Babyor ni Ke Yib ko Fare Ulung ni Ma Pow’iyey

Ngak e En nib T’uf Jehovah Rok:

I gaar Jesus: “Bay mu nanged e tin riyul’, ma tin riyul’ e ir e bayi ayuwegmed nge dab kum pired ni gimed e sib.” (John 8:32) Pi thin ney e rra pi’ e athamgil nga lanin’uy! Arrogon, rayog ni ngam nang e tin riyul’ ni yugu aram rogon ni gad be par ko “tin tomren e rran” ni ke gel e sasalap ko girdi’. (2 Timothy 3:1) Ka ga manang e ngiyal’ ni baaram nim nang e tin riyul’ ni be weliy e Bible? Aram ban’en nrib fel’!

Machane, yugu aram rogon nib ga’ fan ni ngad nanged e tin riyul’ ma gad be weliy murung’agen ko girdi’ ni gubin ngiyal’, maku thingar da folgad riy. Ra ngad rin’ed ni aram rogon, mab t’uf ni ngad pared ni gad ba t’uf rok Got. Mang e ba muun ko re n’ey? Thin ni yog Jesus ko fare nep’ u m’on ni yim’ e be pi’ e fulweg ko re deer ney. I yog ngak e pi apostal rok ni yad ba yul’yul’ ni gaar: “Faan gimed ra fol ko tin ni kug ning chilen ngomed, ma gimed ra par ni gimed ba t’uf rog, ni bod rogon ni kug fol ko tin ni ning e Chitamag chilen ngog gu be par ni ku gub t’uf rok.”​—John 15:10.

Mu tay fanam i yan riy ni i par Jesus nib t’uf rok Got ni bochan e i fol ko pi motochiyel rok. Ere ku er rogodad e ngiyal’ ney. Ra ngad pared ni gad ba t’uf rok Got, mab t’uf ni ngaud folgad ko tin riyul’ ni kad filed. Ku re nep’ nem, me yog Jesus ni gaar: “Re bugithin ney nib riyul’ e kam nanged e chiney, faan gimed ra maruwel ngay ma ra um pired ni gimed ba felfelan’!”​—John 13:17.

Ri gamad be athapeg nra ayuwegem e re ke babyor ney ni ngam ulul ngaum fol ko tin riyul’ ni kam fil mu um par ni ‘gab t’uf rok Got ma ga be sonnag e . . . yafos ndariy n’umngin nap’an.’​—Jude 21.