volan̈a Zan̈ahary? Baka tamy Jehovah raha jiaby nanan̈andro. Namiany fiain̈ana lavorary iro, tany tsara hiain̈ana, ndreky asa tiandro. Satana tsiary nan̈ano raha tsara tamindro. Anao koa tio, mety ho ino raha nataonao?
10. Ino raha maventy tsy maintsy fidintsika tsiaraikiaraiky?
10 Atsika izioty koa tsy maintsy mifidy, fotony miankiny amy zen̈y fiain̈anantsika. Atsika mety mifidy han̈araka fitondrasany Jehovah, ke haboakantsika fa Satana pavandy. Koa tsy zen̈y, atsika mifidy Satana hitariky atsika edy. (Salamo 73:28; vakia Ohabolana 27:11.) Ten̈a vitsy olo tia man̈araka volan̈a Zan̈ahary. Dikanizen̈y, tsy Zan̈ahary manjaka amy donia ty. Ke azovy fo basy?
AZOVY MA MANJAKA AMY DONIA TY?
Izikoa tsy niny Satana fanjakan̈a jiaby amy donia ty, mba sakiny namian̈a Jesosy edy va?
11, 12. a) Ino raha ianarantsika baka amy volan̈a Satana han̈amia fanjakan̈a Jesosy in̈y? b) Ino raha koran̈iny Soratra Masin̈y ahaizan̈a fa Satana manjaka amy donia ty?
11 Jesosy nahay azovy marin̈y manjaka amy donia ty. Tandraraiky Satana ‘nampizaha izy fanjakan̈a jiaby amy donia ty ndreky voninahitry fanjakan̈a aby io.’ Satana nivolan̈a tamy Jesosy: “Hamiako anao raha jiaby io, izikoa anao mankohoko indraiky fo aminaka.” (Matio 4:8, 9; Lioka 4:5, 6) Diniha hely baka: Izikoa tsy Satana tompiny fanjakan̈a aby io, izio tsy mety hamiany Jesosy. Dikanizen̈y, Satana tompiny fanjakan̈a jiaby amy donia ty.
12 Anao mety hivolan̈a: ‘Tsy Zan̈ahary Farany Mahery io ma niasa raha jiaby? Ke nan̈ino fo basy Satana manjaka amy donia ty?’ (Apokalypsy 4:11) Jesosy nivolan̈a mazava fa Satana “pitondra donia ty.” (Jaona 12:31; 14:30; 16:11) Apostoly Paoly koa nivolan̈a fa Satana Devoly “zan̈ahariny donia ty.” (2 Korintianina 4:3, 4) Apostoly Jaona nanoratra fa ‘zao tontolo zao ty ambany fahifan̈any araiky ratsy in̈y.’—1 Jaona 5:19.
AKORY HANDRAVAN̈ANA DONIANY SATANA?
13. Nan̈ino ma atsika mila donia vaovao?
13 Fiain̈anantsika izioty mahairatsy fo. Misy ady, olo man̈ano risoriso, olo mihatsaravelatsihy, ndreky olo kafiry. Tsisy olombelon̈o mahavita man̈adoso raha manahiran̈a jiaby zen̈y, ndray mifen̈y karakory. Tsy ho ela ndraiky Zan̈ahary handravan̈a donia ratsy ty aminy ady Haramagedona, baka io hanolo izio amy donia vaovao, ke ny marin̈y fo hanjaka amy zen̈y.—Apokalypsy 16:14-16; zahava Fan̈azavan̈a 10.
14. Azovy ma nifidiny Zan̈ahary natao Panjakany Fanjakan̈anany? Ino raha efa nivolan̈iny Baiboly momba Jesosy?
14 Jehovah nifidy Jesosy Kristy natao Panjaka amy Fanjakan̈anany andan̈itry an̈y. Baiboly efa nan̈ambara fa Jesosy io “Andrianany Fiadan̈ana”, baka io koa fitondrasan̈anany tsy ho hisy farany. (Isaia 9:6, 7) Jesosy koa fa nampianatra pianatranany aby io nivavaka, nirahiny iro hivavaka momba Fanjakan̈a io. Nivolan̈iny karaha ty: “Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y.” (Matio 6:10) Fanjakan̈any Zan̈ahary io hisolo fanjakan̈anolombelon̈o jiaby. Amy Toko faha-8 hianarantsika fomba han̈anovany zen̈y. (Vakia Daniela 2:44.) Fanjakan̈any Zan̈ahary amy zay han̈ova tany ty hanjary paradisa tsara be.—Zahava Fan̈azavan̈a 11.
EFA MARIKITRY DONIA VAOVAO!
15. Ino ma “tany vaovao” zen̈y?
15 Baiboly mivolan̈a: “Misy lan̈itry vaovao ndreky tany vaovao, ke ny marin̈y fo hanjaka amy zen̈y. Miambin̈y zen̈y atsika.” (2 Petera 3:13; Isaia 65:17) Ndraikindraiky Baiboly koa fa mivolan̈a “tany” zen̈y, olo mipetraka ambony tany raha tiany volan̈iny. (Genesisy 11:1) Dikanizen̈y, “tany vaovao” zen̈y olo man̈araka volan̈a Zan̈ahary, ke Zan̈ahary mitahy iro.
16. Ino kado tsara hamiany Zan̈ahary iro olo hipetraka amy donia vaovao io? Ino raha tsy maintsy ataontsika hazahoan̈a izio?
16 Jesosy nivolan̈a fa zay olo mipetraka amy donia vaovao io hamian̈a “fiain̈ana tsisy farany.” (Marka 10:30) Ino raha tsy maintsy ataontsika hazahoan̈a izio? Azafady kony vakia Jaona 3:16 ndreky 17:3 ahitan̈a valiny. Atsika izioty hizaha raha koran̈iny Baiboly momba fiain̈ana amy Paradisa ambony tany io.
17, 18. Akory ahaizantsika fa hilamin̈y tany jiaby, ke atsika tsy havozo foeky?
17 Tsy hisy eky olo ratsy fan̈ahy, ady, ndreky olo kafiry. Tsisy olo ratsy fan̈ahy eky ambony tany eto amy zen̈y. (Salamo 37:10, 11) ‘Hampijanon̈o ady amy tany jiaby’ Zan̈ahary. (Salamo 46:9; Isaia 2:4) Tany jiaby ho feno olo man̈araka volan̈a Zan̈ahary ndreky tia izy. Olo hiadan̈a tsisy farany.—Salamo 72:7.
18 Olony Jehovah tsy havozovozo. Taminy Israelita aby io nan̈araka volan̈a Zan̈ahary, iro tsisy raha navozoandro, fotony Jehovah niaro iro. (Levitikosy 25:18, 19) Atsika tsy havozo raha ndreky tsy havozo olo eky, amy Paradisa. Tsisy raha hanaitaitry atsika eky!—Vakia Isaia 32:18; Mika 4:4.
19. Nan̈ino atsika matoky fa ho treka hanin̈y amy donia vaovao?
19 Ho treka hanin̈y. “Tany hahavokatra mare. Nata an̈abony bongo mbala hahavokatra fo.” (Salamo 72:16) Jehovah “Zan̈aharintsika hitahy atsika,” ke “tany hahavokatra mare.”—Salamo 67:6.
20. Akory ahaizantsika fa tany jiaby hanjary paradisa?
20 Tany jiaby hanjary paradisa. Olo jiaby hanan̈a tran̈o tsara ndreky zaridain̈y tsara. (Vakia Isaia 65:21-24; Apokalypsy 11:18.) Ho tsara mira zaridain̈y Edena in̈y tany jiaby. Jehovah han̈amia raha jiaby ilaintsika. Koran̈iny Baiboly momba izy: “Tan̈anao koa biafinao, raha jiaby manampahin̈ana ho afapo amy raha ilaindro.”—Salamo 145:16.
21. Akory ahaizantsika fa hihavan̈a olo ndreky biby?
21 Hihavan̈a olo ndreky biby. Biby tsy handratra ndreky tsy hamono eky. Nata tsaiky hely tsy havozo hikodidin̈any biby masiaka.—Vakia Isaia 11:6-9; 65:25.
22. Hataony Jesosy karakory olo jiaby marary?
22 Tsisy olo harary eky. Tamy Jesosy tambony tany teto, maro olo nitahany. (Matio 9:35; Marka 1:40-42; Jaona 5:5-9) Jesosy Panjakany Fanjakan̈any Zan̈ahary, ke izy hitaha olo jiaby. Tsisy olo eky hivolan̈a: “Zaho zen̈y marary e.”—Isaia 33:24; 35:5, 6.
23. Hataony Zan̈ahary karakory olo maty?
23 Olo maty ho velon̈o. Zan̈ahary mampan̈anten̈a hamelon̈o olo maty antapitrisany. “Olo marin̈y ndreky tsy marin̈y samy mbala hivilomin̈y.”—Vakia Jaona 5:28, 29; Asan’ny Apostoly 24:15.
24. Akory izikoa anao miain̈y amy Paradisa zen̈y?
24 Atsika tsiaraikiaraiky mifidy na hianatra momba Jehovah, na han̈ano zay raha tiantsika fo. Atsika koa mifidy hanompo Jehovah, hanan̈a hoavy tsara. Nisy lelahy araiky efa tsy ela hofoaty, nangataka Jesosy hahatsiaro izy. Jesosy nivolan̈a: “Anao hiaraka aminaka amy Paradisa an̈y.” (Lioka 23:43) Amy toko fan̈araka ty atsika hianatra raha momba Jesosy ndreky raha hataony han̈atantirahan̈a fampan̈antinan̈any Zan̈ahary.