Ampia Piaramanompo Hiaritry Raha Sarotro

1. Akory matetiky hamaliany Jehovah vavakany panomponany?

ASA mba hainao fa anao mety hampiasainy Jehovah hamalian̈a vavaka baka amy fô ataonolo? Na antipan̈ahy na pikarakara fiangonan̈a, na pisava lalan̈a, na pitory an̈ivony fiangonan̈a, samy afaka man̈ampy olo aby. Karaha zen̈y koa, na tanora na olo matoe, na rahalahy na ranabavy. Akory ataony Jehovah koa fa misy olo tia izy mangataka vonjy aminany? Matetiky antipan̈ahy ndreky panomponany hafa tsy mivadiky, irahiny ‘man̈ampy ndreky mankahery’ olo io. (Kol. 4:11) Ten̈a mamparavoravo manompo Jehovah ndreky piaramanompo aby io, amy fomba karaha zen̈y! Ke mety afaka man̈ano zen̈y atsika koa fa misy valan̈aretin̈y, na antambo, na fan̈injehan̈a.

AMPIA OLO IZIKOA FA MISY VALAN̈ARETIN̈Y

2. Nan̈ino mety sarotro han̈ampy olo koa fa misy valan̈aretin̈y?

² Sarotro amintsika mifan̈ampy koa fa an̈atiny valan̈aretin̈y. Nan̈ino? Atsika, ohatra, mety tihamangy iro namantsika aby io, kanefa raha zen̈y mampavozo. Sahiran̈a arabola namantsika sasany, ke atsika mety mba tihikaiky iro hihina antran̈ontsika an̈y, kanefa raha zen̈y mbala tsy azo atao. Tsy zen̈y fo, man̈iry tihan̈ampy olo koa atsika, fa problemo fo, atsika mety tsisy vola na misy fianakavian̈antsika marary. Fa ndray zen̈y, atsika mbala man̈iry han̈ampy iro rahalahintsika aby io fo. Sady Jehovah ravoravo izikoa atsika man̈ano erakany vitantsika han̈ampian̈a iro. (Ohab. 3:27; 19:17) Ke ino raha mety ataontsika?

3. Ino raha ianarantsika baka amindro antipan̈ahy amy fiangonan̈a misy Desi? (Jeremia 23:4)

³ Ino raha mety ataony antipan̈ahy? Anao koa antipan̈ahy, ataova raha ahaizanao tsarabe iro ondrikondriky aby io. (Vakia Jeremia 23:4.) Nivolan̈a karaha ty Desi, ranabavy nikoran̈intsika tamy lahatsoratra taloha in̈y: “Rango ela, efa fataondro antipan̈ahy aby taminy andiampitory nisy zaho, niaraka nanompo taminaka ndreky taminolo hafa. Nan̈ano fiarahan̈a niaraka taminay koa iro.”b Ino vokatranizeny? Loso noranora tamindro antipan̈ahy aby io nan̈ampy Desi koa fa navy valan̈aretin̈y COVID-19, avio koa fa nisy fianakavian̈anany natiny virisy io.

4. Nan̈ino iro antipan̈ahy aby io nahavita nan̈ampy Desi, avio ino raha ianarantsika baka amy zen̈y?

⁴ Nivolan̈a karaha ty Desi: “Efa mira naman̈a fahitako iro antipan̈ahy aby io, ke tsy sarotro taminaka nikoran̈a tamindro raha tsapako ndreky raha nampiasaloha zaho.” Ino raha ianarany antipan̈ahy baka amy zen̈y? Karakarà tsara ondrikondrikinaro diany mbala tsisy raha sarotro. Mifen̈a hikamarady amindro. Izikoa sendra misy valan̈aretin̈y ke anao mety tsy ho afaka hamangy iro, mitadiava hevitry hafa hifandraisan̈a amindro. Desi nivolan̈a: “Ndraikindraiky, tan̈atiny andra araiky, nisy antipan̈ahy maromaro nikaiky zaho na nandefa mesazy taminaka. Ten̈a nanohin̈y fonaka andininteny nikoran̈indro taminaka, nata andininteny aby io efa haiko.”

5. Akory fomba mety hahaizany antipan̈ahy raha ilainy piaramanompo, avio akory mety han̈ampiandro iro?

⁵ Afaka man̈ontany iro piaramanompo aby io anao baka hahaizanao raha ilaindro. Fa mahaiza fo mandanjalanja koa fa man̈ano zen̈y. (Ohab. 20:5) Misy hanin̈y, na aody, na raha hafa ilaindro ma iro? Mety havozoan̈a ho very asa ma iro, sa misy amindro tsy ampy vola han̈ifan̈a tran̈o? Sa iro mila ampian̈a hameno taratasy azahoan̈a fan̈ampian̈a amy fanjakan̈a? Marin̈y fa nahazo fan̈ampian̈a baka tamy piaramanompo Desi, fa raha ten̈a nan̈ampy izy, fitiavan̈a ndreky fankahirezan̈a baka amy Baiboly namezandro antipan̈ahy aby io. Hoizy: “Iro antipan̈ahy aby io niaraka nivavaka taminaka. Tsy ten̈a azoko onon̈o raha nivolan̈indro, fa raha tsapako ndraiky tsy nadin̈ako. Jehovah nira nivolan̈a taminaka karaha ty: ‘Anao tsy latsatokan̈a.’ ”​—Isaia 41:10, 13.

6. Ino raha mety ataonolo jiaby amy fiangonan̈a han̈ampian̈a olo hafa? (Zahava sary.)

⁶ Ino raha mety ataonolo hafa? Atsika efa man̈ampo fa iro antipan̈ahy aby io hikarakara piaramanompo amy fiangonan̈a. Kanefa tsy iro fo tiany Jehovah hankahery ndreky han̈ampy olo, fa atsika jiaby. (Gal. 6:10) Ndray raha hely fo ataontsika, efa mety hankahery mare namantsika tsy salama. Tsaiky ziô afaka mandefa karty na man̈ano sary, hankahirezan̈a rahalahy araiky. Tanora ndraiky afaka man̈ano bazariny ranabavy araiky, na man̈ano raha hafa han̈ampian̈a izy. Piaramanompo hafa koa afaka mandoky hanin̈y avio man̈atitry izio antran̈ony naman̈a marary. Lera misy valan̈aretin̈y, olo jiaby amy fiangonan̈a samy mila fankahirezan̈a aby. Ke lera ravan̈a fivorian̈a, na amy Tran̈o Fivorian̈a na amy vidéoconférence, tsara izikoa atsika midokodoko hely mikoran̈a amy rahalahy ndreky ranabavy. Ndray antipan̈ahy aby io koa mba mila fankahirezan̈a. Misy piaramanompo, ohatra, nandefa taratasy hely han̈anaovan̈a mersy antipan̈ahy aby io. Matetiky baka mahaimaro fo asany antipan̈ahy aby io, intsaka eky amy fotoan̈any valan̈aretin̈y. Mampatsaratsara mahita atsika samy mitondra anjara birikintsika, ke ‘mifankahery ndreky mifan̈ampy fo’!​—1 Tes. 5:11.

AMPIA OLO IZIKOA FA MISY ANTAMBO

7. Ino raha sarotro mety hiboaka koa fa baka nisy antambo?

⁷ Mety hiova tampoko fiain̈ananolo lera misy antambo. Olo sasany baka mety ho very fanan̈ana, ravan̈a tran̈o, na maty havan̈a foeky. Tsy vita vaksiny amy raha karaha zen̈y koa iro rahalahy ndreky ranabavintsika aby io. Ke akory mety an̈ampiantsika iro?

8. Ino raha mila ataony antipan̈ahy ndreky lohany fianakavian̈a diany mbala tsisy antambo?

⁸ Ino raha mety ataony antipan̈ahy? Anaro antipan̈ahy, ampia iro rahalahy ndreky anabavinaro aby io hioman̈a diany mbala tsisy antambo. Ataova azo antoko fa hainolo jiaby amy fiangonan̈a ao raha tokony hatao baka iro ho voaro. Mila haindro koa fomba hifandraisan̈a aminy antipan̈ahy. Karaha ty nivolan̈iny Margaret, ranabavy tamy lahatsoratra taloha in̈y: “Tamy raha ilainy fiangonan̈a, iro antipan̈ahy aby io efa nampitandrin̈y zahay fa mbala atahoran̈a hirehitry atiala amy faritry misy zahay. Nivolan̈a iro fa izikoa manampahifan̈a man̈iraka zahay miala tanàna, na mety havozoan̈a hamono midoko ao, direkty zahay mila miala malaky.” Nakiry izy nisy fampitandreman̈a io, fotony nisy motro niredaka mare, fanjava araiky mahery hely tafaranizen̈y. Anao koa lohany fianakavian̈a, ino raha mety ataonao? Diniha amy fotoampivavahany fianakavian̈anaro ino raha tsy maintsy ataonaro tsiaraikiaraiky, hiomanan̈a tsialohaloha aminy antambo. Izikoa anao ndreky iry zanakanao efa nioman̈a, ho kalma anaro izikoa sendra misy antambo.

9. Akory ataondro antipan̈ahy aby io miaraka miasa, aloha ndreky afarany antambo?

⁹ Piandraikitry andiampitory ma anao? Diany mbala tsisy antambo, aleva antoko fa anan̈anao nimerony telefaony ndreky adiresinolo tsiaraikiaraiky aminy andiampitorinao. Man̈anaova listy, avio havaoza matetiky izio. Karaha in̈y lera misy antambo, anao afaka hikaiky pitory tsiaraikiaraiky baka hahaizanao raha ilaindro. Avio koràn̈a malaky aminy antipan̈ahy pandrindra raha ren̈inao. Izy koa baka io hikoran̈a amy piandraikitry faritry. Iro hahavita han̈ampy tsara piaramanompo izikoa miaraka miasa karaha zen̈y. Tafarany motro in̈y, piandraikitry faritriniry Margaret tsy nandry foeky tan̈aty andra araiky sy tapany, fotony izy nandamin̈y asandro antipan̈ahy nikaiky ndreky nikarakara piaramanompo 450 tsy maintsy niala tamy tran̈ondro. (2 Kor. 11:27) Ke vokany, nahazo tany nipitrahan̈a aby lan̈iany olo nila zen̈y.

10. Nan̈ino ten̈a raha maventy aminy antipan̈ahy fitsidihan̈a ondrikondriky? (Jaona 21:15)

¹⁰ Andraikitriny antipan̈ahy man̈amia fankahirezan̈a baka amy Baiboly amindro rahalahy ndreky ranabavy aby io, avio man̈ampy lan̈iany kivy. (1 Pet. 5:2) Ke koa fa misy antambo, ino raha tokony hataondro voanalohany? Zahavandro akory naniny rahalahy ndreky ranabavy tsiaraikiaraiky. Alaindro onon̈o tsao misy amindro avoa raha, na tsisy hanin̈y, na lamba, na tany hipitrahan̈a. Ndray efa fanjava maro afara atỳ, iro mbala mila fankahirezan̈a baka amy Baiboly fo. (Vakia Jaona 21:15.) An̈isany Komitiny Sampan̈a i Harold. Izy efa nifanojy tamy rahalahy ndreky ranabavy maro efa navy tatrany antambo. Karaha ty hoizy: “Elaela iro vo tafianko. Fiain̈anandro mety hanomboko himpody karaha taloha, kanefa iro mety mbala halahelo namandro na havandro naty. Iro koa mety mbala hahatsiarotsiaro fanan̈anandro ravan̈a, na raha seky nahafaty iro. Mety mbala mavesatra mare fondro, lera iro mahatsiaro raha jiaby in̈y. Fa zen̈y tsy mivolan̈a fa iro tsy ampy finoan̈a. Fombanolombelon̈o mahatsapa raha karaha zen̈y.”

11. Ino raha mety mbala ilainy fianakavian̈a?

¹¹ Antipan̈ahy man̈araka torohevitriny Baiboly ty: “Mitoman̈iza miaraka aminolo mitomoan̈y.” (Rom. 12:15) Antipan̈ahy mila man̈amia toky olo niatriky antambo, fa mbala ten̈a tia iro Jehovah ndreky piaramanompo. Tokony hampiany antipan̈ahy koa fianakavian̈a baka hanohy hivavaka fo, hianatra Baiboly, hivory, avio hitory. Raimandreny koa afaka hampirisihindro han̈ampy zanakandro hifantoko amy raha tsy vitany antambo robatin̈y, tsy ino zen̈y fa fikamaradianan̈a amy Jehovah. Anaro raimandreny, ampatsiahiva zanakanaro raha zen̈y. Ampatsiahiva iro koa fa Jehovah tsy han̈ary iro. Hazavà amindro fa fianakavian̈andro man̈erantany von̈ono han̈ampy iro.​—1 Pet. 2:17.

12. Ino raha mety ataonao izikoa anao tihan̈ampy olo tatrany antambo? (Zahava sary.)

¹² Ino raha mety ataonolo hafa? Izikoa nisy antambo marikitry anaro, an̈ontania antipan̈ahy akory mety ahafahanao man̈ampy. Mety azonao atao mandray olo tatrany antambo na iro piasa antsitrapo man̈ano fan̈oren̈ana, hivahiny antran̈onao. Anao koa mety man̈atitry hanin̈y na raha hafa amy pitory mila zen̈y. Fa akory ndraiky izikoa lavitry anao tany nisy antambo io? Anao mbala afaka man̈ampy fo. Mivavaha nindro tatrany antambo. (2 Kor. 1:8-11) Man̈ampy iro koa anao izikoa man̈ano fan̈amezan̈a aminy asa man̈erantany. (2 Kor. 8:2-5) Izikoa anao afaka mandeha amy toeran̈a nisy antambo io, an̈ontania antipan̈ahy ino raha mety ataonao. Mety hahazo fampiofan̈ana anao izikoa voakaiky, amy zen̈y anao mety ampiasain̈a amy tany ten̈a ilavan̈a anao ndreky amy fotoan̈a ten̈a ilavan̈a zen̈y.

AMPIA PIARAMANOMPO HIARITRY FAN̈INJEHAN̈A

13. Ino raha sarotro atrefiny rahalahy ndreky ranabavy amy tany mandrova asantsika?

¹³ Mahaisarotro fo fiain̈anany piaramanompo amy tamy mandrova asantsika. Iro an̈y koa baka mba sahiran̈a arabola, marary avio maty havan̈a. Kanefa nohony fanakantsakanan̈a, antipan̈ahy mety tsy afaka mitsidiky iro, na tsy ten̈a afaka mifandray aminolo mila ankahirezin̈y. Karaha zen̈y, ohatra, raha nisy tamy tany nisy Andrei, araiky voakoran̈a tamy lahatsoratra taloha in̈y. Nisy ranabavy araiky taminy andiampitorinany, efa sahiran̈a mare fotony tsisy vola, kanefa mbala tatrany aksidan tamy tomabily koa. Tsy maintsy nididian̈a matetiky ranabavy io sady tsy afaka niasa. Ndray tio fandraran̈a ndreky valan̈aretin̈y, piaramanompo mbala nan̈ano raha mety vitandro han̈ampian̈a izy fo. Hitany Jehovah baka raha jiaby nandalo taminany, ke izy nandrisiky piaramanompo han̈ampy ranabavintsika io.

14. Akory mety an̈aboahany antipan̈ahy fa izy milampy amy Jehovah?

¹⁴ Ino raha mety ataony antipan̈ahy? Nivavaka i Andrei sady nan̈ano zay raha mety vitany. Akory namaliany Zan̈ahary vavakanany? Jehovah nampiasa piaramanompo maromaro ten̈a afaka nan̈ampy ranabavy io. Sasany, ohatra, nitondra izy nandeha dokotera. Sasany ndraiky nan̈amia vola han̈ampian̈a izy. Jehovah nandrisiky iro han̈ampy izy, avio nitahiny ezakandro. Ke nahazo raha nilainy fo ranabavy io. (Heb. 13:16) Anaro antipan̈ahy, izikoa voasakantsakana asantsika, aza miasa manokan̈a fa mangataha fan̈ampian̈a. (Jer. 36:5, 6) Fa ny ten̈a maventy, milampia amy Jehovah. Izy afaka man̈ampy anaro hikarakara iro rahalahy ndreky ranabavintsika aby io.

15. Ino raha mety ataontsika baka atsika hiray sain̈y fo ndray miatriky fan̈injehan̈a?

¹⁵ Ino raha mety ataonolo hafa? Mety ho vitsivitsy fo atsika afaka hiaraka mivory izikoa fa mandrova asantsika fanjakan̈a. Ke ten̈a ilain̈a mihavan̈a tsara aminolo. Miadiva amy Satana fa tsy amy piaramanompo! Aza jiren̈a raha tsy nety nataony rahalahinao na ranabavinao. Na alamina malaky izikoa misy raha tsy mampifankahazo. (Ohab. 19:11; Efes. 4:26) Atsika tokony ho von̈ono hifan̈ampy. (Tit. 3:14) Ino vokany izikoa fa nan̈ampy ranabavy in̈y, andiampitory nisy izy? Iro nanjary nahainifankatia karaha olo kibo araiky.​—Sal. 133:1.

16. Koa zahan̈a Kolosianina 4:3, 18, akory mety an̈ampiantsika rahalahy ndreky ranabavy injehin̈y?

¹⁶ Mandeha andrivony maro piaramanompo amintsika mbala mifen̈y fo manompo Jehovah, ndray sakantsakanany fanjakan̈a. Sasany amindro gadrain̈y nohony finoan̈andro. Ke ino raha mety ataontsika? Atsika mety mivavaka momba iro ndreky fianakavian̈andro. Maro rahalahy ndreky ranabavy misy korazy manohan̈a piaramanompo amintsika migadra, nata mety samborin̈y iro izikoa tatra. Iro mankahery iro rahalahintsika migadra aby io, man̈atitry hanin̈y arapan̈ahy sady man̈amia raha hafa ilaindro. Tsy vitany zen̈y fo fa iro miaro iro rahalahintsika aby io amy fitsaran̈a. Ke nan̈ino izikoa ampidirinao amy vavaka ataonao koa iro?c (Vakia Kolosianina 4:3, 18.) Aza adin̈a fa vavaka ataonao io ten̈a man̈ampy piaramanompo amintsika aby io!​—2 Tes. 3:1, 2; 1 Tim. 2:1, 2.

17. Akory ataonao hioman̈a hiatriky fan̈injehan̈a rango zioty?

¹⁷ Rango zioty anao ndreky fianakavian̈anao efa afaka mioman̈a hiatriky fan̈injehan̈a. (Asa. 14:22) Aza iritriretin̈y raha ratsy jiaby mety hiboaka amy lerany zen̈y. Sitrany mifen̈a mifandray tsarabe amy Jehovah ndreky man̈ampy zanakanaro han̈ano karaha zen̈y. Izikoa miasaloha anao ndraikindraiky, ambarà Jehovah raha an̈aty fonao. (Sal. 62:7, 8) Diniha miaraka amy fianakavian̈anao nan̈ino anaro afaka matoky izy.d Fioman̈ana io ten̈a han̈ampy zanakanaro, na aminy antambo zen̈y na amy fan̈injehan̈a. Ho kalma fo baka iro ndreky hanan̈a korazy fotony efa nampianarinaro hatoky Jehovah.

18. Ino raha miambin̈y atsika aminy amaray?

¹⁸ Fiadan̈ana Zan̈ahary mahavy atsika hilamintsain̈y. (Fil. 4:6, 7) Amezany Jehovah izio atsika baka fontsika hilamin̈y fo ndray iô aretin̈y, antambo avio fan̈injehan̈a. Ampiasainy hikarakara atsika koa iro antipan̈ahy miasa mafy aby io. Tsy zen̈y fo fa, atsika jiaby amezany tombontsoa hifan̈ampy. Araraota fotoan̈a mbala milamindamin̈y zioty, ke miomàn̈a hiatriky fitsapan̈a mare mbala miambin̈y atsika, an̈isanizen̈y “fahorian̈a be.” (Mat. 24:21) Amy fotoan̈anizen̈y, atsika mila mifen̈y fo hilamintsain̈y ndreky han̈ampy olo hilamintsain̈y koa. Fa koa fa tapitry raha jiaby zen̈y, tsy ho hisy eky problemo hampiasaloha atsika. Ela ny ela fa ho tanteraka amintsika raha niriny Jehovah rango ela. Ino ma zen̈y? Ten̈a fiadan̈ana maharitry mandrakizay!​—Isaia 26:3, 4.