Mpaka Tusangalale ni Yindu Yambone Yatupele Mlungu Mpaka Kalakala

Mlungu ŵamsalile Abulahamu kuti, kupitila mwa mundu jumo “mitundu josope ja ŵandu ŵapachilambo chapasi” jichisangalala ni yindu yambone. (Genesesi 22:18) Ana mundu jweleju ali ŵani?

Chiŵandika yaka 2,000 yipiteyo, Mlungu ŵampele machili Yesu juŵatyochele mu msele wa Abulahamu kuti atendeje yakusimonjesya. Yakulochesyayi yalosyaga kuti yaŵaŵechete Mlungu kwa Abulahamu yichikwanilichikwa kwa ŵandu kupitila mwa Yesujo.—Agalatiya 3:14.

Yakusimonjesya yaŵatesile Yesu yakamuchisye ŵandu kumanyilila kuti jwalakwe jwaliji jwakusagulidwa ni Mlungu. Yeleyi yalosisyesoni yachachitenda Mlungu pakumkamulichisya masengo jwalakwe pakwatendela ŵandu yindu yambone mpaka kalakala. Kwende tulole ndamo sya Yesu sisyawonechele payakusimonjesya yaŵatendaga.

Yesu ŵaganichisyaga ŵane mwakuposya ŵakulwala.

Mundu jwakulwala matana paŵamwendile Yesu kuti amposye, Yesu ŵamkwayiye mundujo ni kuŵecheta kuti, “ngusaka.” Ndaŵi jijojo mundujo jwaposile.—Maliko 1:40-42.

Mwakoloŵa magasa, Yesu jwalisisye ŵandu ŵasala.

Jwalakwe nganiŵaleka ŵandu kuti alaje ni sala. Ndaŵi jine Yesu ŵalisisye ŵandu mwakusimonjesya pakamulichisya masengo mikate msano ni somba siŵilipe. (Mateyu 14:17-21; 15:32-38) Ŵanduwo paŵalile ŵajikwite mwamti yakulya yejinji yasigele.

Ligongo lya chanasa, Yesu ŵajimwisye ŵandu ŵawe.

Chanasa chamtendekasisye Yesu kumjimusya mwanache jwamlume jumopejo jwa jwamkongwe jwamasije.—Luka 7:12-15.