Yehofa akusiŵatamikasoni pasi mtima ŵandu ŵakusimana ni yakusawusya soni kwalimbikasya. Ana mpaka tumsyasye chamtuli Yehofa pangani jakwatendela ŵane chanasa soni kwalimbikasya? Litala limo lyampaka litukamuchisye lili kola ndamo syampaka situkamuchisye kuti twatendeleje ŵane chanasa soni twalimbikasyeje. Ana sine mwa ndamo syelesi sili syapi? Ana chichi champaka chitukamuchisye kuti tunonyelaneje mnope ni chakulinga chakuti “tupitilisye kulimbikasyana” lisiku lililyose? (1 Ates. 4:18) Kuti tukombole kutenda yeleyi tukusosekwa kola mtima wakwaganichisya ŵane, kunonyelana soni umbone mtima. (Akolo. 3:12; 1 Pet. 3:8.) Ana ndamo syelesi mpaka situkamuchisye chamtuli? Naga tukwete ndamo syelesi mumtima mwetu, tuchikombola kwakamuchisya abale ni alongo ŵetu pandaŵi jasimene ni yakusawusya. Yesu jwasasile kuti, “Pakamwa pakusaŵecheta yayigumbele mumtima. Mundu jwambone akusakoposya yindu yambone kutyochela m’chipanje chakwe chambone.” (Mat. 12:​34, 35) Myoyo, kwalimbikasya abale ni alongo ŵetu pandaŵi jakusimana ni yakusawusya lili litala limo lyambone mnope lyakulosya kuti tukusitwanonyela jemanjaji. w23.11 10 ¶10-11

Kuti tuyipikanichisyeje yakulochesya ya m’Baibulo tukusasosekwa kuŵenda chikamuchisyo. Aganichisye chakutendekwa achi: Tuwanichisye kuti ajesile ni mjawo jwinejwakwe ni apite kumalo kwele wawojo ngakukumanyilila chenene, nambo mjawojo akukumanyilila chenene. Mwamti mjawojo akumanyilila chenene kwali nambosoni akumanyilila kwakwinjilila. Ngatukukayichila kuti mpaka asangalale kuti mjawojo jwakundile kwapechesya. Nombe Yehofa ali mpela mjetu jweleju. Jwalakwe akusamanyilila yiliyose yayikututendechela. Myoyo kuti tupikanichisyeje yakulochesya ya m’Baibulo tukusasosekwa kulinandiya soni kumŵenda Yehofa kuti atukamuchisye. (Dan. 2:28; 2 Pet. 1:​19, 20) Mpela mwakusatendela nangolo jwambone, nombe Yehofa akusasaka kuti ŵanache ŵakwe akole sogolo jambone. (Yel. 29:11.) Nambo mwakulekangana ni achinangolo, Yehofa mpaka asale yakutendekwa yamsogolo ni kutendekwa ndendende. Yehofa ŵasagwile achalume kuti alembe yakulochesya yayili m’Baibulo ni chakulinga chakuti tumanyilileje yakutendekwa yakusosekwa mnope mkaniyiŵe kutendekwa.—Yes. 46:10. w23.08 8 ¶3-4

Mlungu ampele Yesu machili gakumachisya yakusawusya yakusimana nayo ŵandu. Mwakutenda yakusimonjesya, Yesu jwalosisye kuti akwete machili gakumachisya yakusawusya yakusasimana nayo ŵandu, yanganaŵa akombwele kumalana nayo mwajika jawo. Mwachisyasyo, jwalakwe akwete machili gakumasya ulemwa, soni ulwele ni chiwa yayikusayika ligongo lya ulemwawo. (Mat. 9:​1-6; Alo. 5:​12, 18, 19) Yakusimonjesya yajwatesile jwalakwe yikusalosya kuti akwete machili gakwaposya ŵandu wosope ku yilwele yamtundu uliwose soni kwajimusya ŵandu ku chiwa. (Mat. 4:23; Yoh. 11:​43, 44) Nambosoni jwalakwe akwete machili gakwimika mbungo jamachili soni kukoposya yiŵanda yakusakala mwa ŵandu. (Maliko 4:​37-39; Luk. 8:2) Kusala yisyene yili yakusangalasya kumanyilila kuti Yehofa ŵampele machili Mwanache jwakwe. Yakusimonjesya yaŵatesile Yesu yikusatusimichisya kuti yindu yambone yiŵasasile Mlungu yichitendekwa mu Uchimwene wakwe. Yakusimonjesya yaŵatesile Yesu ali pachilambo chapasi, yikusatujiganya kuti jwalakwe chachitenda yindu yejinji mu Uchimwene wa Mlungu. w23.04 3 ¶5-7