¿Sau adika wais palni tingni dinit yakat sak yah?

BAIBIL SUMALWI APUT

“Amangladi Papang kaupak mayang, sau adika bitik laih dutni [Sitan] dinit yakat sak ki.” (1 Jan 5:19, Papang Yulni, Sociedad Bíblica de Nicaragua.)

“Adika palni yulni kaina Papang Walanibis kidika: muih alasni yulyang [Sitan] yaklau diyamna balna kidika daukalna atnin.” (1 Jan 3:8.)

¿ADIKA SINSNI LÂNI KAUPAK AIS ILPNI DUMA?

Sau akat trabil balna kidika ais yulni kaiwa pa tanka duma ki (Ribilisan 12:12).

Kasak kulnam sip ki sau adika pâ yamni as kalahwarang ki (1 Jan 2:17).

¿BAIBIL SUWALWA KIDIKA RAHM PAH?

Rahm ki, tannika bâs pan laihta talah:

• Sitan parasni duwa kidika daukalna karang ki. Dihuba yaklauwi, Sitan sau minit yakat parasni duwa kidika mahka dis pamnin want ki. Witing pramis yamwi Sitan yakat “minit bayakna atnin”, dawi di dutni yamna bitik kidika danh yamnin (Hibru 2:14).

• Papangh laih Disas yak walwi yakna sau minit yakat king kana atnin. Sitan sau kingni kidika laih, witing manah atnin kulwi dawi kulnin sâni duwi, kaunah Disas laih sat ûk ki. Disas king kawarang yulni Papangh pramis yamwi aput: “Witing yaklauwi laihwi yakna karang, muih minikunni yulwa kidika [...] muih as bik ilp kalanin dis kidika. Miniknakun ditalna karang, limahni balna yakat” (Salmos 72:13, 14).

• Papangh laih alas yulnin dis ki. Baibil kidika barang yulwi: “Papang laih sip alas yulwas ki” (Hibru 6:18). Dihuba di as pramis yamwa kat pat yamna kapat kulnin ki (Isaías 55:10, 11). Witing pramis yamna kalaih “adika sauni akat king kawa kidika kangwi yakna karang” (Jan 12:31).