Ɣala Ŋɔwɛli-kɛ-maai Kaa Naa Wɔlɔ-wɔlɔ Da Wɔlɔ-wɔlɔ

1-2. Mɛni-kpanaŋ kɛɛ leŋ ɓe Korai-ɓela tamaa da saa tɛɛ zui?

IKILI-ŊA SIA e pilaŋ ya-ŋa keleŋ ta ma nyii nyai ŋa a fãa kɛtɛ tãi. Vãa kɛtɛi a gɛi nya-ŋa keleŋ kɛ tumo-tumo a ŋanaa. Nya-ŋa keleŋ a pɔri lii ɓɛi kelee vãai a lii naai. Kɛɛ nuu ta a nya-ŋa keleŋ soŋ-kɔlii too nyai su, nyiŋi a pai nya-ŋa keleŋ kperai tumoi a gɛɛ ve pu.

² Ya kɛ tɛɛi mɛni-kpanaŋ-ŋa su, tãi ta ya pɔri kɛi nɔ yɛɛ nya-ŋa keleŋ ti. Ikili-ŋa-siai maa a pɔri falenii a maa felaa. Tãi taŋa ya kɛ a I laa a Ziova ŋɔwɛli-kɛ-maai da ŋɔkpɔŋ maai; gɛ ni tãi taŋa ikili-ŋa a kɛ a buɔɔ a kɛ kpiŋ Ziova a mɛni-ŋai kaai ya tɛɛi zui. (Ŋu. 10:1; 13:1) Tãi ta ilaoi ta a pai iŋaa-nɛnɛ woo ɓoi ya nyii pai I fɔrɔi a tãi kpua loŋ. (Tá. 17:17; 25:11 NWT) Gɛ ni tãi taŋa tɛɛ polu ma ikili-ŋa a ŋɔnɔ kɛ a buɔɔ a kɛ Ziova a kpiŋ kpɔŋ maa tɛɛi ipɔ. Nyaŋ ya ŋɔnɔ pɛlɛ gaai yɛɛ imaa mɛni fe kpanani Ziova ma. Ya pɔri lɛɛi leŋ a itɔɔi kpanaŋɔɔ mɛni kɛɛ ŋi su? Kpaa le ɓe pai kpɔnii ya a gɛɛ I laa a Ziova ŋɔwɛli-kɛ-maai da ŋɔkpɔn maai a tãi kelee?

3. Le ɓe Ŋule-wooi 31:7 da 136:​1, e nɛ kua e pilaŋ Ziova “ŋɔwɛli-kɛ maai” ma da berei va wɔlɔ bolu tɔɔ la kuai, nyaŋ gaa leŋ a mɛni-kɔɔŋ-maa lɛlɛɛ a pa dua-pere lɛlɛ ŋi mai? (Ya pɔri ŋɔnɔ votooi kaai.)

³ Mɛnii dɔnɔ nyii a pɔri kpɔnii ya a gɛɛ I lɛɛ a itɔɔi kpanaŋɔɔ mɛni-kpanaŋ-ŋa sui ɓa, Ziova ŋɔwɔlɔ-wɔlɔ wɛli-kɛ-maai maa mɛni lɛɛ ikili-ŋa. (Ŋule-wooi 31:7; 136:1 lono) Ŋooi “ŋɔwɔlɔ-wɔlɔ wɛli-kɛ-maa” sukulai ɓa wɛli-kɛ-maa nyii gɔyɛŋ fe mai. Ziova kaa a mɛni-kɔɔŋ-maa lɛlɛɛ a pa dua-pere lɛlɛɛi ŋi ma. Ŋooi Ɛsedɔ 34:​6, 7 da Ŋule-wooi 86:5 e tii kɛ lai, a nɛi a gɛɛ wɛli-kɛ-maa tamaa kaa Ziova yeei, nyaŋ va wɔlɔ kula vɛli-ɓela polu. Ikili-ŋa sia e pilaŋ nyiŋi sukulai ma, Ziova fe pai wɔlɔ bolu tɔɔi vɛli-ɓela dia! Gɔlɔŋɔɔ a gɛɛ Ziova fe pai wɔlɔ kulai ipolu, a kpɔŋ ya a gɛɛ I lɛɛ a itɔɔi kpanaŋɔɔ ya kɛ tɛɛi mɛni-kpanaŋ-ŋa su.—Ŋu. 23:​4, NWT.

E LƐƐ IKILI-ŊA A GƐƐ ZIOVA ŊƆWƐLI-KƐ-MAAI KAA A ŊALA-KƆLƆI ŊƆSƐŊ LƐƐ TA

4. Mɛni-kɔɔŋ-maa-ŋa lɛ e pilaŋ Ŋala-kɔlɔi ŋɔsɛŋ-lɛɛ-ŋai taŋa dia, nyaŋ le mɛni ɓe ku laai la a diai?

⁴ Mɛnii dɔnɔ nyii a pɔri ŋɔnɔ kpɔŋ maa tɛɛi ipɔ a gɛɛ I lɛɛ a itɔɔi kpanaŋɔɔ mɛni-kpanaŋ-ŋa sui ɓa gɔlɔŋɔɔ a gɛɛ Ziova ŋɔwɛli-kɛ-maai kaa a Ŋala-kɔlɔi ŋɔsɛŋ-lɛɛi ta. Lɛ ɓe a pa ikili-ŋa ya ŋooi “Ŋala-kɔlɔi sɛn-lɛɛi” mɛni? Tãi ta ya pɔri ikili-ŋa siai e pilaŋ dɔ̃ya mɛni-ŋai dia nyii yaa maa-kɔri Ŋala-kɔlɔi sui. Gɔɔŋ-maa ɓa, I maa-kɔri a gɛɛ Ɣala laa ɓa Ziova, Zisɛ kaa a Ɣala ŋɔwɛli-kɛ-maa loŋ tɔnɔi, zaa-ɓelai dife mɛni kelee ta kɔlɔŋ, nyaŋ nɔii a pai kɛi a paredai ɓɛi nuu-kpune a pai kɛi naa wɔlɔ-wɔlɔ da wɔlɔ-wɔlɔi. (Ŋu. 83:18; Ik. 9:5; Zɔŋ 3:16; Mɛ. 21:​3, 4) I kɛɛ yaa laa a zɛŋn-lɛɛ-ŋai ŋi, e kɛ a gbanaŋɔɔ a gɛɛ nuu ta e ilii maa faleŋ. Le mɛni ma? Kpɛni fei I gaa a gɛɛ dikaa a tɔ̃ya. Kwaa naa berei kaa Ziova ŋɔwɛli-kɛ-maai seɣɛɛ a Ŋala-kɔlɔi ŋɔsɛŋ-lɛɛi ta a kpɔŋ la kua ku gili-ŋa-siai a gɛɛ Ziova fe kpaaŋ ni kumɛni ma yee mɛi ɣalei la kwa kɛ tɛɛi mɛni-kpanaŋ-ŋa su.

5. Lono e pilaŋ berei ma nuu a bolu tɔɔ la lɛɛ sɛŋ-lɛɛ-ŋa diai.

⁵ Le ɓe kpɔŋ ya a gɛɛ I ipolu tɔɔ lɛɛ sɛŋ-lɛɛ-ŋa dia I kɛɛ yaa pɛlɛ Ŋala-kɔlɔi maa-kɔrii? Tãi ta I mɛni-ŋai I maa-kɔri iɣala-mɛni pɔlɔi sui kɔɔŋ mɛni-ŋai dia Ŋala-kɔlɔi e kɛ nɛi yai. Kwaa gɔɔŋ-maa tɔnɔ kaa. Tãi ta I kɛ a I laa la a gɛɛ Zisɛ ɓa Ŋwala-wala kelee Ɣalai. Kɛlɛ tãi I pɛlɛ la Ŋala-kɔlɔi maa-kɔrii, tãi ta I ikili-ŋa sia e pilaŋ mare-kɛɛi ŋi ma, ‘Zɛn-lɛɛi ŋi kaa a tɔ̃ya?’ Gɛɛ yaa mɛnii kaa Ŋala-kɔlɔi e mo e pilaŋ mɛni-ŋuŋ ŋi mai, I naa gaa a gɛɛ Zisɛ fa Ŋwala-wala kelee Ɣalai. Naa polu ma, I naa pɛlɛ laai a dɔ̃ya ŋuŋ ŋi: Zisɛ ɓa “nuui maa-ŋuŋ ŋeniɛi su kpɛtɛ-sãai kelee tuɛ,” “Ɣala Noŋ tɔnɔi.” (Ko. 1:15; Zɔŋ 3:18) Tɔ̃ya ma, lɛɛ sɛŋ-lɛɛ-ŋa kaa yɛɛ “siɣãŋ” nyii ŋoloi kpanaŋɔɔi. (2 Kl. 10:​4, 5) Kɛɛ I kɛɛ yaa dɔ̃yai maa-kɔrii, ife ŋɔnɔ lɛ ni polu nɛɛ sɛŋ-lɛɛ-ŋai ti pɔ.—Fe. 3:13.

6. Le mɛni ɓe ŋooi “Ŋɔwɔlɔ-wɔlɔ wɛli-kɛ-maai kɔyɛŋ fe ma” tamaai la Ŋule-wooi 136 sui?

⁶ Ya pɔri mɛni tɔnɔi ti kɛi a pa mɛnii ma Ŋala-kɔlɔi e nɛ e pilaŋ Ziova ŋɔwɛli-kɛ-maai ma. Ya kɛ tɛɛi mɛni kpanaŋ ta su, nyaŋ ikili-ŋa puɔɔ e pilaŋ Ziova ŋɔwɛli-kɛ-maai ma imɛni ma, ikili-ŋa sia e pilaŋ mare-kɛɛi ŋi ma: ‘Ŋa ŋgili-ŋa siai nɔ a nɛlɛɛ?’ Gɛ ni ikili-ŋa-siai kɔɔŋ mɛnii ma Ŋule-wooi 136:1 nyii zɛŋ-lɛɛi ŋi sɛlɛŋ-kpau a kulai zui e nɛ kuai. Le mɛni ɓe Ziova e ŋɔwɛli-kɛ-maai toli la a “wɔlɔ-wɔlɔ wɛli-kɛ-maai?” Le mɛni ɓe ŋooi “ŋɔwɔlɔ-wɔlɔ wɛli-kɛ-maai kɔyɛŋ fe ma” kaa la Ŋule-woo kɔlɔi ŋi su giei buu feerɛ kao lɔɔlu mɛi dai (26)? Yɛɛ berei kwaa maa-kɔri lai, Ziova ŋɔwɔlɔ-wɔlɔ wɛli-kɛ-maai kaa a Ŋala-kɔlɔi ŋɔsɛŋ-lɛɛi ta yɛɛ zɛŋ-lɛɛi takpɛni-ŋai Ŋala-kɔlɔi su nyii I iyee seei mui. Gili-ŋa-siai a gɛɛ I wɛli fe Ziova ma kpaa imaa mɛni fe kpanaŋ ni ma fe a tɔ̃ya. Mɛni ma ipolu tɔɔ gili-ŋa-siai ti ma yɛɛ berei nɔ ya pɔri ipolu tɔɔi la lɛɛ sɛŋ-lɛɛ-ŋa diai!

7. Ɣala-kɔlɔ-kpua-ŋa lɛ nyii nɛ a gɛɛ I wɛli kaa Ziova ma.

⁷ Ɣala-kɔlɔ-kpua tamaa kaa Ŋala-kɔlɔi su nyii nɛ a gɛɛ ku wɛli kaa Ziova ma. Gɔɔŋ-maa ɓa, Zisɛ e mo ŋɔpolu-ɓelai dia nyɛɛi: “Kamaa mɛni kpanaŋɔɔi e tɛɛ liyeŋ tamaa ma.” (Mf. 10:31) Ziova nya kpiŋ e mo ŋɔnuai dia nyɛɛi: “Ŋa pai kakponoi kpananii, ŋa kpɔŋ maa tɛɛ ka pɔ. Ŋa pai kamaa kɔ̃ɔi ŋa kaŋuŋ maa ɓo.” (Az. 41:10) I berei kaa ŋoo-ŋai ti su ponoɔɔi lai? Zisɛ fe mo ni nyɛɛ, ‘Tãi ta kamaa mɛni kpanaŋɔɔi,’ nyaŋ Ziova fe mo ni nyɛɛ, ‘Tãi ta ŋa pai kpɔŋ maa tɛɛi kapɔ.’ Kɛlɛ di mo diyɛɛi: “Kamaa mɛni kpanaŋɔɔi” da “ŋa pai kpɔŋ kpɔŋ maa tɛɛi ka pɔ.” Ya kɛ tɛɛi mɛni kpanaŋ-ŋa su, ŋala-kɔlɔ-kpua-ŋai ŋi difa iŋaa nɛnɛ nɔ, kɛɛ da kpɔŋ ya I laa la a gɛɛ I wɛli kpɔɔi kaa Ziova ma. Mɛni-ŋai ŋala-kɔlɔ-kpua-ŋai ŋi sui kaa a tɔ̃ya. Ya Ziova fɛli e pilaŋ mɛnii ma ikili-ŋa pui, I ikil-ŋa sia a nɛlɛɛ e pilaŋ ŋala-kɔlɔ-kpua-ŋai ŋi dia, gɛ ni ya pai pɔrii mo yɛɛi: ‘Ŋaa Ɣala ŋɔwɛli-kɛ-maai kɔlɔŋ mɛni ma, nyaŋ naai la.’a1 Zɔŋ 4:16

8. Le ɓe ya pɔri gɛi a kɛ ikili-ŋa puɔɔi e pilaŋ Ziova ŋɔwɛli-kɛ-maai ma imɛni ma?

⁸ Kɛlɛ le ɓe ya pɔri gɛi a kɛ ikili-ŋa a kɛ nii a buɔɔ a tãi taŋa e pilaŋ Ziova ŋɔwɛli-kɛ-maai ma imɛni ma? Gili-ŋa-siai ti kɔɔŋ mɛnii ma I gɔlɔŋ e pilaŋ mai. Kukili-ŋa-siai maa a pɔri faleni, kɛlɛ Ziova ŋɔwɛli-kɛ-maai kumɛni mai maa fa faleŋ yɛɛ berei Ŋala-kɔlɔi e nɛ lai. A kɛ kufe laa ni a Ziova ŋɔwɛli-kɛ-maai kumɛni ma, gɛ ni kukaa kuŋɛi naɣiŋ ni ŋɔtua-pere lɛlɛi gɛtɛ ɣelei mɛi, nyaŋ nya ɓa wɛli-kɛ-maa.—1 Zɔŋ 4:8.

IKILI-ŊA SIA A NƐLƐƐ E PILAŊ ZIOVA ‘ŊƆWƐLI-KƐ-MAAI MA IMƐNI MA’

9-10. Le ɓe Zisɛ e kɛ lonoi e pilaŋ ma tãi e mo la nyɛɛi, “Naŋ-nuui nyaa kpiŋ e kawɛli ni” nyii gaa Zɔŋ 16:​26, 27 sui? (Ya pɔri ŋɔnɔ votooi kaai.)

⁹ Kwa pɔri mɛni tamaa maa-kɔrii e pilaŋ Ziova ŋɔwɛli-kɛ-maai ma a mɛni maa-kɔriɛ e pilaŋ mɛnii ma Zisɛ e mo ŋɔpolu-ɓelai diai. E mo dia nyɛɛi: “Naŋ-nuui nyaa kpiŋ e kawɛli ni.” (Zɔŋ 16:​26, 27 lono.) Zisɛ fe mɛnii ŋi ɓo nɔ ti a gɛɛ e ŋɔpolu-ɓelai lii nɛ̃ɛ. Dɔ̃yai ɓa, ŋala-kɔlɔ-kpuai ŋi kɔlɛ ma ɣala-kɔlɔ-kpua-ŋai di nɛ a gɛɛ Zisɛ fe kɛ ni lonoi e pilaŋ ŋɔpolu-ɓelai dikili-ŋa-siai ma a tãi ti. Kɛɛ e kɛ lonoi e pilaŋ mɛni-ŋuŋ takpɛni ma, nya ɓa ɣala-fɛliɛ.

¹⁰ Zisɛ aa kpɛɛ nɔ moi ŋɔpolu-ɓelai dia a gɛɛ di Ɣala fɛli naai su, kɛɛ dife vɛli. (Zɔŋ 16:​23, 24) E kɛ a nɛlɛɛ a gɛɛ di mɛni-ŋuŋ ŋi kɔlɔŋ kpɛni fei, tãi ta ŋɔmu-siɣe saa yeei polu ma, ŋɔpolu-ɓelai dii pɔri ŋwɛlii di pɛlɛ vɛlii. E tee nyiti ma, Zisɛ e kɛ a dilaoi. Eei pɔri kɛi dikili-ŋa a gɛɛ ee di wɛli kaa Zisɛ ma a ŋanaai, eei pɔri ŋwoli tɔɔi difɛli-woo-ŋai dia, gɛ ni e Naŋ mare kɛ dimɛni ma. Kɛlɛ Zisɛ e mo dia a gɛɛ dife dikili-ŋa sia a bere sii ŋi. Le mɛni ma? Kpɛni fei e mo dia nyɛɛi: “Naŋ-nuui nya kpiŋ e kawɛli ni.” Nyiŋi kaa a Ŋala-kɔlɔi ŋɔsɛŋ-lɛɛi ta e pilaŋ ɣala-fɛliɛ ma. I kili-ŋa sia e pilaŋ berei ma nyiŋi pilaŋɔɔi la yai: Iɣala-kɔlɔ maa-kɔriɛ sarai, yaa Zisɛ kɔlɔŋ, nyaŋ ŋwɛli kaa yaa. (Zɔŋ 14:21) Kɛlɛ yɛɛ Zisɛ polu-ɓela nyii-ŋai kɛ zia-ɓelai ditãi mai, ya pɔri Ɣala fɛlii a ilii kelee kpɛni fei I gɔlɔŋ a gɛɛ ‘nya kpiŋ e I wɛli ni.’ Nyaŋ tãi kelee ya Ziova fɛli lai, ya nɛ a gɛɛ I laai a ŋoo-ŋai ti.—1 Zɔŋ 5:14.

MƐNII A IKILI-ŊA PUI KƆLƆŊ

11. Le mɛni ɓe Setɔŋ lii a pai kɛi a nɛ̃ɛ la a kɛ kukili-ŋa a kɛ a buɔɔ e pilaŋ Ziova ŋɔwɛli-kɛ-maai ma kumɛni ma?

¹¹ Le ɓe a pɔri kukili-ŋa pui a pa Ziova ŋɔwɛli-kɛ-maai ma kumɛni ma? Ya pɔri moi a gɛɛ Setɔŋ ɓe a pa a kili-ŋa-sia kɛɛ ŋi kupɔ, nyaŋ tɔ̃ya kaa ti. Dɛɓelei kaa ‘nuu kɔrii mii mɛni ma,’ nyaŋ a ŋwɛlii kukili-ŋa e kɛ a buɔɔ e pilaŋ Ziova ŋɔwɛli-kɛ-maai ma kumɛni ma. (1 Pi. 5:8) Dɔ̃yai ɓa Ziova ŋɔwɛli-kɛ-maai ɓe nii kula a gɛɛ e maa-tee-sɛŋ tɛɛ kumɛni ma, nyaŋ Setɔŋ a ŋwɛlii ku gaa yɛɛ kufa pɔri mɛni lɛlɛɛ kelee ta sɔlɔ ɓoi zu. (Ib. 2:9) Kɛlɛ gbɛɛ ɓe nii a pai kɛi a nɛ̃ɛ a kɛ kukili-ŋa a kɛ a buɔɔ e pilaŋ Ziova ŋɔwɛli-kɛ-maai ma kumɛni ma? Setɔŋ ɓe. Nyaŋ gbɛɛ ŋɔnɔ ɓe nii a pai kɛi a nɛ̃ɛ a kɛ kwa nɛɛ naa a gɛɛ lii-too-polu e ku kpera Ziova fɛlii? Setɔŋ ɓe. Setɔŋ a ŋwɛlii ku gaa yɛɛ ku wɛli fe Ziova ma, kɛlɛ nyiŋi fe a tɔ̃ya. Nya ɓe ŋwɛli fe Ziova ma. “Ŋɔwoya-tua-pere-ŋai” tɔnɔ ɓa a gɛɛ ku gaa yɛɛ kumaa mɛni fe kpanaŋ ni Ziova ma, nyaŋ kuwɛli fe ma. (If. 6:11) Kwa mɛnii kɔlɔŋ kukpɔara-nuui a kɔi a gɛɛ e gɛi, nyiŋi a kukponoi kpanaŋ a gɛɛ “ku tɔɔ Dɛɓelei ma.”—Zĩ. 4:7.

12-13. Tãi ta berei kukaa la a sɔnyɔŋ-ɓelai, a pɔri kukili-ŋa pui leŋ a pa Ziova ŋɔwɛli-kɛ-maai ma kumɛni ma?

¹² Mɛni takpɛni kaa ŋɔnɔ naa nyii a pɔri kukili-ŋa pui a pa Ziova ŋɔwɛli-kɛ-maai ma kumɛni ma. Nyaŋ nya ɓa, zɔnyɔŋ ku zɔlɔ ɓo kukaa-ɓela yeei. (Ŋu. 51:5; Lo. 5:12) Sɔnyɔŋ e naoi-laai kɛ nuu-kpune da Ɣala loai sukara. E ŋɔnɔ pa a kɔlɔ-fela kupɔ, e gɛ kufa kukili-ŋa sia a nɛlɛɛ.

¹³ Sɔnyɔŋ a ŋɔnɔ pa a kili-ŋa-sia takpɛni-ŋa kupɔ yɛɛ, ŋumɛ, lii-sɛlɛŋ ŋanaa da yao. Gili-ŋa-sia-ŋai ti da pa kupɔ kwa sɔnyɔŋ kɛ. Kɛlɛ da ŋɔnɔ pa kupɔ kpɛni fɛi ku gɔlɔŋ a gɛɛ kumaa fe waa ni, nyaŋ bere fei Ziova e ku kpɛtɛ la. (Lo. 8:​20, 21) Yɛɛ berei nɔ keleŋ nyii ŋɔtaya ɓɔɔi fa tii kɛ la a nɛlɛɛ yɛɛ berei maa nɛ̃ɛi e gɛ lai, bere nɔ ɓe sɔnyɔŋ a gɛ kufa pɔri tuai la a nɛlɛɛ kpaa ku kukili-ŋa sia a nɛlɛɛ yɛɛ berei Ziova e ku kpɛtɛ lai. Nyiŋi ɓe gɛ tãi taŋa kwa kɛ kukili-ŋa siai a kɛ ku wɛli kpɔɔi kaa Ziova ma. A kɛ bere ɓe a kɛ la a ya, gɛ ni e lɛɛ ikili-ŋa a gɛɛ Ziova ɓa ‘ŋwala-wala kelee Ɣalai nyii a ŋɔkono-tee-ŋai ŋaa-see kɛ nuui kelee yeei nyii ŋwɛli nii, gɛ ŋoo mɛni, gɛ ŋɔtɔŋ-ŋai mɛi kaai.’—Ni. 1:5.

14. Kukili-ŋa siaa e pilaŋ maa-tee-sɛŋ ma a kpɔŋ leŋ kua a gɛɛ ku laa a Ziova ŋɔwɛli-kɛ-maai kumɛni ma? (Lomaŋ 5:8) (Ya pɔri ŋɔnɔ basii “Ikpiŋ Mɛi Kaa ‘A Sɔnyɔŋ Ŋɔnuu Pɛlɛɛ’” kaai.)

¹⁴ Tãi taŋa kulii a too polu kpɛni fei kwa kɛ gaai nɔ yɛɛ maa fe nɛ̃ɛ ni Ziova e wɛli-kɛ-maa lɛ kua. Nyaŋ nyiŋi kaa a tɔ̃ya. Nyiŋi ɓe Ziova ŋɔwɛli-kɛ-maai maa mɛni kɛ a gbanaŋɔɔ. Kutii kɛɛ fei a gɛ a gɛɛ Ziova e ku wɛli. Kɛɛ e nii maa-tee-sɛŋ tɛɛ kumɛni ma a gɛɛ e pɔri kusɔnyɔŋ-ŋai su mɛni lɛɛi kpɛni fei kuwɛli kpɔɔi kaa ma. (1 Zɔŋ 4:10) E lɛɛ ŋɔnɔ ikili-ŋa a gɛɛ Zisɛ e pa a gɛɛ e sɔnyɔŋ-ɓela ɓalo, kɛɛ maa waa-ɓela fei. (Lomaŋ 5:8 lono) Kumaa fe waa ni, nyaŋ Ziova fa kpala kula a gɛɛ ku tua a maa waa pere. Kwa gɔlɔŋ a gɛɛ berei kukaa la a sɔnyɔŋ-ɓelai ɓe a gɛ kukili-ŋa e kɛ a buɔɔ e pilaŋ Ziova ŋɔwɛli-kɛ-maai ma, kwa pai kɛi a ku kpɛtɛɛ a gɛɛ ku kɔ gili-ŋa-sia nyɔmɔɔi ti pɔ.—Lo. 7:​24, 25 NWT.

LƐƐ A ITƆƆI KPANAŊƆƆ ZIOVA POLU

15-16. Kwa lɛɛ a kutɔɔi kpanaŋɔɔ Ziova polu, le ɓe kwa pɔri kɛi a ku laa lai, nyaŋ le mɛni ma? (2 Samia 22:26)

¹⁵ Ziova a ŋwɛlii a gɛɛ ku mɛni-kpɛtɛɛ lɛlɛɛ-ŋa kɛ, nyaŋ nya ɓa ‘ku ŋoo mɛni.’ (Du. 30:​19, 20) Kwa gɛ ti, kwa pɔri kɛi a ku laa la a gɛɛ ve pai wɔlɔ bolu tɔɔi kua. (2 Samia 22:26 lono.) Kwa lɛɛ a kutɔɔi kpanaŋɔɔ Ziova polu, kwa pɔri kukili tɔɔi ma kpɔŋ-maa mɛni ma kwa kɛ tɛɛi mɛni-kpanaŋ kelee ta su kukɛ-ɣeniɛi su.

¹⁶ Yɛɛ berei kwaa maa-kɔri lai, mɛni-ŋuŋ tamaa kaa naa nyii kwa pɔri lɛɛi a kutɔɔi kpanaŋɔɔ mɛni ma kwa kɛ tɛɛi mɛni-kpanaŋ-ŋa su. Ku gɔlɔŋ a gɛɛ ku wɛli kaa Ziova ma, nyaŋ a pai kpɔŋ maa tɛɛi kupɔ. Nyiŋi kaa a Ŋala-kɔlɔi ŋɔsɛŋ-lɛɛi ta. Kukili-ŋa a kɛ a buɔɔ e pilaŋ ŋɔwɛli-kɛ-maai ma kumɛni ma, mɛnii ku gɔlɔŋ e pilaŋ Ziova ŋɔwɛli-kɛ-maai ma e lɛɛ kukili-ŋa e tɛɛ la kuŋɛi kɛɛ ma kukili-ŋa-siai ma. Kwa ŋwɛlii ku laa la a tãi kelee a gɛɛ Ziova ŋɔwɔlɔ-wɔlɔ wɛli-kɛ-maai kɔyɛŋ fe ma yɛɛ berei nɔ Ŋala-kɔlɔi e mo lai.