CINONYELO Cili Ndamo Japenani Mnope

NDUMETUME Paulo, mwakusalilidwa ni Mlungu, jwalembile ndamo 9 syele msimu weswela ukusamkamucisya mundu kola. (Aga. 5:22, 23) Jwalakwe jwasikolasile ndamo syambonesi ni maloŵe gamo kuti sili “cisogosi ca msimu.”a Mundu jwawete “umundu wasambano” akusakola cisogosici. (Akolo. 3:10) Citela cikusasogola naga akucisamalila cenene. M’yoyosoni mundu akusalosya cisogosici naga msimu weswela ukamula masengo cenene pa umi wakwe.—Sal. 1:1-3.

Ndamo jandanda ja cisogosi ca msimu jaŵajikolasile Paulo jili cinonyelo. Ndamoji jili japenani mnope. Mwamtuli? Paulo jwasasile kuti naga nganakola cinonyelo, nikuti jwaliji “jwangali mate.” (1 Akoli. 13:2) Nambo ana cinonyelo cili cici? Ana tukusosekwa kutenda yamtuli kuti tukole ndamoji, soni ana mpaka tujilosyeje mwamtuli lisiku lililyose?

YAKUSATENDA MUNDU PAKULOSYA CINONYELO

Maloŵepe, ngaŵa mkutagulila cenene ngopolelo ja cinonyelo. Nambo Baibulo jikusasala ndamo sine syakusalosya mundu jwakwete cinonyelo. Mwambone, jikusati cinonyelo cili “cakuwusimana mtima soni cacanasa.” “Cikusasangalala ni usyesyene,” soni “cikusasiŵa yindu yosope, cikusakulupilila yindu yosope, cikusajembeceya yindu yosope, cikusapilila yindu yosope.” Cinonyelo cikusapwatikaposoni kwaganicisya mnope ŵane, soni kwawona kuti ali mjawo jusyesyene. Nambo mundu jwangali cinonyelo akusaŵa jwajelasi, jwakulikwesya, jwakutenda yangalumbana, jwakulipikana, jwakutumbila, soni jwangasaka kwakululucila ŵane. Mwakulekangana ni ndamo syangaŵajilwasi, cinonyelo ‘cangatenda yakusaka yakwepe.’—1 Akoli. 13:4-8.

YEHOFA NI YESU ŴALOSISYE CISYASYO CAMBONE CA CINONYELO

Baibulo jikusati “Mlungu ali cinonyelo.” Kusala yisyene, Yehofa ali msyene cinonyelo. (1 Yoh. 4:8) Yaŵapanganyisye soni yakusatenda yikusasimicisya yeleyi. Yehofa jwalosisye cinonyelo cekulungwa kwa ŵandu pakumtumisya Yesu kuti calaje ni kutuwila. Ndumetume Yohane jwatite, “Mlungu ŵalosisye cinonyelo cakwe kwetuwe, pakuŵa ŵamtumisye Mwanagwe jwakupagwa jika pacilambo capasi, kuti kupitila mwa jwalakwe tupate umi. Cinonyelo celeci cikulosya kuti m’weji nganitumnonyela Mlungu, nambo jwalakwe ni jwaŵatunonyele ni kutumisya Mwanace jwakwe mpela mbopesi jakusiŵa ulemwa wetu.” (1 Yoh. 4:9, 10) Ligongo lya cinonyelo ca Mlungu, jwalakwe mpaka atukululucile yakulemwa yetu, soni mpaka tukole cembeceyo ca umi wangamala.

Yesu jwalosisye kwanonyela kwakwe ŵandu mwakutenda lisosa lya Mlungu mwakusacilila. Paulo jwalembile kuti, “[Yesu] jwatite, ‘Alole! Une mbice kukutenda lisosa lyawo.’ . . . Mwa ‘lisosa’ lyeleli, tuswejesyedwe kupitila mu cilu ca Yesu Klistu cacapelecedwe mpela mbopesi kampepe basi.” (Ahe. 10:9, 10) Pangali mundu jwampaka alosye cinonyelo cakupunda celeci. Yesu jwatite, “Pangali jwakwete cinonyelo mpela celeci, cakuti jwine mpaka apelece umi wakwe ligongo lya acimjakwe.” (Yoh. 15:13) Ana ŵandu ŵangali umlamawe mpaka tukombole kulosya cinonyelo mpela muŵatendele Yehofa ni Yesu? Elo! Kwende tulole mwampaka tutendele yeleyi.

“AJENDELECELE KWENDA M’CINONYELO”

Paulo jwatulimbikasisye kuti, “Amsyasyeje Mlungu, mpela ŵanace ŵakwe ŵakunonyelwa, soni ajendelecele kwenda m’cinonyelo, mpelasoni muŵatunonyelele Yesu ni kulipeleka jika ligongo lya m’weji.” (Aef. 5:1, 2) ‘Tukusajendelecela kwenda m’cinonyelo’ naga tukulosya ndamoji pa yosope yatukusatenda, ngaŵaga m’maloŵepe. Yohane jwalembile kuti, “Ŵanace ŵangu ŵakunonyelwa, tukanonyelanaga ni maloŵepe kapena ni pakamwape, nambo tulosyaneje cinonyelo cisyesyene mu yitendo yetu.” (1 Yoh. 3:18) Mwambone, naga tukusamnonyela Mlungu soni acimjetu, tucijendelecela kuwandisya “ngani syambone syakwamba ya Ucimwene” kwa ŵane. (Mat. 24:14; Luk. 10:27) Tukusajendasoni m’cinonyelo ca Mlungu naga tukuŵa ŵakuwusimana mtima, ŵacanasa, soni ŵakululuka. Baibulo jikusatusalila kuti, “Mpela Yehofa ŵakululucile ni mtima wosope, jemanjasoni atende yeleyo.”—Akolo. 3:13.

Nambo cinonyelo celeci nganiciŵa kwamba kulecelela yiliyose. Mwambone, nangolo jwakumlelela mwanace pacilolo, akusampaga mwanacejo cilicose cakusaka soni ŵangamjamuka. Nambo nangolo jwakusamnonyela yisyesyene mwanace jwakwe jwangatenda yeleyi. Yimpepe yakwe ni Mlungu. Jwalakwe ali cinonyelo, nambo “akusiŵapa cilango ŵandu ŵakusiŵanonyela.” (Ahe. 12:6) Naga tukwenda m’cinonyelo, tucajamukasoni ŵane naga pakusosecela. (Miy. 3:11, 12) Nambo pakutenda yeleyi tukaliŵalila kuti m’wejisoni twapali ni ulemwa, mwamti ndaŵi sine tukusatenda yindu yangali cinonyelo. Yeleyitu yikulosya kuti jwalijose akwete yakusosekwa kongolela panganiji. Ana mpaka tutende yamtuli kuti tujongolele? Kwende tulole matala gatatu.

YATUKUSOSEKWA KUTENDA KUTI TUKOLE CINONYELO

Candanda, am’ŵendeje Mlungu kuti ŵape msimu wakwe ligongo ukusamkamucisya mundu kola cinonyelo. Yesu jwasasile kuti Yehofa akusapeleka “msimu weswela kwa ŵandu ŵakum’ŵenda.” (Luk. 11:13) Naga tukuŵenda msimu weswela, ni kulingalinga ‘kwenda mwa msimuwo,’ yakutenda yetu yicilosya kuti tukwete cinonyelo. (Aga. 5:16) Mwambone, naga wawojo ali jwamkulungwa jwa mumpingo, mpaka aŵendeje msimu weswela kuti wakamucisyeje kwajamuka ŵane ni Malemba mwacinonyelo. Kapena naga ali nangolo, mpaka aŵendeje msimu weswela kuti wakamucisyeje kwajamuka ŵanace mwacinonyelo, ngaŵaga mwaukali.

Caŵili, amsyasyeje Yesu juŵalosisye cinonyelo atamose paŵamtendelaga yangalwe. (1 Pet. 2:21, 23) Tukusosekwa kuganicisya cisyasyo ca Klistu mnopemnope ŵane patutandite, kapena patutendele yangali cilungamo. Ciwusyo cambone kuliwusya ŵane patutendele yeleyi cili cakuti, ‘Akaŵe Yesu, ana akatesile cici pelepa?’ Mlongo jwine lina lyakwe Leigh jwasasile kuti ciwusyoci cikusamkamucisya kuti akatendaga yindu mwakuwutuka miyasi. Jwalakwe jwatite, “Lisiku line, mundu jwine jwakumasengo kwetu jwalembile yakusakala yakwamba uneji ni masengo gangu, ni kwatumicisya acimjangu ŵane kumasengo kwetu. Yambwetece mnope mumtima. Nambo kaneko naliwusisye kuti, ‘Ana mpaka namsyasye wuli Yesu pakutenda yindu ni munduju?’ Pambesi paganicisya yakatesile Yesu panganiji, nasagwile kuti ngambe kuyileka. Pali papite kandaŵi, napikene yakuti mundu jula jwalwalaga, soni kuti yindu ngayikumjendela cenene. Sano napikanicisye ligongo lyakwe ŵalembile yindu yila. Cisyasyo ca Yesu cakulosya cinonyelo atamose ŵane ali amtendele yangali cilungamo cangamucisye kumtendela yakulandanayo mundu jwakumasengo jula.” Kusala yisyene, naga tukumsyasya Yesu, tucitendaga cilicose mwacinonyelo.

Catatu, akoleje cinonyelo cakunda kulaga kuti ŵakamucisye ŵane. Cinonyelo celeci ni cacikusamanyikasya ŵali Aklistu ŵasyesyene. (Yoh. 13:34, 35) Pangani jeleji, Malemba gakusatulimbikasya kuti tukole “nganisyo” mpela siŵakwete Yesu. Paŵatyosile kwinani, “jwalesile yakwe yosope” ligongo lya m’weji, mpaka ‘ŵatuwilile.’ (Afi. 2:5-8) Kuganicisya ya cisyasyo cakwe cakunda kulaga kuti ŵakamucisye ŵane, kucitukamucisya kuŵa mpela Klistu. Yeleyi yicitutendekasya kuŵika yakusaka ya ŵane pasogolo, ngaŵaga yetu. Ana kola cinonyelo kuli kwambonesoni m’matala gane gapi?

UMBONE WAKULOSYA CINONYELO

Kwanonyela ŵane kuli kwambone mnope. Kwende tulole maumbone gaŵilipe:

• LIKUGA LYAKAMULANA LYA PACILAMBO COSOPE: Ligongo lyakuti tukusanonyelana, mumpingo wa Mboni wuliwose wampaka tukasongane pacilambo cosope, abale ni alongo mpaka atupocele ni magasa gaŵili. Uli upile wekulungwa kuti ‘likuga lyosope lya abale ŵetu m’cilamboci’ akusatunonyela! (1 Pet. 5:9) Pangalisoni kwine kwampaka tupate cinonyelo mpela celeci!

• MTENDELE: “Kundililana m’cinonyelo” kukusatukamucisya kuti tusangalaleje ni ‘mtendele wawuli cakutaŵila cakutukamulanya.’ (Aef. 4:2, 3) Tukusalipikana kuti tuli pamtendelewu patuli kumisongano ja mpingo, soni pamisongano jekulungwakulungwa. Ana ngakusimicisya kuti mtendele mpela welewu uli wakusoŵa m’cilambo cangali mtendeleci? (Sal. 119:165; Yes. 54:13) Kutenda yindu mwamtendele ni ŵane kukusalosya kuti tukusitwanonyela, mwamti Atati ŵetu ŵakwinani akusasangalala ni yeleyi.—Sal. 133:1-3; Mat. 5:9.

‘CINONYELO CIKUSALIMBISYA’

Paulo jwalembile kuti, ‘Cinonyelo cikusalimbisya.’ (1 Akoli. 8:1) Ana cinonyelo cikusatenda yeleyi camtuli? Mu caputala 13 ca cikalata ca Paulo cakwawula kumpingo wa Akolinto, jwalakwe jwasasile yacikusatenda cinonyelo pakulimbisya. Cindu cimo caŵacikolasile cili cakuti cinonyelo cikusalongosya yakusaka ya ŵane. (1 Akoli. 10:24; 13:5) Ligongo lyakuti cinonyelo cikusasamala ya ŵane, cili cakuwusimana mtima, soni cacanasa, yikusakamucisya ŵandu kola maŵasa gakunonyelana, soni mipingo jakamulana.—Akolo. 3:14.

Kumnonyela Mlungu kuli kwakusosekwa mnope. Ligongo cinonyelo celeci cikusakamulanya ŵandu ŵamitundu ni yiŵeceto yakulekanganalekangana pakumtumicila Yehofa “mwakamulana.” (Zef. 3:9) Kwende tulosyeje ndamo japenaniji lisiku lililyose.