Akôry Han̈oman̈ana Mariazy Man̈amia Voninahitry Jehovah?

1-2. Tian’i Jehovah han̈ano karakôry andran’ny mariazinarô?

EFA vôn̈ono han̈ano mariazy ma anarô ziô? Arabain̈a anarô ay, fôtony io andra maventy amy fiain̈anan’olo! Anarô koa mety efa mioman̈a mare amy mariazinarô. Tian’i Jehovah anarô ho ravoravo amin’ny andra ioa ndreky ho sambatra amy vadian̈a fo.​—Ohab. 5:18; Tonon. 3:11.

² Jehovah mendriky hamianarô voninahitry amin’ny andran’ny marazinarô. Nan̈ino atsika mivolan̈a zen̈y? Aviô ino raha mety hataonarô baka hahavitanarô zen̈y? Lahatsoratra ty ndray natao voanalohany nin’olo man̈oman̈a mariazy, torolalan̈a aminany ty han̈ampy atsika jiaby han̈amia voninahitry Jehovah, izikoa atsika voakaiky han̈aton̈o mariazy, na irahan̈a man̈ara-maso raha atao ao.

NAN̈INO IZIO TÔKONY HAN̈AMIA VONINAHITRY JEHOVAH?

3. Izikoa misy Kristianin̈y mioman̈a amy vadian̈a, ino raha mila alaindrô toky, aviô nan̈ino?

³ Irô Kristianin̈y man̈oman̈a mariazy tôkony han̈ano izio mifan̈araka amy torolalan̈a amezan’i Jehovah amy Baiboly. Nan̈ino? Fôtony Jehovah namôron̈o vadian̈a io. Izy nanambatra olo fivadiany voanalohany, i Adama ndreky Eva. (Gen. 1:28; 2:24) Ke izikoa anarô fa man̈oman̈a vadian̈anarô, tôkony hataonarô azo antoko fa han̈amia voninahitry Jehovah raha jiaby hatao ao.

4. Ino koa antony hafa mahavy olo man̈oman̈a mariazy mila man̈amia voninahitry Jehovah amin’ny andran’ny mariazindrô?

⁴ Misy antony hafa koa mahavy anarô tôkony han̈amia voninahitry Jehovah: Fôtony izy Babanarô an-dan̈itry an̈y ndreky ten̈a Kamaradinarô. (Heb. 12:9) Hay be fa tianarô ho tsara fo fihavan̈anarô aminany. Ke tsy tianarô foeky amin’ny andran’ny mariazinarô, na afaran’izio, han̈ano raha hampalahelo Kamaradibenarô io. (Sal. 25:14) Ke izikoa anarô fa mandiniky raha jiaby vitan’i Jehovah taminarô ndreky raha mbala hataony aminarô, anarô tsy maintsy han̈ano raha han̈amia voninahitry izy amin’ny andran’ny mariazinarô. Sa karakôry?​—Sal. 116:12.

AKÔRY HAN̈AMEZANARÔ VONINAHITRY JEHOVAH?

5. Nan̈ino Baiboly man̈ampy olo man̈oman̈a mariazy han̈ano fanapahan-kevitry tsara?

⁵ Baiboly tsy man̈amia listin’ny raha atao amin’ny andran’ny mariazy, na amy fety atao amizio. Izio mety hatao mifan̈araka amy raha misy, fomban’ny tany, aviô raha tiandrô fivadiany. Ten̈a Kristianin̈y koa tôkony han̈araka lalàn̈an’ny fanjakan̈a momba mariazy. (Mat. 22:21) Fa ndray zen̈y, izikoa raha atao amy mariazy io atao mifan̈araka amy torolalan̈an’ny Baiboly, han̈amia voninahitry Jehovah ndreky hamparavoravo izy izio. Ke ino aby ma torolalan̈a tôkony hiritriretinarô?

6. Nan̈ino ma olo han̈ano mariazy mila man̈araka lalàn̈an’ny fanjakan̈a amy tany misy irô?

⁶ Man̈araha lalàn̈an’ny fanjakan̈a. (Rom. 13:1, 2) Amin’ny ankamarozan’ny tany, olo han̈ano fivadiany mila man̈araka raha takin’ny lalàn̈a. Irô tôkony handiniky ino aby raha takin’ny lalàn̈a amin’olo han̈ano mariazy, amy tany misy irô. Izikoa anao manan̈a fan̈ontanian̈a momba akôry han̈anaovan̈a zen̈y, aza mihafahafa man̈ontany anti-pan̈ahy.b

7. Tôkony ho fotoan̈a karakôry andran’ny mariazy io, aviô karakôry hahavitan̈a zen̈y?

⁷ Ataova man̈amia voninahitry Jehovah. (1 Kor. 10:31, 32) Mifen̈a baka ho hita amin’ny andran’ny mariazinarô io vokatran’ny fan̈ahy masin̈in’ny Zan̈ahary, fa tsy toe-tsain̈in’ny donia ty. (Gal. 5:19-26) Aviô erakan’ny Soratra Masin̈y, lelahy lohan’ny fianakavian̈a. Ke andraikitrinany mangala toky fa andran’ny mariazindrô io ho andra mamparavoravo ndreky misy hajany. Akôry hahavitan̈a zen̈y? Man̈isy kabaro baka amy Baiboly amy mariazindrô. Tôkony hatao am-pitiavan̈a, mba mankahery, baka iô atao am-pan̈ajan̈a izio. Ho tsapan’olo amy zen̈y fa vadian̈a io ten̈a baka amy Jehovah ankitin̈y. Kabaro io koa hahavy olo hahatsapa fa tsy kidikidy mariazy io fa ten̈a raha maventy. Zen̈y antony mahavy ankamarozan’ny Kristianin̈y mifidy han̈isy kabaro amy Tran̈o Fivorian̈a an̈y, izikoa mbala azo atao. Ke izikoa anarô tihampiasa Tran̈o Fivorian̈a amin’ny andran’ny mariazinarô, mandifasa fangatahan̈a tsialohaloha amin’ny anti-pan̈ahy aby io.

8. Akôry hahavy fetin’ny mariazinao ho hisy hajany fo? (Romanina 13:13)

⁸ Vakia Romanina 13:13. Izikoa anarô mifidy han̈isy fety afaran’ny kabaro io, akôry tôkony hataonarô baka izio tsy ahitan̈a toe-tsain̈in’ny donia ty? Volan̈a griky nadika “fety tsy voafehy” io, ivolan̈ana fety misy olo migiaka dila loatra ndreky lamoziky mantsintsin̈y ziska alin̈y be. Ke izikoa anarô mifidy han̈isy toaka amy mariazinarô io, efa diniha sandra akôry hataonarô, baka tsy hisy olo higiaka dila loatra ao.c Izikoa anarô hifidy han̈isy lamoziky, tandrema tsao mare loatra, baka olo kahinarô io hahavita hifampikoran̈a tsara. Aviô efa tsara sakavy zahavanarô koa ino aby lamoziky handeha halefa ao, aviô ino raha volan̈in’izio, amy zen̈y tsy hanafintohin̈y olo.

9. Ino raha mila alainarô onon̈o momba raha hivolan̈iny na soma atao amy fetin’ny mariazinarô io?

⁹ Amy tany sasany, efa misy raha amboarin̈y tsialohaloha haboaka amy fety ao. An̈isan’izen̈y ziô volan̈an’olo momba irô fivadiany io, video na sary, na koa soma. Ke izio mety hampisy sovenira tsara amy mariazy io. Fa kanefa ndraiky, mila azonarô antoko fa raha mankahery raha jiaby haboaka amizio. (Fil. 4:8) Man̈ontania karaha ty: ‘Mba hampisy fan̈ajan̈a olo edy izio? Izio ma hampisy hajany mariazy io?’ Fa ny ten̈a maventy, man̈ontania koa: ‘Han̈amia voninahitry Jehovah ma izio?’ Aviô ndray mety ho hisy kidikidy koa hivolan̈in’olo amizio, mitandrema tsao izio misy volan̈a vetaveta na misy asaha. (Efes. 5:3) Aviô izikoa misy fianakavian̈a na kamarady hangala fivolan̈ana, ataova azo antoko fa raha ho tianarô raha hivolan̈indrô.

10. Nan̈ino olo man̈oman̈a mariazy tôkony han̈ano raha tsotra? (1 Jaona 2:15-17)

¹⁰ Aza man̈ano raha ahitan̈a fa anarô poerapoera. (Vakia 1 Jaona 2:15-17.) Tian’i Jehovah izikoa mpanomponany man̈amia voninahitry izy fa tsy misariky sain̈in’olo amindrô tômpiny. Ke Kristianin̈y tsy mandany volabe ndreky tsy “man̈ano vantara raha anan̈any” amy mariazindrô. Ino mahatsara anarô man̈ano mariazinarô tsotra fo? Diniha baka raha nivolan̈in’i Mike, rahalahy baka a Norvège ty. Ho izy: “Zahay tsy nitrosa foeky, ke zahay nahavita nan̈ano mpisava lalan̈a fo. Tsotra fo mariazinay, kanefa tsara, aviô misy sovenira tsara koa.” Tabitha ndraiky, ranabavy baka an Inde an̈y nivolan̈a: “Zahay tsy niady sain̈y be zen̈y. Nataonay tsotra fo mariazinay, ke zahay tsy naro raha nila noman̈iny, aviô kirikiry adihevitry taminay ndreky havanay momba raha handeha hatao amizio.”

11. Tôkony ho karakôry lamba ndreky sanjy iritriretindrô han̈ano mariazy io? (Zahava koa sary.)

¹¹ Efa nidinihinarô ma karakôry lamba hisikininarô amizio? Hay be fa anarô tihan̈ano ny faran’ny tsara. Ndray tamin’ny andran’ny Baiboly, olo mpan̈ainga ndreky ningain̈y zen̈y nifidy tsara sanjy nataondrô. (Isaia 61:10) Karaha zen̈y koa anarô. Lamba ataonarô amizio tsy maintsy hiavaka fo, fa izy fo tôkony hataonarô mihaja tsara. (1 Tim. 2:9) Fa ndray zen̈y, aza ambela hanjary raha faran’ny maventy amin’ny andran’ny mariazinarô lamba sikininarô na sanjinarô.​—1 Pet. 3:3, 4.

12. Nan̈ino ma irô olo han̈ano mariazy io mila mitandrin̈y amy fomba tsy mifan̈araka amy Soratra Masin̈y amy tany misy irô?

¹² Aza man̈ano fomba tsy mifan̈araka amy Soratra Masin̈y. (Apok. 18:4) Mariazin’olo amy donia ty matetiky misy fomba maro misy ifandraisany amy fivavahan̈a diso, fifandraisan̈a amy fan̈ahy ratsy ndreky finoanoam-poan̈a. Jehovah mampitandrin̈y atsika mazava fa raha aby io maloto. (2 Kor. 6:14-17) Ke izikoa misy fomba na raha fataon’olo amy tany misy anarô an̈y hitanarô mampisalasala, diniha baka taia navian’izio. Aviô diniha koa ino aby torolalan̈an’ny Baiboly mety harehan̈a, alohan’ny hanapa-kevitry han̈ano na tsy han̈ano izio amy mariazinarô.

13. Amy raha momba kadô, akôry hangalan̈a tahaka Jehovah?

¹³ Fomban’olo aminarô an̈y ma man̈amia kadô olo man̈ano mariazy? Mety arakaraka vola anan̈an’olo kahinarô kadô amezandrô. Aviô Kristianin̈y koa ampirisihin̈y han̈amia, fôtony raha zen̈y mamparavoravo. (Ohab. 11:25; Asa. 20:35) Fa tsy tiantsika izikoa olo kahintsika amy mariazy io hahatsapa ho voatery han̈amia kadô. Tsy tiantsika koa hahavy olo hieritreritry fa kadô tsotra tsy kadô. Atsika io mangala tahaka Jehovah, ke atsika mifen̈y manan̈a fomba fihevitrinany mikasiky kadô io. Ambelantsika koa olo han̈amia kadô atsika, arakaraka raha anan̈andrô ndreky baka amy fôndrô.​—2 Kor. 9:7.

KARAKÔRY HANDRISIAN̈A RAHA SAROTRO?

14. Ino aby raha sarotro hitan’olo sasany man̈oman̈a mariazy?

¹⁴ Mety ho hisy raha sarotro maro ho hitanarô, anarô koa fa man̈oman̈a mariazy man̈amia voninahitry Jehovah. Ohatra, mety ho sarotro aminarô han̈oman̈a mariazy tsotra zen̈y. Karaha ty ho Charlie, baka a Nosy Salomon: “Ten̈a sarotro mifidy azôvy aby olo hikahian̈a. Maro baka kamaradinay. Aviô amy fombanay, olo jiaby man̈anten̈a ainviten̈a aby!” Tabitha, araiky nikoran̈intsika taloha tiô in̈y ndraiky nivolan̈a: “Amy tany misy zahay, efa mahazatra olo miainvite olo marobe. Ke tsy nora tamy raimaindreninay nan̈eky safidinay, hikaiky olo kadiriny 100 fo.” Sarah baka an Inde ndraiky nivolan̈a: “Olo sasany mizaha fanan̈anao vola ndreky lazanao amy fiaraha-monin̈y. Iry zanaka rahalahy ndreky zanaka anabavin’ny papako aby io ziô nan̈ano mariazy naresaka be. Ke ninaka karaha nila naresaresakan’ny nindrô in̈y.” Fa ino raha han̈ampy anao handresy raha sarotro karaha zen̈y, ndreky raha sarotro hafa koa?

15. Nan̈ino ma vavaka io raha ten̈a ilain̈a, izikoa fa man̈oman̈a mariazy?

¹⁵ Ataova antom-bavaka fan̈oman̈ana mariazinarô. Koràn̈a amy Jehovah amy vavaka zay problemo hitanarô ndreky raha an̈atin’ny fônarô. (Fil. 4:6, 7) Mety mangataka aminany anarô han̈ampy anarô han̈ano fanapahan-kevitry tsara ndreky ho kalma fo, izikoa fa misy raha mampiasaloha. Angataha koa izy han̈ampy anarô hanan̈a korazy, izikoa fa amy fotoan̈a ilavanarô izio. (1 Pet. 5:7) Fatokisanarô Jehovah io hitombo arakarakan’ny ahitanarô fa izy man̈ampy anarô. Tabitha nikoran̈intsika in̈y nivolan̈a: “Zaho ndreky fiansenaka niasaloha momba raha mety tsy hitovizanay hevitry, na aminay roe na amin’ny havanay. Ke isaka zahay hikoran̈a momba fan̈oman̈ana mariazinay io, komansenay amy vavaka fo izio. Hitanay tsarabe fa Jehovah nan̈ampy, aviô zahay tsisy oalaoala.”

16-17. Nan̈ino ma ilain̈a fahaizan̈a mifampikoran̈a tsara izikoa fa man̈oman̈a mariazy?

¹⁶ Mikoràn̈a mazava tsara ndreky mifan̈ajà fo. (Ohab. 15:22) Anarô io karaha efa fivadiany. Ke anarô roe hanapa-kevitry amy raha aby hataonarô amy mariazy. An̈atin’izen̈y mifidy daty, vola hampiasain̈a, ndreky man̈ano listin’olo ainvitenarô, aviô raha maro hafa koa. Fa alohan’ny anarô hanapa-kevitry, zahava safidy anan̈anarô, aviô iaraha mandiniky torolalan̈an’ny Baiboly tôkony harehan̈a. Zahava koa torohevitry nazonarô baka tamy Kristianin̈y matotro. Izikoa anarô fa mikoran̈a hevitrinarô momba raha tianarô hatao, mifen̈a ho tsara fan̈ahy, hahay handefitry, ndreky hahay handanjalanja. Aviô izikoa misy fianakavian̈anarô, karaha ataon’ny raimandreninarô mba misy fangatahan̈a ataondrô, kanefa tsisy maharatsy izy, mba areha volan̈andrô. Mba andra maventy amindrô koa baka izio. Fa izikoa misy tsy ikenarô hevitrindrô, mahaiza mandanjalanja izikoa fa man̈azava antony amindrô. (Kol. 4:6) Ataova mazava amy fianakavian̈anarô fa ten̈a tanjon̈onarô ho ravoravo sady han̈amia voninahitry Jehovah.

¹⁷ Izikoa raimandreninarô tsy mpanompon’i Jehovah, mety ho sarotro aminarô man̈azava amindrô safidinarô. Fa anarô ndraiky hahavita han̈ano zen̈y fo. Karaha ty ho Santhosh, rahalahy baka an Inde: “Tian’ny fianakavian̈anay zahay han̈ano fombafomba maron’ny Hindoa. Ke elaela zahay roen’ny fiansenaka vo nahavita nan̈azava tamindrô fanapahan-kevitrinay. Aviô nisy nivoanay nifan̈araka amy tiandrô koa safidy nataonay, izikoa raha io tsy halan’i Jehovah. Ohatra, nivoanay hanin̈y hoaninay amy fety io, ke natao araiky tiandrô in̈y. Aviô zahay koa nanapa-kevitry fa tsy nasian̈a hira ndreky tsinjaka tamizio, fôtony tsy nahazatra irô.”

18. Akôry tôkony hataonarô, baka handeha tsara raha jiaby amin’ny andran’ny mariazy? (1 Korintianina 14:40) (Zahava koa sary.)

¹⁸ Mahaiza mandamin̈y tsarabe. Izikoa anarô mahay mandamin̈y, anarô tsy hiady sain̈y amin’ny andran’ny mariazinarô. (Vakia 1 Korintianina 14:40.) Karaha ty ho Wayne, baka a Taiwan: “Andra vitsivitsy talohan’ny mariazinay, zahay nan̈ano fivorian̈a hely niaraka tamindrô olo aby vôn̈ono hitahitahy zahay. Nidinihinay lamin̈y jiaby efa nataonay, aviô nampodinay natao raha sasany hataonay amy Tran̈o Fivorian̈a an̈y, baka ho azo antoko fa handeha tsara raha jiaby.” Hajà olo kahinarô, ke mifen̈a han̈aja lera.

19. Ino raha han̈ampy anarô hifehy raha jiaby atao amy fetin’ny mariazinarô?

¹⁹ Maro problemo tsy ho voa anarô, izikoa fa dinihinarô tsialohaloha. (Ohab. 22:3) Izikoa mahazatra olo amy tany misy anarô an̈y, avy fo amy fetin’ny mariazy nata tsy nikahian̈a, diniha akôry tôkony hataonarô, baka tsy hisy olo han̈ano zen̈y. Volàn̈a amin’ny havanarô tsy Vavolombelon̈on’i Jehovah raha ho hitandrô an̈y, aviô hazavà ino antony tsy han̈anaovanarô fomba sasany. Mety koran̈inarô amindrô lahatsoratra amy jw.org ao, titranany “Karakôry ma Mariazin’ny Vavolombelon̈on’i Jehovah?” Baka ho erakan’ny nan̈oman̈anarô izy raha ho hisy amy fety ataonarô, mifidiana rahalahy matotro araiky hatao “mpiandraikitry fety.” (Jaona 2:8) Izikoa hazavainarô tsara aminany raha tianarô hatao amy mariazinarô io, izy han̈ampy anarô han̈ano raha hazahoan̈a antoko fa amy fomba mendriky mariazy io ndreky ho vita erakan’ny nan̈oman̈anarô izy.

20. Ino raha tôkony ho tsaroan’olo fivadiany momba andran’ny mariazindrô?

²⁰ Mety hiasaloha ndraiky anarô izikoa mandiniky raha jiaby tafiditry amy fan̈oman̈ana mariazinarô io. Fa kanefa, aza adin̈a fa mariazy io andra araiky fo. Fa fiarahanarô manompo Jehovah manomboko iô ndraiky mitohy fo. Ke mifen̈a erakan’ny vitanarô han̈ano mariazy tsotra aviô amy fomba mendriky. Matokisa Jehovah. Anarô koa man̈araka tari-dalan̈anany, ho vitanarô handamin̈y mariazy, hahavy anarô ho ravoravo ndreky tsy hanen̈iny, lera anarô mandiniky andran’ny mariazinarô afara an̈y.​—Sal. 37:3, 4.