Ran Fl’eg Laniyan’ e Ani Ke Kireban’

“Urngin e tin ni ke sunumiy e yugu be gel’gel’ ko amith u taabang ke mada’ ko chiney.” (Roma 8:22) Gafgow ko girdi’ e ke el mirin boch nga rogon ni kan yoloy ni ke pag 1,900 e duw faram. Ya ke yoor i yan e girdi’ ni ke mulan’rad. Aram fan ni ka nog ko pi Kristiano ni: “Ngan pi’ e athmagil nga laniyan’ e piin ni yad be rus.”—1 Thessalonika 5:14.

Ngiyal’ ney e ke gel i yan e gafgow ma ke yoor boch ko ka faram e girdi’ ni kar pared ni yad ba kireban’. Ma susun ngada gingad ko re n’ey, fa? Ri danga’, ya ke m’ay i tamilangnag ko Bible ni iraray e pow ko “tin tomren e rran” ni yima yog ni “kari mo’maw ni ngan par.” (2 Timothy 3:1-5) Ki weliy Jesus Kristus ni ra taw nga tomren e rran ma ra moy “boor mit e gafgow ko pi nam” ma “girdi’ [e] yad ra aw nga but’ ko marus nap’an ni yad be sonnag e pi n’en ni ra yib nga daken e re but’ ney.”—Luke 21:7-11, 25-27; Matthew 24:3-14.

Nap’an ni ra n’uw nap’an boch ni par e girdi’ u fithik’ e magafan’, tamdag, gafgow, nge ku boch ban’en ni bod e tiney ma ra mulan’rad. Ku boch ban’en ni ma k’aring e tomal ko tafinay nge kireban’ nib gel e ra yan i aw ni be’ ni rib t’uf ni ke yim’, ara mabgol ni ke wer, fa kan n’agey ko maruwel, fa m’ar ni dab ni gol riy. Ku ma kireban’nagey e lem ni gowa dariy be’ ni be lemnagey fa dariy fadad. Faanra aram rogon e kireban’ ko girdi’ ma ra munmun ma ra chuwan’ ko gubin ban’en ma aram e ke tomal laniyan’. Ma dakuriy e athap rok ni nge chuw u fithik’ e pi n’ey.

Kakrom e immoy boch e girdi’ ni kar pirieged ni aray rogon. Job e gafgow ko m’ar nge buch waathan. Ke lemnag ni ke n’ag Got, me weliy ni ke chuwan’ ko yafas ara yafas e ba kireb. (Job 10:1; 29:2, 4, 5) Kari gel e kireban’ rok Jacob ni bochan ni mich u wan’ e bitir rok ni ke yim’, ma ke siyeg ni ngan fl’eg laniyan’ ya ke finey ni kab fel’ nra yim’. (Genesis 37:33-35) Denen nib ubchiya’ e ku ma magawonnag lanin’uy. David ni pilung e i dolo’loy ni yog ni gaar: “Gubin e rran ni polo’ e gu be yan ni ke m’ing kauog, ma kug th’ab gulingag.”—Psalm 38:6, 8; 2 Korinth 7:5, 6.

Ku er rogon e chiney, kari yoor e girdi’ e be gafgow ni bochan e tax ni kaygi tomal ngorad, ma yad be fol riy ni nguur rin’ed nib mo’maw ngorad nge lem rorad nge laniyan’rad. Ma bay e mich riy ni lem ni aram rogon e ma kirebnag e dowef nge man’ey ma ra k’aring e kireban’.—Mu taarebnag ko Proverbs 14:30.

Tin Ba Tuf Rorad e Ayuw

Epaphroditus, reb e Kristiano ko tin somm’on e chibog u Filippi e ri “kireban’ nib gel ni bochan e ke rung’ag [pi tafager rok] thin ni ke m’ar.” Epaphroditus e m’ar u tomren ni ke pi’ e pi fager rok nga Roma ni nge ayuweg apostal Paul, ya sana i lemnag ni pi fager rok e kar pied ngaram ya bochan e dariy rogon u wan’rad. (Filippi 2:25-27; 4:18) Ba uw rogon ni pi’ apostal Paul e ayuw?

Ke sulweg Epaphroditus nga tabinaw ngak e pi fager rok nu Filippi ni ke chagiy bang e babyor ngak ni gaar: “Mu feked [Epaphroditus] nga tabinaw romed u fithik’ e falfalan’ ni bochan Somol, mu um ted fan urngin e girdi’ ni bod ir.” (Filippi 2:28-30) Bin riyul’ i fan ni ke yog Paul ngak yu Filippi morngaagen nge tin ngan rin’ ngak e fan e ngar fl’eged laniyan’ Epaphroditus me chuw e kireban’ rok.

De maruwar e thin ko Bible ni gaar: “Mu fl’eg laniyan’ e piin ni ke kireban’ ara piin ni yad be rus” ya aram e bin rib fel’. I yog reb e ppin ni pirieg ni ke gafgow ko kireban’ ni gaar: “Rib t’uf ni ngam nang ni be lemnagey boch e girdi’.” “Ku ba t’uf rom ni nge non be’ ngom ara ngam rung’ag ni yog be’ ni gaar: ‘Kari gu nang fan; ma bayi fel’ rogom.’ ”

Be’ ni ke magawon ko kireban’ e ma gay be’ nib mutrug nib pagan’ ngak ma manang fan boch ban’en. Be’ ni ma motoyil nib fel’ rogon ma ba k’adan’. Be’ ni dabi turguy e n’en nge rin’ e ani ke kireban’ nib gel’. Dabi gaar: ‘Dab um lem ni arrogon’ ara ‘rib kireb ni ngam rin’ ni arrogon.’ Be’ ni ke gel e kireban’ ngak e ke mom ni nge buch ban’en rok ere rogon ni ra rung’ag ban’en ni ra bakreb ngak ma ra gelnag boch fare kireban’ rok.

Be’ ni ke kireban’ nib gel e ra mulan’. (Jonah 4:3) Yu ngiyal’, ma daki lemnag e girdi’ ko u rogon fel’ngin Got ngorad. Bod ni rin’ e girdi’ ni ur dariy fannaged Jesus. Machane urngin e pi n’ey ma de yog ni ra thiliyeg fel’ngin u wan’ Got. (Isaiah 53:3) Nge riyul’ u wan’um ni rib t’uf fak Got rok, ma ku er rogom ni ri ka gab t’uf rok.—John 3:16.

I taganan’ Jesus ngak fapi cha’ ni kar pared ni ke gafgowan’rad me guy rogon ni nge ayuwegrad ni ngar nanged ni rib ga’ farad. (Matthew 9:36; 11:28-30; 14:14) I weliy ngorad fel’ngin e nochi sparrow u laniyan’ Got. Ke gaar: “Ndariy taa bagayad ni yan ni ke pag Got talin.” Ra u rogon fel’ngin e girdi’ ni piin yad be guy rogon ni ngar rin’ed e tin ni ba m’agan’ ngay! Ma fan e pi n’ey me yog Jesus ni gaar: “ni mus nga piyan lolugmed ma ke m’ay i thieg.”—Luke 12:6, 7.

Riyul’, ba mo’maw rok be’ ni ke tomal laniyan’ nib gel ni fan ko meewar rok ara ke meewar ni nge mich u wan’ ni ri kab ga’ fan’ u wan’ Got. Dabi siy ni ra lemnag ni dakuriy fan ko runguy rok Got ma dakir lemnag. “Gumercha’dad e sana ra turguy ni gad ba kireb.” Ma thin rok Got e ma micheg e re n’ey. Machane kan micheg nib riyul’, fa? Danga’, da gathi er rogon. Got e ma nang ni girdi’ e yad ra denen me mulan’rad ya kar turguyed e oloboch rorad. Ma er fan ni thin ko cha’nem e ra pi’ e pagan ngorad. “Got e kab ga’ nga gumercha’dad ma ma nang urngin ban’en.”—1 John 3:19, 20.

Arrogon, Chitamangdad nu tharmiy e ma runguydad ya ma guy e denen rodad nge oloboch rodad ni rib fel’ rogon. Ma nang rogon e mithmith ko yafas rodad nge gin be sor i yan ngay. Ma nang ni kad awgad ko denen, liliy nge yam’, nge gini ra yan i mus ngay. Bin riyul’ i fan ni ke kireban’dad ma kad magawongad e bay e mich riy ni dabudad ni nguud denengad i yan. Ya Bible e yog ni “ke m’ay fadad,” aram e n’en ke magawonnag laniyan’dad. Ar fan ni ke runguydad Got ke un i chibiy boch e gofgow nge meewar rodad.—Roma 5:12; 8:20.

“Jehovah ir e ba wurengan’ mab ta runguy e girdi’ ” ni rib pagan’dad ngay. “Feni palog thilin e ngek nge ngal e aram rogon nra chuweg e denen rodad nge palognag. Ya ma nang rarogodad ni gad bod e fiyath.” (Psalm 103:8, 12, 14) Riyul’ ni Jehovah ir fare Got ko fl’eg laniyan’ ni ma fl’eg laniyan’dad u nap’an ni ke yib e gafgow ngodad.”—2 Korinth 1:3, 4.

Re n’en nra ayuweg e piin ni ke kireban’rad e ba t’uf ni ngar chugurgad ko fare Got rorad nib wurengan’ ngar faned fare pong ni ke tay ngorad ni ngar “paged fan ngak e tin ke tomal ngorad. Ya riyul’ ni ra sulweg nga rogon e gumerchaey ni ke maadad.” (Psalm 55:22; Isaiah 57:15) Ere thin rok Got e ma pi’ gelngin e meybil ni gaar: “Mu pag e magafan’ rom ngak [Jehovah] ya be lemnagem.” (1 Peter 5:7) Arrogon, meybil u fithik’ e sobut’an’ e ma chugurnag e girdi’ ku Got me falfalan’rad ko ‘gapas rok nra par u laniyan’rad.’—Filippi 4:6, 7; Psalm 16:8, 9.

Ra un mechameg u rogon e yafas ma ra ayuwegey ngan gel ko kireban’. Ra un chamag, ra un kay e ggan nib fel’, muun tanifeng ma yibe toffan nib fel’ min palog i yaliy e TV urngin e pi n’ey e rib ga’ fan. Reb e ppin e ayuweg be’ ni ke kireban’ ni i towasariy ni nga yugu uranow u kanawo’. Fare ppin ni ke kireban e gaar: “Dabug ni nga gu un ko yan,” me fulweg fa binem e ppin ni rib sumunguy mab mudugil e thin rok ni gaar: “Arrogon, ri ga ra un ko yan.” Ba aray rogon ni ke yog fare ppin: ‘Kugu warow u aningeg e mayil. Ma nap’an ni gu sulow ma kari magar machane ke fel’ laniyan’. Dabi mich u wan’um ni faan ra um towasariyem nguum maruweliy ban’en nra ayuwegem nge mada’ ko ngiyal’ ni kam pirieg angin.’

Ma bay yu ngiyal’ ni ga ra rin’ urngin ban’en ni mus ko tafalay ma ku dabi chuweg e kireban’. I yog reb e ppin ni ke puelwol ni gaar: “Kug rin’ urngin ban’en ma de chuweg e kireban’ rog.” Taareb rogon ko ngiyal’ ney ni dabiyog ni ngan golnag be’ nib malmit, ara bbaling ara ba mugutgut. Machane thin rok Got e kan pirieg ni ra un bieg min nang ni ke turguy ngalan’ ma ra fl’eg lanin’uy ya ra yibnag e bin riyul’ e l’agan’ ni ra chuweg e m’ar ko girdi’ ni gubin.—Roma 12:12; 15:4.

Ngiyal’ ni Dakuriy Be’ ni Ra Kireban’ Bayay

Nap’an ni ke weliy Jesus rogon fapi n’en ni ra k’aring e gafogw ni ra yib nga daken e fayleng ko tin tomren e rran miki gaar: “Faanra tabab i m’ug e pi n’ey mi gimed sak’iy ngam changargad nga lang ya ke chugur ni ngan chuwegmed u fithik’ e gafgow.” (Luke 21:28) Be yog Jesus ni ngada chuwgad ko gafgow ngada afgad ko bin biech e fayleng rok Got ni aram “e gin ba puf rogodad riy ni dab kud manged sib ko wod ya kada manged pi fak Got.”—Roma 8:21.

Ngiyal’ ni ra chuw e gafgow ko girdi’ ma ke puf rogoy ni dakuriy e tin i tomalnagrad ni bod ka faram, ma yad ra yan nga reb e rran ma be tamilang i yan lanin’uy, ma ra baud lanin’uy ni kan adag ni ngan rin’ e maruwel ko yu rran! Dakuriy ban’en ni ra taleg be’ ni bochan e kireban’. Fare n’en ni ke micheg Got ngak e girdi’ e ke riyul’ ni “ra n’ag urngin e lu’ u owcherad, ma dab ku unim, ma dab ki kireban’uy ara un yor ara un amith. Ya tin kakrom ban’en e ke chuw.”—Revelation 21:3, 4.

Faanra de yog, ma urngin e thin ko Bible e aram e kan fek ko fare New World Translation of the Holy Scriptures.