ZƐŊ-LƐƐI 58
Kanaŋ Ziova Fɛlii
Tɔ̃ya Korai-ɓela difa wɔlɔ nɛɛ naa a gɛɛ nuu ta kpaa sɛŋ ta e di kpera Ziova fɛlii. Ku laai la a gɛɛ bere ɓe gaa la ikili-ŋa. Ziova lii a nɛ̃ɛ ya lɛɛ a itɔɔi kpanaŋɔɔ vɛliɛ su. (1 Kɔlɔnikɔ 28:9 lono.) Mɛni-ŋa kɛɛ leŋ ɓe a pɔri gɛi a gbanaŋɔɔ a gɛɛ I kanaŋ Ziova fɛlii, nyaŋ le ɓe a pɔri kpɔnii ya?
1. Nua da pɔri kuwɛli-kɛ-maai Ziova mɛni ma sukɔɔni leŋ?
Nua taŋa da pai kɔi a gɛɛ di ku kpera Ziova fɛlii. Gbɛɛ ɓa pɔri mɛni nyɔmɔɔ kɛɛ ŋi kɛi? Nua taŋa nyii-ŋai daa kpera Ziova fɛlii, da lɛɛ mɛni-ŋa ɓo e pilaŋ ŋɔkpɔŋ-gie-mai ma a gɛɛ di kulaa-lai su kara. Dia ɓa diai daa kula dɔ̃yai su da tɔɔ mai. E tee nyiti ma, ɣala-mɛni laa-tuɛ-ɓela taŋa da lɛɛ mɛni-ŋa ɓo e pilaŋ kua a gɛɛ di gɛ diai dife Ziova kɔlɔŋ a nɛlɛɛ di kpera vɛlii. Maa fe nɛ̃ɛ ni ku lono diai daa kula dɔ̃yai su da tɔɔ mai pɔ kpaa ku dikɔlɔ-ŋai lono, kpaa ku li diŋɔŋ kɔli-fãai ŋa a gɛɛ ku mɛni-ŋai da bu naai lono, kpaa maŋ ku divilo-ŋai su kaa. Zisɛ kɛɛ lonoi e pilaŋ nuai dia da ŋwɛli a gɛɛ di nua kpera Ziova fɛlii, e mo nyɛɛi: “Ka dilɛɛ naa. Dikaa a ŋɛi-pu-ɓela tuɛ-ɓela ŋɛi puɔɔ. Nyaŋ a kɛ ŋɛi-pu-nuu a pere kula a maraŋ-ŋɛi-pu-nuu, difeerɛ da pai tooi loai.”—Maafiu 15:14.
2. Kumɛni-kpɛtɛɛ-ŋai da nɛ leŋ a gɛɛ kukaa Ziova polu?
Ŋwɛli-kɛ-maai kulii su Ziova mɛni mai a pai kulii kulai a gɛɛ kufe kuyee pu lɛɛ ɣala-mɛni ta su a pere sii kelee ta. Maa fe nɛ̃ɛ ni kutii kpaa kpɔŋ-gie-ma kelee ta nyii kukaa zui kpaa maŋ mɛni nyii kelee kwa gɛi, e kɛ a bilaŋɔɔ lɛɛ ɣala-mɛni ma. Ziova a ku lia-woo ɓoi nyɛɛi: ‘Ŋanua, ka kula [Babelɔŋ Kɛtɛi] su.’—Mɛni-lɛɛi 18:2, 4.
MƐNI TAMAA MAA-KƆRI
Mɛni-ŋai kaa ya pɔri gɛi a gɛɛ ife nɛɛ naa nuu ta e iwɛli-kɛ-maai su saa Ziova mɛni ma. Berei kaa ya pɔri ŋɔnɔ nɛi la a gɛɛ ikaa Ziova polu a I kulaa Babelɔŋ Kɛtɛi su.
3. Ikpiŋ mɛi kaa a lɛɛ sɛŋ-lɛ-ɓela
Maa nɛ̃ɛi ku tua leŋ kwa lɛɛ mɛni-ŋa mɛni e pilaŋ Ziova ŋɔkpɔŋ-gie-mai ma? Tare-woo-ŋa 14:15 lono, gɛ ni ka lono e pilaŋ mare-kɛɛ ŋi ma:
Le mɛni ɓe kufa laa nɔ la a mɛnii kelee kwa mɛnii?
2 Zɔŋ 9-11 lono, gɛ ni ka lono e pilaŋ mare-kɛɛ-ŋai ŋi dia:
Maa nɛ̃ɛi ku tua leŋ a diai daa kula dɔ̃yai su da tɔɔ mai?
A nɛɛ maŋ kufe lono diai daa kula dɔ̃yai su da tɔɔ mai pɔ, pere sii kɛɛ leŋ ɓe kwa pɔri kɛi kuwoli tɔɔi la disɛŋ-lɛɛ-ŋai dia?
I laai la Ziova lii a pai kɛi leŋ a kɛ kwa kuwoli tɔɔ lɛɛ mɛni-ŋa dia e pilaŋ ma da ŋɔkpɔŋ-gie-mai?
4. Kanaŋ Ziova fɛlii a nɛɛ maŋ iɓaraŋ korai-nuu e sɔnyɔŋ kɛ
Kwa gɔlɔŋ a gɛɛ kuɓaraŋ korai-nuu ta aa sɔnyɔŋ kɛtɛ kɛ korai-toli-kpɔŋ su, le ɓe maa nɛ̃ɛi ku gɛi? Kwaa dɔ̃ya-ŋuŋ ŋi kaa Ɣala Ŋɔtɔŋ su nyii e wɔlɔ dɛɛ Eezuɛ-ŋai pɔi. Levetekɔ 5:1 lono.
Yɛɛ berei gaa la ŋala-kɔlɔ-kpuai ŋi sui, kwa gɔlɔŋ a gɛɛ nuu ta aa sɔnyɔŋ kɛtɛ kɛ, maa nɛ̃ɛi ku mɛnii ku gɔlɔŋ e pilaŋ mai ɓo korai-toli-kpɔŋ laa-tuɛ-ɓelai dia. Kɛɛ ku lɛɛ pai gɛi ti, a pai kɛi a nɛlɛɛ a gɛɛ ku maa nuui ti fɔrɔ a gɛɛ nyaa kpiŋ e li e mo korai-toli-kpɔŋ laa-tuɛ-ɓelai dia. A wala gɛ, kwa pai kuwɛli-kɛ-maai Ziova mɛni mai lɛi a kɛ kwa mo korai-toli-kpɔŋ laa-tuɛ-ɓelai dia. Nyiŋi kɛɛ a wɛli-kɛ-maa su kpanaŋɔɔ lɛ leŋ . . .
Ziova mɛni ma?
nuui zɔnyɔŋ kɛi mɛni ma?
korai-toli-kpɔŋ su-ɓelai mɛni ma?
Iɓaraŋ korai-nuu a kɛ mɛni-kpɔlu su, kpɔŋ maa tɛɛ bɔ!
5. Kula Babelɔŋ Kɛtɛi su
Luu 4:8 da Mɛni-lɛɛi 18:4, 5 lono, gɛ ni ka lono e pilaŋ mare-kɛɛ-ŋai ŋi dia:
Naa kaa nii kɔlɔ ma ɣala-mɛni takpɛni su?
Ŋgaa kpɔŋ-gie-ma ta su nyii bilaŋɔi ɣala-mɛni takpɛni ma?
Ŋatii a kpɔŋ maa tɛɛ lɛɛ ɣala-mɛni ta pɔ a pere sii kelee ta?
Maa nɛ̃ɛi ŋa nii mɛni maa felaŋɔɔ takpɛni-ŋa kɛ ŋakɛ-ɣeniɛi su a pa ŋgulaa ma lɛɛ ɣala-mɛni kelee ta su?
Ŋa kɛ oowei a mare-kɛɛ-ŋai ŋi ta sukula woo, mɛni maa faleŋɔɔ-ŋa kɛɛ leŋ ɓe maa nɛ̃ɛi ŋa gɛi?
Mɛni-ŋai ŋi kelee su, mɛni-kpɛtɛɛ kɛ nyii pai gɛi kili-ŋa-sia lɛlɛɛ e kɛ iyeei, e nɛ a gɛɛ ikaa Ziova polu.
Le ɓe ya pai gɛi a kɛ da I mare kɛ a gɛɛ I kpɔŋ maa tɛɛ kpɔŋ-gie-ma ta pɔ nyii bilaŋɔi lɛɛ ɣala-mɛni mai?
NUA TAŊA DA MO DIYƐƐI: “Ŋa ŋwɛlii nɔ ŋa mɛni-ŋai kɔlɔŋ diai daa kula dɔ̃yai su da tɔɔ mai da mo e pilaŋ Ziova Ŋɔsere-faa Kɛ-ɓelai dia a gɛɛ ŋa pɔri gbɔŋ-gie-mai maa kɔ̃ɔi.”
I laai la nyiŋi kaa a tare mɛni? Le mɛni ma?
MƐNI-ŊUŊ-ŊAI YAA MAA-KƆRII
A gɛɛ ku kanaŋ Ziova fɛlii, maa nɛ̃ɛi ku kpera laoi-laa kɛi a diai ŋwɛlii di ku pɛlɛi.
Gili-too-ŋa mare-kɛɛ-ŋai
Le mɛni ɓe maa fe nɛ̃ɛ ni ku kuwoli tɔɔ la diai dia daa kula dɔ̃yai su da tɔɔ mai?
Le ɓe maa nɛ̃ɛi ku gɛ kwa gɔlɔŋ a gɛɛ kuɓaraŋ korai-nuu ta aa sɔnyɔŋ kɛtɛ kɛ?
Kwa pɔri siai leŋ a nia-wooi a gɛɛ ku kula lɛɛ ɣala-mɛni su?
MƐNI TAKPƐNI-ŊA MAA-KƆRI
Mɛni maa-kɔri e pilaŋ berei ma ya pɔri tuai la nua da lɛɛ mɛni-ŋa ɓo e pilaŋ Ziova Ŋɔsere-faa Kɛ-ɓelai dia.
Ya pɔri gɔlɔni leŋ a kɛ kpɔŋ-gie-ma ta kpaa mɛni-ŋa taŋa pilaŋɔi Babelɔŋ Kɛtɛi ma?
“Kanaŋ Tii Kɛi ‘A Ŋele-ŋai Gbɛɛ Ŋai,’ Kpɛɛ-ŋa ” (Nyeŋkeŋ, Ŋweei 2019, ŋoo-ɣɛli-kpului 16-18)
Le ɓe diai daa kula dɔ̃yai su da tɔɔ mai taŋa daa gɛ a gɛɛ di kulaa-lai su saa?
Zɛŋ-lɛɛi ŋi lono a gɛɛ I mɛni maa-kɔri e pilaŋ berei ma ɣala-mɛni laa-tuɛ-nuu kɛtɛ ta e kula la lɛɛ ɣala-mɛni su: “Ŋaa Tua Ɣala Kɔrii E Siɣe Noloŋ Tãi Ma.”
“Ŋala-kɔlɔi A Nua Dikɛ-ɣeniɛi Maa Faleŋ” (Nyeŋkeŋ, Gbɔɔyɔɔi 1, 2011)