Akory Amahan̈a Raha Manahiran̈a Momba Varotro?

Amy 1 Korintianina 6:1-8 ao apostoly Paoly nikoran̈a momba piaramanompo tsy nifan̈araka. Nivolan̈a raha mahakivy izy tao. Nisy Kristianin̈y ta Korinto tan̈y ‘nasaky nitory Kristianin̈y namandro tamy fitsaran̈a manoloan̈a olony donia ty.’ (Andininy 1) Paoly nivolan̈a fa Kristianin̈y tsy tokony han̈ano raha karaha zen̈y, fa tokony hifen̈y handamin̈y raha tsy ifan̈arahan̈a io amy fiangonan̈a ao fo. Atsika izioty handiniky antony maventy nahavy izy nan̈amia torohevitry io, baka io hizahantsika koa ino raha tsy voakasikizen̈y.

Izikoa olo samy piaramanompo miaraka mivarotro, amy farany iro mety tsy hifan̈araka. Raha voanalohany tokony hataontsika, mifen̈y mandamin̈y zen̈y mifan̈araka amy toro lalan̈a Jehovah. Atsika tsy tokony han̈ano zay raha tiantsika fo. (Ohabolana 14:12) Jesosy nivolan̈a fa mila alamin̈y malaky raha tsy ifan̈arahan̈a io, amy zen̈y tsy loso lavitry. (Matio 5:23-26) Nisy ndraiky Kristianin̈y nimalo tsy nahay nefa, ndraiky nifampitory tamy fitsaran̈a foeky. Zen̈y nahavy Paoly nivolan̈a: ‘Anaro tsy manan̈a ny marin̈y, izikoa anaro mifampitory amy fitsaran̈a an̈y.’ Nan̈ino Paoly nivolan̈a zen̈y? Fotony manjary malaza ratsy atsika, baka io Zan̈ahary ivavahantsika ho voa baraka. Dikanizen̈y, mila tandremantsika tsarabe volan̈a Paoly ty: ‘Tsy sitrany koa man̈eky resy?’​—Andininy 7.

Nivolan̈a koa Paoly fa Zan̈ahary nan̈amia atsika antipan̈ahy handamin̈y raha tsy ifan̈arahan̈a amy fiangonan̈a. Iro io hendry, fotony iro mandiniky tsarabe fahamarin̈ana amy Baiboly ao. Zen̈y nahavy Paoly mivolan̈a fa iro io ‘afaka mitsara raha amy fiangonan̈a’ amy “raha momba fiain̈ana ty.” (Andininy 3-5) Jesosy koa nivolan̈a fa, nata raha sarotro mare karaha fan̈odian̈a raha tsy natao ndreky fitaka koa, mbala an̈isanizen̈y. Misy raha telo ty tsy maintsy arehan̈a izikoa fa mandamin̈y raha tsy ifan̈arahan̈a: Voanalohany, iro olo tafiditry amizio antsendriky mila mifampikoran̈a. Izikoa mbala tsy milamin̈y fo, araiky amindro mety mitondra vavolombelon̈o araiky na aroe. Izikoa mbala tsy milamin̈y fo koa, mandihana man̈aton̈o antipan̈ahy amy fiangonan̈a.—Matio 18:15-17.

Antipan̈ahy aby io tsy voatery ho olo miasa amy fitsaran̈a ndreky mahay resaka varotro, sady tsy takin̈y amindro zen̈y. Iro tsy mamoron̈o fitsipiky izikoa fa mandamin̈y olo tsy mifan̈araka, fa man̈iraka iro hifen̈y han̈araka toro lalan̈a amy Baiboly ndreky han̈ano raha ihavan̈ana fo. Izikoa fa hitandro fa sarotro alamin̈y mare raha io, iro mety han̈ontany piandraikitry faritry na koa man̈ontany birony sampan̈a. Na izy man̈ano zen̈y, misy raha tsy ilàn̈a zen̈y. Hizahantsika baka sasany.

Misy raha manahiran̈a sasany, mety amy fitsaran̈a an̈y fo mahavaha izy. Ohatra amy zen̈y, izikoa misy olo mila taratasy fisarahan̈a amy vadian̈a, mitaky volanjaza, ndreky mila taratasy fiantohan̈a. Mety hitory amy fitsaran̈a koa rahalahy araiky, izikoa misy olo nitory izy tan̈y, kanefa tsy marin̈y aby antony nitorian̈a izy.a

Tsy mifanohitry amy torohevitry Paoly fan̈anovan̈a raha aby zen̈y, izikoa tsy raha baka amy fitiavan̈a malo mahavy izy man̈ano zen̈y.b Kristianin̈y tokony hankamasin̈y an̈arany Jehovah, ke han̈ano raha mampisy fihavan̈ana ndreky firaisantsainy amy fiangonan̈a fo. Aza adin̈a fa fitiavan̈a ten̈a ahaizan̈a Kristianin̈y, ke olo manan̈a ‘fitiavan̈a zen̈y tsy mitady raha hahatsara izy tompiny fo.’—1 Korintianina 13:4, 5; Jaona 13:34, 35.