Tukusalijiganya ya Mlungu Kupitila mwa Atumiki Ŵakwe
Kalakala Mlungu ŵasalilaga ŵandu Maloŵe gakwe kupitila mwa atumiki ŵakwe. Maloŵe gelega mpaka gatukamuchisye kumanyilila yindu yatukusosekwa kutenda kuti Mlungu atutendeleje yindu yambone. Kwende tulole yatukulijiganya kutyochela kwa atumiki ŵatatu.
ABULAHAMU
Mlungu ali jwangali lusagu soni akusasaka kwatendela ŵandu yindu yambone.
Mlungu ŵamsalile jwakutumichila Abulahamu kuti “tinjapa upile ŵandu wosope.”—Genesesi 12:3.
Ana tukulijiganya chichi? Mlungu akusatunonyela mnope mwamti akusasaka kuti ŵandu wosope ŵakusampikanilaga ŵatendele yindu yambone.
MOSE
Mlungu ali jwachanasa soni akusiŵatendela yindu yambone ŵandu ŵakusachilila kummanyilila jwalakwe.
Mlungu ŵampele machili Mose gakutendela yakusimonjesya. Mose jwapopesile kuti, “Asalalile mtima, andosye matala gawo kuti namanyilile ŵalakwe.” (Ekisodo 33:13) Mlungu jwasangalele ni yaŵaŵendile Moseyi. Mwamti ŵampele lunda lwalwamtendekasisye kuti apikanichisye mwakusatendela yindu soni ndamo syakwe. Mwachisyasyo Mose jwalijiganyisye kuti “Mlungu ali jwachanasa ni jwambone mtima.”—Ekisodo 34:6, 7.
Ana tukulijiganya chichi? Naga tukutenda yakomboleka kuti tummanyilile chenene Mlungu, jwalakwe chachitutendela yindu yambone. Kupitila m’Maloŵe gakwe jwalakwe jwasasile yatukusosekwa kutenda kuti tumtumichileje. Jwalakwe jwatusimichisyesoni kuti chachitutendela yindu yambone.
YESU
Ligongo lya chanasa Yesu ŵaposyaga ŵandu ŵakulwala
Mlungu mpaka atutendele yindu yambone naga tukulijiganya yaŵatendaga Yesu soni yaŵajiganyaga.
Maloŵe ga Mlungu gakusasala yejinji yakwamba Yesu nambosoni yaŵajiganyaga. Mlungu ŵampele Yesu machili gakutendela yakusimonjesya, mpela kwaposya ŵangalola, ŵangapikana soni ŵandu ŵalemale. Jwalakwe jwayikene pakwajimusya ŵandu ŵawe. Yaŵatesile Yesuyi yikulosya yindu yambone yele Mlungu yachachatendela ŵandu wosope. Jwalakwe jwasasile yindu yakusosekwa kutenda mundu jwalijose kuti tasangalale ni yindu yamboneyi. Maloŵe ga Mlungu gakusati, “Umi wangamala ugopolela kuti ŵamanyilile ŵalakwe ŵali Mlungu jikape ŵakuwona, nipo soni ammanyilile Yesu Klistu juŵamtumile wawojo.”—Yohane 17:3.
Yesu ŵanonyelaga ŵandu soni ŵatendelaga chanasa. Ŵandu ŵajinji ŵapite kwa Yesu paŵampikene ali mkuŵecheta kuti, “Mlijiganye kwa une, pakuti ndili jwakutulala mtima ni jwakulinandiya; naga mkutenda yingumsalilayi, timchisimana chipumulisi cha umi wenu.” (Mateyu 11:29) Mwakulekangana ni ŵandu ŵane ŵaŵalagasyaga achakongwe, Yesu ŵatendelaga chanasa achakongweŵa soni ŵachimbichisyaga.
Ana tukulijiganya chichi? Yesu ŵanonyelaga mnope ŵandu. Nombe m’we tukusosekwa twanonyeleje ŵandu ŵane mpela muŵatendelaga Yesu.
YESU NGAŴA MLUNGU
Maloŵe ga Mlungu gakusati “tukwete Mlungu jumpepe” soni kuti Yesu ali mtumiki jwa Mlungu. (1 Akolinto 8:6) Yesu jwasasile mwakupikanika chenene kuti Mlungu ali jwamkulungwa kupunda Yesujo soni Mlungujo ni juŵamtumile Yesu pachilambopa.—Yohane 11:41, 42; 14:28.a
a Kuti amanyilile yejinji yakwamba Yesu Klistu alole kabuku kakuti, Cikulupi Cisyesyene Cikusatukamucisya Kuŵa Ŵakusengwa mbali 8 ni 9 pa www.pr418.com/yao.