Anaro Tanora, Mifen̈a Fo Handroso Arapan̈ahy Ndray Anaro Efa Vita Batisa

1. Ino aby raha tsara nataony tanora maro?

ISAKA taon̈o, andrivony tanora kristianin̈y atao batisa. Efa nan̈ano dingana zen̈y ma anao? Izikoa zen̈y, ravoravo aminao mare iro rahalahinao ndreky ranabavinao arapan̈ahy aby io, baka io Jehovah! (Ohab. 27:11) Miniminia hely baka ino aby raha tsara vitanao. Nazoto anao nianatra Baiboly, ary mety efa maromaro taon̈o donko nan̈anaovanao zen̈y. Ke raha zen̈y nahavy anao resy lahatra fa Baiboly io Volan̈a Zan̈ahary. Nanjary hainao ndreky tianao mare koa Araiky nan̈amia boky masin̈y io. Nitombo mare fitiavanao izy ke zen̈y nahavy anao nanokanten̈a taminany ndreky natao batisa. Farandraha tsara eky fanapahankevitrinao zen̈y!

2. Ino raha hidinihintsika amy lahatsoratra ty ato?

² Talohany anao natao batisa, mety nisy raha maro nitsapa finoan̈anao, ke tsy nora taminao tsy nivadiky tamy Jehovah. Fa arakaraka anao mahaibe ho hisy raha hafa koa hitsapa anao. Satana tsy maintsy han̈ano raha fo hahavy anao tsy ho tia Jehovah ndreky tsy hanompo Izy eky. (Efes. 4:14) Fa aza man̈eky. Ino raha han̈ampy anao tsy hivadiky amy Jehovah ndreky hiain̈y mifan̈araka amy fanokan̈anten̈anao? Mifen̈a handroso “malaky” amy lafiny arapan̈ahy, baka anao hanjary Kristianin̈y matotro. (Heb. 6:1) Akory mety havitanao zen̈y? Zen̈y raha hidinihintsika ato.

AKORY HAHAVY ANAO HAHAIHO MATOTRO FO?

3. Ino raha mila ataony Kristianin̈y jiaby ndray iro efa vita batisa?

³ Ndray atsika efa vita batisa, mbala ilaintsika jiaby fo man̈araka torohevitry namezany apostoly Paoly iro Kristianin̈y ta Efesosy. Iro nampirisihiny hanjary Kristianin̈y ‘matotro.’ (Efes. 4:13) Dikanizen̈y, iro mila ‘manohy mandroso fo.’ Fandrosoan̈a arapan̈ahy io nampiran̈iny Paoly amy fitombosan̈any vatan̈any tsaiky. Ravoravo mare olo koa fa mahazo zanaka. Tiandro mare zanakandro. Fa tsaiky io tsy maintsy ho be fa tsy hidôko tsaiky fo. Koa fa mahaibe izy, efa tsy tokony han̈ano ‘jerinjaza’ eky. (1 Kor. 13:11) Karaha zen̈y koa atsika Kristianin̈y. Mbala mila manohy mandroso fo atsika, ndray efa vita batisa. Alô atsika handiniky raha sasany han̈ampy atsika han̈ano zen̈y.

4. Ino toetry han̈ampy anao handroso arapan̈ahy? Hazàva. (Filipianina 1:9)

⁴ Ampitombosa fitiavanao Jehovah. Efa tia Jehovah mare anao. Fa fitiavanao izy zen̈y mbala mety hampitombosin̈y fo. Amy fomba akory? Misy fomba araiky nikoran̈iny apostoly Paoly, amy Filipianina 1:9 ao. (Vakia.) Paoly taminio nivavaka baka ‘hahaihitombo fo’ fitiavan̈andro Filipianin̈y aby io. Dikanizen̈y, mety atao tsarabe mampitombo fitiavan̈a Jehovah zen̈y. Ho vitantsika han̈ano zen̈y izikoa ‘haintsika ndreky mazava amintsika tsarabe sitrapôny Zan̈ahary.’ Arakarakany ahaizantsika Jehovah hitombosany fitiavantsika izy, avio hahaiho tiantsika fo koa toetrinany ndreky fomba fan̈anaovany raha. Mahaitihan̈ano raha mamparavoravo izy fo atsika, fa tsy tihan̈ano raha mampalahelo izy. Zen̈y mahavy atsika mifen̈y mare baka hahay raha tiany hataontsika ndreky fomba havitantsika zen̈y.

5-6. Akory hahavy fitiavantsika Jehovah hitombo? Hazavà.

⁵ Hitombo mare fitiavantsika Jehovah izikoa mifen̈y atsika hahay Jesosy. Nan̈ino? Fotony tsisy nihafa amy Jehovah foeky toetriny Jesosy. (Heb. 1:3) Hahay Jesosy tsarabe atsika izikoa mianatra iro Filazantsara efatra amy Baiboly ao. Anao ma efa zatra mamaky Baiboly isanandra? Izikoa anao mbala tsy zatra, nan̈ino izikoa bokiny Filazantsara hanombohanao izy? Anao koa mamaky tantarany Jesosy ao, aleva onon̈o ino aby toetrinany. Izy nahay niaraka taminolo avio izy tia nan̈ojon̈o tsaiky. (Mar. 10:13-16) Jesosy tsara fan̈ahy mare salakady tia olo, ke tsy navozo foeky iro pianatranany aby io nikoran̈a hevitrindro taminany. (Mat. 16:22) Hita baka amy zen̈y fa nangala tahaka Babany andan̈itry an̈y izy. Jehovah koa farandraha mora ikoran̈ana eky. Ke atsika koa fa mivavaka, mety koran̈intsika aminany raha jiaby tiantsika koran̈iny, ndreky raha jiaby mameno fôntsika. Matoky atsika fa izy tsy hitsaratsara atsika. Atsika tiany, ke karakarainy.​—1 Pet. 5:7.

⁶ Jesosy nahinakinaka olo. Karaha ty raha nitantarainy apostoly Matio: “Izikoa fa hitany iro vahoaka aby io, nahinakinaka mare izy, fotony hitany fa iro io nampijalian̈a salakady tsisy olo nijery foeky karaha ataony ondrikondriky tsisy piambin̈y in̈y.” (Mat. 9:36) Karakory fo basy Jehovah? Jesosy nivolan̈a: “Tsy tiany Babako andan̈itry an̈y hisy ho very foeky na araiky amindro madiniky aby io.” (Mat. 18:14) Tsy hitanao mamparavoravo raha zen̈y? Zen̈y haviantsika mivolan̈a fa izikoa mitombo raha haintsika momba Jesosy, hitombo koa fitiavantsika Jehovah.

7. Ino raha han̈ampy anao hanjary Kristianin̈y matotro? Nan̈ino?

⁷ Hahaiho tia Jehovah fo koa anao sady ho matotro, izikoa anao manokan̈a fotoan̈a iarahan̈a amindro rahalahy ndreky ranabavy fiangonan̈a araiky aminao. Diniha hely baka haravoan̈andro piaramanompo aby io. Tsy nanen̈iny foeky iro nifidy hanompo Jehovah. An̈ontania iro hely baka raha sasany niain̈andro tamy fanompoan̈a. Izikoa misy fanapahankevitry matomboko mila ataonao, aza misalasala mangataka torohevitry amindro. Aleva onon̈o fa ‘hahômby raha ataonao izikoa maro olo pan̈amia hevitry anao.’​—Ohab. 11:14.

8. Ino raha mila ataonao izikoa anao misalasala momba raha ampianariny Baiboly?

⁸ Ataova raha hahavy anao tsy hisalasala. Erakany efa hitantsika tamy fehintsoratra faha-2, Satana tsy maintsy hitady fomba fo hahavy anao halemy finoan̈a ndreky tsy hifandray tsara amy Jehovah. An̈isany fomba araiky han̈anaovany zen̈y iziô, ataony raha hahavy anao hisalasala momba raha sasany nianaranao tamy Baiboly. Ohatra iziô, tsy iniany tsy amaray, mety hisy olo handresy lahatra anao fa Zan̈ahary zen̈y tsisy, fa baka taminy evolision nampisy atsika. Taminy anao mbala hely, anao mety tsy nandiniky zen̈y. Kanefa, anao iziô efa be, ke mety hianatra zen̈y anaro a lekaoly. Mety ho hitanao karaha marin̈y foeky fomba han̈azavany papianatranaro raha momba evolision io. Ndray zen̈y, iro mety tsiary nandiniky porofo fa misy ankitin̈y Zan̈ahary Pamôron̈o zen̈y. Tsaraova toro lalan̈a aminy Ohabolana 18:17 ty: “Karaha manan̈a ny marin̈y lan̈iany mivolan̈a voanalohany, firaka ny ankilany avy, ke man̈adihady izy tsarabe.” Ke alohany anao han̈eky be fahatany zay raha ampianarin̈y anao a lekaoly, tsara anao mianatra tsarabe ny marin̈y an̈atiny Volan̈a Zan̈ahary. Man̈anaova fikarohan̈a amy boky ndreky gazetintsika. Tsara koa anao mikoran̈a amy rahalahy na ranabavy efa navy nino evolision. An̈ontania iro ino raha namparesy lahatra iro fa ten̈a misy ankitin̈y Zan̈ahary, avio izy niasa atsika sady ten̈a tia atsika. Koran̈a mankahery karaha zen̈y ten̈a man̈ampy anao hahita porofo fa misy ankitin̈y Pamôron̈o.

9. Ino raha ianaranao baka amy Melissa?

⁹ Nan̈ano fikarohan̈a momba fisiany Pamôron̈o ranabavy araiky, Melissa an̈arany.b Ten̈a nan̈ampy izy handresy fisalasalan̈anany raha zen̈y. Ho izy: “A lekaoly, iro papianatra aby io koa fa man̈azava momba evolision io, tsisy olo tsy resy lahatra. Tamy voanalohany, zaho tsy nazoto nan̈ano fikarohan̈a, fotony zaho navozo tsao hahita porofo mankamarin̈y evolision. Kanefa, ho zaho tamy jeriko tan̈y, atsika kony tsy tiany Jehovah hanompo izy karkaraha io fo fa mba tokony hisy antony hanompoantsika izy. Ke nanomboko nan̈ano fikarohan̈a zaho. Nivakiako boky Izio ma Ten̈a Misy Ankitin̈y Pamôron̈o Araiky Mijery Anao Zen̈y? (fransay), avio bokikely Nisy Namorona ve Izao Rehetra Izao? ndreky Ahoana no Nampisy Antsika? Fanontaniana Dimy Mila Dinihina. Ten̈a nilaiko fan̈azavan̈a aby tao. Ôtrizay nataoko talohaloha!”

10-11. Ino raha han̈ampy anao hanan̈a eritreritry madio fo? (1 Tesalonianina 4:3, 4)

¹⁰ Ialà fitondranten̈a ratsy. Mahery fan̈irian̈a han̈ano firaisan̈a izikoa olo araiky mbala tanora, ke mety ho sarotro tsy han̈ano zen̈y izikoa misy naman̈a mitaon̈o haloto fitondranten̈a. Zen̈y tsarabe raha tiany Satana hataonao. Ino raha han̈ampy anao hadio fitondranten̈a fo? (Vakia 1 Tesalonianina 4:3, 4.) Lera anao mivavaka manokan̈a in̈y, koràn̈a amy Jehovah raha tsapanao. Ambarà izy aminy antsipiriany raha an̈atiny fônao, avio iangavia izy han̈amia anao angôvo. (Mat. 6:13) Aza adin̈a fa Jehovah ten̈a tihan̈ampy anao fa tsy han̈asazy anao. (Sal. 103:13, 14) Afaka man̈ampy anao koa Volan̈a Zan̈ahary. Vitany Melissa, ranabavy nikoran̈intsika taloha tarỳ in̈y tsy nieritreritry raha tsy manjary. Karaha ty nambarany: “Vaky Baiboly isanandra ten̈a nan̈ampy zaho tsy ho resiny fan̈iriandratsy. Izio nampatsiaro zaho fa zaho niny Jehovah ke zaho tiako hanompo izy.”​—Sal. 119:9.

¹¹ Aza man̈aohatra miady manokan̈a foeky izikoa fa misy problemo. Koràn̈a aminiry olobenao raha mampijaly jerinao. Marin̈y ndraiky fa tsy mora mikoran̈a raha mampiasaloha zen̈y aminolo, kanefa raha zen̈y ten̈a mila atao. Karaha ty ho Melissa: “Nangataka korazy tamy Jehovah zaho izikoa fa nivavaka, baka io nikoran̈iko tamy papako problemonaka. Ren̈iko nahivankivan̈a mare zaho tafaranizen̈y. Haiko fa Jehovah ravoravo aminaka.”

12. Ino raha han̈ampy anao hahay hanapakevitry?

¹² Ambilà toro lalan̈any Baiboly hitariky anao. Anao koa fa mahaibe, olobenao mety han̈aomba anao han̈ano raha sasany. Kanefa ny raha misy, mbala tsy maro raha nandalovanao tamy fiain̈ana. Ke ino raha mila tandremanao baka tsy ho robaka fihavanan̈anao amy Jehovah? (Ohab. 22:3) Nazavainy Ranabavy Kari raha nan̈ampy izy hahay hanapakevitry. Tontohitry izy fa Kristianin̈y matotro zen̈y tsy voatery mila lalàn̈a fo isaka misy raha mandalo amy fiain̈ananany. Ho izy: “Toro lalan̈any Baiboly ny raha ten̈a nila nazava taminaka, fa tsy lalàn̈a fo.” Anao koa fa mamaky Baiboly, man̈ontania ten̈a karaha ty: ‘Ino fomba fihevitriny Jehovah ianarako baka aminy andininy ty? Ino toro lalan̈a mety han̈ampy zaho han̈ano ny tsara fo? Ino hatsaran̈a ho azoko izikoa zaho man̈araka raha aby ampianariny Baiboly io?’ (Sal. 19:7; Isaia 48:17, 18) Ho moramora aminao han̈ano fanapahankevitry mamparavoravo Jehovah, izikoa anao mamaky Baiboly ndreky mandiniky toro lalan̈a aby ao. Anao koa tsy vôly mandroso, ho hitanao fa tsy voatery mila lalàn̈a fo anao amy raha tsiaraikiaraiky mandalo amy fiain̈ananao, fotony efa mazava aminao fomba fihevitriny Jehovah momba raha aby io.

13. Nan̈ino ma ten̈a ilain̈a mahay mifidy naman̈a? (Ohabolana 13:20)

¹³ Mifidiana naman̈a tia Jehovah. Atsika tiô efa nikoran̈a fa, misy vokany amy fandrosoan̈anolo araiky olo ataony naman̈a. (Vakia Ohabolana 13:20.) Nisy fotoan̈a Ranabavy Sara nanjary tsy ravoravo. Fa baka tiô nisy raha nandalo, ke izio nampipody haravoan̈anany. Karaha ty ho Sara: “Tamy fotoan̈a io tsarabe zaho nahazo naman̈a ten̈a tsara. Misy rahavavy tanora hely zay niaraka nianatra Tilikambo Fiambesan̈a taminaka isaka herin̈iandra. Nisy naman̈a hafa koa nan̈ampy zaho hasaky han̈amia valinteny tampivorian̈a. Nohony raha nataondro kamaradiko aby io, nanomboko nan̈ano fianaran̈a manokan̈a ndreky nivavaka tamy fô jiaby zaho. Nahaitsara fihavanan̈a tamy Jehovah fo zaho, avio nanjary ravoravo ndraiky.”

14. Akory nazahoany Julien kamarady tsara?

¹⁴ Akory azahoanao naman̈a mandrisiky anao han̈ano ny tsara? Karaha ty ho antipan̈ahy araiky zay, Julien an̈arany: “Tamy zaho mbala helihely, nahazo kamarady tsara zaho izikoa fa niaraka nitory tamy piaramanompo. Mafana fô amy fahamarin̈ana iro io, ke nampiandro zaho hahita hafizany fanompoan̈a. Nanomboko nanan̈a tanjon̈o hanompo manontolo andra zaho baka tiô. Olo nitovy taon̈o taminaka fo nipitahako ela jiaby in̈y. Nahatsiaro matiantoko zaho, fotony maro piaramanompo efa mahazoazo taon̈o kanefa ten̈a naman̈a tsara. Tafara, nahazo naman̈a maro tsara koa zaho tamy Betela. Ohatra tsarandro io nan̈ampy zaho nahay nifidy fangalan̈a diandian̈a nataoko, ke raha zen̈y nahavy zaho nahainarikitry Jehovah fo.”

15. Ino fampitandreman̈a namezany Paoly i Timoty momba fifidianan̈a naman̈a? (2 Timoty 2:20-22)

¹⁵ Akory ndraiky izikoa hitanao fa misy olo fiangonan̈a araiky aminaro tsy naman̈a tsara? Efa hainy Paoly fa tsy olo jiaby tan̈ivony fiangonan̈a kristianin̈y tamy taonjato voanalohany zay ohatra tsara aby. Ke zen̈y nahavy izy nampitandrin̈y Timoty tsy hipetaka be taminolo karaha zen̈y. (Vakia 2 Timoty 2:20-22.) Farandraha valera eky fifandraisan̈antsika amy Jehovah Babantsika andan̈itry an̈y, ke tsisy olo tokony hambelantsika handrobaka izio!​—Sal. 26:4.

HANDROSO ARAPAN̈AHY ANAO IZIKOA MANAN̈A TANJON̈O

16. Ino aby tanjon̈o mety fidianao?

¹⁶ Manàn̈a tanjon̈o tsara. Mifidiana tanjon̈o hankafatatra finoan̈anao ndreky han̈ampy anao hahaiho matotro. (Efes. 3:16) Azonao atao iziô mankatsara fahazaranao mianatra manokan̈a ndreky mamaky Baiboly. (Sal. 1:2, 3) Na mety miezaka koa anao hankatsara vavakanao na han̈ano zen̈y matetitetiky sady baka amy fô. Na koa anao mety mianatra hifehy ten̈a mare amy karazan̈a fangalan̈a diandian̈a fidianao ndreky fomba ampiasanao fotoan̈anao. (Efes. 5:15, 16) Matokisa fa izikoa anao miezaka mare baka handroso arapan̈ahy, ho ravoravo aminao Jehovah.

17. Mety ino vokany izikoa anao mifen̈y man̈ampy olo?

¹⁷ Anao koa mazoto man̈ampy olo, hahaimatotro fo anao. Jesosy nivolan̈a: ‘Man̈amia raha olo ten̈a mampasambatra tozay mahazo raha baka aminolo.’ (Asa. 20:35) Hahazo hatsaran̈a maro anao izikoa anao mampiasa fotoan̈anao ndreky angôvony fahatanoran̈anao han̈ampian̈a olo hafa. Ohatra iziô, anao mety man̈ano tanjon̈o hitahitahy piaramanompo efa matoe ndreky marary amy fiangonan̈a misy anao. Mety man̈ano bazarindro ohatra anao, na mampianatra iro mampiasa fitaovan̈a elektrônìky. Izikoa anao rahalahy, anao mety man̈ano tanjon̈o hanjary pikarakara fiangonan̈a, amy zen̈y hahaiho maro fo fomba mety han̈ampianao iro rahalahy ndreky ranabavy aby io. (Fil. 2:4) Man̈aboaka fitiavan̈a aminolo tsy an̈isany fiangonan̈a koa anao, izikoa anao mazoto mitory vaovao tsarany Fanjakan̈any Zan̈ahary amindro. (Mat. 9:36, 37) Izikoa mety, ataova tanjon̈o hanompo Jehovah manontolo andra.

18. Ino koa raha han̈ampy anao handroso arapan̈ahy? Nan̈ino?

¹⁸ Han̈ampy anao handroso arapan̈ahy koa fan̈anaovan̈a fanompoan̈a manontolo andra. Anao iziô koa man̈ano pisava lalan̈a, anao mety man̈ano Sekolin’ny Mpitory Ilay Fanjakana. Mety ho afaka hanompo amy Betela koa anao na han̈ano fan̈oren̈ana tran̈o ampiasain̈a amy fivavahan̈a marin̈y. Karaha ty ho Kaitlyn, ranabavy pisava lalan̈a mbala tanora: “Zaho koa fa vita batisa, fiarahan̈a manompo amindro ranadahy ndreky rahavavy efa zadraharaha aby io ny raha an̈isany ten̈a nan̈ampy zaho handroso. Ohatra tsarandro nandrisiky zaho hazoto handalin̈y Baiboly ndreky hankatsara fahaizako mampianatra.”

19. Ino aby hatsaran̈a ho azonao izikoa anao tsy vôly mandroso arapan̈ahy?

¹⁹ Ho maro hatsaran̈a ho azonao izikoa anao tsy vôly mandroso arapan̈ahy. Fahatanoran̈anao tsy ho very bôriny amy raha tsisy dikany. (1 Jaona 2:17) Anao tsy harary fô nohony tsy fahaizan̈a manapakevitry. Mifanohitry amy zen̈y aby ny raha ho hisy, fotony hahômby raha ataonao avio anao ho sambatra ankitin̈y. (Ohab. 16:3) Ohatra tsara amezanao koa hankahery piaramanompo aminao, na tanora izy na matoe. (1 Tim. 4:12) Fa an̈abonizen̈y, anao ho afapô salakady hilamintsain̈y, fotony hainao fa mamparavoravo Jehovah anao sady minaman̈a marikitry aminany.​—Ohab. 23:15, 16.