Kɛ A Ilii Kpeleɛ

Mɛnii Zisɛ E Gɛi

VILOI: Zisɛ E Kpɔŋ Maa Tɛɛ Neɣe Pɔ A Lii-kpele Pere

1. VILOI su kaa, kpaa Zɔŋ 7:​3-5 da 1 Kɔleŋtiɛŋ 15:​3, 4, 7 lono. Gɛ ni mare-kɛɛ-ŋai ŋi sukula:

1. Zisɛ neɣe-ni di tua leŋ e pilaŋ ŋɔsɛŋ-lɛɛi ma?

2. Le ɓe nɛ a gɛɛ Zisɛ fii fe kpɛɛ ni kpɔŋ maa tɛɛi neɣe Zĩi pɔ?

Le Ɓe Kwa Pɔri Maa-kɔrii Zisɛ Yeei?

2. Maa nɛ̃ɛi kulii e kɛ a gbeleɛ kpɛni fei, nua tani-ŋa da tãi tamaa siɣe a gɛɛ di laa a duŋ lɛlɛɛi.

Zisɛ Pɔɔkɔɔŋ

3. Tii kɛ a ɣala-woo-ɓo pere takpɛni. Ife kpala nuu ta la a kɛ ve faa ni ma a gɛɛ e Ŋala-kɔlɔi maa-kɔri ŋama. Pere a kɛ naa, tii kɛ a vilo da zɛŋ-lɛɛ-ŋai nyii a pɔri kpɔni dia di mɛnii kɔlɔŋ a kɛ Ɣala-kɔlɔ Maa-kɔriɛ ma da berei a pɔri kpɔni la diai.

4. Ife nua kɔɔŋ diɓaraŋ-ŋa dia. Nuu kelee ŋɔmɛni-ŋa-kaa pere kaa a dakpɛni. A kɛ ikaayɔɔi su nuu ta kpaa nuui ya lene-polu naa-kaa kɛi mai fe ŋwɛlii e nyee see Ŋala-kɔlɔi maa-kɔriɛ mu, ikili-ŋa sia e pilaŋ mɛnii ma nyii gɛi ve ŋwɛlii e Ŋala-kɔlɔi maa-kɔrii. Mɛni ta kaa naa nyii naai la nyaŋ a ziɣe a mɛni kpanaŋɔɔ? Ŋɔkaayɔɔi kpaa ŋɔkolii su-ɓela da tɔɔi ma? Tãi tɛɛ bɔ a gɛɛ e gili-ŋa sia e pilaŋ mɛnii ma a maa-kɔrii da berei Ŋala-kɔlɔi maa-kɔriɛ mɛni kpanaŋɔɔi lai.

5. Ɣala fɛli nuui mɛni ma. Ziova fɛli a gɛɛ e kpɔŋ ya kili-kɛ-zu e kɛ iyeei e pilaŋ Ŋala-kɔlɔ maa-kɔri-nuui ma, I tua a nyaa a ɓaa-kɛ-maa pere. Ziova fɛli a gɛɛ e kpɔŋ ya itãi kɔlɔŋ ya pɔri kperai la Ŋala-kɔlɔi ŋaa-lɛi nuu ta ma nyii ve ŋwɛlii e maa-faleŋ kɛi.—1 Kl. 9:26.