Guruy Ni 2

Ngan Nang Rogon Nib M’ag E Liw Rok Kristus Ko Tin Ni Yarmiy Got

“Nap’an ni tabab Got ngay ni nge sunumeg e fayleng nge urngin ban’en ni bay u lan e lang,” ma gubin ban’en ni i ngongliy e “rib fel’.” (Gen. 1:1, 31) I sunumeg Jehovah e girdi’ nra yog e par nib fel’ ngak nga m’on rok. Machane fare togopuluw ni buch u Eden e ke magawonnag e par nib fel’ ko urngin e girdi’. Dawori thil e tin nib m’agan’ Jehovah ngay ko fayleng nge girdi’. Mus ko ngiyal’ ni ke pufthinnag e piin ni kar togopuluwgow ko gagiyeg rok, ma i tamilangnag Got ni girdi’ rok Adam ni ra fol rok e ran thapegrad ngak. Ran sulweg nga rogon e bin riyul’ e liyor, ma ra thang Got fa en nib kireb nge maruwel nib kireb rok. (Gen. 3:15) Ma aram ma gubin ban’en e bayi par ni “rib fel’” biyay. Bayi rin’ Jehovah e pi n’en ney u daken Fak, ni Jesus Kristus. (1 John 3:8) Ere, rib ga’ fan ni ngad nanged rogon nib m’ag e liw rok Kristus ko tin ni yarmiy Got.​—Acts 4:12; Fil. 2:9, 11.

LIW ROK KRISTUS

Nap’an ni ngan lemnag rogon nib m’ag e liw rok Kristus ko tin ni yarmiy Got, ma thingar da nanged ni bay boor ban’en nib l’ag ngay. Ya Jesus e ir fa en ni ke Biyuliy e girdi’, ma ir fare Prist nib Tolang, ma ir Lolugen fare ulung ko Kristiano, ma chiney i ir fare Pilung ko Gil’ilungun Got. Faan gad ra fl’eg i lemnag e pi n’en ney ma ra ayuwegdad ngad ted fan e yaram rok Got ma ra gelnag e michan’ rodad ni ba t’uf Kristus Jesus rodad. Be tamilangnag e Bible u murung’agen e pi liw rok.

Nap’an ni i wereg Kristus e machib u fayleng ma kan tamilangnag ni ir e ra fl’eg thilin Got nge piin ni ma fol rok. (John 14:6) Ir fa en ni ke Biyuliydad ya ke pi’ ir ni maligach ni fan ko boor e girdi’. (Matt. 20:28) Gathi ke mus ni ke dag Jesus rogon e ngongol nib mat’aw. Ya ke mang kenggin e n’en ni ngongliy Jehovah ni nge rin’ e tin nib m’agan’ ngay ni fan ko girdi’. Kari mus ni ir e ra ayuwegdad ngad fel’gad u wan’ Got. (Acts 5:31; 2 Kor. 5:18, 19) Yam’ ni tay Jesus nge fas ko yam’ rok e ke pithig e kanawo’ ko piin ni ma fol rok nge yog e flaab ndariy n’umngin nap’an ngorad u tan e gagiyeg ko Gil’ilungun Got nu tharmiy.

Jesus Kristus e ku ir e Prist nib Tolang u tharmiy. Aram rogon nrayog ni nge ‘nang rogon ni gad ba meewar’ me biyuliy e piin ni kar ognaged yad ngak u fayleng ni yad ma denen. I weliy apostal Paul ni gaar: “Re prist rodad nem nib th’abi tolang e gathi reb e prist ndabi kireban’ ngodad nga fadad meewar. Ya re prist rodad nem nib th’abi tolang e yib ngak urngin kanawoen e pi n’en ni ma waliy e girdi’ nge denen ni bod gadad, machane de denen.” Ma aram me pi’ Paul e athamgil nga laniyan’ e piin ni ke michan’rad ngak Jesus Kristus ni ngar sulod ngak Got u daken e re yaram ney me gaar ko verse 16: “Ere nge dab kud tamdaggad ngad bad nga tagil’ Got, ko gin ni bay e ayuw riy . . . min ayuwegdad ko ngiyal’ ndabi siy ni ngar ni ayuwegdad.”​—Heb. 4:14-16; 1 John 2:2.

Maku Jesus e be maruwel ni ir lolugen e ulung ko Kristiano. Taareb rogon pi gachalpen Jesus u nap’an e bin som’on e chibog ko ngiyal’ ney ma de t’uf rodad reb e pilung u fayleng. Ya be pow’iy Jesus e girdi’ rok u daken e kan ni thothup, Thin nib Thothup, nge piin ni yad bod en ni ma gafaliy e saf, ni thingar ra fulweged ngak nge Chitamangin u tharmiy nga rogon e maruwel ni ur ted ngak e ulung i saf rok Got. (Heb. 13:17; 1 Pet. 5:2, 3) I weliy Jehovah u murung’agen Jesus ni gaar: “Gu gagiyegnag nge yog e thin me tay murung’agen e pi nam, mu daken e gu dag ngorad riy feni sorog.” (Isa. 55:4) I dag Jesus ni ke lebug e pi thin nem u daken ko ngiyal’ ni yog e pi thin ney ngak pi gachalpen: Dab ni “pining e ‘Tayog e thin’ ngomed, ya taabe’ e ba’ ni ir e be yog e thin romed, ni aram fare Messiah.”​—Matt. 23:10.

I tamilangnag Jesus e tafinay rok ni baadag ni nge ayuwegdad ko ngiyal’ ni yog e pi thin ney: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog, ya gub munguy ma gub sobut’an’; mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matt. 11:28-30) I micheg Jesus Kristus ni ir “faanem nib fel’ rogon ni ma gafaliy e saf” ni bod rogon Chitamangin nu tharmiy, Jehovah Got, ya i ayuweg e ulung ko Kristiano u fithik’ e gum’an’ me pi’ e toffan ngorad.​—John 10:11; Isa. 40:11.

U lan e bin som’on e babyor ni yoloy Paul ngak e ulung u Korinth, mi weliy yugu reb e maruwel nib m’ag ko liw rok Kristus ko pi thin ni baaray: “Yi Kristus e thingari mang ir e i gagiyeg nge yan i mada’ ko ngiyal’ ni ke gel Got ngak urngin e pi toogor me ta’rad nga tan e rifrif u ay. Ma ngiyal’ ni yira tay urngin ban’en riy nga tan pa’ Kristus ni ir e nge gagiyegnag, ma aram e ir, ni ir e Fak Got, e bayi ta’ ir nga tan pa’ Got ni ke ta’ urngin ban’en nga tan pa’ Kristus; ma aram e Got e bay i gagiyegnag urngin ban’en.” (1 Kor. 15:25, 28) U m’on ni yib Jesus nga fayleng ma i par u tharmiy ni ir “be’ nib salap i muruwliy ban’en,” ni ir fa bin som’on e n’en ni i sunumeg Got. (Prov. 8:22-31) Nap’an e ngiyal’ ni l’og Got Jesus nga fayleng, ma i rin’ e tin nib m’agan’ Got ngay u gubin ngiyal’. I k’adan’ ko skeng ni th’abi gel me yim’ ni ir ba yul’yul’ ngak Chitamangin. (John 4:34; 15:10) Bochan ni i par Jesus nib yul’yul’ ku Got me pi’ e yafos rok, ma aram me yib e flaab ngak. I Got e faseg Jesus ko yam’ me pi’ mat’awun ni nge mang Pilung ko Gil’ilungun Got u tharmiy. (Acts 2:32-36) Bochan ir e Pilung ko Gil’ilungun Got, me ere pi’ Got e maruwel ngak ni nge pow’iy bokum miriay e kan nib gel ngar chuweged e gagiyeg ko girdi’ u fayleng mar thang gubin ban’en nib kireb riy. (Prov. 2:21, 22; 2 Thess. 1:6-9; Rev. 19:11-21; 20:1-3) Ma aram Gil’ilungun Got nu tharmiy u tan pa’ Kristus e ra par ni go’ ir ni be gagiyegnag e fayleng nib polo’.​—Rev. 11:15.

NGAN NANG FAN E LIW ROK

Jesus Kristus, ni ir fa en ni ngan folwok rok, e ir ba fl’ont. Kan pi’ e maruwel ngak ni nge ayuwegdad. Ke pi’ Got e maruwel ngak Kristus ni nge mang Tayog e Thin ko girdi’ rok Got e ngiyal’ ney. Ere, ngan nang fan e liw rok Kristus ko tin ni yarmiy Got e be yip’ fan ni nguuda pired ni gad ba yul’yul’ ku Jehovah ma nguuda folgad ko ulung rok ni be m’onog iyan.

Pi gachalpen Jesus ko fa bin som’on e chibog e ur nanged fan e liw rok Kristus ko tin ni yarmiy Got. Ya ur maruwelgad u taabang u tan e gagiyeg rok Kristus, mar folgad ko pi n’en ni i yog ngorad u daken e kan ni thothup nge Thin ko Bible. (Acts 15:12-21; Rev. 1:1) I weliy apostal Paul u murung’agen e ulung rok Kristus ni ur maruwelgad u taabang ni ke gaar: “Machane ra ud weliyed e tin nib riyul’ u fithik’ e t’ufeg, ma gadad ra ilal u gubin e kanawo’ ngad boded mam’ungun Kristus, ni ir e llug. Urngin yang ko re dowef nem ma ke peth nga taabang nrogon ni ke gagiyegnag, ma re dowef nem e be par nib chayem ni urngin e ul’ul ni kan ta’ ngay e ir e be kol. Ere faanra bayang me maruwel nrogon ni nge maruwel, ma aram mi i ilal fare dowef ma be ga’nag ir i yan u daken e t’ufeg.”​—Efe. 4:15, 16.

Bod rogon downgin e girdi’, ma fare ulung ni bay girdien fachi ulung nge “yugu boch e saf” riy e bay boor mit i bayang riy. Faan ra reb bayang e ulung e ra maruwel u taabang ngar folgad ko gagiyeg rok Kristus, ma aram ma ra yib angin riy nge ga’ iyan ma gad ra yan u daken e t’ufeg, “ni ir e ma chugumiy urngin ban’en nga taabang nge par ni ke fel’ rogon.”​—John 10:16; Kol. 3:14; 1 Kor. 12:14-26.

Tin ni ke buch u fayleng iyan e be micheg ndariy e maruwar riy ni ke lebug e thin ko profet nu Bible ni kan pi’ mat’awun ngak Jesus Kristus nge mang pilung ko Gil’ilungun Got ni ka nap’an 1914. Chiney ma be gagiyeg u fithik’ e pi toogor rok. (Ps. 2:1-12; 110:1, 2) Mang e be yip’ fan e re n’ey ko girdi’ ni yad ba fas u fayleng e ngiyal’ ney? Ra dag Jesus gelngin e Pilung ko pi pilung nge Somol ko pi somol ngak e pi toogor rok ko ngiyal’ ni nge gechignagrad. (Rev. 11:15; 12:10; 19:16) Dabi n’uw nap’an ma ra lebug e n’en ni i micheg Jehovah ko ngiyal’ ni i togopuluw e girdi’ ngak, ya ra thap e girdi’ ni yad bay u pa’ ni ba’ ni mat’aw ngak. (Rom. 16:20) Rib gel e falfalan’ rodad ya ke tamilang fan e liw rok Kristus ko tin ni yarmiy Got u wan’dad ma gad be maruwel u taabang ngad machibnaged fare thin nib fel’ u fayleng iyan u tan’ e gagiyeg rok Kristus u nap’an e tin tomren e rran ney!